МӘРЬВ ҺʹЬЗРӘТА ҺʹЬЗКЬРЬНЕ НӘ. Нә зәԝащ, нә малбәт, у нә жи һәвалти нькарә бе һʹьзкьрьн сәрфьраз бә. Һәмьки һʹьзкьрьн пʹьрʹ фәрз ә, кӧ бькарьбьн ньһерʹандьна рʹаст хԝәй кьн у бәхтәԝар бьн. Ле гәло бь рʹасти «һʹьзкьрьн» чь йә?

Ль вьр ньһа дәрһәԛа һʹьзкьрьна романтики найе готьне, ле һәмьки әв жи фәрз ә. Бь рʹасти ль вьр хәбәрдан дьчә дәрһәԛа һʹьзкьрьна даһа мәзьн, чь кӧ мерьв һелан дькә хәмгинийа хԝә бона һʹалхԝәшийа мәрьвед дьн бьдә кʹьфше. Мәрьвәки ӧса, йед дьнена пешийа хԝә датинә. Һʹьзкьрьна ви щурʹәйи бь принсипа те рʹебәрикьрьне, ле әв дьлгәрмийева у һәства гьредайи йә.

Кʹьтеба Пироз дәрһәԛа һʹьзкьрьне бәдәԝ шьроԝәдькә: «Һʹьзкьрьн думькдьреж у ширьн ә, һʹьзкьрьн һʹәвсудийе накә, һʹьзкьрьн кʹӧбар набә, пʹьшька хԝәда наԝәрьмә, бепʹәргал нинә, йа хԝә нагәрʹә, зу һерс накʹәвә, кʹине нажо, дьле хԝә ль нәһәԛийе ша накә, ле рʹастийерʹа ша дьбә. Һʹьзкьрьн һәр гав дадьхә . . . һәр гав хԝәйигӧман ә, һәр гав сәбьр дькә. Һʹьзкьрьн тʹӧ щар кʹӧта набә» (1 Корьнтʹи 13:4-8).

Һʹьзкьрьна ви щурʹәйи «тʹӧ щар кʹӧта набә», у әԝе тʹӧ щар бәтавәнәбә. Ле пәй ԝәʹдәра әв һʹьзкьрьн даһа ԛәԝи дьбә. Һʹьзкьрьн думькдьреж ә, ширьн ә у дьбахшинә, ләма жи әв «бь йәктийа тʹам һәвва гьредьдә» (Колоси 3:14). Хенщи ԝе йәке, һәләԛәтийа кӧ һʹьзкьрьна ӧсава һәвва гьредайи йә, ԝе бехофийеда бә у бәхтәԝар бә, чьмки әԝе дина хԝә нәдә  кемасийед мәрийа. Ԝәрен әм шеԝьр кьн дәрһәԛа йәктийа зәԝащеда.

Иса Мәсиһ принсипед фәрз әʹйан кьр дәрһәԛа зәԝаще. Әԝ гот: «Мер ԝе де у баве хԝә бьһелә, хԝә ль жьне бьгьрә у һәр дӧ ԝе бьбьнә бәдәнәк. . . Бона ве йәке әԝед кӧ Хԝәде кьрьнә йәк, бьра мәрьв жь һәвдӧ нәԛәтинә» (Мәтта 19:5, 6). Дӧ принсипед сәрәкә зәлал дьбьн.

«ҺӘР ДӦ ԜЕ БЬБЬНӘ БӘДӘНӘК». Зәԝащ әв һәйә гьредана һәри незик, у һʹьзкьрьн жи зәԝаще дьпарезә жь нәамьнийа мер йан жьне. Жьн у мер дьбьнә «бәдәнәк» тʹәне тʹәви һәв, нә кӧ тʹәви кәсәки дьн (1 Корьнтʹи 6:16; Ибрани 13:4). Нәамьни һьлдьшинә һевийе у зәԝаще. Һәрге малбәтеда зарʹ жи һәнә, әв йәк дькарә алийе емосийалида ԝана зийан кә, у әԝана дьфькьрьн, кӧ кәс ԝана һʹьз накә, ԝәки әԝана хофийеда ньн у хәйде жи хԝәй дькьн.

«ӘԜЕД КӦ ХԜӘДЕ КЬРЬНӘ ЙӘК». Зәԝащ ӧса жи һәйә һәвгьредана пироз. Щотед зәԝьщи йед кӧ әве йәке фәʹм дькьн, дьхәбьтьн кӧ зәԝаща хԝә ԛәԝи кьн. Чахе чәтьнайи пешда тен, әԝана һʹәму тьшти дькьн кӧ зәԝаща хԝә хԝәй кьн. Һʹьзкьрьна ԝан ԛәԝи йә. Һʹьзкьрьна ви щурʹәйи «һәр гав дадьхә», у аликʹарийе дьдә чәтьнайа сафи кьн, сәва бькарьбьн йәктийе у әʹдьлайе хԝәй кьн.

Чахе нава де-бавада һʹьзкьрьн һәйә, һьнге зарʹ жи кʹарәкә мәзьн дьстиньн. Щесика кәчʹька 20 сали ӧса дьбежә: «Де-баве мьн бь рʹасти жи һәв һʹьз дькьн у ԛәдьре һәв заньн. Чахе әз дьвиньм, ча дийа мьн ԛәдьре баве мьн занә, әз жи дьхԝазьм чʹәʹв бьдьмә ԝе».

Һʹьзкьрьн әв хәйсәте сәрәкә йә бал Хԝәде. Кʹьтеба Пироз дьбежә: «Хԝәде һʹьзкьрьн ә» (1 Йуһʹәнна 4:8). Ләма жи сәр Йаһоԝа те готьне «Хԝәдейе хԝәзьли» (1 Тимотʹейо 1:11). Чахе әм чʹәʹв дьдьнә хәйсәтед Әʹфьрандаре хԝә, һут һʹьзкьрьнеда, әм жи бәхтәԝар дьбьн. Кʹьтеба Әфәси 5:1, 2 ӧса дьбежә: «Чʹәʹв бьдьнә Хԝәде, чаԝа зарʹед һʹьзкьри у хԝә ль һʹьзкьрьне бьгьрьн».