АСТРОЛОЖИ: Һьнә мәрьв баԝәр дькьн, ԝәки ахьрийа ԝан ве йәкева гьредайи йә, кӧ рʹожа буйина ԝан стәйрк чь щурʹәйи рʹез гьртьбун. Әԝана пе тьштед астроложи у һороскопа дьхԝазьн пебьһʹәсьн һәла чь һивийа ԝан ә у паше һәр тьшти дькьн, ԝәки хԝә хԝәй кьн кӧ зийан нагьһижә ԝан у пешдачуйи бьн.

ФЕН ШУЙ: Һьнәк жи баԝәр дькьн ԝәки бәхтәԝари ве йәкева гьредайи йә, һәла әԝана мал йан авайи ԝе кʹидәре ава бькьн, демәк әԝ гәрәке ль гора ԛәԝатед тʹәбийәте кӧ найенә дитьне, бенә авакьрьне. Ло Ԝинг, * йе кӧ Һон-Конгеда дьжи, дьбежә: «Експерте фен шуй мьнрʹа гот, һәгәр әз кәвьрәки мәхсус дькʹана хԝәда дайньм ԝи щийи кӧ әԝи мьнрʹа гот, ԝи чахи әзе дьһа зедә пʹәра чекьм».

ҺʹӘБАНДЬНА КАЛ-БАВА: Һьнә мәрьв жи дьфькьрьн ԝәки әԝана гәрәке һӧрмәт-рʹумәте бьдьнә кал-бава йан жи щурʹә-щурʹә хӧдана, ԝәки әԝ ԝана бьпарезьн у бәрәкʹәт кьн. Кʹӧлфәтәкә бь наве Ване жь Вийәтнаме, дьбежә: «Мьн баԝәр дькьр һәгәр әз һӧрмәт-рʹумәте бьдьмә кал-бавед хԝәйә мьри, жийина мьн ԝе дьһа баш бә у ахьрийа мьн у зарʹед мьн ԝе бехоф бә».

РЕИНКАРНАСЙА: Гәләк мәрьв баԝәр дькьн, кӧ чахе кәсәк дьмьрә әԝ диса у диса те буйине у ӧса жийина ԝи бәрдәԝам дьбә. Әԝана баԝәр дькьн, кӧ тьштед ԛәнщ у хьраб, йед кӧ тенә сәре ԝан, ахьрийа кьред ԝан ә, кʹижан кӧ ԝана жийина дьнда дькьр.

Рʹаст ә гәләк мәрьв ве йәке баԝәр накьн, ле диса жи әԝана кʹочʹәктийе дькьн, мәсәлә пе карта, пе ԛаԝәйе у сәр кʹәфа дәст. Әԝана дьфькьрьн ԝәки әԝ тьшт ԝе али ԝан бькьн ахьрийа хԝә бьзаньбьн.

Гәло әԝ мәрьвед кӧ ԝан тьшта баԝәр дькьн, у ԝанва мьжул дьбьн, бәхтәԝар бунә у жийина бехоф ԛазанщ кьрьнә?

Дина хԝә бьдьнә сәрһатийа Һао, йе кӧ Вийәтнамеда дьжи. Әԝи дьхԝәст пе астроложийе, фен шуйе у һʹәбандьна кал-бава ахьрийа хԝә бьзаньбә у жийина хԝәда пешдачуйи бә. Ле гәло әԝ гьһиштә нета хԝә? Һао дьбежә: «Мьн гәләк пʹәре хԝә ӧнда кьр, кʹәтьмә бьн дәйна, малда шәрʹ-дәʹԝ пешда һатьн у әз гәләк дьлшкәсти бумә».

Куиминг жи кӧ жь Тәйԝане йә, баԝәрийа хԝә астроложи, реинкарнасйа, бәхт, фен шуй у һʹәбандьна кал-бава, дьани. Ле гава әԝи һәр тьшт леколин кьр, гот: «Мьн фәʹм кьр, ԝәки әԝ һинкьрьн у әʹрф-әʹдәт мьԛабьли һәв ьн у дьхальфиньн. Мьн тедәрхьст кӧ гәләк щар прогнозед астроложи нәрʹаст ьн. Ле дәрһәԛа реинкарнасйайе, мьн пьрс дьда хԝә, һәгәр әʹмьре мьнә пешийе ԛә найе бира мьн, әз ча дькарьм гӧһастьна бькьм ԝәки әʹмьре хԝәйи дьн дьһа баш кьм?»

Һао, Куиминг у диса гәләк мәрьвед дьн, тедәрхьстьнә кӧ ахьрийа мә фәләк, бәхт, стәйрк, һʹәбандьна кал-бава у реинкарнасйайева гьредайи нинә. Ле гәло әв те һʹәсабе ԝәки ахьрийа мә дәсте мәда нинә у әм нькарьн тьштәк бькьн?

Гәләк дьфькьрьн ԝәки әԝана ԝе әʹмьре хԝәда һьнге бәхтәԝар у пешдачуйи бьн, һәгәр пәй хԝәндьна бьльнд у һәбуке кʹәвьн. Ле гәло кәсед ӧса гьһиштьнә нета хԝә у бәхтәԝар ьн?