1, 2. Чаԝа Паԝлосе шанди нишан кьр, кӧ әԝ рʹази йә бона ԛәнщийа нәһежа жь Хԝәде?

ПАԜЛОСЕ ШАНДИ дькарьбу бь исафа тʹәмьз бьгота: «Кʹәрәма [Хԝәде] кӧ бь мьнрʹа йә, бош-бәтал нибу». (Бьхунә 1 Корьнтʹи 15:9, 10.) Паԝлос рʹьнд фәʹм дькьр, кӧ әԝ һежайи рʹәʹмтийа Хԝәде нибу, чьмки әԝи бәре Мәсиһи дьзерандьн.

² Чахе Паԝлос ида әʹмьрда мәзьн бу, әԝи Тимотʹейорʹа ньвиси: «Әз жь Мәсиһ Исайе Хӧдане мә рʹази мә, йе кӧ ԛәԝат да мьн, әз амьн һʹәсаб кьрьм, данимә сәр ве хьзмәткʹарийе» (1 Тимтʹ. 1:12-14). Ле гәло әԝ чь щурʹә хьзмәткьрьн бу? Паԝлос готә рʹуспийед щьвата Әфәси: «Әз әʹмьре хԝә лайиԛи тʹӧ тьшти накьм, тʹәне дькьм бьгьһижьмә мәрәме хԝә у ԝе ԛӧльха кӧ мьн жь Хӧдан Иса стандийә биньмә сери, аԝа готи Мьзгинийа кʹәрәма Хԝәде бь мәʹрифәти даннасин кьм» (Кʹар. Шанд. 20:24).

3. Кʹижан хьзмәтийа мәхсус Паԝлосрʹа һатә дайине? (Бьньһерʹә шькле әʹԝльн.)

 ³ Чь «мьзгини» Паԝлос бәла дькьр, кʹижан кӧ кʹәрәма Хԝәде, демәк ԛәнщийа нәһежа әʹйан дькьр? Әԝи готә Мәсиһийед Әфәсида: «Ԝә бьһистьбә, кӧ әв ԝәкʹилти жь кʹәрәма Хԝәде бона ԝә мьнрʹа һатийә дайине» (Әфәс. 3:1, 2). Паԝлосрʹа һатә готьне, ԝәки әԝ гәрәке мьзгине бәла кә мәрьвед нәщьһурʹа. Чьмки ида рʹе вәбу бона мәрьвед жь мьләтед дьн, сәва әԝана жи Пʹадшатийа Хԝәдеда тʹәви Иса Мәсиһ сәрԝертийе бькьн. (Бьхунә Әфәси 3:5-8.) Паԝлос бь хирәт хьзмәт дькьр, у бона Мәсиһийед иройин әԝи мәсәләкә гәләк баш һишт. Әԝи әʹйан кьр кӧ ԛәнщийа Хԝәде һьндава ԝи, «бош-бәтал» нибу.

4, 5. Чьрʹа әм дькарьн бежьн кӧ «мьзгинийа Пʹадшатийе» у мьзгинийа ԛәнщийа нәһежа жь Хԝәде, йәк ә?

⁴ Ԝан рʹожед ахьрийеда щьмәʹта Йаһоԝа бәла дькьн «мьзгинийа Пʹадшатийе . . . кӧ һʹәму мьләтарʹа бьбә шәʹдәти» (Мәт. 24:14). Әԝ «мьзгини» кӧ әм бәла дькьн, әԝ ӧса жи те һʹәсабе мьзгинийа ԛәнщийа нәһежа жь Хԝәде. Ле чьрʹа әм дькарьн әԝе йәке бежьн? Чьмки һʹәму кʹәрәм, кʹижан кӧ әме бьстиньн бь сайа Пʹадшатийа Хԝәде, жь ԛәнщийа Йаһоԝа те (Әфәс. 1:3). Бәле, Паԝлос гәләк рʹази бу жь Йаһоԝа бона ԛәнщийа ԝи. Ле һун рʹази нә жь Хԝәде сәва ԛәнщийа нәһежа, кӧ әԝ һьндава мә дьдә кʹьфше? (Бьхунә Рʹомайи 1:14-16.)

