• САЛА БУЙИНЕ: 1963

• ԜӘЛАТ: БРИТАНЙА

• БӘРЕ: ХӘБАТА ԜЕЙӘ БАШ ҺӘБУ

ЖИЙИНА МЬНӘ БӘРЕ:

Әз Лондона Башуреда һатьмә буйине. Малбәта мәда нәһә зарʹ бун, әз йа шәша бум. Де-баве мьн жь Сент Винсентайе бун, йа кӧ ль сәр гьрава Карибе йә. Дийа мьн дьчу дера Методиста. Һʹәԝаса мьн һьндава религийайе у Хԝәде тʹӧ щар пешда нәдьһат, ле мьн гәләк һʹьз дькьр леколина бькьм. Ԝәʹде һесабунед хԝәйә мәкʹтәбе әз дьчумә бәр голе у мьн тʹәви хԝә кʹьтебед жь кʹьтебхане һьлдьда.

Чәнд сал шунда паше хьлазкьрьна мәкʹтәбе, мьн фәʹм кьр кӧ дьхԝазьм али мәрийа бькьм. Мьн хԝәрʹа хәбатәкә ӧса дит, кʹидәре мьн гәрәке аликʹарийе бьда сәԛәта, кәсед мала кʹижана тʹӧнә бу у ԝанрʹа кʹерʹа һинбун чәтьн бу. Паше әз чумә университете, сәва кӧ һин бьм дәрһәԛа зандарийа сьһʹәт-ԛәԝата мәрьва. Паши хьлазкьрьна һинбуне мьн хәбатәкә баш хԝәрʹа дит, мьн тʹӧ тьшт жь хԝә кем нәдькьр у ӧса дьжит чаԝа кӧ мьн хԝәш дьһат. Әз жь мале дьхәбьтим у бона хәбата мьн, мьнрʹа тʹәне лептоп у интернет лазьм бу. Әз сәр чәнд һʹәфтийа дьчумә ԝәлате дьн у ԝе отеледа дьмам, кʹижан мьн хԝәш дьһат. Мьн жь тʹәбийәта ԝедәре шабуне дьстанд у әз ӧса жи дьчумә щийед һесабуне у спортева мьжул дьбум. Жийина мьн бе мьнәт бу. Ле диса жи мьн тʹӧ щар бир нәдькьр дәрһәԛа мәрьвед бәләнгаз у кʹәсиб.

ЧАԜА КʹЬТЕБА ПИРОЗ ЖИЙИНА МЬН ГӦҺАСТ:

Әз бь сала дәрһәԛа нета әʹмьр дьфькьрим. Ле щаба ве пьрсе мьн тʹӧ щар Кʹьтеба Пирозда нәдьгәрʹийа. Сала 1999, рʹожәке хушка мьн Маргарет, йа кӧ Шәʹда Йаһоԝа бу, тʹәви һәвала хԝә һатьнә мала мьн. Һәвала ԝе һьндава мьн гәләк һәвалһʹьз бу. Әз хԝәха жь хԝә әʹщебмайи мам кӧ чаԝа әз ԛайил бум, ԝәки әԝ тʹәви мьн һинбуна Кʹьтеба Пироз дәрбаз кә. Ле әз рʹӧһʹанида ԛә пешда нәдьчум, чьмки хәбата мьн гәләк ԝәʹдә жь мьн дьстанд.

Һавине сала 2002, әз дәрбази башура-рʹоавайа Инглистане бум. Ԝедәре мьн дәстпекьр курса зедә дәрбаз бьм, ԝәки диплома дохторийе бьстиньм. Ԝи чахи мьн ӧса жи дәстпекьр һәрʹьмә щьвата у мьн кӧрʹе хԝә жи тʹәви хԝә дьбьр. Рʹаст ә мьн хԝәндьна бьльнд стандьбу, ле тʹәне бь сайа һинбуна Кʹьтеба Пироз мьн карьбу фәʹм кьм, чьма ве дьнеда һаԛас проблем һәнә у ча әԝана ԝе бенә сафикьрьне. Һьнге мьн бь рʹасти фәʹм кьр чь тенә һʹәсабе хәбәред жь Мәтта 6:​24, кʹидәре те готьне, кӧ мәрьв нькарә дӧ ахарʹа хӧламтийе бькә. Тӧ гәрәке йан Хԝәдерʹа хьзмәт ки, йан жи һәбукерʹа. Мьн фәʹм дькьр, кӧ зутьрәке әз гәрәке сафи кьм әʹмьре хԝәда чь дайньмә сәр щийе пешьн.

