BI qasî 350-î salan, dem bi ser Tofana Nûh re bihûrî bû. Birahîm (ku wekî Îbrahîm jî tê nasîn) pêxamber li bajarê Ûrê, yê ku li axên Iraqa îroyîn di aştiyê de bû, jiyana xwe didomand. Birahîm di warê baweriyê de, miroveke berbiçav bû. Lê dîsa jî, wê çaxê bo vê baweriyê, ceribandinek li benda wî bû.

Yahowa Xweda ji Birahîm re got, ji welatê xwe derkeve, koçî welateke biyan bike; paşê dihat fêmkirin ku ew welat wê welatê Kenan bibûya. Birahîm di heman gavê de ev yek qebûl kir. Ew tevî hevsera xwe Sara, biraziyê xwe yê bi navê Lût û tevahiya maliyên xwe birê ket. Wî piştî ku rêwîtiyeke dirêj domand, gihîşt welatê Kenanê û li wir dest bi jiyana di bin konan de kir. Yahowa Xweda bi Birahîm re peymanek girê da û ev soz da wî: Dûndana Birahîm wê bibûya neteweyeke mezin; tevahiya malbatên li ser rûyê erdê wê bi navgîniya wî bereket bistandana û welatê Kenanê jî, bi milkî ji dûndana wî re bihata dayîn.

Birahîm û Lût bûn xwediyê gelek keriyên mezin ên pez, bizin û hin ajalên din, bi vî awayî ew bûn mirovên dewlemend. Birahîm çikotî nekir û ji Lût re derfeta bijartina herêma ku dixwaze lê bijî, da. Lût dehla berdar a li herêma Urdunê ji xwe re hilbijart û li nêzîkî bajarê Sodomê cîhwar bû. Lê xelkê Sodomî di warê sincîtiyê de, pirr xerab bû û li dijî Yahowa Xweda gunehên mezin dikir.

Paşê Yahowa Xweda ji Birahîm re soza, ku dûndana wî wê mîna stêrên ezmanan zêde bibe, da. Birahîm bi vê sozê bawerî anî. Lê hevsera wî Saraya hezkirî, stewr bû. Gava temena Sarayê nêzîkî 90-î bû, Xweda ji Birahîmê, ku bi xwe jî wê çaxê 99 salî bû re, ragihand ku wê zarokek ji wan re bibûya. Wek ku Xweda gotibû Sarayê Îshaq anî cîhanê. Hin zarokên din jî ji Birahîm re bûn, lê Rizgarkarê ku li Adenê hatibû Sozdayîn, wê ji dûndana Îshaq bihata.

Wê demê Lût û malbata xwe li Sodomê dijiyan, lê Lûtê ku miroveke rast bû, bi xwe ne mîna xelkê ku li vî bajarî jiyaneke bêsincî didomand, bû. Lewre gava Yahowa Xweda biryara xerakirina bajarê Sodomê da, derbarê nêzîkbûyîna vê hilweşînê de, pêşî bi navgîniya milyaketên ku şandibûn, Lût hişyar kir. Milyaketan Lût û malbata wî hişyar kirin, da ku ew bêyî li paş xwe binêrin ji bajarê Sodomê birevin. Xweda paşê bi ser bajarê Sodomê û Gomoraya xerab a ku cîranê wan bû de, agir û kewkûrt barand û bi vî awayî yên ku li wir dijîn, tûne kirin. Lût û herdu keçên wî rizgar bûn. Lê hevsera Lût jî bi îhtimaleke mezin, bi hesreta tiştên ku li wir hiştibûn, li paş xwe mêze kir. Wê berdêla vê guhnedanê bi jiyana xwe da.

Ji 1. Mûsa 11:10 heta 19:38.