⁵ Тʹема пешьнда әм пеһʹәсийан, кӧ рʹаст ә әм мәрьвнә гӧнәкʹар ьн, ле жь ԛәнщийа Йаһоԝа әм гәләк щурʹә кʹаре дьстиньн. Мә гәләк кʹәрәм стандийә жь Йаһоԝа, ләма әм борщдар ьн мәрьвед дьненарʹа жи гьли кьн дәрһәԛа һʹьзкьрьна Йаһоԝа. Әм ӧса жи ԝанрʹа гәрәке гьли кьн, кӧ чь кʹаре әԝана дькарьн бьстиньн жь һʹьзкьрьна ԝи. Ле ча әм дькарьн али мәрьвед дьн бькьн, кӧ әԝана рʹази бьн сәва ԛәнщийа нәһежа, кӧ Хԝәде дьдә кʹьфше.

6, 7. Чахе әм мәрьварʹа гьли дькьн дәрһәԛа кʹьрʹине, бь ве йәке әм ча мьзгине бәла дькьн дәрһәԛа ԛәнщийа Хԝәде?

⁶ Иро, ԛә хәма мәрьва нинә чахе әԝана гӧнә дькьн. Ләма әԝана фәʹм накьн кӧ чьрʹа әԝана һʹәԝще кʹьрʹине нә. У әԝ мәрьв һе зедә у зедә избат дьбьн, кӧ жийина ԝан бәхтәԝарийе ԝанрʹа найнә. Гәләк жь ԝана фәʹм накьн кӧ чь йә гӧнә, у ча әԝ сәр мә һʹӧкӧм дькә. Тʹәне паши хәбәрдана тʹәви Шәʹдед Йаһоԝа, әԝана әве йәке фәʹм дькьн. Әԝана ӧса жи ньзаньн кӧ чь ԝанрʹа лазьм ә, сәва әԝана жь һʹӧкӧме гӧнә аза бьн. Ле чахе әԝана педьһʹәсьн кӧ Йаһоԝа Кӧрʹе хԝә шандә сәр әʹрде, у сәва мә ԛӧрбан кьр, әԝ мәрьвед дьлсах гәләк жь Хԝәде рʹази дьбьн. Әԝана дьлша дьбьн кӧ әԝ кʹьрʹин һатә дайине, сәва һʹәму мәрьв жь гӧнә у мьрьне хьлаз бьн. У әԝана фәʹм дькьн кӧ Йаһоԝа әв йәк кьр, жь бо һʹьзкьрьна хԝәйә мәзьн у ԛәнщийа нәһежа (1 Йуһʹн. 4:9, 10).

⁷ Дина хԝә бьдьне, кӧ Паԝлос чь гот дәрһәԛа Кӧрʹе Йаһоԝайи һʹьзкьри: «Йәктийа ԝида [Исада] әм аза бунә бь хуна ԝи, аԝа готи афубуна гӧна стандийә. Әва йәка жь дәԝләмәндтийа кʹәрәма ԝи [Йаһоԝа] йә» (Әфәс. 1:7). Ԛӧрбана Иса избат дькә һʹьзкьрьна Хԝәде у ԛәнщийа Ԝийә мәзьн һьндава  мә. Чьԛас әм дьлрʹьһʹәт дьбьн кӧ әм заньн, ԝәки һәрге әм баԝәрийа хԝә ԛӧрбана Иса тиньн, гӧнед мә ԝе бенә бахшандьне. Хенщи ԝе йәке, исафа мә ԝе бәр Хԝәде тʹәмьз бә (Ибрн. 9:14). Бь рʹастийе жи, әԝ чьԛас мьзгиникә баш ә, кʹижан кӧ әм дькарьн мәрьварʹа гьли кьн!

8. Чьрʹа мәрьвед гӧнәкʹаррʹа лазьм ә тʹәви Хԝәде ль һәв бен?

⁸ Һʹәта кӧ мәрьв баԝәрийа хԝә ԛӧрбана Иса найньн, Хԝәде ԝана һʹәсаб дькә ча дьжмьнед хԝә. Ләма әм борщдар ьн ԝанрʹа гьли кьн кӧ әԝана дькарьн бьбьнә досте Хԝәде. Йуһʹәннайе шанди ньвиси: «Әԝе кӧ Кӧрʹ баԝәр дькә, жийина ԝийә һʹәта-һʹәтайе һәйә. Әԝе кӧ гӧрʹа Кӧрʹ накә, әԝ жийине набинә, ле хәзәба Хԝәде ль сәр ԝи дьминә» (Йуһʹн. 3:36). Әм бәхтәԝар ьн кӧ ԛӧрбана Иса мәщале дьдә мә, кӧ әм бьбьнә досте Хԝәде. Паԝлос дәрһәԛа ԝе йәке гот: «Һун жи кӧ ԝәхтәке жь дәст фькьр у кьрьнед хԝәйә хьраб, хәриб у нәйаред Хԝәде бун, ле ньһа әԝи бь мьрьна Мәсиһә бәдәни һун тʹәви хԝә ль һәв анин» (Колс. 1:21, 22).

