1. Әм чьрʹа гәрәке ԛәдьре де у баве хԝә бьгьрьн?

 МӘРЬВӘКИ билан гьлийед ӧса гот: «Гӧрʹа баве хԝә бькә, кӧ тӧ же кʹәтийи у дийа хԝә беһӧрмәт нәкә, гава пир бьбә» (Мәтʹәлок 23:22). Дьбәк һун бежьн: «Ча әзе дийа хԝә беһӧрмәт кьм». Бәле, гәләк мәрьв де у баве хԝә һʹьз дькьн у ԛәдьре ԝан дьгьрьн. Әм фәʹм дькьн кӧ де-баве мә мәрʹа гәләк ԛәнщи кьрьнә. Ԝана әʹмьр дайә мә. Рʹаст ә әʹмьре мә гьшка жь Йаһоԝа йә, ле бе де-бав әме хԝәха дьне нәкʹәтана. Әм бона де-баве хԝә чь жи бькьн, йәкә әм нькарьн бьн әмәке ԝан дәред, чьмки тʹӧ тьшт нькарә жь әʹмьре мә ԛимәттьр бә. Һун тʹәне бьдьн һʹәсабе хԝә чьԛас щәфа ԝана кʹьшандийе ԝәки мә мәзьн кьн, чьԛас бәрхԝә кʹәтьнә бона мә, һʹьзкьрьн данә кʹьфше у чьԛас ԛәԝат у пʹәрә хәрщ кьрьнә, сәва кӧ мә мәзьн кьн. Ләма жи ԛәнщ ә кӧ Кʹьтеба Пироз ширәтәкә ӧса дьдә: «Ԛәдьре де у баве хԝә бьгьрә . . . ԝәки чәрха тә рʹаст бә у сәр әʹрде әʹмьре тә дьреж бә» (Әфәси 6:2, 3).

2. Гәло зарʹед мәзьн чаԝа дькарьн «дәйне де у баве хԝә вәгәрʹиньн»?

² Паԝлосе шанди гьлийед ӧса гот: «Һәгәр зарʹ йан нәвийед жьнәбике һәбьн, бьра әԝ зарʹ пешийе мала хԝәда һин бьн чаԝа хԝәденасийа хԝә бьдьнә кʹьфше у бь ви тьһәри дәйне де у баве хԝә вәгәрʹиньн, чьмки әв йәк ль Хԝәде хԝәш те» (1 Тимотʹейо 5:4). Гәло зарʹед мәзьн чаԝа дькарьн «дәйне де у баве  хԝә вәгәрʹиньн»? Йа пешьн гәрәке бьшекьриньн ԝи щәфайи у һʹьзкьрьне кӧ де у бав у кальк-пирька һьндава ԝанда данә кʹьфше. Гәрәке зарʹ фәʹм бькьн ԝәки мәрьвед әʹмьрда мәзьн һʹәԝще һʹьзкьрьне нә. Бь рʹастийе һәр кәс дьхԝазә кӧ йед дьн ԛәнщийед ԝана бьшекьриньн, ләма жи лазьм ә әм тʹьме де у баварʹа ӧса жи кальк-пирькарʹа бьдьнә кʹьфше кӧ әм ԝана ԛимәт дькьн. Ԝанарʹа лазьм ә бьзаньбьн кӧ әʹмьре ԝан бош-бәтал нинә.

3. Чаԝа әм дькарьн ԛәдьре де-бава у кальк-пирька бьгьрьн?

