Паԝлосе шанди заньбу кӧ пропаганда Шәйтʹан гәләк хоф ә. Ле йазьх һьнә Мәсиһи дьфькьрин, кӧ әԝ нә һаԛас хоф ә. Мәсәлә, ча те кʹьфше һьнә Мәсиһийед Корьнтʹи дьфькьрин, кӧ әԝана рʹӧһʹанида ԛәԝи нә у Шәйтʹан ԝе тʹӧ щар ԝана нәхальфинә (1 Корн. 10:12). Ләма жи Паԝлос әԝ ширәт да: «Әз дьтьрсьм, тӧԝәрә чаԝа мәʹр бь фелбазийа хԝә Һеԝа хапанд, ӧса жи әԝ һʹьше ԝә бьчәлԛинә у һун дәсте хԝә жь ширһʹәлали у дьлсахийа хԝәйә һьндава Мәсиһда бькьн» (2 Корн. 11:3).

Гьлийед Паԝлос нишан дькьн кӧ гәләк фәрз ә әм зәʹф хԝәда баԝәр нибьн. Сәва кӧ Шәйтʹан ԝә нәхальфинә, һун гәрәке рʹьнд һаш пе һәбьн кӧ пропаганда ԝи чьԛас хоф ә у зийанкʹар ә. Һьнге һуне бькарьбьн хԝә хԝәй кьн жь ԝе йәке.

Пропаганда чь йә? Әԝ һәйә информасийа дәрәԝ, кʹижан кӧ мәрийа дьхальфинә у һʹӧкӧм дькә сәр фькьред ԝан у кьред ԝан. Ль гора кʹьтебәке, пропаганда әԝ һәйә «дәрәԝи, ԛәлпи, хальфандьн, кʹижан кӧ һʹӧкӧм дькә сәр психоложийайе», йане сәр һʹьше мәрьва. Ве кʹьтебеда ӧса жи һатә готьне кӧ пропаганда «нәщайиз ә, зийандар ә, у бь нәһәԛийе йә» («Propaganda and Pеrsuasion»).

Бәле, пропаганда гәләк хоф ә, чьмки әԝ дькарә һеди-һеди ӧса һʹӧкӧм кә сәр фькьред мә, кӧ әм ԛә һаш пе жи тʹӧнә бьн. Әм дькарьн әԝе йәке бәрамбәри газе кьн, чьмки газ жи найе кʹьфше у нә жи бина ԝе һәйә. Експертәки, наве кʹижани Ванс Пакерд ә, гот кӧ пропаганда дьзива һʹьше  мә дькә бьн контрола хԝә, кӧ «әм һаш жь хԝә жи тʹӧнә нә». Зандарәки жи гот кӧ гәләк мәрьв бьн һʹӧкӧме пропагандайеда, «кьред зийанкʹар кьрьнә». Мәсәлә, «генотсид, шәрʹ, нәфрʹәткьрьна мьләта, нәфрʹәткьрьна религийа, у гәләк кьред бехԝәдети», бьн һʹӧкӧме пропагандайеда һатьн кьрьне («Еasily Lеd—A History of Propaganda»).

Һәрге мәрьв дькарьн пе пропаганда хԝә мә бьхальфиньн, һәмьки Шәйтʹан һе зедә дькарә мә бьхальфинә. Шәйтʹан рʹабун-рʹуньштьн у психоложийа мәрьва жь дәстпека әʹфьрандьна ԝан леколин дькә. У иро «тʹәмамийа дьнйайе» бьн һʹӧкӧме ԝида йә. У ве дьнйайеда әԝ дькарә һәр тьшти бьдә хәбате сәва кӧ дәрәԝед хԝә бәла кә (1 Йуһʹн. 5:19; Йуһʹн. 8:44). Шәйтʹан ӧса бь һостәти фәʹме мәрьва корʹ дькә, кӧ «тʹәмамийа дьне» дьхальфинә (2 Корн. 4:4; Әʹйан. 12:9). Ле һун ча дькарьн мьԛабьли пропаганда ԝи һәрʹьн?