9, 10. а) Чь щабдари Мәсиһ дайә рʹункьрийа? б) Ча «пәзед дьн» али рʹункьрийа дькьн?

⁹ Иса шьхӧл да рʹункьрийед сәр әʹрде, кʹижан кӧ Паԝлос нав дькә «ԛӧльхе льһәванине». Паԝлос рʹункьрийед ԛьрʹна йәкерʹа гот: «Әв һәр тьшт жь Хԝәдеда нә, кӧ әм бь Мәсиһ тʹәви хԝә ль һәв анин у ԛӧльхе льһәванине да мә. Аԝа готи Хԝәде бь Мәсиһ дьнйа тʹәви хԝә ль һәв ани, нәһәԛийед ԝан ԝанрʹа нәһәԛи һʹәсаб нәкьрьн у готьна льһәванине спартә мә. Аԝа әм жь алийе Мәсиһда ԛасьдийе дькьн, чаԝа кӧ Хԝәде бь мә һиви жь ԝә дькә: ‹Әм алийе Мәсиһда рʹәща жь ԝә дькьн, тʹәви Хԝәде ль һәв ԝәрьн!›» (2 Корн. 5:18-20).

¹⁰ Бона «пәзед дьн» әԝ ԛәдьрәки мәзьн, кӧ әԝана дькарьн ве хьзмәтийеда али рʹункьрийа бькьн (Йуһʹн. 10:16). Чаԝа «ԛасьдед» Иса, «пәзед дьн» гәләк кʹар дькьн шьхӧле бәлакьрьна мьзгинийеда. Әԝана мәрьва рʹастийе һин дькьн у али ԝан дькьн кӧ әԝана незики Хԝәде бьн у бьбьнә досте ԝи. Әԝ һәйә пʹарәкә шьхӧле бәлакьрьна мьзгине дәрһәԛа ԛәнщийа нәһежа жь Хԝәде.

11, 12. Чьрʹа чахе мәрьв педьһʹәсьн кӧ әԝана дькарьн Йаһоԝарʹа дӧа бькьн, әԝ йәк бона ԝан мьзгини йә?

¹¹ Гәләк мәрьв дӧа дькьн, чьмки әԝана паши дӧа хԝә баш тʹәхмин дькьн. Ле әԝана баԝәр накьн кӧ Хԝәде бь рʹастийе дӧайед ԝан дьбьһе. Әԝана гәрәке бьзаньбьн кӧ Йаһоԝа әԝ кәс ә, йе кӧ дӧа «дьбьһе». Даԝьде зәбурбеж ньвиси: «Әй тӧ, йе кӧ дӧайан дьбьһизә, ԝе һʹәму мьров бен ба тә. Гӧнә зора мьн дьбьн, һәрчи сәрһьлданед мә . . . , тӧ ԝан дьбәхшини» (Зәб. 65:2, 3, ИМ).

¹² Иса шагьртед хԝәрʹа гот: «Һәгәр һун пе наве мьн тьштәки бьхԝазьн әзе бькьм» (Йуһʹн. 14:14). Фәʹмдари йә, кӧ «тьштәки» ль ԝьр те һʹәсабе, чь кӧ ль гора ԛьрара Йаһоԝа йә. Йуһʹәнна гот: «Әм ль бәр Хԝәде рʹуспи нә, чьмки әм заньн, һәгәр әм тьштәки ль гора хԝәстьна ԝи же бьхԝазьн, әԝ дәнге мә дьбьһе» (1 Йуһʹн. 5:14). Чьԛас әм ша дьбьн чахе әм мәрьва һин дькьн, ԝәки әԝана бь дӧа незики «тʹәхте Хԝәдейи кʹәрәме» дьбьн, демәк Йаһоԝа! (Ибрн.  4:16). Әм гәрәке ԝана һин кьн кӧ рʹаст дӧа бькьн, Кәсе рʹастрʹа дӧа бькьн, у бона тьштед рʹаст дӧа бькьн. Ӧса әме али ԝан бькьн, кӧ әԝана незики Йаһоԝа бьн у ԝәʹде чәтьнайа бәрдьлийе бьстиньн (Зәб. 4:1; 145:18).

