ПАШИ Селава дьнйайе ԝәкә 350 сал дәрбаз бун. Бьраһим пʹехәмбәр бажаре пешдачуйи Урда дьжит, (йе кӧ сәр әʹрде Ираԛа иройин ә). Баԝәрийа Бьраһим ԛайим бу. Ле щарәке баԝәрийа ԝи һатә щерʹьбандьне.

Йаһоԝа Бьраһимрʹа гот, ԝәки әԝ жь ԝәлате хԝә дәркʹәвә у һәрʹә әʹрде нәнас, демәк әʹрде Кәнане. Бьраһим бе дӧдьлибуне гӧрʹа Хԝәде кьр. Әԝи жьна хԝә Сәра, у кӧрʹе бьре хԝә Лут у һʹәму нәфәред мала хԝә һьлда, кʹәтә рʹекә дьреж һʹәта кӧ бьгьһижә Кәнане. Ԝедәре әԝана чадьрада дьжитьн. Йаһоԝа пәйман тʹәви Бьраһим гьреда у соз да ԝи, кӧ жь ԝи щьмәʹтәкә мәзьн ԝе дәркʹәвә у бь сайа Бьраһим һʹәму малбәт ԝе бенә кʹәрәм кьрьне, у зӧрʹәтед ԝи жи бьбьнә хԝәйе әʹрде Кәнане.

Бьраһим у Лут дәԝләти бун, чьмки кәри у дәԝаред ԝан гәләк ль һәв зедә дьбун. Бьраһим бе тьмати готә Лут, ԝәки пешийе әԝ хԝәрʹа әʹрд бьжберә. Һьнге Лут һәрема Урдӧнейә бәрдарда әʹрд хԝәрʹа жьбарт, йе кӧ незики бажаре Содоме бу. Бьнәлийед ви бажари мәрьвнә бенамус бун, у пешбәри Йаһоԝа гәләк гӧнед гьран дькьрьн.

Ԝәʹдә шунда Йаһоԝа Хԝәде диса щарәке готә Бьраһим, кӧ зӧрʹәтед ԝи мина стәйркед әʹзмана ԝе зедә бьн. Бьраһим баԝәрийа хԝә ве йәке ани. Ԝәʹдә дәрбаз дьбу, ле Сәра жьна ԝийә һʹьзкьри бе зӧрʹәт бу. Чахе Бьраһим 99 сали бу, ле Сәра 90 сали, Хԝәде гот, ԝәки ԝе кӧрʹ ԝанрʹа бьбә. Хԝәде созе хԝә ани сери, у Сәрайерʹа кӧрʹ бу, наве ԝи данин Исһаԛ. Рʹаст ә зарʹед Бьраһимә дьн жи һәбун, ле Хьлазкʹаре создайи, дәрһәԛа кʹижани кӧ Еденеда пешда һатьбу готьне, гәрәке хут жь Исһаԛ бьһата.

Ԝи чахи Лут тʹәви малбәта хԝә Содомеда дьжит. Әԝ мәрики рʹаст бу у нәбу мина ԝан мәрьвед бенамус, йед кӧ Содомеда дьжитьн. Пешийа кʹӧтакьрьна Содоме, Йаһоԝа мәләк шандьн щәм Лут, ԝәки дәрһәԛа кʹӧтакьрьна ви шәһәри әʹлами ԝи кьн. Мәләка Лут у малбәта ԝи ләз хьстьн, ԝәки әԝана зускава жь Содоме дәркʹәвьн, у пьшт хԝә нәньһерʹьн. Паши ве йәке, Хԝәде агьр у кәвьред агьрпекʹәти, мина баране баранд сәр Содоме у ӧса жи сәр Гоморайа зӧлм, йе кӧ незики Содоме бу. Һʹәму бьнәлийед ԝанә хьраб у бенамус, ԛьрʹ бун. Лут у һәр дӧ ԛизед ԝи хьлаз бун, ле жьна ԝи пьшт хԝәва зьвьрʹи, чьмки әԝе һʹәйфа хԝә һәбуна хԝә ани. Бәле, жь бо нәгӧһдарикьрьне әԝе әʹмьре хԝә ӧнда кьр.

​—Сәр һʹиме кʹьтеба Дәстпебун 11:10-19:38.