1. Чьрʹа баԝәри гәләк фәрз ә? (Бьньһерʹә шькьле әʹԝльн.)

 ТӘ ԚӘ пьрсәкә ӧса дайә хԝә: «Гәло Йаһоԝа ԝәʹде тәнгасийа мәзьн ԝе мьн хьлаз кә?» Паԝлосе шанди гот, кӧ һʹӧнӧрәки лапи фәрз, кʹижан кӧ мәрʹа лазьм ә сәва кӧ хьлаз бьн, әԝ һәйә баԝәри. Әԝи гот: «Бе баԝәри тʹӧ щар набә кӧ инсан ль Хԝәде хԝәш бе» (Ибрани 11:6). Ле йазьх, баԝәрийа гәләк мәрьва тʹӧнә йә (2 Тʹесалоники 3:2). Әв һәр дӧ рʹез али мә дькьн кӧ әм фәʹм кьн, кӧ чьԛас фәрз ә ԝәки әм баԝәрийа хԝә ԛәԝи кьн.

2, 3. а) Чьрʹа фәрз ә кӧ баԝәрийа мә һәбә? б) Дь ве тʹемайеда әме дәрһәԛа чь шеԝьр кьн?

² Паԝлосе шанди дьгот дәрһәԛа баԝәрийа «һежа», демәк йа щерʹьбанди. (Бьхунә 1 Пәтрус 1:7.) Тәнгасийа мәзьн гәләк незик ә, у әм дьхԝазьн кӧ баԝәрийа мәйә ԛәԝи һәбә, кӧ әм хьлаз бьн (Ибрани 10:39). Ләма мәрʹа лазьм ә гәләк бьхәбьтьн, сәва кӧ баԝәрийа хԝә ԛәԝи кьн. Әм дьхԝазьн нава ԝан мәрьвада бьн, кʹижан кӧ Иса Мәсиһ ԝе ԝәʹде һатьна хԝә ԝан хәлат кә жь бо баԝәрийа ԝан. Әм жи мина ԝи мәрьви, кʹижани кӧ жь Иса һиви кьр кӧ баԝәрийа ԝи зедә кә, дькарьн бежьн: «Аликʹарийа нәбаԝәрийа мьн бькә!» (Марԛос 9:24). Йан жи, әм дьбәкә мина шандийа бежьн: «Баԝәрийа мә зедә кә» (Луԛа 17:5).

³ Дь ве тʹемайеда әме шеԝьр кьн дәрһәԛа ԝан тьшта: әм ча дькарьн баԝәрийа хԝә ԛәԝи кьн, әм ча дькарьн бьдьнә кʹьфше кӧ баԝәрийа мә ԛәԝи йә, у әм чьрʹа дькарьн дӧдьли нәбьн, кӧ Хԝәде ԝе али мә бькә, чахе әм дӧа дькьн кӧ баԝәрийа мә һе зедә бә.

4. Кʹижан мәсәлә дькарьн мә һелан кьн, ԝәки әм баԝәрийа хԝә ԛәԝи кьн?

⁴ Баԝәри гәләк фәрз ә, ләма жи Йаһоԝа Кʹьтеба Пирозда гәләк мәсәлә дайә ньвисаре дәрһәԛа баԝәрийе. У әԝ мәсәлә һатьнә ньвисаре «бона һинбуна мә» (Рʹомайи 15:4). Мәсәлед Бьраһим, Сәрайе, Исһаԛ, Аԛуб, Муса, Рʹәхабе, Гидәйон, Барак у йед дьн, дькарьн мә һелан кьн, ԝәки әм баԝәрийа хԝә ԛәԝи кьн (Ибрани 11:32-35). Хенщи ԝан мәсәлед бәре, ӧса жи һәнә мәсәлед баԝәрийа хушк-бьред мәйә рʹожа иройин. a (Бьньһерʹә спартьн.)

5. Чаԝа Елйас әʹйан кьр баԝәрийа хԝәйә ԛәԝи һьндава Йаһоԝа, у әм кʹижан пьрсе дькарьн бьдьнә хԝә?