Саләк пешийа ве йәке әм маләкида тʹоп дьбун, кʹидәре Шәʹдед Йаһоԝа шеԝьр дькьрьн кʹьтеба бь наве, «Гәло Әʹфьрандарәки Дьлован Һәйә?» * У ԝи чахи әз избат бум, ԝәки тʹәне Йаһоԝа, Әʹфьрандаре дьнйайе дькарә һʹәму проблемед инсанәте сафи кә. Ле университетеда мә һин дькьрьн, ԝәки баԝәрийа һьндава Әʹфьрандар нета жийинева гьредайи нинә. Әԝ йәк сәр мьн нәбаш һʹӧкӧм кьр. Паши дӧ мәһа мьн университет һишт у мьн сафи кьр һе зедә ԝәʹде хԝә сәр шьхӧлед рʹӧһʹани хәрщ кьм.

Хәбәред жь Мәтʹәлок 3:​5, 6 мьн һелан кьрьн жийина хԝә бьгӧһезьм: «Бь тʹәмамийа дьле хԝә баԝәрийа хԝә Йаһоԝа бинә, у итʹбарийа хԝә һʹьше хԝә нәйнә, (ДТʹ). Һʹәму рʹийед хԝәда тӧ Хԝәде нас кә у Әԝе һʹәму шьвәрʹийед тә рʹаст-дуз кә». Занәбуна дәрһәԛа Хԝәде жь һәбун у жь занәбуна ве дьнйайе йа кӧ мьн станд, дьһа четьр бу. Чьԛас һе зедә әз педьһʹәсийам дәрһәԛа ԛьрара Хԝәде һьндава әʹрде у рола Иса, йе кӧ әʹмьре хԝә бона мә да, һаԛас һе зедә мьн дьхԝәст Әʹфьрандаре хԝәрʹа хьзмәт кьм. Әз һатьмә ньхӧмандьне сала 2003, мәһа Нисанеда. Паши ве йәке мьн әʹмьре хԝә гӧһаст.

ЧЬ КʹАР МЬН СТАНД:

Әз гәләк ԛимәт дькьм һәләԛәтийа хԝә тʹәви Йаһоԝа. Әз әʹдьлайа дьл у шабуне дьстиньм жь занәбуна ԝе йәке, кӧ Хԝәде нас дькьм. Ӧса жи һәләԛәтийа тʹәви хушк-бьра мьнрʹа шабуне тинә.

Әз гәләк һʹьз дькьм һин бьм у занәбуна зедә бьстиньм, ләма жи һинбуна Кʹьтеба Пироз у щьват шабуне мьнрʹа тиньн. Мьн хԝәш те мәрьварʹа дәрһәԛа Йаһоԝа гьли кьм. Әв бу шьхӧләкә лапә фәрз әʹмьре мьнда, чьмки бь ви щурʹәйи әз али мәрьва дькьм, ԝәки әԝана ида ньһада әʹмьре хԝә баш кьн у һевийа баш дәрһәԛа ахьрийе бьстиньн. Жь мәһа Һʹәзиране сала 2008, әз хьзмәт дькьм чаԝа пешәнга һәртʹьм у әз ша мә, ԝәки һʹәчʹи зәʹф ԝәʹде хԝә әз хьзмәткьрьнеда дәрбаз дькьм. Әз гәләк жь Йаһоԝа рʹази мә, чьмки мьн нета жийине дит.