13, 14. а) Рʹункьри ԝе чь ԛәдьрәки мәзьн ахьрийеда бьстиньн? б) Рʹункьри ԝе чь шьхӧләкә баш бькьн сәва инсанәте?

¹³ Нава зәманед кӧ ԝе бен, Йаһоԝа ԝи чахи жи ԝе ԛәнщийа хԝә бьдә кʹьфше. Ле чаԝа? Хԝәде ԝе ԛәдьрәки мәзьн бьдә 144 000, йед кӧ сәр әʹзмана тʹәви Мәсиһ ԝе сәрԝертийе бькьн. Дәрһәԛа ԝе йәке Паԝлос ньвиси: «Хԝәдейе кӧ хԝәйе рʹәʹма дәԝләмәнд ә, бь һʹьзкьрьна хԝәйә мәзьн, бь кʹижане әм һʹьзкьрьн, гава әм һе жь дәст нәһәԛийед хԝә мьри бун, әԝи тʹәви Мәсиһ әм сах кьрьн. Бь кʹәрәме һун хьлазбуйи нә! Йәктийа ԝида әм жь мьрьне рʹакьрьн у тʹәви ԝи әм ль дийаре әʹзмана данә рʹуньштандьне, бь сайа Мәсиһ Иса. Ԝи әв йәк кьр, ԝәки ль нава ԝан зәманед кӧ ԝе бен, дәԝләмәндтийа кʹәрәма хԝәйә беһьмбәр, һьндава мәда бь сайа Мәсиһ Иса, бь ширьнайи бьдә кʹьфше» (Әфәс. 2:4-7).

¹⁴ Чәтьн ә әм бьдьнә бәр чʹәʹве хԝә, кӧ чьԛас тьштед баш Йаһоԝа һазьр кьрийә бона Мәсиһийед рʹункьри, чахе әԝана сәр әʹзмана тʹәви Мәсиһ сәрԝертийе бькьн (Луԛа 22:28-30; Фили. 3:20, 21; 1 Йуһʹн. 3:2). Йаһоԝа ԝе һьндава рʹункьрийа «дәԝләмәндтийа кʹәрәма хԝәйә беһьмбәр» бьдә кʹьфше. Әԝана ԝе бь симболик бьбьнә «Оршәлима ну», йане бука Мәсиһ (Әʹйан. 3:12; 17:14; 21:2, 9, 10). Әԝана ԝе тʹәви Иса «мьләта» ԛәнщ кьн. Әԝана ԝе али мәрьва бькьн кӧ жь гӧнә у мьрьне аза бьн, сәва кӧ бьбьнә беԛьсур. (Бьхунә Әʹйанти 22:1, 2, 17.)

15, 16. Ахьрийеда ча Йаһоԝа ԝе һьндава «пʹәзед дьн» ԛәнщийа нәһежа бьдә кʹьфше?

¹⁵ Әфәси 2:7-да, әм дьхуньн кӧ «нава . . . зәманед кӧ ԝе бен» Хԝәде ԝе ԛәнщийа нәһежа әʹйан кә. Бешьк, Йаһоԝа «дәԝләмәндтийа кʹәрәма хԝәйә беһьмбәр», ԝе дьнйа тʹәзәда жи сәр әʹрде мәрьварʹа әʹйан кә (Луԛа 18:29, 30). Йаһоԝа ԝе ԛәнщийа хԝәйә лапә мәзьн бьдә кʹьфше, чахе мәрьва жь мьрьне рʹакә (Иб. 14:13-15; Йуһʹн. 5:28, 29). Ле кʹе нә әԝ мәрьв, йед кӧ ԝе жь мьрьне рʹабьн? Әԝ һәнә мәрьвед амьн йед кӧ пешийа мьрьна Иса мьрьнә, у ӧса жи «пәзед дьн», кʹижан кӧ ԝәʹде ԝан рʹожед ахьрийеда мьрьнә. Әԝ һʹәму мәрьвед амьн ԝе вәгәрʹьнә жийине, сәва бәрдәԝам кьн Йаһоԝарʹа хьзмәт кьн.

