ГӘЛӘК хушкед азәп хьзмәт дькьн ԝан ԝәлатада кʹидәре кӧ һʹәԝщәти һәйә. Һьнәк жь ԝан, бь дәһа сала хьзмәт дькьн ԝәлатед хәрибда. Ле гәло чь али ԝан кьр, ԝәки ԝана гәләк сал пешда сафи кьрьн, кӧ дәрбази ԝәлате хәриб бьн? Ԝәʹде хьзмәтийа ԝан ԝәлатада, әԝана чь хԝәрʹа һин бун? Ча әʹмьре ԝан һатә гӧһастьне? Мә жь ԝан чәнд хушка интервийу һьлда. Һәрге тӧ хушкәкә азәп и, у тӧ гәләк дьхԝази ԝәки мина ԝан хьзмәт ки у шабуне бьстини, әԝ интервийу дькарьн кʹаре бьдьнә тә. Бь рʹастийе, һәр кәс жь мә дькарә жь сәрһатийа ԝан кʹаре бьстинә.

Һәрге тӧ хушкәкә азәп и, дьбәкә тӧ фькьрийи һәла тӧйе бь рʹастийе бькарьби ԝәлате хәрибда ча пешәнг хьзмәт ки йан на. Анита, кӧ ньһа 75 сали йә, дӧдьли бу кӧ ԝе бькарьбә хьзмәт кә ԝәлате хәрибда. Әԝ Инглистанеда мәзьн бу у ль ԝедәре 18 салийа хԝәда ча пешәнг хьзмәт дькьр. Әԝ дьбежә: «Мьн гәләк һʹьз дькьр дәрһәԛа Йаһоԝа мәрьва һин кьм, ле мьн тʹӧ щар нә жи баԝәр дькьр, ԝәки әзе бькарьбьм хьзмәт кьм ԝәлате хәрибда. Әз ԛә зьмане хәриб һин нәбьбум у әз дьфькьрим, ԝәки әзе нә жи бькарьбьм һин бьм. Ләма әз гәләк әʹщебмайи мам, чахе мьн тʹәглифи Мәкʹтәба Гиләд кьрьн. Мьн баԝәр нәдькьр ԝәки мәрьве мина мьн ԝе тʹәглифкьрьнәкә ӧса бьстинә. Ле йәкә мьн хԝәрʹа гот, ‹Һәрге Йаһоԝа дьфькьрә кӧ әз дькарьм, чь жи һәбә әзе бькьм›. Әԝ йәк 50 сала пешда ԛәԝьми. Һʹәта ньһа әз Жапонйайеда ча мисйонер хьзмәт дькьм». Анита зедә дькә: «Бь чʹәʹвед чʹурьси щара әз хушкед щаһьлрʹа дьбежьм: ‹Һәрге һун дьхԝазьн рʹеԝитийа гәләк һʹәԝас, дә чәнтʹе хԝә һьлдьн у тʹәви мьн ԝәрʹьн›. Әз ша мә ԝәки гәләка һәма ӧса жи кьрьн».

Гәләк хушк йед кӧ хьзмәт дькьн ԝәлатед хәрибда, пешийе дӧдьли дьбун һәла дәрбаз бьн ԝәлате хәрибда йан на. Ле гәло чь ԝана һелан кьр нета ӧса дайньн пешийа хԝә?

Маурин кӧ ньһа 64 сали йә гьли дькә: «Щаһьлтийеда мьн гәләк дьхԝәст ԝәки әʹмьре хԝә рʹаст дәрбаз кьм у али мәрьва бькьм». Чахе Маурин бу 20 сали, әԝ дәрбази Кԝебек бу (Канада), кʹидәре кӧ һе зедә пешәнг лазьм бун. Әԝ дьбежә: «Паше мьн тʹәглифи Мәкʹтәба Гиләд кьрьн, ле әз дьтьрсийам ԝәки әзе һәрʹьм щийе нәнас у хәриб, бей һәвалед хԝә. Әз ӧса жи бәрхԝә дькʹәтьм кӧ дийа хԝә дьһельм, кʹижан кӧ мьԛати баве мьни нәхԝәш дьбу. Гәләк шәв мьн бь һесьра Йаһоԝарʹа дӧа дькьр бона чуйина хԝә. Чахе мьн тʹәви де-баве хԝә хәбәрда дәрһәԛа хәмед хԝә, әԝана мьн ширәт кьрьн ԝәки әз һәрʹьмә  Гиләде. Мьн ӧса жи дьдит ԝәки щьватеда хушк-бьра ча бь һʹьзкьрьн али де-баве мьн дькьрьн. Чахе мьн дәсте Йаһоԝа дьдит, әз ԛә дӧдьли нәдьбум ԝәки әԝ ԝе али мьн бькә у мьԛати мьн бә. Ԝи ԝәʹдәйи әз ида һазьр бум ԝәки һәрʹьм!» Дәстпека сала 1979, Маурин ча мисйонер 30 сала зедәтьр хьзмәт дькьр Африкайа Рʹоһьлатеда. Иро, әԝ Канадайеда мьԛати дийа хԝә дьбә, у һьн жи ча пешәнге мәхсус хьзмәт дькә. Чахе әԝ тинә бира хԝә хьзмәтийа хԝә ԝәлате хәрибда, әԝ дьбежә: «Йаһоԝа тʹьме дьда мьн ве йәке чь кӧ мьнрʹа лазьм бу у кʹәнге лазьм бу».

