1-2. (а) Паԝлосе шанди чьрʹа готьбу, кӧ һʹӧнӧре «һәри мәзьн һʹәзкьрьн ә»? (б) Әме ньһа дина хԝә бьдьнә кʹижан пьрса?

 ГАВА Паԝлосе шанди бәʹса гӧмане, баԝәрийе у һʹәзкьрьне кьр, әԝи гот кӧ «йа һәри мәзьн һʹәзкьрьн ә» (1 Корьнтʹи 13:13, ИМ). Паԝлос чьрʹа ӧса гот? Дьнйа тʹәзәда ԝе ида нәлазьм бә, ԝәки әм баԝәр кьн, кӧ созед Хԝәде ԝе бенә сери, чьмки әме бь чʹәʹве хԝә бьвиньн ԝәки әԝ ча һатьнә сери. Ле тьштәк ԝе һәрһәйи бьминә. Гәло чь? Гәрәке әм тʹьме Йаһоԝа у мәрьва һʹәз бькьн. Әв һʹәзкьрьн ԝе һʹәта-һʹәтайе зедә бә.

² Әм тʹьме һʹәԝще һʹәзкьрьне нә, ләма жи әме дина хԝә бьдьнә се пьрса. Йа йәке, чьрʹа әм гәрәке һәвдӧ һʹәз бькьн? Йа дӧда, әм ча дькарьн һьндава һәвда һʹәзкьрьне бьдьнә кʹьфше? Йа сьсийа, әм ча дькарьн һʹәзкьрьна һьндава һәвда ԛәԝи хԝәй кьн?

3. Чьрʹа әм гәрәке һәвдӧ һʹәз бькьн?

³ Чьрʹа фәрз ә ԝәки әм һәвдӧ һʹәз бькьн? Шагьртед Исайә рʹаст бь һʹәзкьрьне тенә наскьрьне. Иса шандийед хԝәрʹа ӧса гот: «Бь ве йәке һʹәмуйе заньбьн һун шагьртед мьн ьн, һәгәр һун һәвдӧ һʹьз бькьн» (Йуһʹәнна 13:35). Һʹәзкьрьн ӧса жи мә йәктийеда хԝәй дькә. Паԝлос һʹәзкьрьн нав кьр ча «йәктийа тʹам» (Колоси 3:14). Хенщи ве йәке, Йуһʹәннайе шанди ӧса хушк-бьрарʹа ньвиси: «Әԝе кӧ Хԝәде һʹьз дькә, әԝ гәрәке бьре хԝә жи һʹьз бькә» (1 Йуһʹәнна 4:21). Гава әм  һʹәзкьрьне һьндава һәвда дьдьнә кʹьфше, бь ве йәке әм әʹйан дькьн, кӧ Йаһоԝа һʹәз дькьн.

4-5. Һʹәзкьрьна һьндава Хԝәде чаԝа һʹәзкьрьна һьндава хушк-бьрава гьредайи йә? Мәсәле бинә.

⁴ Гәло һʹәзкьрьна мәйә һьндава Хԝәде, чаԝа һʹәзкьрьна мәйә һьндава хушк-бьрава гьредайи йә? Мәсәлә, ԝәрә әм бьфькьрьн кӧ чаԝа дьл гьредайи йә тʹәви пʹаред бәдәне. Гава һʹәким сәр зәнда мә ледана дьле мә чап дькә, әԝ дькарә тедәрхә, кӧ дьле мә чь һʹалида нә. Жь ве мәсәле, әм чь дькарьн һин бьн?

⁵ Чаԝа кӧ ледана дьле мә дәрһәԛа сьһʹәт-ԛәԝата мә һʹәкимрʹа әʹйан дькә, кӧ дьле мә чь һʹалида нә, ӧса жи һʹәзкьрьна мәйә һьндава кәсед дьн нишан дькә, кӧ әм Хԝәде чьԛас һʹәз дькьн. Һәрге әм тедәрдьхьн кӧ һʹәзкьрьна мә һьндава хушк-бьра кем буйә, әв йәк әʹйан дькә, кӧ һʹәзкьрьна мә һьндава Йаһоԝа жи кем буйә. Ле гава әм һәр рʹож һʹәзкьрьна хԝә хушк-бьрарʹа нишан дькьн, әв йәк дьдә кʹьфше, кӧ һʹәзкьрьна мә һьндава Хԝәде ԛәԝи йә.

