САЛА 1937-да 26 Адаре, дӧ мәрьвед рʹеви, вәстийайи, һеди-һеди әʹрәба хԝә кӧ ԛьреж бу дажотьн у вәдьгәрʹийанә Сиднейе (Австралйа). Әԝана саләк пешда жь ԝи шәһәри дәркʹәтьбун у ԝәкә 19 300 км. рʹеԝити кьрьбун у чубунә щийед гәләк дур. Әԝ мәрьв, Артур Ԝилис у Бил Нийуленд бун. Әԝан пешәнгед хирәт нет дабунә пешийа хԝә кӧ мьзгинийа Пʹадшатийа Хԝәде Австралйайе навинда бәла кьн, кʹидәре кӧ лап һьндьк мәрьв дьжитьн.

Салед 1920-1930-да, кʹомәкә бьчʹук йа Леколинкʹаред Кʹьтеба Пироз * дь Австралйайеда, ль шәһәред кӧ незики бәʹре бун у жь ԝан шәһәра дәр мьзгини бәла дькьрьн. Австралйа навинда һьндьк мәрьв дьжин, чьмки әԝ щики зьһа йә у дәшт у чол ә, чапа кʹижани кӧ ԝәк ниве Әԝрупайе йә. Әԝан бьра заньбун ԝәки шагьртед Иса гәрәке шәʹдәтийе бьдьн «һʹәта сәре дьне», демәк Австралйа навинда жи (Кʹар. Шанд. 1:8). Ле гәло ԝана ча ԝе бькарьбуна шьхӧләкә ӧса пʹьрʹ мәзьн бькьрана? Ԝана баԝәр дькьр кӧ Йаһоԝа ԝе ԛәԝата ԝан кʹәрәм кә, чьмки ԝана сафи кьрьбун һʹәму тьшти бькьн чь кӧ дәсте ԝан те.

Сала 1929-да щьватед Кԝинслендеда у Австралйа Рʹоавайеда чәнд әʹрәбә чекьрьбун, сәва кӧ жь шәһәра дәр, демәк Австралйа навинда мьзгинийе бәла кьн. Ԝан әʹрәбада ньвин һәбун у һащәтед ԝәки хԝарьне чекьн. Бь ԝан әʹрәба пешәнгед хирәт дьчун, йед кӧ дькарьбун әв әʹрәба чекьрана һәрге әв хьраб буйа. Әԝ пешәнг дьчунә гәләк щийа, кʹидәре кӧ мәрьва дәрһәԛа мьзгинийе нәбьһистьбун.

Пешәнгед кӧ дәсттәнг бун у нькарьбун әʹрәбед ӧса хԝәрʹа дәстхьстана, бь бисиклета дьчунә Австралйа навинда. Мәсәлә, дь сала 1932-да, бьраки 23 сали бь наве Бинет Брикел жь Рокʹһамптоне (Кԝинсленд) рʹевитийа хԝә дәстпекьр, у нава пенщ мәһада ль щийед дур алийе бакʹуре мьзгини бәла дькьр. Бисиклета ԝи гәләк баркьри бу, сәр кʹижане кӧ әԝи ләʹйиф, кʹьнщ, хԝарьн у гәләк кʹьтеб хԝәрʹа дьбьр. Чахе чәрхед бисиклета ԝи дьмашийан, әԝи йәкә рʹийа хԝә бәрдәԝам дькьр,  чьмки баԝәр бу кӧ Йаһоԝа ԝе рʹебәрийе ԝи бькә. Әԝи бисиклета хԝә тʹәви хԝә һьлдьда у 320 км. ньга дьчу ԝан щийа, кʹидәре мәрьв бәре жь бо тʹибуне мьрьбун. Нава 30 салед дьн, Бинет ль тʹәмамийа Австралйайеда бь бисиклете, мотосикле у әʹрәбе, бь сәда һʹәзар километра дәрбаз дьбу. Әԝи дәстпекьр Аборигенарʹа мьзгинийе бәла кә у щьватед тʹәзә саз кьр, йед кӧ тʹәмамийа Австралйа навинда гәләк әʹйан бун.