• САЛА БУЙИНЕ: 1973

• ԜӘЛАТ: АВСТРЙА

• БӘРЕ: ХӦМАРБАЗ

ЖИЙИНА МЬНӘ БӘРЕ:

Әз шәһәрәки бьчʹукда Браунауйеда һатьмә буйине, йа кӧ Австрйайеда йә. Ԝи шәһәрида ԛачахти ԛә тʹӧнә бу. Нәфәре мала мьн Католик бун у ԝана мьн жи һин дькьр хԝә ԝе һʹәбандьне бьгьрьм.

Дәрәщәк кӧ әʹмьре мьнда ԛәԝьми, гәләк сәр мьн һʹӧкӧм кьр. Сала 1984, чахе әз 11 сали бум, мьн тʹәви һәвалед хԝә футболе дьлист. Һьнә ԝәхт шунда әʹрәбә һәвале мьн хьст у әԝ мьр. Мьрьна һәвале мьн бу дәрдәки гьран бона мьн. У бь сала, пьрса ви щурʹәйи мьн әʹщьз дькьр, кӧ паши мьрьне чь дьԛәԝьмә.

Гава мьн мәкʹтәб хьлаз кьр мьн дәстпекьр чаԝа әләктрик бьхәбьтьм. Әз йәки хӧмарбаз бум у мьн пʹәре ԛальм сәр хӧмаре хәрщ дькьр, ле диса жи кемасийа пʹәра щәм мьн тʹӧнә бу. Әз ӧса жи спортева мьжул дьбум у мьн гәләк хԝәш дьһат рока сәрт бьбьһем. Мьн хԝәш дьһат һәрʹьмә клуба у ԝәʹде хԝә дәрбаз кьм. Жийина мьнда ԝәʹдәдәрбазкьрьн у бенамуси щийе әʹԝльн дьгьртьн, ле диса жи әʹмьре мьн пʹучʹ у вала бу.

ЧАԜА КʹЬТЕБА ПИРОЗ ЖИЙИНА МЬН ГӦҺАСТ:

Сала 1995, мерәки әʹмьрда мәзьн, йе кӧ Шәʹде Йаһоԝа бу, дәре мьн хьст. Әԝи кʹьтебәк да мьн кʹижанеда дьһатә шьровәкьрьне щаба сәр һʹиме Кʹьтеба Пироз дәрһәԛа ве йәке, кӧ паши мьрьне чь дьԛәԝьмә. Ԛәзийа кӧ һатә сәре һәвале мьн жь һʹьше мьн дәрнәдькʹәт, һәма әԝ йәк мьн һелан кьр нә кӧ тʹәне тʹема дәрһәԛа мьрьне бьхуньм, ле кʹьтебе бь тʹәмами бьхуньм.

Ԝе кʹьтебеда мьн нә тʹәне щабед сәр пьрсед хԝә дәрһәԛа мьрьне станд, ле һе зедә. Мьн баԝәрийа хԝә тʹәне Иса дьани, чьмки әз малбәта Католикида мәзьн бьбум. Ле һинбуна Кʹьтеба Пироз али мьн кьр, һәләԛәтийа незик тʹәви Баве Иса, демәк Йаһоԝа саз кьм. Дьле мьн бь шабуне тʹьжә бу гава әз пеһʹәсийам, ԝәки Йаһоԝа нә кӧ хԝә жь мә вәдьшерә, ле дәԝсе хԝә әшкәрә дькә бона ԝан, йед кӧ ԝи дьгәрʹьн (Мәтта 7:​7-​11). Әз пеһʹәсийам кӧ һәстед Йаһоԝа һәнә у ԝәки әԝ хԝәйе созе хԝә йә. Әԝ йәк һʹәԝаса мьн һьндава пʹехәмбәртийед жь Кʹьтеба Пироз пешда ани у мьн һелан кьр леколин кьм, ча әԝана һатьнә сери. Леколина ԝи щурʹәйи баԝәрийа мьн һьндава Хԝәде ԛәԝи кьр.