³ Чахе әм ԛәдьре де-бава, кальк у пирька заньн, бь ԝе йәке әм ԝанарʹа дьдьн кʹьфше, ԝәки ԝана һʹьз дькьн (1 Корьнтʹи 16:14). Һәрге әм тʹәви де-баве хԝә нажин, гәрәке бир нәкьн, ԝәки бона ԝан фәрз ә һаш мә һәбьн, кӧ әм ча ньн. Әме шабуне бькьнә дьле ԝан, һәрге нәʹме ԝанарʹа лекьн, тʹеле хьн йан сәрики ԝана хьн. Ендриу йе кӧ рʹуспийә жь ԝәлате Африкайе йә, һʹәфте дӧ щара дьчу бал баве хԝә, кʹижан кӧ 95 километр жь ԝи дур дьжит, сәва кӧ бона ԝи хәм бькә. Баве ԝи нә Шәʹде Йаһоԝа бу. Ендриу гьли дькә: «Чахе әз бумә Шәʹде Йаһоԝа баве мьн гәлә мьԛабьли ԝе йәке бу. Ле чахе әԝи дьдит, кӧ ча әз хәм дькьм бона ԝи ԝәʹде нәхԝәшийа ԝи, әԝи дәстпекьр хушк-бьред мьнрʹа бежә, ‹Һун гәрәке хԝә һʹәбандьна бьре хԝә бьгьрьн!› Бь сайа ԝе йәке 9 хушк-бьред мьн бунә Шәʹдед Йаһоԝа».

4. Ча сәрԝеред дине Щьһуйа һʹӧкӧм дькьрьн сәр мәрьва, ԝәки хәм нәкьн бона де-баве хԝәйи әʹмьрда мәзьн?

⁴ Алийе материйалида аликʹарийе бьдьнә де-баве хԝә. Гәло бь ԝе йәке әм дьдьн кʹьфше кӧ ԛәдьре ԝан дьгьрьн? Бәле. Гәләк щар әԝ һәма ӧса нә. Ԝәʹде Исада, һәрге мәрьвәки бьгота кӧ пʹәрә у һәбуна ԝи жь «Хԝәдерʹа те дайине», сәрԝеред дине Щьһуйа изьн нәдьданә  ԝи, һәбуна хԝә бона хәмкьрьна де-баве хԝә бьдә хәбате (Мәтта 15:3-6). Әԝ йәк берʹәмти бу! Бь рʹастийе сәрԝеред дине Щьһуйа дьхԝәстьн ԝәки зарʹ ԛәдьре де-баве хԝә нәгьрьн, ле һьндава ԝан хԝә сәрт у берʹәм бьдьнә кʹьфше у бона хәмед ԝан хәм нәкьн. Әм нахԝазьн бьбьнә мәрьвнә мина ԝан! (Ԛануна Дӧщари 27:16).

5. Рʹаст ә щарна дәԝләт аликʹарийа материйали дьдә кал-пира, ле чьрʹа зарʹ диса жи гәрәке хәм бькьн бона де-бавед хԝәйи әʹмьрда мәзьн?

⁵ Рʹожа иройин гәләк ԝәлатада бона мәрьвед әʹмьрда мәзьн, алийе материйалида, нан хԝарьне, кьнща у мале, дәԝләт хәм дькә. Дьԛәԝьмә мәрьвед әʹмьрда мәзьн хԝәрʹа пʹәрә тʹоп кьрьнә бона калбун-пирбуна хԝә. Ле һәрге әԝ пʹәрә ида һатийә хәрщкьрьне у тʹера ԝан накә, зарʹ гәрәке ԛәдьре де-баве хԝә бьгьрьн бь ԝе йәке кӧ хәм бькьн бона ԝан алийе материйалида. Хәмкьрьн бона де-баве әʹмьрда мәзьн дьдә кʹьфше, ԝәки әм ԛәдьре Сазкʹаре малбәте Йаһоԝа Хԝәде дьгьрьн.

6. Чь гӧһастьн дькарьн бькьн сәва кӧ хәм кьн бона де-баве хԝә?

