Çavkaniya mizgînê, Yehowa ye. Ew “Xwedayê dilşad” e, û ew dixwaze ku hemû malbat jî dilşad bin (1. Tîmotêyos 1:11, WDN). Zewaca pêşîn ji aliyê Xwedê ve hatibû saz kirin. Zewaca resmî muhîm e ku malbat hem ji bo dê û bav hem jî ji bo zarokan bibe warekî bihizûr. Ji ber vê yekê, lazim e ku zewac li gor qanûnên dewletê bê qeyd kirin.​—Lûqa 2:1, 4, 5 bixwîne.

Xwedê li zewacê çawa dinêre? Xwedê dixwaze ku zewac daîm be û ku jin û mêr ji hev re dilsoz bimînin (Îbranî 13:4). Yehowa ji hevberdanê nefret dike (Maleyaxî 2:16). Lê belê eger jin an mêr zîna bike, kesê bêsûc dikare kesê ku zîna kiriye berde û bi yekî din re bizewice.​—Metta 19:3-6, 9 bixwîne.

Yehowa dixwaze ku jin û mêr piştgiriya hev bikin (1. Mûsa 2:18). Li gor Kitêba Pîroz, mêr serê malbatê ye. Loma gerek ew malbata xwe ji aliyê madî û manewî ve xwedî bike. Mêr gerek ji jina xwe ji dil hez bike. Wekî din, gerek her du jî ji hev hez bikin û qedrê hev bigirin. Ji ber ku hemû jin û mêr şaşiyan dikin, ji bo hizûra malbatê lazim e ku ew hevdû efû bikin.​—Efesî 4:31, 32; 5:22-25, 33; 1. Petrûs 3:7 bixwîne.

Eger di zewacê de problem hebe, gerek jin û mêr xîret bikin ku problemên xwe bi hezkirinê hel bikin (1. Korîntî 13:4, 5). Ji bo helkirina problemên zewacê, Kitêba Pîroz hevberdanê tewsiye nake.​—1. Korîntî 7:10-13 bixwîne.

Yehowa dixwaze ku hûn dilşad bin. Eger hûn bi gotinên wî bikin, ciwantiya we wê xweş derbas bibe. Wekî din, Yehowa dixwaze ku hûn ji hîkmet û tecrûbeya dê û bavê xwe feyde bibînin (Kolosî 3:20). Ji xeynî vê, Xwedê dixwaze ku hûn guh bidin wî û Îsa Mesîh. Bi vî awayî, hûnê dilxweş bibin.​—Waiz 11:9-12:1; Metta 19:13-15; 21:15, 16 bixwîne.

Gerek hûn ji bo hewcedariyên zarokên xwe bi xîret bixebitin (1. Tîmotêyos 5:8). Ji xeynî vê, eger hûn dixwazin ku zarokên we dilşad bin, gerek hûn alîkariya wan bikin ku ew ji Xwedê hez bikin û gotinên Kitêba Pîroz hîn bibin (Efesî 6:4). Lazim e ku zarokên we bibînin ku hûn ji Xwedê çi qas hez dikin. Eger hûn zarokên xwe li gor Kitêba Pîroz hîn bikin, ev yek dikare li ser fikrên wan baş tesîr bike.​—5. Mûsa 6:4-7; Methelokên Silêman 22:6 bixwîne.

We baş be ku hûn cesaretê bidin zarokên xwe û pesnê wan bidin. Wekî din, şîret û rastkirin jî ji wan re lazim in. Terbiye wê wan biparêze ku ew ji rê dernekevin û dilşadiya xwe winda nekin (Methelokên Silêman 22:15). Lê belê, terbiye gerek bi sertî û zordarî neyê dayîn.​—Kolosî 3:21 bixwîne.

Hin kitêbên Şahidên Yehowa bi xusûsî ji bo dê û bavan û ji bo zarokan hatine hazir kirin. Temela van kitêban, Kitêba Pîroz e.​—Zebûr 19:7, 11 bixwîne.