Иса гот кӧ ча әм дькарьн хԝә хԝәй кьн жь пропагандайе: «Рʹастийе нас кьн у рʹастийе ԝә аза кә» (Йуһʹн. 8:31, 32). Шәрʹда әскәр гәрәке информасийа рʹаст бьзаньбьн дәрһәԛа дьжмьна, сәва дьжмьн ԝана нәхальфиньн. Мәрʹа жи лазьм ә информасийа рʹаст сәва хԝә жь пропагандайе хԝәй кьн. Ле кʹидәре йә информасийа рʹаст? Йаһоԝа мәрʹа бь сайа Кʹьтеба Пироз информасийа рʹаст у ширәта дьдә, сәва кӧ нәкʹәвьнә бьн байе пропаганда Шәйтʹан (2 Тимтʹ. 3:16, 17).

Шәйтʹан һаш жь ве йәке һәйә. Ләма жи әԝ ве дьнйа бьн һʹӧкӧме хԝәда дьдә хәбате, сәва рʹе мә бьгьрә, кӧ әм Кʹьтеба Пироз нәхуньн у леколин нәкьн. Хԝә хԝәй кьн кӧ нәкʹәвьнә ве тʹәлька ԝи! (Әфәс. 6:11) Бона ве йәке әм гәрәке бь тʹәмами «фәʹм бькьн» рʹастийе (Әфәс. 3:18). Әв йәк һеса нинә, ле лазьм ә әм ԛәԝате хәрщ кьн сәва ве йәке. Авторәки бь наве Ноем Чампски гот: «Тʹӧ кәс ԝе рʹастийе нәкә һʹьше тә. Тӧ гәрәке хԝәха рʹастийе бьгәрʹи». Ләма жи бь дьл у щан «һәр рʹож» Ньвисара леколин бькьн, у һуне рʹастийе бьвиньн (Кʹар. Шанд. 17:11).

Бир нәкьн кӧ Шәйтʹан нәхԝазә һун рʹаст бьфькьрьн у фәсал бьн. Ле гәло чьрʹа? Чаԝа ньвисарәкеда те готьне, пропаганда «һе зәʹф у зу һʹӧкӧм дькә» сәр ԝан мәрьва, «йед кӧ тьшта кʹур леколин накьн» у «нә жи дьщерʹьбиньн һәла рʹаст ә йан на» («Mеdia and Sociеty in thе Tԝеntiеth Cеntury»). Ләма жи тʹӧ щар чʹәʹвгьрти тьшта баԝәр нәкьн, ле  аԛьле хԝә бьдьнә хәбате (Мәтʹлк. 14:15). Хԝәде һʹьш-аԛьл у сәрԝахти дайә мә, сәва әм рʹастийе дьле хԝәда хԝәй кьн у баԝәрийа хԝә ԛәԝи кьн (Мәтʹлк. 2:10-15; Рʹом. 12:1, 2).

Шәрʹда гәләк щар пропагандайе дьдьнә хәбате, сәва тьрсе бькьнә дьле әскәра у ԝәки әԝана нәхԝазьн шәрʹ бькьн. Дьжмьн дькарьн нав әскәрада дәрәԝа бәла кьн, сәва шәрʹ бькʹәвә ортʹа ԝан у жь әскәред хԝә бьԛәтьн у дур кʹәвьн. Генераләки Алмани дәрһәԛа мәʹники гот, кӧ чьрʹа Алманийа Шәрʹе Һʹәмдьнйайе йа йәкеда да дәр. Әԝи гот кӧ щьмәʹт «пе пропаганда дьжмьна гипноз бьбун, чаԝа кʹеврушк бьн гипноза мәʹрда». Тʹәлькед Шәйтʹан жи ӧса ньн. Әԝ нахԝазә ԝәки әм щьватеда йәктийеда бьн, у ләма һәр тьшти дькә сәва әм жь щьвате бьԛәтьн. Бәʹса хәбәре, әԝ ӧса дькә, ԝәки һәвнәфәʹмкьрьн бькʹәвә ортʹа хушк-бьра. Йан жи һәрге щьватеда кәсәк хәйди йан фькьри кӧ һьндава ԝи нәһәԛи һатә кьрьне, Шәйтʹан ӧса дькә, ԝәки әԝ тʹәшкиләта Хԝәде бьһелә.