⁶ Гәләк зарʹ һʹьзкьрьн у хԝәԛӧрбанкьрьне дьдьн кʹьфше де-баве хԝәрʹа, йед кӧ бе ԛәԝат ьн, бь ԝе йәке кӧ һазьр ьн али ԝан бькьн. Ле һьнә зарʹ де-баве хԝә дьбьнә мала хԝә, йан жи дәрбази ԝи щийи дьбьн кʹидәре де-баве ԝан дьжин, сәва кӧ незики ԝан бьн. Һьнәк жи дьчьнә мала ԝан сәва кӧ тʹәви ԝан бьжин. Гәләк щар әԝ йәк шабуне дькә һьм дьле зарʹа һьм жи дьле де-бава.

7. Чьрʹа гәләк фәрз ә ләзә-ләз сафикьрьна нәкьн?

⁷ Ле щарна, щигӧһастьнед ӧса кʹаре найньн. Гәло чьрʹа? Чьмки щарна әԝ гӧһастьн ләзә-ләз тенә кьрьне. Кʹьтеба Пирозда те готьне: «Йе аԛьл дина хԝә дьдә гавед хԝә» (Мәтʹәлок 14:15). Һәрге дийа тәйә әʹмьрда  мәзьн рʹасти чәтьнайа те, дьԛәԝьмә тӧ дьфькьри ԝәки ԝе баш бә, кӧ әԝ тʹәви тә бьжи. Чахе сафикьрьна ӧса дькьн, ԝе баш бә бьфькьрьн дәрһәԛа ԝан пьрса. Гәло дайика ԝә бь рʹастийе чьда һʹәԝщә йә? Дьбәк һьнә кәс йан хԝәха дәԝләт дькарьн аликʹарийе бьдьн ԝе йәкеда? Гәло әԝ дьхԝазә дәрбази мала ԝә бә? Гәло әԝ гәрәке жь һәвалед хԝә дур бә? Ле ча әԝ йәк сәр ԝе һʹӧкӧм бә? Ԝә пешда тʹәви ԝе дәрһәԛа ԝе йәке хәбәр дайә? Дәрбазбуна ве чаԝа ԝе һʹӧкӧм бә сәр мер йан жьна ԝә у зарʹед ԝә? Кәсәки дьн ԝе бькарьбә бона дийа ԝә хәм бькә чахе лазьм бе? Ле гәло һун дькарьн нав һәвда шьхӧла парʹавәкьн? Дәрһәԛа ԝан пьрса ԝә тʹәви һәр кәси жь малбәте шеԝьр кьрийә?

8. Ширәт жь кʹе дькарьн бьстиньн, чахе сафи дькьн ча али де-баве хԝә бькьн?

⁸ Һәр кәс мәщбур ә бона де-баве хԝә хәм бькә, ләма жи әԝана гәрәке тʹәвайи тʹоп бьн, ԝәки сафикьрьна бькьн. Дькарьн жь рʹуспийед щьвате ширәта бьхԝазьн у жь һәвалед хԝә дәрәща кʹижани мина йа ԝә йә. Кʹьтеба Пирозда те готьне: «Бе ширәт мәрәм у тʹьвдир бәтал дьбьн, ле бь сайа гәләк ширәткʹара әԝ тенә сери» (Мәтʹәлок 15:22).

9, 10. а) Әм гәрәке чь һьлдьн һʹәсаб, чахе пәй мәрьвед әʹмьрда мәзьн дьньһерʹьн? б) Рʹаст ә щарна зарʹ сәр йа хԝә дьсәкьньн бона кʹара де-бава, ле әԝана ԝи чахи чь гәрәке бир нәкьн?

