Ɛzra 1:1-11
1 Insay di fɔs ia we Kiŋ Sayrɔs na Pashia de rul as kiŋ, Jiova mek Kiŋ Sayrɔs na Pashia mek wan anawnsmɛnt ɔlsay na in kiŋdɔm, so dat wetin Jiova bin yuz Jɛrimaya fɔ tɔk go kam tru. Kiŋ Sayrɔs mek dɛn rayt am. I se:
2 “Na dis Kiŋ Sayrɔs na Pashia se, ‘Jiova di Gɔd we de rul na ɛvin dɔn gi mi ɔl di kiŋdɔm dɛn na di wɔl, ɛn i dɔn gi mi di wok fɔ bil os fɔ am na Jerusɛlɛm we de na Juda.
3 Ɛniwan pan una we na in pipul dɛn, lɛ in Gɔd de wit am, ɛn lɛ i go ɔp na Jerusɛlɛm, we de na Juda, ɛn bil Jiova, we na di Gɔd na Izrɛl ɛn we na di tru Gɔd, in os bak, dat na, in os we bin de na Jerusɛlɛm.*
4 Ɛnibɔdi we na fɔrina, ilɛk usay i de, lɛ in neba dɛn* ɛp am bay we dɛn gi am silva, gold, prɔpati dɛn, animal dɛn, ɛn ɔfrin dɛn we dɛn dɔn mek-ɔp dɛn maynd fɔ gi fɔ di tru Gɔd in os we bin de na Jerusɛlɛm.’”
5 Dɔn ɔl di wan dɛn we de bifo na dɛn papa say na Juda ɛn Bɛnjamin ɛn di prist dɛn ɛn di Livayt dɛn—ɔl di wan dɛn we Gɔd tɔch dɛn at—pripia fɔ go bil Jiova in os bak we bin de na Jerusɛlɛm.
6 Ɛn ɔl di wan dɛn we de rawnd dɛn bin sɔpɔt dɛn bay we dɛn gi dɛn tin dɛn we dɛn mek wit silva ɛn gold, prɔpati dɛn, animal dɛn, ɛn tin dɛn we gɛt valyu, apat frɔm ɔl di sakrifays dɛn we dɛn dɔn mek-ɔp dɛn maynd fɔ gi.
7 Dɔn Kiŋ Sayrɔs se mek dɛn gi dɛn di tin dɛn we bin de na Jiova in os we Nɛbyukadnɛza bin tek na Jerusɛlɛm ɛn put dɛn na in yon gɔd in os.
8 Kiŋ Sayrɔs na Pashia mek Mitridat, we de kip di valyu tin dɛn, briŋ dɛn kam ɛn kɔnt dɛn ɛn rayt dɛn fɔ Shɛshbaza* we na chif fɔ Juda.
9 Dis na di tin dɛn we i bin kɔnt ɛn rayt: 30 gold kɔntena dɛn we gɛt baskɛt shep, 1,000 silva kɔntena dɛn we gɛt baskɛt shep, 29 ɔda kɔntena dɛn,
10 30 smɔl bol dɛn we dɛn mek wit gold, 410 smɔl bol dɛn we dɛn mek wit silva, ɛn 1,000 ɔda tin dɛn.
11 Ɔl di tin dɛn we dɛn mek wit gold ɛn silva na bin 5,400. Shɛshbaza bin kɛr go ɔl dɛn tin ya we di wan dɛn we dɛn kapchɔ bin de kɔmɔt na Babilɔn fɔ go na Jerusɛlɛm.
Futnot Dɛn
^ Ɔ i kin bi, “dat na, di Gɔd we de na Jerusɛlɛm.”
^ Insay Ibru, “lɛ di pipul dɛn we de na di say we i de.”
