1. Кʹьрʹин чь кʹәрәма дькарә мәрʹа бинә?

КʹЬРʹИН кӧ Иса Мәсиһ да, гәләк кʹәрәма тинә. Бь сайа кʹьрʹине һʹәму зарʹед Адәм йед кӧ рʹастийе һʹьз дькьн, ахьрийеда ԝе бьбьнә нәфәред малбәта Хԝәде у жийина һʹәта-һʹәтайе бьстиньн. Ле хенщи ԝан кʹәрәма кʹьрʹин һе зедә тьшт дькә. Әԝ йәк кӧ Иса мьр у рʹастийа Йаһоԝа избат кьр, пьрсәкә гәләк фәрзва гьредайи йә кʹижан бона һʹәмуйа йә, һьн сәр әʹзмана һьн сәр әʹрде (Ибрн. 1:8, 9).

2. а) Иса дӧайе хԝәда дәрһәԛа кʹижан тьштед гәләк фәрз гот? (Бьньһерʹә шькле әʹԝльн.) б) Ве готареда әме дәрһәԛа чь шеԝьр кьн?

² Иса ԝәкә дӧ сал пешийа мьрьна хԝә, шагьртед хԝә һин кьр кӧ ӧса дӧа бькьн: «Баве мәйи әʹзмана! Наве тә пироз бә, Пʹадшатийа тә бе, әʹмьре тә бә, чаԝа ль әʹзмен, ӧса жи ль сәр әʹрде» (Мәт. 6:9, 10). Сәва кӧ һе зедә кʹьрʹине бьшекьриньн, ԝәрә шеԝьр кьн кӧ әԝ ча наве Хԝәде пироз дькә, кʹәрәма тинә бь сайа Пʹадшатийа Хԝәде у рʹе вәдькә ԝәки ԛьрара Хԝәде бе сери.

3. Наве Йаһоԝа дәрһәԛа ԝи чь әʹйан дькә, у ча Шәйтʹан наве Хԝәдейи пироз беһӧрмәт кьр?

³ Иса дӧайе хԝәда пешийе гот ԝәки наве Хԝәде пироз бә. Наве Йаһоԝа әʹйан дькә, ԝәки Әԝ йәки ча һьмзор у пироз ә. Дӧайе хԝәйә дьнда, Иса ԝи нав кьр «Баве Пироз» (Йуһʹн. 17:11). Бәле, Йаһоԝа пироз ә у ләма һʹәму принсип у ԛанунед ԝи пироз ьн. Ле Шәйтʹан Әдәнеда шәрʹ авитә Хԝәде, ԝәки изьна ԝи тʹӧнә мәрьварʹа ԛануна дайнә. Әԝ дәрәԝәкә мәзьн бу, у Шәйтʹан бь бӧхдан наве Хԝәде беһӧрмәт кьр (Дәстп. 3:1-5).

4. Иса ча наве Хԝәде пироз дькьр?

⁴ Ле Иса бь дьл наве Хԝәде һʹьз дькьр (Йуһʹн. 17:25, 26). Әԝи һʹәму тьшт дькьр сәва наве Хԝәде пироз кә. (Бьхунә Зәбур 40:8-10.) Иса пе жийина хԝәйә сәр әʹрде избат кьр, ԝәки һʹәму ԛанунед Йаһоԝа рʹаст ьн у бона кʹара мә нә. Чахе Шәйтʹан дьхԝәст Иса бьшкенә пе мьрьна бь чәрчьрандьне, Иса һәла һе ԝи чахи жи бь тʹәмами амьн ма Баве хԝәйи әʹзманарʹа. Бь амьнийа хԝә Иса избат кьр, ԝәки мәрьве беԛьсур дькарә һʹәму тьштида гӧрʹа Хԝәде бькә.

5. Әм ча дькарьн наве Хԝәде пироз кьн?