⁹ Сәва кӧ ԛәдьре де-баве хԝәйи әʹмьрда мәзьн бьгьрьн, лазьм ә дьлшәԝат у фәʹмкʹар бьн. Сал дәрбаз дьбьн у мәрьвед әʹмьрда мәзьнрʹа чәтьн дьбә рʹе һәрʹьн у тьштәки бира хԝәда хԝәй кьн. Әԝана һʹәԝще аликʹарийе нә. Щарна, зарʹ гәләк де-баве хԝә контрол дькьн у наһельн, ԝәки әԝана тьштәк бе ԝан бькьн. Ле мәрьвед мәзьн әʹмьр дитьнә, нава ԝан салед хԝәда әԝана занәбун у билани ԛазанщ кьрьнә, хԝәха хԝәйе сәре хԝә бунә  у хԝәха сафикьрьн кьрьнә. Һәрге зарʹ гәләк ԝана контрол нәкьн, әԝана ԝе тʹәхмин кьн, ԝәки диса жи ԝана һʹәсаб дькьн ча де-бав у мәрьвнә билан. Ԝанарʹа чәтьн ә чахе дәԝса ԝан ида зарʹ рʹебәрийа дьдьн у сәва ԝе йәке әԝана дькарьн бькʹәвьнә депресийе йан һерс кʹәвьн. Һьнә де-бав дьхәйидьн чьмки әԝана дьшьрмиш дьбьн, ԝәки зарʹед ԝан азабуне жь ԝан дьстиньн.

¹⁰ Бона де-бава хәм кьн шьхӧләкә нәһеса йә. Ле ԝе ԛәнщ бә, һәрге изьне бьдьн де-баве хԝәйи әʹмьрда мәзьн, хԝәха сафикьрьна бькьн у хԝәха бона хԝә хәм бькьн, һʹәта кӧ дькарьн. Ԝе билани бә, пешийе тʹәви ԝан шеԝьр кьн у паши ԝе йәке сафи кьн чь бона ԝан дьһа баш ә. Дьбәкә де-бав нькарьн һәр тьшти бькьн. Ле һәрге зарʹ изьне бьдьнә ԝан, һаԛас бькьн чьԛас кӧ ԛәԝата ԝан дьгьһиже, зарʹ ԝе тʹәхмин кьн, ԝәки чьԛас һьндьк әʹмьре ԝан контрол дькьн, һаԛас һәләԛәтийа тʹәви ԝан ԝе баш бә. Әԝ йәк ԝе шабуне бькә дьле де-бава, ӧса жи зарʹа. Щарна сафикьрьнәкеда әм сәр йа хԝә дьсәкьньн, чьмки дьшьрмиш дьбьн кӧ әԝ йәк бона де-бава кʹар ә, ле әм диса жи гәрәке бир нәкьн, ԝәки лазьм ә ԛәдьре ԝан бьгьрьн у ньһерʹандьна ԝан һьлдьнә һʹәсаб. Чаԝа кӧ де-бав һежа нә, ӧса һьндава ԝан бь ԛәдьр бьн. Хәбәра Хԝәдеда те готьне: «Ль бәр йе пʹорʹсьпи рʹабә у ԛәдьре әʹмьре мәзьн бьгьрә» (Ԛануна Кʹаһинтийе 19:32).

11-13. Чь ԝе али зарʹа бькә хәм кьн бона де-баве хԝә, ԝи чахи жи һәрге һәләԛәтийа де-бава тʹәви ԝан нәбаш бу чахе әԝана бьчʹук бун?

¹¹ Щарна зарʹарʹа чәтьн ә мьԛати де-баве хԝәйи әʹмьрда мәзьн бьн, чьмки әԝана дькьнә бира хԝә һәләԛәтийа де-бава һьндава хԝә, чахе һе бьчʹук бун. Дьԛәԝьмә баве тә йәки сар у бетʹалаш бу, ле дийа тә  һʹӧкӧмһʹьз у сәрт бу. Йан дьԛәԝьмә тӧ һʹәта ньһа һерс дькʹәви йан дьхәйиди сәр ԝе йәке, кӧ де-баве тә ӧса нибун һьндава тә, чаԝа кӧ тә дьхԝәст. Гәло тӧ дькари әв һәстед һан жь дьл у һʹьше хԝә дәрхи? a

¹² Бьраки бь наве Бас, гьли дькә: «Баве мьн офисере СС бу нава натсиста Алманйайеда. Әԝ гәләк зу жь хԝә дәрдькʹәт у гәләк хоф бу. Гәләк щар әԝи бәр чʹәʹве мьн дийа мьн кʹӧта йә. Щарәке әԝ гәләк һерс кʹәт сәр мьн у ԛайиша хԝә һьлда да нав чʹәʹве мьн. Әԝи ӧса ԛәԝи мьн хьст, ԝәки әз кʹәтьмә сәр ньвина».