⁵ Жь Кʹьтеба Пироз мәсәләкә ԛәԝи дәрһәԛа баԝәрийе, әԝ һәйә мәсәла Елйас. Чахе һун бьфькьрьн сәр мәсәла ԝи, дина хԝә бьдьнә сәр ԝан пенщ дәрәща, кʹидәре кӧ Елйас баԝәрийа хԝәйә ԛәԝи һьндава Йаһоԝа әʹйан кьр. 1) Чахе Елйас готә Пʹадша Аһаб кӧ Йаһоԝа ԝе әʹрде һʹьшк кә, әԝи бь баԝәри гот: «Бона мафе Хԝәдайе Исраел, Хӧдане кӧ зьнди йә, йе әз ль бәр сәкьнимә, һʹәта кӧ готьна мьн һәбә, ԝе дь ван саланда хӧнав у баран нәкʹәвә!» (1 Пʹадшати 17:1). 2) Елйас баԝәр дькьр, кӧ ԝәʹде ве хәзәбе Йаһоԝа ԝе бона һʹәԝщед ԝи у мәрьвед дьн хәм бькә (1 Пʹадшати 17:4, 5, 13, 14). 3) Елйас ӧса жи баԝәр бу, кӧ Йаһоԝа дькарә кӧрʹе жьнәбийе сах кә (1 Пʹадшати 17:21). 4) Елйас ӧса жи дӧдьли нәдьбу, кӧ жь Йаһоԝа ԝе агьр бе у ԛӧрбана ԝи һʹуфи хԝә кә (1 Пʹадшати 18:24, 37). 5) Һʹәта кӧ баран бьбарийа, Елйас бь баԝәрийа ԛәԝи готә Аһаб: «Дәркʹәвә бьхԝә у вәхԝә; жь бәр кӧ дәнге зедәйийа баране һәйә» (1 Пʹадшати 18:41). Паши ве мәсәла Елйас, әм дькарьн пьрсе бьдьнә хԝә: «Гәло баԝәрийа мьн жи ӧса ԛәԝи йә, чаԝа йа Елйас?»

6. Әм гәрәке чь жь Йаһоԝа бьхԝазьн, сәва кӧ баԝәрийа хԝә ԛәԝи кьн?

⁶ Әм хԝәха нькарьн баԝәрийа хԝә зедә кьн, ләма әм гәрәке жь Хԝәде рʹӧһʹе пироз бьхԝазьн. Гәло чьрʹа? Чьмки баԝәри йәк жь бәред рʹӧһʹе пироз ә (Галати 5:22). Әԝ бь билани йә чахе әм гӧһ дьдьнә ширәта Иса, кӧ дӧа дькьн Хԝәдерʹа, сәва кӧ әԝ һе зедә рʹӧһʹе пироз бьдә мә. Иса соз дайә кӧ Йаһоԝа ԝе «рʹӧһʹе пироз бьдә әԝед кӧ жь ԝи дьхԝазьн» (Луԛа 11:13).

7. Шьровәкьн кӧ чаԝа әм дькарьн баԝәрийа хԝә ԛәԝи хԝәй кьн.

⁷ Чахе баԝәрийа мәйә ԛәԝи һьндава Хԝәде һәйә, әм гәрәке әԝе баԝәрийе хԝәй кьн. Баԝәрийе әм дькарьн бәрамбәр кьн тʹәви агьр. Чахе әм агьр тʹәзә ведьхьн, алава ԝе дькарә гәләк ԛайим бә, ле һәрге сәрда дара зедә нәкьн, ахьрийе әԝ агьр ԝе весә у тʹәне кʹози бьминә. Ле һәрге әм тʹьме дара бавежьнә сәр агьр, әԝ ԝе бәрдәԝам кә бьшхӧлә. Дәрһәԛа баԝәрийе жи әм дькарьн ӧса бежьн. Һәрге әм һәр рʹож Хәбәра Хԝәде дьхуньн у тʹьме леколин дькьн, ԝе һʹьзкьрьна мә һьндава Кʹьтеба Пироз у Йаһоԝа һе зедә бә. У ахьрийе, әме баԝәрийа хԝә ԛәԝи хԝәй кьн.

8. Чь дькарә али тә бькә, кӧ баԝәрийа хԝә ԛәԝи ки у хԝәй ки?