Тʹӧ щар нәкʹәвьнә ве тʹәлька ԝи! Пе рʹебәри у ширәтед Хәбәра Хԝәде һәрʹьн. Мәсәлә, Кʹьтеба Пироз дьбежә ԝәки «ль һәв бьбахшиньн», у чәтьнайед ортʹа һәвдӧда зу сафи кьн, демәк зу ль һәв бен (Колс. 3:13, 14; Мәт. 5:23, 24). Ӧса жи әԝ рʹастә-рʹаст дьбежә кӧ хԝә дур нәхьн у башԛә нәкьн жь щьвате (Мәтʹлк. 18:1). Хԝә бьщерʹьбиньн һәла һун чьԛас хԝәйкьри нә жь пропаганда Шәйтʹан. Жь хԝә бьпьрсьн: «Һәрге ԝан пашԝәхтийада хушкәке йан бьраки мьн хәйдандийә, мьн ча хԝә дайә кʹьфше? Мьн дьле Хԝәде ша кьр йан дьле Шәйтʹан?» (Галт. 5:16-26; Әфәс. 2:2, 3)

Әскәре кӧ бь тʹәмами сәроке хԝәрʹа амьн нинә, шәрʹда ԝе ԛәԝи нибә. Ләма жи дьжмьн пропагандайе дьдьнә хәбате, сәва кӧ әскәр баԝәри у итʹбарийа хԝә һьндава сәроке хԝә ӧнда кьн. Дьжмьн дькарьн бь ԝан гьлийа шьке бькьнә дьле әскәра: «Итʹбарийа хԝә сәрокед хԝә нәйньн!» йан жи «Әԝана ԝе ԝә бькьнә ԛәзийе!» Хенщи ве йәке, әԝана дькарьн шашийед сәрока бежьн сәва һе зедә шьке бькьнә дьле әскәра. Шәйтʹан һәма ве йәке жи дькә. Әԝ тʹьме дьхԝазә шьке бькә дьле мә, сәва әм итʹбарийа хԝә ԝан мәрьва нәйньн, йед кӧ тʹәшкиләта Йаһоԝада рʹебәрийе дькьн.

 Ле һун ча дькарьн хԝә жь ве йәке хԝәй кьн? Тʹьме хԝә ль тʹәшкиләта Йаһоԝа бьгьрьн. Бь амьни пьштгьрийа ԝан бькьн, йед кӧ рʹебәрийа щьмәʹта Хԝәде дькьн, у дьбәкә щара шашийа дькьн (1 Тʹеслн. 5:12, 13). Һәрге рʹабәр йан кәсәки дьн пе гьлийед хԝә дьхԝазьн ԝә бьхальфиньн у шьке бькьнә дьле ԝә, «фькьре хԝәда зу шаш нәбьн», һәрге жи чь кӧ әԝана дьбежьн рʹасти те кʹьфше (2 Тʹеслн. 2:2; Тито 1:10). Ширәта Паԝлос бьдьнә хәбате, кʹижан кӧ әԝи Тимотʹейорʹа дайә. Демәк, нава рʹастийеда кӧ ԝә нас кьр бьминьн, у бира хԝәда хԝәй кьн һун чь пеһʹәсийан (2 Тимтʹ. 3:14, 15). Бьфькьрьн кӧ чьԛас избаткьрьн һәнә кӧ әм дькарьн итʹбарийа хԝә ԝан рʹебәра биньн, кӧ Йаһоԝа ида бь сәда сала дьдә хәбате сәва әԝана рʹебәрийе мә бькьн (Мәт. 24:45-47; Ибрн. 13:7, 17).

Бир нәкьн ԝәки щара пропаганда Шәйтʹан әʹйан те кʹьфше. Щара әԝ тьрсе дькә дьле мәрьва, кʹижан кӧ «щурʹе пропаганда бәре йә» («Еasily Lеd—A History of Propaganda»). Професоре Британи Филип М. Тейлоре гот, ԝәки Асура пропаганда данә хәбате у пе тьрсе дьжмьнед хԝә һьлдьданә бьн дәсте хԝә. Шәйтʹан жи иро тьрсе дьдә хәбате. Мәсәлә, әԝ дьдә хәбате тьрса бәр мәрьва, тьрса бәр пәйкʹәтьна, тьрса бәр мьрьне, у тьрса бәр тьштед майин, сәва кӧ әм ида Йаһоԝарʹа хьзмәт нәкьн (Иша. 8:12; Йерәм. 42:11; Ибрн. 2:15).