6. Чьрʹа әм гәрәке хушк-бьра һʹәз бькьн? (1 Йуһʹәнна 4:7-9, 11)

⁶ Һәрге һʹәзкьрьна мә һьндава хушк-бьрада дьле мәда кем дьбә, әв йәк проблемәкә мәзьн ә. Гәло чьрʹа? Чьмки әв нишана ве йәке йә, кӧ рʹӧһʹанийа мә бьн хофеда нә. Йуһʹәннайе шанди әшкәрә готьбу: «Һәгәр әԝе бьре хԝә кӧ дьбинә һʹьз накә, ԝе чаԝа бькарьбә Хԝәде һʹьз бькә кӧ набинә?» (1 Йуһʹәнна 4:20). Әв йәк чь дәрс ә бона мә? Сәва кӧ Йаһоԝа Хԝәде жь мә рʹази бә, әм гәрәке «һәвдӧ һʹьз бькьн» (Бьхунә 1 Йуһʹәнна 4:7-9, 11).

7-8. Әм ча дькарьн һʹәзкьрьна хԝә кәсед дьнрʹа бьдьнә кʹьфше?

⁷ Хәбәра Хԝәдеда гәләк щар тʹәми һатийә дайине, кӧ «һәвдӧ һʹьз бькьн» (Йуһʹәнна 15:12, 17; Рʹомайи 13:8; 1 Тʹесалоники 4:9; 1 Пәтрус 1:22; 1 Йуһʹәнна 4:11). Һʹәзкьрьн жь дьл те, у тʹӧ кәс нькарә дьле мә бьвинә. Ле мәрьв ча дькарьн тедәрхьн, кӧ әм бь дьл у щан ԝана һʹәз дькьн? Һʹәзкьрьна мә ԝе пе готьн у кьред мә бе кʹьфше.

⁸ Щурʹә-щурʹә метод һәнә, кӧ ча әм дькарьн һʹәзкьрьна хԝә хушк-бьрарʹа бьдьнә кʹьфше. Мәсәлә, Кʹьтеба Пирозда те готьне ԝәки һәвдӧрʹа «рʹастийе бежьн» (Зәкәрйа 8:16). «Һәврʹа әʹдьлайийеда бьжин» (Маркос 9:50). «Ԛәдьркьрьнеда жь һәвдӧ дәрбазтьр бьн» (Рʹомайи 12:10). «Һәвдӧ ԛәбул кьн» (Рʹомайи 15:7). Бәрдәԝам кьн «бьбахшиньнә һәв» (Колоси 3:13). «Баред һәвдӧ һьлдьн» (Галати 6:2). «Бәр дьле һәвда ԝәрьн» (1 Тʹесалоники 4:18). «Аликʹарийа һәвдӧ бькьн» (1 Тʹесалоники 5:11). «Бона һәв дӧа бькьн» (Аԛуб 5:16).

9. Диса кʹижан һʹӧнӧр ԝе али мә бькьн, мәрьва һʹәз кьн у бәр дьле ԝанда бен? (Бьньһерʹә ӧса жи шькьл.)

⁹ Ԝәрә әм дина хԝә бьдьнә ве ширәта Паԝлосе шанди: «Бәр дьле һәвда ԝәрьн». Гәло чьрʹа фәрз ә, кӧ әм бәр дьле һәвда бен, у әв йәк ча һʹәзкьрьна мә дьдә кʹьфше? Ль гора каники, хәбәред «бәр дьле һәвда ԝәрьн», кӧ Паԝлосе шанди ве рʹезеда да хәбате, те һʹәсабе кӧ мәрьв «ԝәʹде гәләк чәтьнда кʹеләка кәсәки дьсәкьнә у бәрдьлийе дьдә ԝи». Чахе әм бәрдьлийе дьдьнә  хушк йан бьраки, әм али ԝи дькьн ԝәки әԝ диса бәрдәԝам кә бь амьни Йаһоԝарʹа хьзмәт кә. Һәр щар чахе әм бәр дьле кәсәкида тен, әм һʹәзкьрьна хԝә һьндава ԝида дьдьнә кʹьфше (2 Корьнтʹи 7:6, 7, 13).