Нав тʹәмамийа дьнйайеда, Австралйа йәк жь ԝан ԝәлата йә, кʹидәре кӧ һьндьк мәрьв дьжин, илаһи Австралйа навинда. Ле йәкә щьмәʹта Йаһоԝа нет данә пешийа хԝә, ԝәки бьвиньн ԝан мәрийа, йед кӧ дури шәһәра дьжин.

Пешәнг Стуарт Келти у Ԝилийам Торингтон, дьхԝәстьн һәма әԝе нете биньн сери. Дь сала 1933-да әԝана жь Бәрʹийа Симпсоне дәрбази Алис Спрингсе бун, сәва кӧ мьзгинийе бәла кьн. Әв шәһәр һәма Австралйа навинда йә. Чахе әʹрәба ԝанә бьчʹук шкәст у йа авитьне бу, бьре Келти, ньгәки кʹижани кӧ жь протеза дар бу, диса жи тʹәви Ԝилийам бәрдәԝам кьр рʹевити кьр, ле ида сәр дәԝа! Ԛәԝата пешәнга кʹарәкә мәзьн ани, чахе әԝана Ԝилийам Крикда, щийе сәкьнандьна трена, менещере отеләкерʹа дәрһәԛа мьзгинийе гьли кьрьн. Ԝәʹдә шунда әԝ менещере отеле Чарлс Бернард, рʹасти ԛәбул кьр. Әԝи отела хԝә фьрот у ԝәкә 15 сала әԝи тʹәне, чаԝа пешәнг щийед жь шәһәра дур дь Австралйайеда хьзмәт дькьр.

Ԝан пешәнгарʹа лазьм бу мерхаси у хирәт, сәва кӧ тәйах кьн һʹәму чәтьнайада. Чахе Артур Ԝилис у Бил Нийуленд, дәрһәԛа кʹижана кӧ мә ль абзаса пешьнда хәбәр да, ль щийе дур Австралйайеда хьзмәт дькьрьн, һьнге әԝана нава дӧ һʹәфтийада ԝәкә 32 км. дәрбаз бун. Жь бо баранәкә ԛайим, бәрʹи бьбу мина бәʹра һʹәрийе. Щарна ԝанарʹа чәтьн бу, чьмки һәԝа гәләк гәрм бу у ԝана гәрәке әʹрәба хԝә бь дәʹвдане нава ԛучʹед бәрʹийеда бьвьрана. Әԝана дәштед бь кәвьр-кӧчʹькрʹа у чʹәмед зьһарʹа дәрбаз дьбун. Гәләк щар чахе әʹрәба ԝан хьраб дьбу, әԝана пʹийе хԝә йан бь бисиклете чәнд рʹожа дьчунә шәһәрәки незик у бь һʹәфтийа һивийе бун һʹәта пʹаред әʹрәбе бьгӧһастана. Нава ԝан чәтьнайада, бьра шабуна хԝә ӧнда нәдькьрьн. Артур Ԝилис жь журнала «Ԛьрʹна Зерʹин» гьлийед ӧса ԝәкʹьланд: «Тʹӧнә рʹийа чәтьн у пʹьрʹ дьреж сәва шәʹдед Ԝи».

Чарлс Һарис, йе кӧ гәләк ԝәхт ча пешәнг хьзмәт дькьр, дьгот кӧ щурʹә-щурʹә чәтьнайед бәрʹийеда у рʹийа дьреж, әԝ һе незики Йаһоԝа кьрьн. Хенщи ве йәке әԝи гот: «Чәнтʹе тә чьԛас бьчʹук бә, һаԛас ԝе һеса бә жийина тә. Һәрге Иса һазьр бу дәрва бьн стәйркада рʹазе, ԝәки ӧса нә әм жи гәрәке һазьр бьн ӧса бькьн, чахе бона шьхӧле Хԝәде лазьм бә». Гәләк пешәнга һәма ӧса жи кьрьн. Бь сайа хирәт у ԛәԝата ԝан, мьзгини гьһиштә һәр ԛӧлбед Австралйайе у али гәләка кьр ԝәки әԝана пьштгьрийа Пʹадшатийа Хԝәде бькьн.