¹³ Ле һʹӧнӧред дьн жи бал баве ԝи һәбун. Бас хәбәрдана хԝә бәрдәԝам дькә у дьбежә: «Әԝ гәләк хәбатһʹьз бу, әԝи һәр тьшт дькьр сәва малбәта хԝә хԝәй кә. Әԝи тӧ щар мьнрʹа нәдьда кʹьфше һʹьзкьрьна хԝә ча бав, ле мьн заньбу кӧ әԝ нькарә әве йәке бькә. Чьмки чахе баве мьн зарʹо бу, дийа ԝи бәри ԝи да у әԝ жь мал дәрхьст. Әԝи хԝәха әʹмьрда хԝәрʹа рʹе дит, у щаһьлтийа хԝәда чу шәрʹ. Мьн баве хԝә фәʹм дькьр у ләма ԝи сущдар нәдькьр. Кʹәнге әз мәзьн бум, мьн сафи кьр, кӧ һʹәта әԝ сах ә, һәр тьштида али ԝи бькьм. Әԝ йәк нәһеса бу, ле мьн һәр тьшт дькьр чь кӧ ԛәԝата мьн дьгьһишт. Әз дьхәбьтим һʹәта хьлазийе бона ԝи бьбьм кӧрʹәки баш у әз дьфькьрьм, кӧ баве мьн һәма ӧса жи һʹәсаб дькьр, кӧ әз кӧрʹәки баш ьм».

14. Кʹижан рʹез жь Кʹьтеба Пироз дькарьн бьдьнә хәбате, ԝи чахи кʹәнге хәм дькьн бона де-баве хԝәйи әʹмьрда мәзьн?

¹⁴ Һәр дәрәщада дькарьн бьдьнә хәбате ширәтед жь Кʹьтеба Пироз: «Дьлшәԝатийе, ԛәнщийе, мьлуктийе, бәрбьһерийе у сәбьре ль хԝә ԝәргьрьн. Ль һәв сәбьр кьн у ль һәв бьбахшиньн, һәгәр газьне йәки ль  һьндава йәкида һәбә. Чаԝа Хӧдан бахшандә ԝә, һун жи ӧса бьбахшиньнә һәв» (Колоси 3:12, 13).

15. Чьрʹа щарна хәмкьрьн бона де-бава еше дькарә бькә дьл?

¹⁵ Хәм кьн бона де-баве әʹмьрда мәзьн әԝ нәһеса йә, чьмки гәләк тьшт гәрәке бе кьрьне у гәләк ԝәʹдә сәр ԝе йәке те хәрщ кьрьне. Ле дьһа зәʹф чәтьн ә чахе сәр ԝе йәке дьфькьри у бәрхԝә дькʹәви. Гәләк дьле тә дешә чахе тӧ дьвини кӧ де йан баве тә чʹәʹвада кор дьбә, һеди-һеди һәр тьшти бир дькә у тʹӧ тьшти бь ԛәԝата хԝә нькарә бькә. Сенди гьли дькә: «Тʹәмамийа малбәта мә  сәр стуйе дийа мьн бу. Гәләк чәтьн бу бьньһерʹьн ча әԝ дьчәрчьрә у хԝәха бона ԝе хәм кьн. Сәрида әԝе дәстпекьр бькӧлә, мә гопал да дәсте ԝе, паше мә кʹурсийа бона сәԛәта да ԝе. Ле ԝәʹдә пәй ԝәʹдә әԝ дьһа хьраб дьбу у ахьрийе мьр. Пәнщед рʹәԛе, һәстийе дийа мьнда бәла дьбу у лазьм бу, ԝәки сьбәһ һʹәта еваре дина мә лебә. Мә сәре ԝе дьшушт, мә ле тʹер дькьр у бона ԝе дьхԝәнд. Әԝ йәк гәләк чәтьн бу илаһи алийе емосиалида. Мьн гәләк дийа хԝә һʹьз дькьр у чахе мьн фәʹм кьр кӧ дийа мьн дьмьрә әз гәләк гьрийам».