⁸ Әԝ занәбуна кӧ тә пешийа ньхӧмандьне станд бәс нинә (Ибрани 6:1, 2). Мәсәлә, леколинкьрьна пʹехәмбәртийед жь Кʹьтеба Пироз, кʹижан кӧ ида һатьнә сери, ԝе али тә бькә, кӧ баԝәрийа хԝә һе зедә ки у ԛәԝи ки. Тӧ ӧса жи дькари бь Хәбәра Хԝәде тедәрхи, һәла баԝәрийа тә бь рʹастийе ԛәԝи йә йан на. (Бьхунә Аԛуб 1:25; 2:24, 26.)

9, 10. Чаԝа баԝәрийа мә ԛәԝи дьбә чахе а) һәвалед мәйә баш һәнә? б) әм тенә сәр щьвате? в) әм мьзгинийе бәла дькьн?

 ⁹ Паԝлосе шанди готә Мәсиһийа, кӧ әԝана дькарьн бь баԝәрийа хԝә «дьл бьдьн бәр һәв» (Рʹомайи 1:12). Әԝ чь те һʹәсабе? Чахе әм тʹәви хушк бьред мә ԝәʹдә дәрбаз дькьн, әм дькарьн баԝәрийа һәвдӧ ԛәԝи кьн. Илаһи чахе әм ԝәʹде хԝә дәрбаз дькьн тʹәви ԝан баԝәрийа кʹижана щерʹьбанди йә, һьнге баԝәрийа мә зедә дьбә (Аԛуб 1:3). Һәвалед хьраб баԝәрийа мә һьлдьшиньн, ле һәвалед баш баԝәрийа мә ԛәԝи дькьн (1 Корьнтʹи 15:33). Ләма жи әм пәй ԝе ширәте дьчьн, кӧ тʹьме бенә сәр щьвате. Чьмки сәр щьвате әм дькарьн «дьл бьдьнә һәв». (Бьхунә Ибрани 10:24, 25.) Һьн жи, ширәтед кӧ әм щьватеда дьстиньн, баԝәрийа мә зедә дькьн. Кʹьтеба Пироз дьбежә: «Баԝәри жь бьһистьне те» (Рʹомайи 10:17). Тӧ дькари пьрсе бьди хԝә: «Гәло жийина мьнда щьват кʹижан щи дьгьрә?»

¹⁰ Әм ӧса жи баԝәрийа хԝә ԛәԝи дькьн, чахе мьзгине бәла дькьн у мәрьва Кʹьтеба Пироз һин дькьн. Әм жи мина Мәсиһийед пешьн, һин дьбьн кӧ итʹбарийа хԝә Йаһоԝа биньн, у һәр дәрәщеда бь мерхаси хьзмәт дькьн (Кʹаред Шандийа 4:17-20; 13:46).

11. Чьрʹа баԝәрийа Кʹаләб у Йешу ԛәԝи бу, у әм ча дькарьн чʹәʹв бьдьнә ԝан?

¹¹ Баԝәрийа мә һьндава Йаһоԝа һе зедә дьбә, чахе әм дьвиньн кӧ ча әԝ али мә дькә у щаба дӧайед мә дьдә. Әԝ йәк Кʹаләб у Йешу дитьнә. Ԝана баԝәрийа хԝә һьндава Йаһоԝа әʹйан кьрьнә, чахе чунә кӧ тʹәсәлийа Әʹрде Создайи бькьн. Чахе ԝәʹдә дәрбаз бу, баԝәрийа ԝан һе ԛәԝи дьбу, чьмки ԝана тʹьме дьдит кӧ Йаһоԝа ча али ԝан дькә. Ләма Йешу дькарьбу бь баԝәри бьгота Исраелийа: «Йәк жи жь готьнед кӧ Хԝәдайе ԝә Хӧдан дайә мә, вала дәрнәкʹәт у гьшк жи һатьн щиһ». Паше әԝи гот: «У ньһа жь Хӧдан бьтьрсьн, жь дьл у дьлсозийе ԛультийе [хьзмәтийе] ԝирʹа бькьн». Әԝи ӧса жи зедә кьр: «Әзе жи баԝәрийе бь кьрьнед хԝәва нишани тә кьм» (Йешу 23:14; 24:14, 15). Чахе әм итʹбарийа хԝә Йаһоԝа тиньн у дьвиньн кӧ әԝ чаԝа хут али мә дькә, баԝәрийа мә һе ԛәԝи дьбә (Зәбур 34:8).