Нәһельн ԝәки Шәйтʹан тьрсе бькә дьле ԝә, кӧ һун сьст бьн у амьнийа хԝә ӧнда кьн! Иса гот: «Жь ԝана нәтьрсьн, йед кӧ бәдәне дькӧжьн, жь ԝе пештьр тьштәки дьн нькарьн бькьн» (Луԛа 12:4). Бь тʹәмами итʹбарийа хԝә созе Йаһоԝа биньн кӧ әԝе ԝә хԝәй кә у «зорайийа ԛәԝате» бьдә ԝә, сәва һун нәкʹәвьнә тʹәлька Шәйтʹан (2 Корн. 4:7-9; 1 Пәт. 3:14).

Ле щара дьбәкә һун хԝә сьст тʹәхмин кьн йан жи бьтьрсьн. Ле бир нәкьн кӧ Йаһоԝа ԝәрʹа жи гьлийе ӧса дьбежә, кʹижан кӧ Йешурʹа гот: «Мерхас у ԛәԝи бә. Нәтьрсә у хоф нәкә, чьмки Йаһоԝа Хԝәдейе тә тʹәви тә йә кʹӧда жи һәрʹи» (Йешу 1:9, ДТʹ). Һәрге һун бона тьштәки тʹәвһәв дьбьн у бәрхԝә дькʹәвьн, дәрберʹа Йаһоԝарʹа дӧа бькьн у дьле хԝә жерʹа вәкьн. У дӧдьли нәбьн ԝәки «әʹдьлайийа Хԝәде . . . ԝе дьл у фькьред ԝә» хԝәй кә, сәва кӧ һун ԛәԝи бьн у мьԛабьли пропаганда Шәйтʹан бьсәкьньн (Фили. 4:6, 7, 13).

Те бира ԝә чахе ԝәкʹиле Асури бь наве Рабшак чь пропаганда бәла кьр нава щьмәʹта Хԝәдеда? Әԝи гот кӧ йанчь жь дәсте Асура тʹӧ кәс ԝе ԝана хьлаз нәкә, у һәла һе Йаһоԝа Хԝәде жи нькарә али ԝан кә». Әԝи бь мерхаси зедә кьр кӧ йанчь Йаһоԝа хԝәха ԝанрʹа гот ԝәки ԛьрʹа ви әʹрди бинә. Ле гәло Йаһоԝа сәр ве йәке чь щаба хԝә да? Йаһоԝа гот: «Жь бәр готьнед кӧ хӧламед ԛьрале Асуре, бона кӧ хәбәран жь мьнрʹа бьдьн готьнед у мьн жи ԝан бьһистьнә, нәтьрсә!» (2 Пʹадш. 18:22-25; 19:6). Паше, Йаһоԝа мьлйакʹәте хԝә шанд, йе кӧ шәвәкеда ԛьра 185 000 Асура ани (2 Пʹадш. 19:35).

Ԛә ӧса буйә кӧ һун филме дьньһерʹьн, у ԝедәре листькчи те хапандьне, ле һаш пе тʹӧнә йә? Дьбәкә һун дьбежьн: «Баԝәр нәкә! Әԝана тә дьхапиньн». Бьдьнә бәр чʹәʹве хԝә, кӧ мьлйакʹәт жи ԝәрʹа дьбежьн: «Фәсал бә! Нәкʹәвә бьн байе дәрәԝе Шәйтʹан!»

Гӧһе хԝә нәдьнә пропаганда Шәйтʹан (Мәтʹлк. 26:24, 25). Гӧһ бьдьнә Йаһоԝа у һәр тьштида итʹбарийа хԝә ԝи биньн (Мәтʹлк. 3:5-7). Әԝ бь һʹьзкьрьне әве ширәте дьдә ԝә: «Кӧрʹе мьн, сәрԝахт бә у дьле мьн ша кә, кӧ әз бькарьбьн щаба ԛардаред хԝә бьдьм» (Мәтʹлк. 27:11). Һәрге һун ӧса бькьн, һуне һʹьш-аԛьле хԝә хԝәй кьн у нәкʹәвьнә бьн байе дәрәԝед Шәйтʹан!