Ԝенди, кӧ ньһа 65 сали йә, чахе 14 сали бу дәстпекьр ча пешәнг хьзмәт кә Австралйайеда. Әԝ тинә бира хԝә: «Әз гәләк шәрмокә бум у мьнрʹа чәтьн бу тʹәви мәрьвед нәнас хәбәр дьм. Ле чахе әз бумә пешәнг, әз һин бум ԝәки тʹәви щурʹә-щурʹә мәрьва хәбәр дьм, у ләма мьн ида һеса тʹәви мәрьва хәбәр дьда. Әз ӧса жи һин бумә кӧ итʹбарийа хԝә Йаһоԝа биньм, у ида мьнрʹа чәтьн нибу һәрʹьм ԝәлате хәрибда хьзмәт кьм. Ӧса жи хушкәкә азәп, кʹижан кӧ бәре 30 сала зедәтьр ча мисйонер Жапонйайеда хьзмәт дькьр, мьн тʹәглиф кьр ԝәки тʹәви ԝе һәрʹьм сәр се мәһа ԝедәре хьзмәт кьм. Чахе мьн тʹәви ԝе хьзмәт дькьр, әз һелан бум ԝәки ԝәлате хәрибда хьзмәт кьм». Сала 1986-да, Ԝенди дәрбази Вануату бу, кʹижан кӧ жь Австралйа рʹоһьлате 1 770 км дур ә.

Ԝенди һʹәта ньһа Вануатуйеда йә у хьзмәт дькә офиса ԝәлгәрʹандьнеда. Әԝ дьбежә: «Чахе әз дьвиньм ԝәки ча кʹом у щьватед тʹәзә саз бун щийед кӧ жь шәһәр дур ьн, әз гәләк ша дьбьм. Бона мьн ԛәдьрәки гәләк мәзьн ә, ԝәки әз ԝан гьравада жи дькарьм шьхӧле Йаһоԝа пешда бьвьм».

Кумико, кӧ ньһа 65 сали йә, хьзмәт дькьр ча пешәнге мәхсус Жапонйайеда. Паше һәвала ԝе жерʹа гот ԝәки һәрʹьн дәрбази Нәпале бьн. Кумико дьбежә: «Әԝе тʹьме мьнрʹа дьгот ԝәки әм дәрбаз бьн, ле әз диса жи ԛайил нәдьбум. Әз бәрхԝә дькʹәтьм ԝәки әз гәрәке зьмане тʹәзә һин бьм у гәрәке һини тьштед тʹәзә бьм. Ӧса жи нәһеса бу пʹәра дәстхьм, сәва кӧ дәрбази ԝәлате хәриб бьм. Ԝи ԝәʹдәйи чахе мьн дәрһәԛа ԝан тьшта хәм дькьр, әз кʹәтьмә аварийе у әз бьрьмә нәхԝәшхане. Ԝедәре әз дьфькьрим: ‹Кʹе занә паше диса ԝе чь бе сәре мьн? Дьбәкә әз нәхԝәшийа гьран кʹәвьм у ида нькарьбьм ԝәлате хәрибда хьзмәт кьм. Ләма жи ԝе баш бә ԝәки әз һәма саләке хьзмәт кьм ԝәлате хәрибда›. Мьн бь кʹәла дьле хԝә дӧа дькьр Йаһоԝарʹа кӧ али мьн бькә, ԝәки әз сафикьрьна рʹаст бькьм». Чахе Кумико дәркʹәт жь нәхԝәшхане, әԝ сәр ԝәʹдәки кьн чу Нәпале. У паше жи әԝ тʹәви һәвал-хьзмәткʹаре хԝә кӧ пешәнг бу, ида дәрбази ԝи ԝәлати бу.