12. Әм ча дькарьн бьдьнә кʹьфше кӧ баԝәрийа мә ԛәԝи йә?

¹² Әм ча дькарьн бьдьнә кʹьфше кӧ баԝәрийа мә ԛәԝи йә? Аԛуб гот: «Әзе жи баԝәрийе бь кьрьнед хԝәва нишани тә кьм» (Аԛуб 2:18). Кьред мә дьдьнә кʹьфше һәла баԝәрийа мә ԛәԝи йә йан на. Ԝәрә әм бьвиньн кӧ чаԝа.

13. Әм ча баԝәрийа хԝә дьдьнә кʹьфше чахе даннасин дькьн?

¹³ Лапә баш кӧ ча әм дькарьн баԝәрийа хԝә бьдьнә кʹьфше, әԝ һәйә хьзмәткьрьн. Гәло чьрʹа? Чьмки чахе әм мьзгинийе бәла дькьн, әм әʹйан дькьн кӧ әм баԝәр дькьн, ԝәки хьлази незик ә у кӧ «әԝ дәрәнг наминә» (Һәбаԛуԛ 2:3). Сәва кӧ пебьһʹәсьн һәла баԝәрийа мә ԛәԝи йә, әм дькарьн пьрсе бьдьнә хԝә: «Гәло бәлакьрьна мьзгине бона мьн чьԛас фәрз ә? Гәло әз чь кӧ дькарьм һʹәму тьшти дькьм, сәва кӧ мәрьварʹа дәрһәԛа Хԝәде гьли кьм? Гәло әз мәщала дьгәрʹьм, сәва кӧ һе зедә Йаһоԝарʹа хьзмәт бькьн?» (2 Корьнтʹи 13:5). Ԝәрә әм баԝәрийа хԝә бьдьнә кʹьфше, бь ве йәке кӧ «хьлазбуне» әʹлам кьн, демәк мьзгинийе бәла кьн. (Бьхунә Рʹомайи 10:10.)

14, 15. а) Әм ча дькарьн бьдьнә кʹьфше баԝәрийа хԝә дь жийина хԝәйә һәррʹожида? б) Мәсәлед ӧса гьли кьн кʹижан кӧ баԝәрийа ԛәԝи дьдьнә кʹьфше.

¹⁴ Әм баԝәрийа хԝә дьдьнә кʹьфше, ӧса жи чахе тәнгасийа тәйах дькьн. Һәрге проблемед мә һәнә, мәсәлә, нәхԝәши, дьлтәнги, депресийа, кʹәсиббун йан проблемед дьн, әм гәрәке баԝәр бьн, кӧ Йаһоԝа у Иса ԝе али мә бькьн (Ибрани 4:16). У әм баԝәрийа хԝә һьндава Йаһоԝа дьдьнә кʹьфше чахе аликʹарийе жь ԝи дьхԝазьн. Иса гот кӧ әм дькарьн жь Йаһоԝа һиви кьн, кӧ «нане мәйи рʹоже» бьдә мә (Луԛа 11:3). Мәсәлед жь Кʹьтеба Пироз избат дькьн, кӧ чь кӧ әм һʹәԝщә нә, Йаһоԝа дькарә бьдә мә. Мәсәлә, чахе Исраеледа әʹрд һʹьшк бу, Йаһоԝа ав у хԝарьн дьда Елйас. Кʹьтеба Пироз дьбежә кӧ «ԛижакан сьбәһе нан у гошт жерʹа дьанин у еваре нан у гошт дьанин у жь нәԝале аве вәдьхԝар» (1 Пʹадшати 17:3-6). Әм баԝәр дькьн, кӧ Йаһоԝа ӧса жи дәрһәԛа һʹәԝщед мә хәм дькә.

