Шәʹдед Йаһоԝа жь бо мәʹнийа религи тʹәвнәбуйина политики хԝәй дькьн, кʹижан кӧ сәр һʹиме һинкьрьнед Кʹьтеба Пироз ә. Әм һʹӧкӧме хԝә накьнә сәр сәрԝеред политики у бона бьжартьна партийед политики у мәрьвед дьн, дәнге хԝә надьн. Әм хԝәха жи ԛӧльхе политики ԛәбул накьн у тʹӧ тьшти накьн, ԝәки сәрԝерәки жь ԛӧльхе ԝи дәрхьн. У әв сафикьрьна мә, сәр һʹиме һинкьрьна Кʹьтеба Пироз ә.

•   Әм чʹәʹв дьдьнә Иса Мәсиһ, кʹижан кӧ инкʹар кьр тʹәхте политики ԝар бә (Йуһʹәнна 6:15). Әԝи шагьртед хԝә һин дькьр, кӧ «нә жь ве дьнйайе» бьн у зәлал ԝанрʹа шьровәкьр, ԝәки әԝана гәрәке шьхӧле политикида пьштгьрийа тʹӧ кәси нәкьн (Йуһʹәнна 17:14, 16; 18:36; Марԛос 12:13-17).

•   Әм Пʹадшатийа Хԝәдерʹа амьн ьн, дәрһәԛа кʹижани кӧ Иса гот: «Әв Мьзгинийа Пʹадшатийе ԝе ль нав тʹәмамийа дьнйайе бе даннасинкьрьне» (Мәтта 24:14). Ча пьштгьред Пʹадшатийа Хԝәде, мәрʹа шьхӧл һатийә дайине кӧ дәрһәԛа һатьна ԝи әʹлам кьн. Әм шьхӧле политикида тʹәвнәбуйине хԝәй дькьн, фьрԛи тʹӧнә әв шәһәре мәва гьреда йә, йан щики дьнва (2 Корьнтʹи 5:20; Әфәси 6:20).

•   Әв йәк кӧ әм тʹәвнәбуйине хԝәй дькьн, изьне дьдә мә бь азайи дәрһәԛа Пʹадшатийа Хԝәде һʹәму мәрийарʹа гьли кьн, у фьрԛи тʹӧнә ньһерʹандьна ԝан дәрһәԛа политики чь щурʹә йә. Әм һәр тьшти дькьн, кӧ пе гьли у кьред хԝә избат кьн, ԝәки әм итʹбарийа хԝә тʹәне Пʹадшатийа Хԝәде тиньн, кӧ әԝе һʹәму проблемед дьнйайе сафи кә (Зәбур 56:11).

•   Әм али политикида мьԛабьли һәв дәрнайен, ләма жи әм тʹәви бьратийа мәйә һʹәмдьнйайе йәктийеда ньн (Колоси 3:14; 1 Пәтрус 2:17). Ле религийед кӧ дькʹәвьнә нава политике, щӧдәбуне дькьнә нава әндәмед хԝә (1 Корьнтʹи 1:10).

 Ԛәдьргьртьн һьндава сәрԝера. Рʹаст ә әм накʹәвьнә нава шьхӧлед политики, ле әм ԝәлатед хԝәда ԛәдьре сәрԝера дьгьрьн. Әԝ йәк ль гора Кʹьтеба Пироз ә кʹидәреда те готьне: «Һәр мәрьвәк бьра гӧрʹа ԝан һʹӧкӧмәтийада бә, кӧ сәр ԝирʹа нә, чьмки тʹӧ һʹӧкӧмәти бейи дәстура Хԝәде тʹӧнә у әԝе кӧ һәнә жи, жь Хԝәдеда нә» (Рʹомайи 13:1). Әм гӧра ԛанунед дәԝләте дькьн, хәрща дьдьн у пьштгьрийа сәрԝера дькьн, гава әԝана бона бьнәлийед хԝә хәм дькьн. Әм накʹәвьнә нава тʹәвльһәвбунед политики, ле гӧра тʹәмийа Кʹьтеба Пироз дькьн, кʹидәреда те готьне «бона пʹадша у һʹәму сәрԝера» дӧа бькьн, илаһи гава әԝана сафикьрьнәкә ӧса дькьн, йа кӧ азабуна мә дькʹәвә (1 Тимотʹейо 2:1, 2).

 Әм ӧса жи ԛәдьре сафикьрьна мәрьва дьгьрьн, гава әԝана бьжартьна хԝәйә политикева гьредайи дькьн. Мәсәлә, гава бьжартьн дьбьн, әм мьԛабьли ве йәке тьштәки накьн у рʹийа ԝан мәрьва нагьрьн, кʹе кӧ дьхԝазьн ԝан бьжартьнада кʹар бькьн.

 Гәло әԝ сафикьрьна мә тьштәки тʹәзә йә? На. Ԛьрʹна йәкеда шанди у Мәсиһийед дьн жи сафикьрьнәкә ӧса кьрьбун, кӧ пьрсед политикива гьредайи бун. Кʹтәбәкеда дәрһәԛа Тʹәвнәбуйина Мәсиһийа те готьне: «Рʹаст ә Мәсиһийед пешьн хԝә мәщбур һʹәсаб дькьрьн, ԝәки ԛәдьре сәрԝера бьгьрьн, диса жи ль гора ньһерʹандьна ԝан изьна ԝан тʹӧнә бу бькʹәвьнә нава шьхӧле политики». Кʹьтебәкеда жи бь наве «Сәр рʹийа бәрбь сивилизасийайе» те готьне, кӧ Мәсиһийед пешьн нәдьбунә политик.

 Гәло әв ньһерʹандьна мә зьраре дьдә бехофийа мьләтийе? На. Әм мәрьвнә әʹдьлайиһʹьз ьн у мәʹни тʹӧнә кӧ дәԝләт жь мә бьтьрсә. Дина хԝә бьдьне, кӧ чь те готьне дәрһәԛа тʹәвнәбуйина мә, һәжмара сала 2001-да йа Академийа Мьләтийе, йа Украине: «Дьԛәԝьмә иро әв сафикьрьна Шәʹдед Йаһоԝа гәләка хԝәш найе. Әв мәʹнийа пешьн бу, кӧ чьрʹа әԝана бәре рʹасти пәйкʹәтьна һатьбун жь алийе Натсиста у рʹежима Комуниста». Ле Йәктийа Совйәтеда ԝәʹде пәйкʹәтьнед ӧса гьран, әԝана диса жи «ча бажарванед гӧһдар дьман, әԝана бь хирәт колхоз у кʹарханада дьхәбьтин у бона дәԝләте ԛә хоф нибун». Ве һәжмареда те готьне, кӧ сафикьрьн у кьред Шәʹдед Йаһоԝа, рʹожа иройин «тʹӧ зьрар надьнә тʹӧ ԝәлатәки».