Иса Рʹува Йәки Чаԝа бу?
Щаба Кʹьтеба Пироз
Тʹӧ кәс сәд сәләфи ньзанә Иса рʹува йәки чаԝа бу, чьмки Кʹьтеба Пирозда дәрһәԛа ԝе йәке найе готьне. Демәк әԝ йәк фәрз нинә. Ле диса жи жь Кʹьтеба Пироз әм дькарьн дәрһәԛа ԝе йәке һьнә тьшт пебьһʹәсьн.
Чʹьв-чʹине ԝи: Иса Щьһу бу у дьԛәԝьмә жь дийа ԝи чʹьв-чʹине Ибранийа дәрбази ԝи бьбун (Ибрани 7:14). Ча те кʹьфше рʹуйе ԝи мәхсус нибу. Һәрге ӧса нибуйа, әԝи ԝе нькарьбуйа дьзива жь Щәлиле һʹәта Оршәлиме бьчуйа (Йуһʹәнна 7:10, 11). Ӧса жи әʹйан ә кӧ әԝ рʹува жь шагьртед хԝә щӧдә нәдьбу, чаԝа йәки мәхсус. Биньн бира хԝә әԝе дәрәще, чахе Щьһуда әскәрарʹа нишан да, кӧ Иса кʹижан ә (Мәтта 26:47-49).
Дьрежайа пʹорʹе ԝи: Кʹьтеба Пирозда те готьне: «Пʹорʹе дьреж рʹәԝша мер давежә», ләма жи пʹорʹе Иса ԝе дьреж нибуйа (1 Корьнтʹи 11:14).
Рʹийе ԝи: Рʹийе Иса һәбу. Әԝи дьани сери әв йәк, чь кӧ ԛануна Щьһуйа дәʹԝа дькьр, демәк ԝәки мер «сәре рʹудана хԝә нәбьрʹә» (Ԛануна Кʹаһинтийе 19:27; Галати 4:4). Ӧса жи пʹехәмбәртийа дәрһәԛа щәфед Иса дьда кʹьфше, ԝәки ԝе рʹийе ԝи һәбә (Ишайа 50:6).
Бәжн-бал: Һьлбәт Иса алийе физикида йәки гәләк ԛәԝи бу. Әԝи ԝәʹде хьзмәтийа хԝә гәләк рʹеԝити дькьр (Мәтта 9:35). Әԝи дӧ щара пʹарьстгәһа Щьһуйа тʹәмьз кьр, кӧ тʹәхте базьргана ԝәлдьгәрʹанд у щарәке пе ԛамчи пәз у дәԝаре ԝан жь пʹарьстгәһе дәрхьст (Луԛа 19:45, 46; Йуһʹәнна 2:14, 15). Кʹьтебәкеда «McClintock and Strong’s Cyclopedia» ӧса те готьне: «Жь чар кʹьтебед Мьзгинийе те кʹьфше, ԝәки [Иса] йәки сьһʹәт-ԛәԝат бу» (Дәрхьстьна IV, рʹупʹела 884).
Бәшәра ԝи: Иса йәки дьлгәрм у дьлшәԝат бу, бешьк әԝ йәк жь бәшәра ԝи жи дьһатә кʹьфше (Мәтта 11:28, 29). Һʹәму щурʹә мәрьв дьчунә бал ԝи, кӧ жь ԝи бәрдьли у аликʹарийе бьстиньн (Луԛа 5:12, 13; 7:37, 38). Һәла һе зарʹа жи хԝә бал ԝи рʹьһʹәт тʹәхмин дькьр ьн (Мәтта 19:13-15; Марԛос 9:35-37).
Ньһерʹандьна нәрʹаст кӧ Иса рʹува йәки чаԝа бу
Ньһерʹандьна нәрʹаст: Жь бо ԝе йәке кӧ кʹьтеба Әʹйантида пʹорʹе Иса бәрамбәри һьрийе дьбә у ньге ԝи жи бәрамбәри «сьфьре» хас, һьнәк дьфькьрьн, ԝәки Иса әʹсле хԝәда жь Африкайе бу (Әʹйанти 1:14, 15).