16, 17. Чь ширәт ԝе али ԝан бькә кʹе бона де-бавед әʹмьрда мәзьн хәм дькьн, кӧ сәр һәр тьшти рʹаст бьньһерʹьн?

¹⁶ Чь тӧ дькари бьки һәрге тӧ жи дәрәща ԝи щурʹәйида ни? Аликʹарикә лапә мәзьн әԝ ә, кӧ гӧһ бьдьнә Йаһоԝа, Хәбәра ԝи бьхуньн у ԝирʹа дӧа бькьн (Филипи 4:6, 7). Ԝе дәрәщеда баш ә, рʹьнд хԝарьна хԝә бьхԝи у хәԝа хԝә бьстини. Әԝ йәк ԝе али тә бькә сьһʹәт-ԛәԝатеда у һʹьшда ԛәԝат би, сәва кӧ бькарьби бона мәрьвед хԝәйи незик хәм бьки. Лазьм ә ԝәʹдә бьвини сәва кӧ жь шьхӧлед һәр рʹожи һеса би. Ле һәрге сәр хәбата тә рʹожед һесабуне нәманә, ԝе бь билани бә диса жи хԝәрʹа ԝәʹдә бьвини сәва һеса би. Дькари жь кәсәки дьн һиви ки, ԝәки мьԛати мәрьве нәхԝәш бә, сәва тӧ һьнәки мал дәрейи.

¹⁷ Гәләк щар әԝед кӧ хәм дькьн бона де-бавед хԝәйи әʹмьрда мәзьн у бетʹаԛәт, гәләк тьшт жь хԝә дәʹԝа дькьн. Хԝә сущдар нәкә сәва ԝе йәке, кӧ тьштәки нькари бьки. Щарна дәрәщед ӧса пешда тен, кʹәнге гәрәке де-баве мәйи һʹьзкьри йед кӧ әʹмьрда мәзьн ньн, бьбьнә мала бона кал-пира, кʹидәре әԝана дькарьн аликʹарийа һәкима бьстиньн. Һәрге тӧ мьԛати де-баве хԝә дьби сьһʹәт-ԛәԝата кʹижани кӧ тʹӧнә, гәләк тьшт жь хԝә дәʹԝа нәкә. Гәрәке ԝәк һәв хәм ки ча бона де-бава, ӧса жи бона мер, зарʹ у бона хԝә.

18, 19. Чь созе аликʹарийе Йаһоԝа да у чь мәсәлә нишан дькә, ԝәки Йаһоԝа созе хԝә тинә сери?

¹⁸ Йаһоԝа бь сайа Хәбәра хԝә, бь һʹьзкьрьне ширәта дьдә мә, кʹижан дькарьн али мә бькьн, чахе бона де-баве хԝәйи әʹмьрда мәзьн хәм дькьн. Ле Йаһоԝа диса бь щурʹәки дьн жи дькарә али мә бькә. Зәбурбеж әв гьлийед һана бь аликʹарийа рʹӧһʹе Хԝәдейи пироз ньвиси: «Хӧдан незики ԝан һʹәмуйа йә, кʹижан кӧ гази Ԝи дькьн. . . . Заринийа ԝан дьбьһе у ԝан хьлаз дькә». Йаһоԝа хьзмәткʹаред хԝәйи амьн хьлаз дькә у мьԛати ԝан дьбә ԝәʹде лапи чәтьнда жи (Зәбур 145:18, 19).