 Чахе Кумико дькә бира хԝә дәһ салед хԝәйә дәрбазбуйи кӧ әԝе хьзмәт дькьр Нәпаледа, әԝ дьбежә: «Әԝ чәтьнайед дәрһәԛа чь жи әз бәрхԝә дькʹәтьм, дәрбаз бун, чаԝа Исраели Бәʹра Соррʹа дәрбаз бун. Әз гәләк ша мә кӧ мьн хьзмәт дькьр ԝи ԝәлатида кʹидәре кӧ һʹәԝщәти һәбу. Гәләк щар чахе әз малбәтәкеда дәрһәԛа мьзгинийа жь Кʹьтеба Пироз гьли дькьм, һьнге пенщ йан шәш щинар жи тен у тʹәви мә дьбьн, ԝәки әԝана жи гӧһе хԝә бьдьнә мә. Һәла һе зарʹа жи жь мьн һиви дькьрьн, ԝәки бәлавока дәрһәԛа Кʹьтеба Пироз бьдьмә ԝан. Әз гәләк шабуне дьстиньм, ԝәки хьзмәт дькьм ԝе територйайеда кӧ мәрьв дьбьһен».

Әʹщебмайи нинә ԝәки әԝ хушкед мерхас рʹасти чәтьнайа жи һатьн. Ле гәло ча ԝана әԝ чәтьнайи дәрбаз кьрьн?

Диан кӧ жь Канадайе йә, дьбежә: «Пешийе, мьнрʹа чәтьн бу кӧ әз жь малбәта хԝә гәләк дур бум». Ньһа әԝ 62 сали йә, әԝе 20 сала хьзмәт дькьр ча мисйонер Кот Девуареда. Әԝ гьли дькә: «Мьн Йаһоԝарʹа дӧа дькьр, ԝәки әԝ али мьн бькә сәва әз әԝе щьмәʹте һʹьз бькьм, кʹидәре кӧ әз хьзмәт дькьм. Дәрсдарәки жь Мәкʹтәба Гиләде, Щек Редфорд, мәрʹа гот кӧ чахе әм һʹале мәрьва бьвиньн територйа хԝәда, пешийе дьбәкә тʹәвһәв бьн, у һәла һе әʹщебмайи жи бьминьн, илаһи чахе кʹәсиббуне бьвиньн. Ле паше әԝи гот: ‹Дина хԝә нәдьн кӧ әԝана кʹәсиб ьн. Дина хԝә бьдьн, ԝәки әԝана чь тʹәхмин дькьн чахе рʹастийед жь Кʹьтеба Пироз педьһʹәсьн›. Мьн һәма ӧса жи кьр, у әԝе йәке кʹәрәмәкә мәзьн мьнрʹа ани! Чахе мьн мьзгинийа дәрһәԛа Пʹадшатийе мәрьварʹа гьли дькьр, мьн дьдит, ԝәки чʹәʹве ԝана ча дьчʹурьсьн!» Ле диса чь али Диан кьр, ԝәки һини хьзмәтийа ԝәлате хәрибда бә? «Һәләԛәтийа мьн тʹәви ԝан, кʹе жи мьн Кʹьтеба Пироз һин дькьр, ԛәԝи бу у әз гәләк ша дьбум чахе мьн дьдит ԝәки әԝана ча дьбьнә хьзмәткʹаред Йаһоԝайи амьн. Мисйонерти бона мьн бу ча мал. Мьн де у бав, хушк у бьред рʹӧһʹани ԛазанщ кьр, ча кӧ Иса соз да» (Марԛ. 10:29, 30).

Ан, кӧ ньһа 46 сали йә, Асйайеда хьзмәт дькә, кʹидәре кӧ шьхӧле мә ԛәдәхәкьри йә. Әԝ гьли дькә: «Нава гәләк салада мьн ԝәлате хәрибда щурʹә-щурʹә щийада хьзмәт дькьр, у әз тʹәви хушка дьмам, йед кӧ жь щурʹә-щурʹә мьләта бун у хәйсәттда жи щурʹә-щурʹә бун. Щара, жь бо ве йәке мә һәв фәʹм нәдькьр у дьле һәвдӧ дьешанд. Чахе ӧса дьԛәԝьми, мьн һʹәму тьшт дькьр кӧ дьһа незики ԝан бьм, сәва һе рʹьнд фәʹм бькьм култура ԝан. Ӧса жи әз һин бум, ԝәки һе бь һʹьзкьрьн бьм тʹәви ԝан у ԝана фәʹм бькьм. Әз гәләк ша мә, ԝәки әԝ йәк бәред баш  ани у мьн һәвалед незик хԝәрʹа дит, кʹижан кӧ али мьн кьрьн ԝәки әз кʹьфшкьрьна хԝәда бьминьм».