Паше мьн фәʹм кьр, ԝәки тʹәне Шәʹдед Йаһоԝа дькарьн бь рʹасти али мәрьва бькьн Кʹьтеба Пироз фәʹм бькьн. Мьн дина хԝә да ԝе йәке, кӧ әʹдәбйәтед ԝанда гәләк рʹезед жь Кʹьтеба Пироз һәнә, мьн дәстпекьр кʹьтеба хԝәйә Католикида ԝан рʹеза бьгәрʹьм. Чьԛас дьһа зедә әз һин дьбум, һаԛас һе зедә әз избат дьбум кӧ мьн рʹасти дит.

Мьн фәʹм кьр кӧ Йаһоԝа дьхԝазә, ԝәки әз ль гора нормед ԝи бьжим. Жь Әфәси 4:​22-​24, ИМ, әз пеһʹәсийам кӧ әз гәрәке «мьрове кәвьн» жь хԝә дур хьм, кʹижан кӧ «бь хԝәстәкед хапинок» бу у «мьрове ну» ль хԝә кьм, йе кӧ «ль гор Хԝәде» йә. Ләма жи мьн тʹәрка бенамусийе да. Мьн ӧса жи тʹәрка хӧмаре да, чьмки әԝ йәк нав мьнда хԝәһʹьзийе у һʹьзкьрьна һьндава пʹәра пешда дьани (1 Корьнтʹи 6:9, 10). Хенщи ԝе йәке мьн гәрәке тʹәрка һәвалед хԝәйә нәбаш бьда, у тʹәви ԝан һәвалтийе бькьра, кʹе ль гора принсипед Хԝәде дьжит.

Әԝ йәк нә һеса бу. Ле чахе мьн дәстпекьр һәрʹьм сәр щьватед Шәʹдед Йаһоԝа, мьн хԝәрʹа гәләк һәвал ԛазанщ кьр. Мьн бь хирәт бәрдәԝам дькьр Кʹьтеба Пироз кʹур леколин кьм. Ԝәʹдә шунда мьн тʹәрка рока сәрт да у ахьрийе нә кӧ тʹәне нетед мьн, ле ӧса жи кʹьнщхԝәкьрьна мьн һатә гӧһастьне. Сала 1995, әз һатьмә ньхӧмандьне у бумә Шәʹде Йаһоԝа.

ЧЬ КʹАР МЬН СТАНД:

Әз һин бум чаԝа рʹаст пʹәра хәрщ кьм у ньһерʹандьна мьн һьндава тьштед материйали һатә гӧһастьне. Бәре әз зу һерс дькʹәтьм, ле ньһа дькарьм һерса хԝә контрол кьм. Хенщи ԝе йәке әз бона ахьрийе ида бәр хԝә накʹәвьм.

Әз ша мә кӧ әз ньһа пʹара тʹәшкиләта Йаһоԝа мә, кʹидәре мәрьвед жь щурʹә-щурʹә мьләта Йаһоԝарʹа хьзмәт дькьн. Һьнә жь ԝан мәрьва рʹасти гәләк чәтьнайед гьран тен, ле диса жи Хԝәдерʹа амьн дьминьн. Әз ша мә кӧ ньһа әз ԝәʹдә у ԛәԝата хԝә нә кӧ сәр ԝәʹдәдәрбазкьрьн у хԝәстьнед хԝә хәрщ дькьм, ле сәр ԝе йәке кӧ Йаһоԝарʹа хьзмәт кьм у али мәрьвед дьн бькьм.

• САЛА БУЙИНЕ: 1963

• ԜӘЛАТ: ИНГЛИСТАН

• БӘРЕ: НЕТА ЖИЙИНЕ ӦНДА КЬРЬБУ

ЖИЙИНА МЬНӘ БӘРЕ:

Әз Инглистанеда һатьмә буйине, ле чахе әз һʹәфт сали бум, малбәта мә дәрбази Австралйайе бу. Әм Голд-Костайеда щиԝар бун, йа кӧ һәрема Кԝинслендеда йә. Рʹаст ә әм дәԝләти нибун, ле һәр тьштед лазьм бал мә һәбу.