10. Ортʹа дьлшәԝати у бәрдьлийеда чь һәвгьредан һәйә?

¹⁰ Дьлшәԝати у бәрдьли һәвва гьредайи нә. Гәло чьда? Мәрьве дьлшәԝат дьхԝазә бәрдьлийе бьдә мәрьва у дәрдед ԝан сьвьк кә. Демәк, пешийе дьле мә бона кәсәки дьшәԝьтә у паше әм бәр дьле ԝида дьчьн. Дина хԝә бьдьне, кӧ ча Паԝлосе шанди дьдә кʹьфше, ԝәки дьлшәԝатийа Йаһоԝа, Ԝи һелан дькә бәрдьлийе бьдә кʹьфше. Паԝлос Йаһоԝа нав кьр ча «Баве дьлшәԝатийе у Хԝәдейе һʹәму бәрдьлийе» (2 Корьнтʹи 1:3). Йаһоԝа Хԝәде «Баве дьлшәԝатийе» йә, ләма жи дьле ԝи бона мә дьшәԝьтә у әԝ рʹожед чәтьнда кʹеләка мә йә (2 Корьнтʹи 1:4). Чаԝа кӧ рʹожәкә гәрмда ава сар тʹибуна мә дьшкенә у дьле мә рʹьһʹәт дькә, Йаһоԝа жи рʹожед чәтьнда бәр дьле мәда те у дьле мә һеса дькә. Ле әм ча дькарьн чʹәʹв бьдьнә Йаһоԝа, демәк һьндава мәрьвада дьлшәԝат бьн у бәрдьлийе бьдьнә ԝан? Мәщаләк кӧ әм ча дькарьн ве йәке бькьн әв ә, ԝәки һʹӧнӧред ӧса нав хԝәда пешда биньн, кʹижан кӧ ԝе али мә бькьн дьлшәԝатийе у бәрдьлийе бьдьнә кʹьфше. Гәло әԝ чь һʹӧнӧр ьн?

11. Ль гора Колоси 3:12 у 1 Пәтрус 3:8, сәва кӧ әм бәр дьле һәвда бен, әм гәрәке кʹижан һʹӧнӧра пешда биньн?

¹¹ Гәло чь ԝе али мә бькә бәрдәԝам кьн һәр рʹож һʹәзкьрьне бьдьнә кʹьфше у бәр дьле һәвда бен? Әм гәрәке бәрдьли, һʹәзкьрьна бьратийе у дьлшәԝати нав хԝәда пешда биньн (Бьхунә Колоси 3:12; 1 Пәтрус 3:8). Әԝ һʹӧнӧр ча ԝе али мә бькьн? Һәрге әм һьндава хушк-бьрада дьлшәԝат бьн у бона ԝан хәм бькьн, хԝәстьна мә ԝе ԛәԝи бә бәр дьле ԝанда бен, чахе әԝана рʹасти кӧл-дәрда бен. Чаԝа кӧ Иса гот, «дьл бь чь тʹьжә йә, зьман әве жи дьбежә. Мәрьве ԛәнщ тьштед ԛәнщ дьбежә, чьмки дьле ԝи бь тьштед ԛәнщ тʹьжә йә. Ле мәрьве хьраб тьштед хьраб дьбежә, чьмки дьле ԝи бь тьштед хьраб тʹьжә йә» (Мәтта 12:34, 35). Бәле, гава әм бәр дьле хушк-бьрада тен, әм нишан дькьн кӧ әм бь рʹасти жи ԝана һʹәз дькьн.

12. (а) Чьрʹа әм гәрәке һʹьшйар бьминьн? (б) Әме ньһа щаба кʹижан пьрсе бьстиньн?