Уте жь Алманйайе, кӧ ньһа 53 сали йә, сала 1993 һатә кʹьфшкьрьне ча мисйонер Мадагәскареда. Әԝ гьли дькә: «Пешийе, мьнрʹа чәтьн бу, ԝәки зьмане тʹәзә һин бьм, ӧса жи һини һәԝайе бьм, у хԝә жь нәхԝәшийа маләриа, амоеба у кӧрмед парасит хԝәй кьм. Ле мьн аликʹарийа гәләк мәзьн станд. Хушкед ԝе мьһаледа, зарʹед ԝан у әԝ мәрьвед кʹе жи мьн Кʹьтеба Пироз һин дькьр, бь сәбьр али мьн кьрьн, ԝәки зьман һин бьн. Һәвал-хьзмәткʹаре мьн дьл-әшԛ мьԛати мьн дьбу чахе әз нәхԝәш дькʹәтьм. Ле лап зәʹф Йаһоԝа али мьн кьр. Мьн тʹьме дӧада дьле хԝә жерʹа вәдькьр. Паше, әз һивийа щаба дӧайед хԝә дьбум, щара чәнд рʹожа, щара жи бь мәһа һивийе бум. Бь рʹастийе Йаһоԝа һәр чәтьнайе мьн сафи кьр». Ида 23 сал ә кӧ Уте хьзмәт дькә Мадагәскареда.

Мина ԝан хушк-бьра йед кӧ хьзмәт дькьн щийед кӧ һʹәԝщәти һәйә, хушкед азәп жи йед кӧ ԝәлате хәрибда хьзмәт дькьн дьбежьн ԝәки әԝ хьзмәткьрьн гәләк кʹәрәма тинә. Ле гәло ԝана чь кʹәрәм стандьн?

Һиде, жь Алманйайе, кӧ ньһа 73 сали йә, жь сала 1968 Кот Девуареда мисйонер ә. Әԝ гьли дькә: «Шабунәкә мьнә мәзьн әԝ ә, ԝәки әз дьвиньм кӧ чаԝа зарʹед мьнә рʹӧһʹани ‹бәрдәԝам дькьн сәр рʹийа рʹастийе дьчьн›. Һьнәк жь ԝан кʹижана кӧ мьн Кʹьтеба Пироз һин дькьр, ньһа пешәнг у рʹуспи нә. Гәләк жь ԝан мьн нав дькьн Дайе йан жи Пирке. Йәк жь ԝан рʹуспийа, тʹәви жьна хԝә у зарʹед хԝә, мьн һʹәсаб дькьн ча нәфәре мала хԝә. Демәк, Йаһоԝа мьнрʹа дайә кӧрʹ, бук, у се нәби» (3 Йуһʹн. 4).

Карен жь Канадайе, кӧ ньһа 72 сали йә, 20 сала зедәтьр хьзмәт дькьр Африкайа Рʹоһлатеда. Әԝ дьбежә: «Хьзмәтийа мисйонерти мьн һин кьр, ԝәки әз һе зедә бькьм бона шьхӧле Хԝәде, бь һʹьзкьрьн у бь сәбьр бьм. Ӧса жи, әз һе һеса мәрьва фәʹм дькьм, чьмки мьн тʹәви хушк-бьред жь щурʹә-щурʹә мьләта һәвкʹари дькьр. Мьн фәʹм кьр, ԝәки гәләк тьшта әз дькарьм бь щурʹәки майин жи бькьм. У чьԛас кʹәрәмәкә баш ә, ԝәки ньһа һәвалед мьн һәнә, йед кӧ жь щурʹә-щурʹә ԝәлата нә. Рʹаст ә әʹмьре мә у кʹьфшкьрьнед мә тенә гӧһастьн, ле йәкә һәвалти дьминә».

Маргарет, жь Инглистане, кӧ ньһа 79 сали йә, Лаоседа ча мисйонер хьзмәт дькьр. Әԝ дьбежә: «Йа пешьн, хьзмәткьрьна ԝәлате хәрибда чʹәʹве мьн вәкьр, кӧ Йаһоԝа ча һʹәму мьләта незики тʹәшкиләта хԝә дькә. Әԝ йәк баԝәрийа мьн гәләк ԛәԝи кьр. Әз һе ԛайим итʹбарийа хԝә Йаһоԝа тиньм, ԝәки әԝ рʹебәрийа тʹәшкиләта хԝә дькә у кӧ әԝ ԝе ԛьрара хԝә бинә сери».

Бәле, хушкед азәп кӧ ԝәлате хәрибда хьзмәт дькьн, шьхӧләки мәзьн дькьн бона шьхӧле Хԝәде. Әԝана рʹасти жи һежайи пʹайа нә (Һʹакьм. 11:40). Һәжмара ԝан һе зедә дьбә, у әԝ йәк гәләк баш ә (Зәб. 68:11). Ле һун дькарьн дәрәща хԝә бьгӧһезьн, у чʹәʹв бьдьнә ԝан хушкед хирәт йед кӧ интервийу да? Һәрге һун ӧса бькьн, һуне әʹсә «тәʹм кьн у бьзаньбьн кӧ Хӧдан ча ԛәнщ ә!» (Зәб. 34:8)