Әз нькарьм бежьм кӧ зарʹотийа мьн нәбаш бу, ле диса жи әз бәхтәԝар нибум. Әз жь зарʹотийеда һьндава жийине дьлсар бьбум. Баве мьн гәләк ичʹкә вәдьхԝар у һьндава дийа мьн гәләк сәрт бу, ләма жи мьн ԝи һʹьз нәдькьр. Ле чахе әз пеһʹәсийам кӧ чь һатә сәре баве мьн чахе әԝ Малайеда әскәр бу, мьн ԝи чахи фәʹм кьр кӧ чьрʹа әԝ бу мәрьвәки ӧса.

Щаһьлтийа хԝәда мьн дәстпекьр тʹәви һәвалед хԝәйә мәкʹтәбе ичʹке вәхԝьм. Чахе әз 16 сали бум, мьн мәкʹтәб һишт у әз чумә әскәрийе. Мьн дәстпекьр наркотик у тʹьтуне бьдьмә хәбате. Ахьрийе әз ичʹкева гәләк һатьмә гьредане. Пешийе мьн тʹәне шәми-ләʹда вәдьхԝар, ле паше мьн һәррʹож вәдьхԝар.

Һәла һе 20 салийед мьн жи тʹәмам нәбьбун, әз ида дӧдьли дьбум кӧ Хԝәде һәйә. Әз дьфькьрим, «Һәрге Хԝәде һәйә, чьма әԝ дьһелә, ԝәки мәрьв бьчәрчьрьн у бьмьрьн?» Мьн һәла һе һәлбәст ньвиси дәрһәԛа ԝе йәке, кӧ Хԝәде һʹәму проблемед инсанәтеда нәһәԛ ә.

Чахе әз 23 сали бум әз жь әскәрийе чум. Паше ԝе йәке әз сәр щурʹә-щурʹә хәбата дьхәбьтим, саләки әз һәла һе ԝәлате дьнда дьхәбьтим, ле диса жи мьн нета жийине нәдьдит. Әз бе нет у мәрәм дьжитьм у нә жи һʹәԝаса мьн һәбу тьштәки бькьм. Мал, хәбата баш у пешдачуйина хәбатеда, һәр тьшт бона мьн пʹучʹ у вала бун. Мьн дьлбини тʹәне жь ичʹке у музике дьстанд.

Ле Полонистанеда чахе әз чумә Освентсиме лагера натсиста, ԝи чахи хԝәстьна мьн пешда һат, кӧ пебьһʹәсьм сәва чь әм дьжин. Бәре мьн тʹәне дьхԝәнд дәрһәԛа зӧлмийа кӧ дьԛәԝьми сәр ԝе територийа мәзьн, ле чахе мьн пе чʹәʹве хԝә дит територийа ԝе лагере, агьр дьле мьн кʹәт. Ԛә һʹьше мьнрʹа дәрбаз нәдьбу, кӧ мәрьв дькарьн ӧса зӧлм бьн. Те бира мьн кӧ чʹәʹве мьн тʹьжи һесьр бьбу у әз дора лагере дьчум-дьһатьм у пьрсәк жь һʹьше мьн дәрнәдькʹәт: «Чьма?»

ЧАԜА КʹЬТЕБА ПИРОЗ ЖИЙИНА МЬН ГӦҺАСТ:

Сала 1993, чахе әз жь ԝәлате хәриб вәгәрʹийамә мал, мьн дәстпекьр Кʹьтеба Пироз бьхуньм, сәва кӧ щабед сәр пьрсед хԝә бьвиньм. Һьнә ԝәхт шунда дӧ Шәʹдед Йаһоԝа дәре мьн хьстьн у мьн тʹәглиф кьрьн сәр щьвата мәзьн, йа кӧ гәрәке сәр стадионе дәрбаз буйа. Мьн сафи кьр һәрʹьм.