¹² Әм дьхԝазьн тʹьме «һәвдӧ һʹьз бькьн» (1 Йуһʹәнна 4:7). Ле әм гәрәке бир нәкьн, кӧ Иса гот ԝәки «һʹәзкьрьна гәләка ԝе сар бә» (Мәтта 24:12). Иса нәгот кӧ һʹәзкьрьн ԝе нава һʹәчʹи зәʹф шагьртед ԝида сар бә. Ле диса жи әм гәрәке һʹьшйар бьминьн, ԝәки дьлсарийа мәрьвед ве дьне, сәр һʹәзкьрьна мә һʹӧкӧм нәкә. Ләма жи, ԝәрә әм дина хԝә бьдьнә ве пьрса фәрз: Әм ча дькарьн тедәрхьн, һәла һʹәзкьрьна мә һьндава хушк-бьрада ԛәԝи йә йан на?

13. Чь дькарә һʹәзкьрьна мә бьщерʹьбинә?

¹³ Һьнә дәрәщед жийина мәда, готьн у кьред мә дьдьнә кʹьфше, ԝәки әм кәсед дьн чьԛас һʹәз дькьн (2 Корьнтʹи 8:8). Пәтрусе шанди дәрһәԛа ве йәке  ӧса гот: «Бәри һәр тьшти, һʹьзкьрьна ԝә һьндава һәвда бь дьл у щан бә, чьмки һʹьзкьрьн гәләк гӧна дьньхемә» (1 Пәтрус 4:8). Ле жь бо кемасийед хушк-бьра, һʹәзкьрьна мә дькарә бе щерʹьбандьне.

14. Ль гора 1 Пәтрус 4:8, гәрәке һʹәзкьрьна мә чаԝа бә? Мәсәле бинә.

¹⁴ Ԝәрә әм дьһа кʹур дина хԝә бьдьнә гьлийед Пәтрусе шанди. Пʹара пешьнда йа рʹеза 8, те готьне кӧ һʹәзкьрьна мә гәрәке «бь дьл у щан бә». Ле пʹара дӧдада те готьне кӧ әв һʹәзкьрьн ча сәр мә һʹӧкӧм дькә. Әв мә һелан дькә чʹәʹве хԝә сәр шашийед хушк-бьра дадьн. Әм дькарьн ве йәке бәрамбәри мәсәләке бькьн. Бьдьнә бәр чʹәʹве хԝә кӧ сьфрәк гәләк һʹәрʹьши йә у ләкʹә сәр ьн. Һәрге пʹарчʹе сьфьре бавежьнә сәр, ԝе нә кӧ тʹәне ләкʹәк йан дӧдӧ бе вәшартьне, ле гәләк ԛьсуред сьфьре. Һәма бь ԝи щурʹәйи, һәрге һʹәзкьрьна мә һьндава хушк-бьра бь дьл у щан бә, әме бькарьбьн нә кӧ тʹәне шашик йан дӧда бьбахшиньнә ԝан, ле «гәләк гӧна».

15. Һәрге һʹәзкьрьна мә ԛәԝи бә, әме бькарьбьн чь бькьн? (Колоси 3:13).

 ¹⁵ Һʹәзкьрьна мә һьндава хушк-бьрада гәрәке ӧса ԛәԝи бә, ԝәки әм бькарьбьн бь дьл у щан һәла һе шашийед ԝанә мәзьн жи бьбахшиньн (Бьхунә Колоси 3:13). Гава әм ӧса дькьн, бь ве йәке әм дьдьнә кʹьфше, кӧ һʹәзкьрьна мә ԛәԝи йә у әм дьле Йаһоԝа ша дькьн. Ӧса жи чь дькарә али мә бькә, ԝәки әм шашийед кәсед дьн бьбахшиньн у зу нәхәйидьн?

16-17. Әм чаԝа дькарьн чʹәʹвед хԝә сәр ԛьсур у кемасийед кәсед дьн бьгьрьн? Мәсәле бинә. (Бьньһерʹә ӧса жи шькьл.)

