Кʹьтеба Пироз дьбежә кӧ бьльндайа Голйатʹ ԝәкә 3 метр бу (1 Самуйел 17:4). Һьнәк мәрьв баԝәр накьн кӧ Голйатʹ һаԛас бьльнд бу. Ле һун заньн ԝәки ль горʹа леколине һатә кʹьфше кӧ дәԝрана мәда жи мәрьве лапи бьльнд һәбу у бьльндайа ԝи 2.7 метр зедәтьр бу. Ләма жи әм дькарьн баԝәр бьн кӧ Голйатʹ жи гәләк бьльнд бу. Әԝ жь рькʹьнйата Рʹьфайи бу йед кӧ бәжбьльндайа хԝәда гәләк әʹйан бун. Документед Мьсьрйада, йа ԛьрна 13 Б.Д.М. һатьбу готьне, кӧ һәрәма Кәнанеда әʹскәред хоф һәбун, бьльндайа кʹижана кӧ 2.4 метр зедәтьр бу. Ләма жи әм дькарьн бежьн, кӧ бь рʹасти Голйат йәки гәләк бьльнд буйә.

Һәбун зандаред ӧса, йед кӧ дьхԝәстьн избат кьн кӧ сәрһатийа дәрһәԛа Даԝьд Пʹадша тәне чʹирок ә. Ле щәм ԝана дәрнәкʹәт. Чьмки археолога, ньвисара кәԝьн дьтьн кʹидәре кӧ һатьбу ньвисандьне «Мала Даԝьд». Хенщи ԝе йекә Иса Мәсиһ жи дәрһәԛа Даԝьд хәбәр дьда (Мәтта 12:3; 22:43-45). Ль гора рькʹьнйата Даԝьд жи, избат дьбе кӧ Иса һәйә Мәсиһ. Чьмки рькʹьнйата Иса, жь дӧ алийава әʹйан дькә кӧ әԝ жь Даԝьд Пʹадша йә (Мәтта 1:6-16; Луԛа 3:23-31). Демәк сәрһатийа дәрһәԛа Даԝьд чʹирок нинә.

Кʹьтеба Пироз дьбежә кӧ әԝ шәрʹ ль Дәшта Әлайеда ԛәԝьми. Ле әв ӧса жи әʹламәтийа һур бь һур дьдә дәрһәԛа ве йәке. Мәсәлә кӧ ордийа Фьльстийана ль тʹәпә щиԝар бьбу, әԝ тʹәпә ортʹа дӧ шәһәрада бу, демәк Соһо у Азәкайе. Ле Исраели щиԝар бьбун ль алийе дьне һьмбәри Фьльстийа. Гәло әв щи бь рʹасти һәбу?

Дина хԝә бьдьн кӧ мәрьвәки кӧ чубу ль ԝан щийа бьгәрʹә, чь готьбу: «Рʹебәре мә, йе кӧ хԝәденас нибу, мә бьрә Дәшта Әлайе. Әм һьлдькʹшийан ль сәр тʹәпә щийе бьльнд. Чахе әм гьһиштьнә щи мә дор-бәре хԝә ньһерʹи у дит дәшта Әлайе. Һьнге рʹебәр мәрʹа хԝәнд 1 Самуйел 17:1-3. Паше әԝ дина мә да ве дәште у гот: ‹Алийе чʹәпе, кәвьр-кочʹькед Соһойе нә. Ле алийе рʹасте кәвьр-кочʹькед Азәкайе нә. Фьльстийан щиԝар бьбун ортʹа ван дӧ шәһәра, щики ль сәр ԝан тʹәпа, кʹижана кӧ һун бәр хԝә дьбиньн. У дьбәкә әм ньһа ль сәр ви щи сәкьнинә кʹидәре кӧ ордийа Исраелийа щьԝар бьбу›. Мьн да бәр чʹәʹве хԝә кӧ Шаԝул у Даԝьд һәма ль ԝи щийи сәкьни буйә, кʹидәре кӧ әз сәкьни бум. Паше әм пәйа бун, у бәр чʹәмәкирʹа дәрбаз бун, кӧ зьһа бьбу у тʹьжә кәвьр бун. Мьн диса жи да бәр чʹәве хԝә, кӧ чаԝа Даԝьд ль ви щийи сәкьнийә, хԝә куз кьрийә, у пенщ кәвьред пән һьлдайә, бь кʹижани әԝи гәрәке Голйатʹ бькӧшта». Әв мәрьв, мина гәләк мәрьвед дьн, әʹщебмайи мабу жь бо ве йәке, кӧ Кʹьтеба Пироз дәрһәԛа тьштед ӧса, әʹламәтийа чьԛас рʹаст у һур бь һур дьдә.

Ләма жи мәʹнийед мә тʹӧнәнә, кӧ әм бькʹәвьнә бьн шьке у бьфькьрьн кӧ ԛәԝьмандьна дәрһәԛа Даԝьд у Голйатʹ, чʹирок ә. Щи у мәрьвед ве ԛәԝьмандьне, бь рʹасти жи һәбун. Ле һе фәрз әԝ ә, кӧ дәрһәԛа ве ԛәԝьмандьне дь Хәбәра Хԝәдеда һатә ньвисаре. Демәк әв әʹламәти жь Хԝәдейе рʹастийе йә. У әԝ «Хԝәдейе хԝәйе готьна» хԝә йә у нькарә дәрәԝа бькә (Тито 1:2; 2 Тимотʹейо 3:16).