Избати: Кʹьтеба Әʹйанти бь симбола ньвисар ә (Әʹйанти 1:1). Пʹорʹе Иса кӧ мина һьрийе йә у ньгед ԝи мина сьфьре хас ьн, бь симболик дьдьнә кʹьфше һʹӧнӧред Иса паши сахкьрьна ԝи жь мьрьне. Ле әԝ йәк надә кʹьфше, кӧ әԝ рʹува йәки чаԝа бу гава сәр әʹрде бу. Әʹйанти 1:14-да кӧ те готьне: «Пʹорʹе сәре ԝи мина һьрийа ԛәрԛаш у мина бәрфе сьпи бу», дина мә дьдә нә кӧ сәр щурʹе пʹорʹ, ле сәр рʹәнг. Рʹәнге сьпи симбола биланийе йә, кӧ чьԛас салед әʹмьр зедә дьбьн, билани жи һе зедә дьбә (Әʹйанти 3:14). Ве рʹезеда пʹорʹе Иса нә кӧ тʹәне бәрамбәри һьрийе дьбә, ле ӧса жи бәрамбәри бәрфе.
Ньгед Иса бәрамбәри «сьфьре хаси жь кʹура агьр дәрхьсти» дьбьн (Әʹйанти 1:15). Ӧса жи рʹуйе ԝи «мина рʹойе бу кӧ тʹәмамийа ԛәԝата хԝәва шәԝԛ» дьда (Әʹйанти 1:16). Тʹу мьләтәки ӧса тʹӧнәйә кӧ рʹәнге чʹәрʹме ԝан ԝи щурʹәйи бә, ләма жи әԝ йәк бь симболик дьдә кʹьфше кӧ Исайе сахкьри «нава рʹонайийеда йә» (1 Тимотʹейо 6:16).
Ньһерʹандьна нәрʹаст: Иса йәки сьст у бәләнгаз бу.
Избати: Иса мерәки ԛәԝи у зор бу. Мәсәлә чахе әскәр һатьн кӧ ԝи бьгьрьн, әԝ бь мерхаси бәр ԝан сәкьни (Йуһʹәнна 18:4-8). Иса ӧса жи дьԛәԝьмә физикида ԛәԝи бу, чьмки әԝ нәщар бу у бь һащәтед нәщарийе, йед дәста, дьхәбьти (Марԛос 6:3).
Ле чьма Исарʹа аликʹари лазьм бу, гава әԝи стуна хԝәйә щәфе дьбьр? У чьма әԝ жь дӧ ԛачаха зутьр мьр? (Луԛа 23:26; Йуһʹәнна 19:31-33) Әԝ щерʹьбандьнед кӧ пешийа мьрьне рʹасти Иса һатьн, гәләк ԛәԝат жь ԝи стандьн. Әԝ тʹәмамийа шәве жь бо һʹале хԝәйи гьран рʹанәза (Луԛа 22:42-44). Ԝе шәве Щьһуйа ԛәрфе хԝә ԝи дькьрьн, ле сьбәтьре Рʹомайа ԝи гәләк дьчәрчьрандьн (Мәтта 26:67, 68; Йуһʹәнна 19:1-3). Әван һʹәму тьшта мьрьна ԝи ләз хьстьн.
Ньһерʹандьна нәрʹаст: Иса тʹьме мәʹдәкьри у мьталада бу.
Избати: Иса пʹьрʹ баш хәйсәт-һʹӧнӧред Баве хԝәйи әʹзмани, Йаһоԝа, кʹижан кӧ Кʹьтеба Пирозда те навкьрьне «Хԝәдейе хԝәзьли», әʹйан дькьр (1 Тимотʹейо 1:11; Йуһʹәнна 14:9). Хенщи ԝе йәке, Иса мәрьвед дьн жи һин дькьр, кӧ чь бькьн ԝәки бәхтәԝар бьн (Мәтта 5:3-9; Луԛа 11:28). Әв избати нишан дькьн, ԝәки бәшәра Иса тʹьме хԝәш у ша бу.
Дьбәкә Wәрʹа Һʹәwас бә
ҺИНКЬРЬНЕД КʹЬТЕБА ПИРОЗӘ СӘРӘКӘ
Ча Әм Дькарьн Баԝәр Бькьн, кӧ Кʹьтеба Пироз жь Хԝәде йә?
Һәрге Ньвискʹаре әʹсли йе Кʹьтеба Пироз демәк Автор Хԝәде йә, әԝ гәрәке жь кʹьтебед дьнена щӧдә бә.
ДӘРҺӘԚА МӘ
Һун Дьхԝазьн ԝәки Сәрледана Ԝә Бькьн?
Шеԝьр кә пьрсәкә жь Кʹьтеба Пироз йан жи дәрһәԛа Шәʹдед Йаһоԝа һе зедә пебьһʹәсә.