 ¹⁵ Әм баԝәр ьн кӧ һәрге әм принсипед Кʹьтеба Пироз дьдьнә хәбате, әме бькарьбьн һʹәԝщед малбәта хԝә рʹази кьн. Ребека хушк жь Асйайе кӧ меркьри йә, гьли дькә кӧ чаԝа әԝ у малбәта ԝе, принсипед жь Мәтта 6:33 у Мәтʹәлок 10:4 данә хәбате. Әԝ дьбежә кӧ малхе ԝе тʹәхмин дькьр, кӧ жь бо хәбата ԝи, һәләԛәтийа ԝи тʹәви Йаһоԝа дькарә хьраб бә. У ләма әԝи хәбата хԝә һишт. Ле чар зарʹед ԝан һәбун, ләма ԝана дәстпекьрьн хԝәха хԝарьна чекьн, кʹижан кӧ ԝана дькарьбу бькʹьрийана. У жь бо ве хәбата ԝанә гьран, пʹәре ԝан тʹьме тʹера һʹәԝщед малбәте дькьр. Әԝ дьбежә: «Мә тʹәхмин дькьр кӧ Йаһоԝа тʹӧ щар әм нәдьһиштьн. Тʹӧ щар әм бехԝарьн нәдьман». Щәм тә жи ԛәԝьмандьнед ӧса һәбунә, кӧ баԝәрийа тә ԛәԝи кьрьнә?

16. Һәрге әм баԝәрийа хԝә Хԝәде тиньн, әԝ йәк чь кʹаре тинә?

¹⁶ Һәрге әм принсипед Йаһоԝа дьԛәдиньн, әм гәрәке тʹӧ щар дӧдьли нәбьн кӧ әԝ ԝе али мә бькә. Паԝлос әван гьлийед Һәбаԛуԛ ԝәкʹьланд: «Йе рʹаст ԝе бьжи, чьмки баԝәр дькә» (Галати 3:11; Һәбаԛуԛ 2:4). Ле әм гәрәке тʹәне баԝәрийа хԝә Ԝи биньн, кʹижан кӧ бь рʹастийе дькарә али мә бькә. Паԝлос тинә бира мә, кӧ Хԝәде әԝ ә, «йе кӧ дькарә һәр тьшти һе зедә кә, нә чаԝа әм дьхԝазьн йан дьфькьрьн, бь ԝе ԛәԝата кӧ нава мәда дьхәбьтә» (Әфәси 3:20). Хьзмәткʹаред Йаһоԝа чьԛас дькарьн һʹәму тьшти дькьн, сәва кӧ ԛьрара Хԝәде биньн сери. Ле әԝана заньн кӧ ԛәԝата ԝан бь синор ә. Әм чьԛас рʹази нә, кӧ Хԝәде тʹәви мә йә у кӧ әԝ мә кʹәрәм дькә.

17. а) Иса ча щаба шандийа да? б) Чьрʹа әм дькарьн баԝәр бьн кӧ Йаһоԝа ԝе һе зедә баԝәри бьдә мә?

¹⁷ Паши ве шеԝьркьрьне, дьбәкә әм хԝә мина шандийа тʹәхмин дькьн чахе ԝана жь Иса һиви кьрьн: «Баԝәрийа мә зедә кә» (Луԛа 17:5). Иса бь щурʹәки мәхсус щаба шандийед хԝә да, сала 33 рʹожа Пенщийе Һʹәсабе. Ԝана рʹӧһʹе пироз станд у карьбун фәʹм кьн мәрәма Хԝәде. Бь ве йәке баԝәрийа ԝан ԛәԝи бу, у ԝана бона бәлакьрьна мьзгине, кампанийа мәзьн дәстпекьрьн (Колоси 1:23). Гәло һәрге әм һиви кьн жь Хԝәде кӧ баԝәрийа мә зедә бә, әԝ ԝе али мә бькә? Йаһоԝа соз дьдә мә, кӧ чахе «әм тьштәки ль гора хԝәстьна ԝи же бьхԝазьн», әԝ ԝе бьдә мә (1 Йуһʹәнна 5:14).

18. Чаԝа Йаһоԝа кʹәрәм дькә ԝан, кʹе баԝәрийа хԝә ԛәԝи дькә?

¹⁸ Һәрге әм бь тʹәмами итʹбарийа хԝә Йаһоԝа биньн, әԝ ԝе мә кʹәрәм кә. Чахе әм жь ԝи бьхԝазьн кӧ һе зедә баԝәрийа мә һәбә, баԝәрийа мә ԝе һе ԛәԝи бә, у әме «һежайи Пʹадшатийа Хԝәде бьн» (2 Тʹесалоники 1:3, 5).