Ɛzra 6:1-22
6 Na de Kiŋ Darayɔs gi ɔda lɛ dɛn chɛk, ɛn dɛn chɛk usay dɛn kin kip di istri buk dɛn ɛn di valyu tin dɛn na Babilɔn.
2 Ɛn dɛn fɛn wan skrol na wan ples we dɛn de rili protɛkt na Ɛkbatana, na di prɔvins na Midia, ɛn na dis mɛsej bin rayt insay de:
3 “Insay di fɔs ia we Kiŋ Sayrɔs de rul, Kiŋ Sayrɔs gi ɔda we gɛt fɔ du wit Gɔd in os na Jerusɛlɛm. I se: ‘Lɛ dɛn bil di os bak so dat dɛn go ebul fɔ mek sakrifays dɛn de, ɛn lɛ dɛn le in fawndeshɔn dɛn; i fɔ bi 60 kyubit* ay, ɛn 60 kyubit wayd,
4 wit tri leya big big ston dɛn we dɛn fɔ rol fɔ put na dɛn ples dɛn ɛn wan leya bod dɛn; ɛn lɛ dɛn tek mɔni na di kiŋ in os fɔ du dat.
5 Ɛn di gold ɛn silva kɔntena dɛn na Gɔd in os we Nɛbyukadnɛza bin tek na di tɛmpul na Jerusɛlɛm ɛn briŋ am kam na Babilɔn, lɛ dɛn kɛr dɛn go bak, so dat dɛn go put dɛn na dɛn ples na Gɔd in os we de na Jerusɛlɛm.’
6 “So yu Tatenay, di gɔvnɔ na di eria Biɛn di Riva, Shita-bɔzinay, ɛn yu kɔmpin dɛn, di dɛpiti gɔvnɔ dɛn na di eria Biɛn di Riva—una nɔ go na da ples de.
7 Una nɔ ambɔg di wok we dɛn de du na Gɔd in os. Di gɔvnɔ fɔ di Ju dɛn ɛn di bigman dɛn fɔ di Ju dɛn go bil Gɔd in os bak na di say we i bin de.
8 Apat frɔm dat, a de gi una ɔda bɔt wetin una fɔ du fɔ dɛn bigman ya fɔ di Ju dɛn we de bil Gɔd in os bak: Ɔl wetin dɛn de spɛn fɔ kɔmɔt frɔm di say we dɛn de kip di kiŋ in valyu tin dɛn, frɔm di taks we una de gɛda na di eria Biɛn di Riva; una fɔ gi dɛn kwik kwik wan so dat di wok nɔ go stɔp.
9 Ɛn ɛnitin we dɛn nid—yɔŋ man kaw dɛn, man ship dɛn, yɔŋ ship dɛn fɔ bɔn sakrifays to di Gɔd we de rul na ɛvin, wit,* sɔl, wayn, ɛn ɔyl, jɔs lɛk aw di prist dɛn we de na Jerusɛlɛm se—una fɔ mek shɔ se una kɔntinyu fɔ gi dɛn dɛn tin ya ɛnide,
10 so dat dɛn go kɔntinyu fɔ mek sakrifays dɛn we go mek di Gɔd we de rul na ɛvin gladi ɛn pre fɔ mek di kiŋ ɛn in bɔypikin dɛn gɛt wɛlbɔdi.
11 Ɛn a dɔn gi ɔda se if ɛnibɔdi nɔ du wetin a se, dɛn go pul bod na in os, dɛn go es am ɔp ɛn fasin am pan di bod, ɛn in os go tɔn to pɔblik latrin* fɔ we i nɔ du wetin a se.
12 Ɛn mek di Gɔd we dɔn mek in nem de na da ples de dɔnawe wit ɛni kiŋ ɛn pipul dɛn we go tray fɔ go agens wetin a dɔn se ɛn pwɛl Gɔd in os we de na Jerusɛlɛm. Na mi, Darayɔs, dɔn gi dis ɔda ɛn una du am wantɛm wantɛm.”
13 Na de Tatenay di gɔvnɔ fɔ di eria Biɛn di Riva, Shita-bɔzinay, ɛn dɛn kɔmpin dɛn du ɔl wetin Kiŋ Darayɔs dɔn se wantɛm wantɛm.
14 Dɔn di bigman dɛn fɔ di Ju dɛn kɔntinyu fɔ bil ɛn kɔntinyu fɔ go bifo pan di bildin wok, ɛn di tin dɛn we Egay di prɔfɛt ɛn Zakaraya we na Ido in granpikin bin de prɔfɛsay bin de ɛnkɔrej dɛn; ɛn dɛn dɔn di bildin wok bikɔs ɔf di ɔda we di Gɔd na Izrɛl gi ɛn di ɔda we Sayrɔs ɛn Darayɔs ɛn Kiŋ Atazaksis na Pashia gi.
15 Dɛn dɔn fɔ bil di os di tɔd de insay di mɔnt we nem Eda,* insay di ia we mek siks we Kiŋ Darayɔs de rul.
16 Dɔn di Izrɛlayt dɛn, di prist dɛn, di Livayt dɛn, ɛn di balans wan dɛn we kɔmɔt na Babilɔn dɛdiket Gɔd in os wit gladi-at.
17 Fɔ dɛdiket Gɔd in os, dɛn sakrifays 100 man kaw dɛn, 200 man ship dɛn, 400 yɔŋ ship dɛn, ɛn fɔ sin ɔfrin fɔ ɔlman na Izrɛl, dɛn sakrifays 12 man got dɛn, we ikwal to di trayb dɛn na Izrɛl.
18 Ɛn dɛn ɔganayz di prist dɛn ɛn di Livayt dɛn bay dɛn grup fɔ wok fɔ Gɔd na Jerusɛlɛm, akɔdin to wetin rayt na Mozis in buk.
19 Ɛn di wan dɛn we kɔmɔt na Babilɔn du di Pasova di de we mek 14 na di fɔs mɔnt.
20 Ɔl di prist ɛn di Livayt dɛn bin dɔn klin dɛnsɛf, so dɛn ɔl bin klin; dɛn kil di animal dɛn fɔ di Pasova sakrifays fɔ ɔl di wan dɛn we kɔmɔt na Babilɔn, fɔ dɛn kɔmpin prist dɛn, ɛn fɔ dɛnsɛf.
21 Dɔn di Izrɛlayt dɛn we kɔmɔt Babilɔn it am, wit ɔl di wan dɛn we dɔn jɔyn dɛn fɔ wɔship* Jiova di Gɔd na Izrɛl ɛn we dɔn pul an pan di dɔti tin dɛn we di neshɔn dɛn na di land de du.
22 Dɔn dɛn mek di Bred we Nɔ Gɛt Yist Fɛstival fɔ sɛvin dez wit gladi-at, bikɔs Jiova mek dɛn gladi ɛn i bin dɔn mek di kiŋ na Asiria lɛk dɛn, so i sɔpɔt dɛn pan di wok we dɛn bin de du na di tru Gɔd in os, di Gɔd na Izrɛl.
Futnot Dɛn
^ Na lɛk 26.7 mita (87.6 fit). Luk Apɛndiks B14.
^ Wit na tin we pipul dɛn de it.
^ Ɔ i kin bi, “dɔtibɔks; say we dɛn de trowe animal tɔylɛt.”
^ Luk Apɛndiks B15.
^ Insay Ibru, “luk fɔ.”