¹⁹ Әԝ йәк кәчькәке сәр хԝә тʹәхмин кьр, наве кʹижане Мирна йә. Параличе дийа ԝе хьстьбу, у әԝе бона дийа хԝә хәм дькьр. Әԝ дьбежә: «Жь ԝе йәке хьрабтьр тʹӧ тьшт тʹӧнә, кʹәнге дьвини ча мәрьвед тәйи незик жь еша хԝә дьналә у нә жи дькарә бежә кʹидәра ԝе дешә. Дийа мьн те бежи аведа дьхәньԛи, ле мьн әԝ йәк дьдит у тʹӧ тьшт нькарьбу бькьра. Гәләк щар мьн бәр Йаһоԝа чок дьда у дьготә ԝи, ԝәки әз ԝәстийам. Әз ԝәк Даԝьд дьгьрийам, йе кӧ Йаһоԝарʹа дӧа дькьр ԝәки һесьре ԝи дәрданәкеда тʹоп кә у бир бинә. [Зәбур 56:8] У чаԝа Йаһоԝа соз дабу, әԝи әԝ ԛәԝат да мьн жи йа кӧ мьнрʹа лазьм бу. ‹Хӧдан бу пьштоване мьн›» (Зәбур 18:18).

20. Кʹижан созед Кʹьтеба Пироз дьлгәрм дькә ԝан ке хәм дькьн бона де-бавед хԝәйи әʹмьрда мәзьн йед кӧ бәр мьрьне нә?

²⁰ Тӧ чь жи бьки бона де-бавед хԝәйи әʹмьрда мәзьн, йәкә әԝана кал-пир дьбьн у дьмьрьн. Ԝи чахи жи гава тӧ гәләк рʹьнд пәй дьньһерʹи, йәк ә мәрьве әʹмьрда мәзьн дькарә бьмьрә, чаԝа әԝ йәк ԛәԝьми сәре дийа Мирнайе. Ле әԝ мәрьв йед кӧ баԝәрийа хԝә Йаһоԝа тиньн, заньн ԝәки мьрьн хьлазийа һәр тьшти нинә. Паԝлосе шанди гот: «Ԝәк кӧ әԝ бь хԝә  жи ԛәбул дькьн кӧ вәжина йед рʹаст у нәрʹаст ԝе чебә, әв һевийа мьн жи жь Хԝәде һәйә» (Кʹаред Шандийа 24:15, ИМ). Баԝәрийа ԝе йәке кӧ Хԝәде ԝе әʹрде тʹәзә чекә, кʹидәре «мьрьне тʹӧнәбә» дьлгәрьм дькә ԝан мәрийа, мәрьвед кʹижани кӧ мьрьнә (Әʹйанти 21:4).

21. Чахе ԛәдьре де-бавед хԝәйи әʹмьрда мәзьн дьгьрьн, әԝ йәк чь бәред баш тинә?

²¹ Хьзмәткʹаред Хԝәде бь ԛәдьр ьн һьндава де-бавед хԝә, ԝи чахи жи гава әԝана әʹмьрда мәзьн дьбьн (Мәтʹәлок 23:22-24). Чахе әԝана ӧса бь ԛәдьр ьн һьндава ԝан, ԝи чахи әԝана дьвиньн ча тенә сери готьнед Хԝәде: «Бьра де-баве тә пе тә әшԛ бьн, бьра ша бә йа кӧ тӧ же кʹәти» (Мәтʹәлок 23:25). Чахе ԛәдьре де-баве хԝәйи әʹмьрда мәзьн дьгьри, бь ԝе йәке ԛәдьре Йаһоԝа дьгьри у ԝи ша дьки.