Әʹдәбйәтед мәда мә чәнд щара бәʹса ве пьрсе кьрийә. Ибрани 12:16-да те готьне, кӧ Әсаԝ «тьштед пироз ԛимәт нәкьр» у «мафе ньхӧритийа хԝә, бона зькә хԝарьн [Аԛубрʹа] фьрот, ДТʹ». Жь ве йәке те кʹьфше, кӧ чахе Аԛуб «мафе» ньхӧритийе станд, әԝ жи кʹәтә нава рʹеза кал-бава, жь кʹижана Мәсиһ гәрәке бьһата (Мәт. 1:2, 16; Луԛа 3:23, 34).

Ле жь һьнә сәрһатийед Кʹьтеба Пироз те кʹьфше, кӧ мер сәва бькʹәвә нав рʹеза ԝан кал-бава, жь кʹижана Мәсиһ гәрәке бьһата, әʹсә нибу кӧ ньхӧри буйа. Ԝәрә чәнд избаткьрьнед ве йәке шеԝьр кьн:

Жь кӧрʹед Аԛуб (Исраел) кӧ Леайе жерʹа ани, ньхӧри Рубен бу. Ле кӧрʹе пешьн жь Рʹаһеле, йа кӧ Аԛуб гәләк ле һʹьз дькьр, Усьв бу. Чахе Рубен гӧнә кьр, маф, демәк изьна ньхӧритийе, гьһиштә Усьв (Дәстп. 29:31-35; 30:22-25; 35:22-26; 49:22-26; 1 Дир. 5:1, 2). Ле йәкә әԝана һәрдӧ жи нәкʹәтьнә нав рʹеза ԝан кал-бава, жь кʹижана Мәсиһ гәрәке бьһата. Кӧрʹе Аԛуб йе чара Щьһуда, кʹижан  кӧ Леайе жерʹа ани, кʹәтә нава ве рʹезе (Дәстп. 49:10).

Луԛа 3:32-да те рʹезкьрьне пенщ наве кал-бавед жь хәза Мәсиһ. Ча те кʹьфше һәр йәк жь ԝан ньхӧри бу. Мәсәлә, ньхӧрийе Боԝаз Овед бу, ле ньхӧрийе Овед Йеша бу (Рʹутʹ 4:17, 20-22; 1 Дир. 2:10-12).

Ле әм заньн кӧ Даԝьде кӧрʹе Йеша, ньхӧри нибу. Әԝ жь һʹәйшт кӧрʹа йе лапи бьчʹук бу. Ле йәкә Мәсиһ жь рʹькʹьнийата Даԝьд бу (1 Сам. 16:10, 11; 17:12; Мәт. 1:5, 6). Рʹаст ә Сьлеман ньхӧрийе Даԝьд нибу, ле әԝ жи кʹәтә рʹеза ԝан кал-бава (2 Сам. 3:2-5).

Ле әԝ найе һʹәсабе кӧ ньхӧрти фәрз нибу. Чьмки малбәтеда йе ньхӧри хԝәйиԛәдьр бу, у гәләк щар паши малхе мале, әԝ дьбу сәрԝер. Ӧса жи малбәтеда һәбук дӧбарә дьданә ԝи (Дәстп. 43:33; Ԛан. Дщр. 21:17; Йешу 17:1).

Ле мафе ньхӧритийе дькарьбу бьгьһишта кӧрʹәки дьн. Әԝ йәк те кʹьфше чахе Бьраһим ньхӧритийа Исмайил да Исһаԛ (Дәстп. 21:14-21; 22:2). У ӧса жи ча мә дит, ньхӧритийа Рубен гьһиштә Усьв.

Ньһа ԝәрен әм диса бьхуньн Ибрани 12:16: «Һаш жь хԝә һәбьн, нәбә кӧ йәк бенамус бә, йан мина Әсаԝ бә, йе кӧ тьштед пироз ԛимәт нәкьр у мафе ньхӧритийа хԝә, бона зькә хԝарьн фьрот, ДТʹ». Гәло Паԝлос бь ве рʹезе чь дьхԝәст бьгота?

Ве рʹезеда Паԝлос нә кӧ дина Мәсиһийа дьда сәр хәза кал-бавед Мәсиһ, ле әԝи дьхԝәст ԝана ширәт кьра, ԝәки «ньгед хԝә рʹийа рʹастда» бавежьн. Әԝана гәрәке мьԛати хԝә буна кӧ нәкʹәтана нав бенамусийе, у «дәсте хԝә жь кʹәрәма Хԝәде» нәкьрана (Ибрн. 12:12-16). Ле һәрге ԝана ӧса нәкьра, ԝе бьбуна мина Әсаԝ, йе кӧ «тьштед пироз ԛимәт нәкьр», у бу йәки дьнеһʹьз.

Әсаԝ дьжит һена бавәʹширада, у дьԛәԝьмә щара изьна ԝи һәбу һәла һе жи ԛӧрбана бинә (Дәстп. 8:20, 21; 12:7, 8; Иб. 1:4, 5). Ле Әсаԝ бь бьнйатʹа мәрьвайи дьфькьри, ләма әԝи бона тʹасә шорба ниська пьшта хԝә да һʹәму кʹәрәмед хԝә. Дьԛәԝьмә әԝи әԝ йәк кьр, чьмки нәдьхԝәст ԝи щәфайи бькʹьшинә, кʹижан кӧ зӧрʹәта Бьраһим гәрәке бьдита, чаԝа һатьбу пʹехәмбәртикьрьне (Дәстп. 15:13). Әсаԝ дӧ жьнед пʹутпʹарьст ани, у бь ве йәке жи да кʹьфше кӧ әԝ дьнеһʹьз бу у тьштед пироз нәдьшекьранд. Әԝ дӧ жьн бунә кӧла дьле де-баве Әсаԝ (Дәстп. 26:34, 35). Ле Аԛуб чʹәʹв нәда бьре хԝә у жьнәкә ӧса ани йа кӧ Хԝәдейе рʹаст дьһʹәбанд (Дәстп. 28:6, 7; 29:10-12, 18).

Ахьрийеда, әм чь дькарьн бежьн дәрһәԛа хәза Мәсиһ? Ча мә дит ве хәзеда нә һʹәмушк ньхӧри бун. Щьһуйа әԝ йәк заньбун у ԛәбул дькьрьн, ӧса жи ԛәбул дькьрьн ԝәки Мәсиһ бь рʹькʹьнийата Даԝьд һат, кʹижан кӧ кӧрʹе Йеша йе бьчʹук бу (Мәт. 22:42).