¹⁶ Дәԝса кӧ дина хԝә бьдьнә ԛьсур у кемасийед хушк у бьра, дина хԝә бьдьнә һʹӧнӧред ԝанә баш. Ԝәрә әм мәсәләке шеԝьр кьн. Бьдә бәр чʹәʹве хԝә, кӧ тӧ тʹәви хушк-бьра ԝәʹдәки баш дәрбаз дьки. Пешийа кӧ һәв бәла бьн, тӧ шькьле кʹоме дькʹьшини. Тӧ дӧ шькьлед дьн жи дькʹьшини, чьмки дьԛәԝьмә шькьле пешьн рʹьнд дәрнәйе. Ньһа се шькьл дәсте тәда ньн. Сәр шькьләки, тӧ дьвини ԝәки бьрак рʹьнд дәрнәкʹәтийә. Тӧйе чь бьки? Һәмьки, тӧйе ԝи шькьли тʹәмьз ки, чьмки дӧ шькьлед дьн жи һәнә, сәр кʹижана һәр кәс бәдәԝ ә у бәшәра гьшка хԝәш ә.

 ¹⁷ Әм дькарьн биранинед хԝә бәрамбәри шькьлед ӧса бькьн. Гава әм тʹәви хушк-бьра ԝәʹдәки хԝәш дәрбаз дькьн, әм ван биранинед хԝә ԛә бир накьн. Ле рʹожәке, һәрге хушкәк йан бьрак дьле мә бешинә, гәло әме чь бькьн? Чаԝа кӧ әм дькарьн шькьләки нәрʹьнд тʹәмьз кьн, ӧса жи әм дькарьн ван тьштед нә баш бир кьн (Мәтʹәлок 19:11; Әфәси 4:32). Жь бо ве йәке, кӧ мә тʹәви хушк-бьра гәләк ԝәʹде баш дәрбаз кьрийә, әв йәк дькарә али мә бькә шашийед ԝан бир кьн. Бәле, әм дьхԝазьн тʹәне биранинед хԝәш бира хԝәда хԝәй кьн у ԛимәт кьн.

18. Ве готареда әм дәрһәԛа һʹәзкьрьне чь һин бун?

¹⁸ Әм чьрʹа дьхԝазьн һʹәзкьрьна ортʹа һәвда ԛәԝи хԝәй кьн? Чаԝа мә дит, һʹәзкьрьна мә һьндава хушк-бьра нишан дькә, кӧ әм бь рʹасти Йаһоԝа Хԝәде һʹәз дькьн. Әм чаԝа дькарьн һʹәзкьрьна хԝә кәсед дьнрʹа нишан кьн? Мәщаләк әԝ ә, кӧ әм бь дьлшәԝатийе «бәр дьле һәвда» бен. Гава әм ԛьсур у кемасийед кәсед дьн дьбахшиньн, һʹәзкьрьна мә һьндава һәвда ԛәԝи дьбә.

19. Чьрʹа гәләк фәрз ә, кӧ әм иро һʹәзкьрьне һәвдӧрʹа нишан кьн?

¹⁹ Гәло чьрʹа ӧса фәрз ә, кӧ әм иро һәв һʹәз бькьн? Пәтрус ӧса готьбу: «Ахьрийа һәр тьшти незик буйә. . . . Бәри һәр тьшти, һʹьзкьрьна ԝә һьндава һәвда бь дьл у щан бә» (1 Пәтрус 4:7, 8). Хьлазийа ве дьнйа хьраб незик дьбә, ләма жи әм гәрәке бона чь һазьр бьн? Иса пешда дәрһәԛа пәйчуйед хԝә ӧса готьбу: «Бона наве мьн һуне бәр чʹәʹве һʹәму мьләта рʹәш бьн» (Мәтта 24:9). Сәва кӧ әм һьмбәри ве нәфрʹәтийе Йаһоԝа Хԝәдерʹа амьн бьминьн, гәрәке әм тʹьфаԛи у йәктийа хԝә бьпʹарезьн. Һәрге әм хушк-бьра һʹәз бькьн, Мире-щьна ԝе тʹӧ щар нькарьбә мә жь һәв вәԛәтинә, чьмки һʹәзкьрьн мә «бь йәктийа тʹам һәвва гьредьдә» (Колоси 3:14; Филипи 2:1, 2).