Һьнә мәһ пешийа ԝе йәке әз һатьбум сәр ԝе стадионе, сәва листьке бьньһерʹьм. Ле чахе щьвата мәзьн сәр ԝе стадионе дәрбаз бу, гәләк тьшт дьле мьн гьрт. Шәʹдед Йаһоԝа гәләк бь ԛәдьр бун, әԝана бь мәʹрифәти хԝәкьри бун у зарʹед ԝан нәʹсийа нәдькьрьн. Ле дьһа зедә әԝ йәк сәр мьн һʹӧкӧм кьр, чахе ԝәʹде нан-хԝарьне бь сәда Шәʹдед Йаһоԝа хԝарьне дьхԝарьн ль сәр мәйдана листьке у гава әԝана вәгәрʹийанә сәр щийед хԝә, паши ԝан тʹӧ гәмар тʹӧнә бу! Ле йа сәрәкә әԝ ә кӧ мьн нав ԝанда тьштәкә ӧса дит, чь кӧ мьн һаԛас ԝәхт дьгәрʹийа, әԝ әʹдьлайа дьл бу. Рʹаст ә готаред жь бәрнаме бира мьнда нәма, ле рʹабун-рʹуньштьна Шәʹдед Йаһоԝа гәләк сәр мьн һʹӧкӧм кьр.

Ԝе рʹоже бәре еваре кӧрʹе мәтʹа мьн кʹәтә бира мьн, әԝи Кʹьтеба Пироз дьхԝәнд у щурʹә-щурʹә религийа леколин дькьр. Чәнд сал пешда әԝи хәбәред Иса мьнрʹа хԝәнд, кʹидәре дьһатә готьне кӧ религийа рʹаст бь сайа бәред баш те наскьрьне (Мәтта 7:​15-20). Ләма жи мьн сафи кьр пебьһʹәсьм, кӧ чьма Шәʹдед Йаһоԝа жь йед дьнена щӧдә дьбьн. Щара пешьн әʹмьре мьнда дьле мьн бь һевийе тʹьжә бу у мьн хԝәст дәрһәԛа ԝе йәке һе зедә пебьһʹәсьм.

Һʹәфтек шунда әԝ дӧ Шәʹдед Йаһоԝа, йед кӧ мьн тʹәглифи сәр щьвата мәзьн кьрьн, һатьнә мала мьн. Чахе ԝана мьнрʹа дәрһәԛа һинбуна Кʹьтеба Пироз гот, әз ԛайил бум һин бьм. Мьн ӧса жи дәстпекьр һәрʹьм сәр щьватед ԝан.

Һинбуна Кʹьтеба Пироз ньһерʹандьна мьн һьндава Хԝәде гӧһаст. Әз пеһʹәсийам кӧ Хԝәде нәһәԛ нинә жь бо зӧлмийа кӧ ве дьнйайеда дьԛәԝьмә у дьле ԝи дешә чахе әԝ дьбинә, кӧ мәрьв хьрабийе дькьн (Дәстпебун 6:6; Зәбур 78:40, 41). Мьн сафи кьр кӧ тʹӧ щар дьле Йаһоԝа нәешиньм, ле дәԝсе дьле ԝи ша кьм (Мәтʹәлок 27:11). Ләма жи мьн тʹәрка ичʹке, щьхаре у жийина бенамуси да. Сала 1994, әз һатьмә ньхӧмандьне у бумә Шәʹде Йаһоԝа.

ЧЬ КʹАР МЬН СТАНД:

Ньһа әз бь рʹасти жь әʹмьре хԝә рʹази мә. Әз ида пе ичʹке проблемед хԝә сафи накьм. Әз һин бум хәмед хԝә бьдьмә сәр Йаһоԝа (Зәбур 55:22).

Әԝа ида дәһә сал ә әз зәԝьщи мә сәр кʹӧлфәтәкә дәлал, бь наве Карен, щәм кʹижане ԛизәкә дәлал Нели һәйә у мә хԝәш те тʹәвайи хьзмәт кьн у мәрийарʹа дәрһәԛа Хԝәде гьли кьн. Ньһа әз дькарьм бежьм, ԝәки мьн нета жийине дит.