¹⁶ Ӧса жи бь милйона мәрьвед кӧ дәрһәԛа Хԝәде ньзаньбун у мьрьнә, ԝе жь мьрьне рʹабьн. Ԝанрʹа ԝе мәщал бе дайине кӧ сәрԝертийа Йаһоԝа ԛәбул кьн. Йуһʹәнна ньвиси: «Һьнге мьн мьрийед бьчʹук у мәзьн дитьн кӧ ль бәр тʹәхт сәкьни бун. Кʹьтеб вәбун у кʹьтебәкә дьн жи вәбу, аԝа готи кʹьтеба жийине. Диԝана мьрийа анәгори ԝан кьред ԝанә кʹьтебада ньвисар һатә кьрьне. Бәʹре мьрийед хԝә дан, Мьрьне у Дийаре Мьрийа жи мьрийед хԝә дан. Диԝана һәр мәрьвәки жь ԝан анәгори кьрьнед ԝан һатә кьрьне» (Әʹйан. 20:12, 13). Бәле, әԝ мәрьв ԝе пебьһʹәсьн дәрһәԛа Йаһоԝа, у бьзаньбьн чаԝа әԝана дькарьн принсипед ԝи, кʹижан кӧ Кʹьтеба Пирозда һәнә, биньн сери. Хенщи ве йәке, әԝана ԝе пе рʹебәрийед тʹәзә һәрʹьн, кʹижан кӧ ԝе «кʹьтебада» ньвисар бьн. Йаһоԝа ԝе пе ԝан рʹебәрийед тʹәзә жи, ԛәнщийа нәһежа әʹйан кә.

17. Әм чь гәрәке бира хԝәда хԝәй кьн, чахе мьзгине бәла дькьн?

¹⁷ Хьлази гәләк незик ә. Ләма илаһи ньһа гәләк фәрз ә кӧ әм мьзгинийа Пʹадшатийе бәла кьн! (Марԛ. 13:10). Әв мьзгини әʹйан дькә ԛәнщийа нәһежа жь Йаһоԝа, у әԝе йәке әм гәрәке бира хԝәда хԝәй кьн. Чахе әм мьзгинийе бәла дькьн, нета мә әԝ ә кӧ Йаһоԝа рʹумәт у һӧрмәт кьн. Әм әве йәке дькарьн бькьн, чахе мәрьварʹа гьли дькьн дәрһәԛа һʹәму кʹәрәмед Йаһоԝа, кʹижан кӧ дьнйа тʹәзәда әԝ ԝе сәр мәрьвада бьбаринә. Әм гәрәке мәрьварʹа бежьн кӧ Хԝәде жь бо ԛәнщийа хԝәйә мәзьн ԝе ԝан һʹәму соза бинә сери.

18, 19. Әм ча дькарьн рʹумәт кьн ԛәнщийа нәһежа кӧ Йаһоԝа дьдә кʹьфше?

¹⁸ Чахе әм мәрьварʹа шәʹдәтийе дьдьн, әм дькарьн ԝанрʹа шьровәкьн кӧ бьн сәрԝертийа Мәсиһ, инсанәт ԝе бь тʹәмами кʹаре бьстинә жь кʹьрʹине. Әм гәрәке шьровәкьн кӧ бь сайа ве кʹьрʹине ахьрийеда һʹәму мәрьв ԝе бьбьнә беԛьсур. Кʹьтеба Пироз дьбежә: «Әʹфьрине хԝәха жи жь ԝе хӧламтийа пʹучʹ аза бьн у тʹәви азайи у рʹумәта зарʹед Хԝәде бьн» (Рʹом. 8:21). Әԝ йәк ԝе тʹәне бь сайа ԛәнщийа Йаһоԝайә мәзьн бе стандьн.

¹⁹ Әԝ ԛәдьрәки мәзьн ә сәва мә, кӧ әм дькарьн мәрьварʹа гьли кьн дәрһәԛа созед пʹьрʹ баш, кʹижан кӧ Әʹйанти 21:4, 5-да һәнә: «[Хԝәде] жь чʹәʹвед ԝан һʹәму һесьред ԝан паԛьж кә у иди мьрьне тʹӧнәбә, нә шин, нә гьри, нә еш-ешук, чьмки тьштед бәре дәрбаз бун». У Йаһоԝа ль сәр тʹәхт рʹуньшти мәрʹа соз дьдә: «Ва әз һәр тьшти ну чедькьм». Ӧса жи Йаһоԝа дьбежә: «Бьньвисә, чьмки әв хәбәр амьн у рʹаст ьн». Бәле, чахе әм бь хирәт мьзгине бәла дькьн, әм бь рʹастийе жи ԛәнщийа Йаһоԝайә мәзьн рʹумәт дькьн!