Жь дәстпека әʹфьрандьна инсанәте Әʹфьрандаре мә бь мәләка у пʹехәмбәра мәрьварʹа хәбәр дьда. Хԝәде ӧса жи сафи кьр, ԝәки ԛьрара хԝә у созед хԝә бьдә ньвисаре. Әв созед Хԝәде дькарьн сәр ахьрийа тә һʹӧкӧм бьн. Ле дәрһәԛа ԝан соза тӧ жь кʹӧ дькари пебьһʹәси?

Хԝәде соз-ԛьраред хԝә бь сайа пʹехәмбәра да ньвисаре. Иро дәрһәԛа ве йәке әм дькарьн Ньвисаред Пирозда бьвиньн (2 Тимотʹейо 3:16). Гәло Хԝәде чь щурʹәйи бь пʹехәмбәра әʹламәтийа хԝә дьда ньвисаре? (2 Пәтрус 1:21) Хԝәде нет-фькьред хԝә дькьрә һʹьше ньвискʹара у ԝана дьньвисин. Әм мәсәләке биньн. Һәрге мәзьне хәбате хәбатчийе хԝәрʹа бежә, кӧ бь готьна ԝи нәʹме бьньвисә, диса жи ньвискʹаре ве нәʹме мәзьне хәбате йә. Анәгори ве йәке, Хԝәде мәрьв данә хәбате, сәва кӧ ԛьрара хԝә бьдә ньвисаре, ле диса жи Ньвискʹаре әʹсьлийә Ньвисаред Пироз, Хԝәде йә.

Хԝәде дьхԝазә, ԝәки һʹәму мәрьв Хәбәра ԝи бьхуньн у фәʹм бькьн, чьмки әʹламәтийа ԝи пʹьрʹ фәрз ә. Иро «Мьзгинийа ԝийә һʹәта-һʹәтайе» дьгьһижә «һʹәму мьләта, бәрәка, зьмана у щьмәʹта» (Әʹйанти 14:6). Бь кʹәрәма Хԝәде, Ньвисаред Пироз бь тʹәмами йан пʹаред ԝе, ль сәр 3 000 зьмана зедәтьр һатьнә ԝәлгәрʹандьне. Дьнйайеда тʹӧ кʹьтеб ӧса бәлабуйи нинә чаԝа әв.