⁵ Ле әм ча дькарьн нишан кьн, ԝәки наве Хԝәде һʹьз дькьн? Пе кьред хԝә. Йаһоԝа жь мә дәʹԝа дькә кӧ әм пироз бьн. (Бьхунә 1 Пәтрус 1:15, 16.) Әԝ те һʹәсабе, ԝәки әм гәрәке тʹәне Йаһоԝа бьһʹәбиньн у бь тʹәмамийа дьле хԝә гӧрʹа ԝи бькьн. Һәла һе ԝәʹде пәйкʹәтьна жи, әм гәрәке һʹәму тьшти бькьн сәва ԛанун у принсипед ԝи биньн сери. Чахе әм кьред рʹаст дькьн, әм наве Йаһоԝа рʹумәт дькьн (Мәт. 5:14-16). Чаԝа щьмәʹта пироз, әм пе жийина хԝә избат дькьн ԝәки ԛанунед Йаһоԝа рʹаст у баш ьн, ле готьнед Шәйтʹан дәрәԝ ьн. Әм гьшк гӧнәкʹар ьн у ләма жи шашийа дькьн. Ле әм бь дьл гӧнед хԝә тиньн рʹуйе хԝә у пьшта хԝә дьдьнә ԝан кьра, кʹижан кӧ наве Хԝәде беһӧрмәт дькьн (Зәб. 79:9).

6. Рʹаст ә әм гӧнәкʹар ьн, ле чьрʹа Йаһоԝа дькарә мә рʹаст һʹәсаб бькә?

⁶ Һәрге әм баԝәрийа хԝә ԛӧрбана Иса тиньн, Йаһоԝа гӧнед мә дьбахшинә. Йед кӧ хԝә тʹәсмили Йаһоԝа дькьн, әԝ ԝана ԛәбул дькә ча хьзмәткʹаред хԝә. Йаһоԝа Мәсиһийед бьжарти рʹаст һʹәсаб дькә ча кӧрʹед хԝә у йед кӧ жь «пәзед дьн» ьн һʹәсаб дькә ча достед хԝәйи рʹаст (Йуһʹн. 10:16; Рʹом. 5:1, 2; Аԛуб 2:21-25). Демәк, һәла һе ньһа жи кʹьрʹин мәщале дьдә мә, ԝәки әм бәр чʹәʹве Баве хԝә Йаһоԝа рʹаст бенә һʹәсабе у наве ԝи пироз кьн.

7. Пʹадшатийа Хԝәде ԝе бь сайа кʹьрʹине кʹижан кʹәрәма бинә?

⁷ Паше Иса дӧайе хԝәда жь Хԝәде һиви кьр: «Пʹадшатийа тә бе». Ле гәло ча кʹьрʹин гьредайи йә тʹәви Пʹадшатийа Хԝәде? Бь сайа кʹьрʹине рʹе вәбу, ԝәки 144 000 йед бьжарти, сәр әʹзмана тʹәви Иса ча пʹадша у кʹаһин сәрԝертийе бькьн (Әʹйан. 5:9, 10; 14:1). Иса ԝе тʹәви йед бьжарти һʹәзар сали сәрԝертийе әʹрде бькә, у ԝе инсанәтерʹа кʹаре биньн. Әʹрд ԝе диса бьбә щьнәт, у һʹәму мәрьвед амьн ԝе бьбьнә бекемаси. Хьзмәткʹаред Йаһоԝа йед сәр әʹзмана у йед сәр  әʹрде, ԝе ахьрийеда бьбьнә малбәтәк (Әʹйан. 5:13; 20:6). Иса ԝе сәре мәʹр бьһʹьнщьрʹинә у ԝе бь тʹәмами бьдә һьлдане ԝан кӧл-дәрда кʹижан кӧ жь ԝи тен (Дәстп. 3:15).

8. а) Иса ча шагьртед хԝәрʹа нишан кьр ԝәки Пʹадшатийа Хԝәде гәләк фәрз ә? б) Әм ча дькарьн нишан кьн ԝәки әм пьштгьрийа Пʹадшатийе дькьн?

⁸ Чахе Иса сәр әʹрде бу, әԝи шагьртед хԝәрʹа нишан кьр ԝәки Пʹадшатийа Хԝәде чьԛас фәрз ә. Һәма дәрберʹа паши ньхӧмандьна хԝә, Иса һʹәму щийа «мьзгинийа Пʹадшатийа Хԝәде» бәла дькьр (Луԛа 4:43). Иса пешийа кӧ бьчуйа әʹзмана, тʹәми да шагьртед хԝә ԝәки «һʹәта сәре дьне» дәрһәԛа ԝи шәʹдәтийе бьдьн (Кʹар. Шанд. 1:6-8). Бь сайа бәлакьрьна мьзгинийа Пʹадшатийе, мәрьв дькарьн пебьһʹәсьн дәрһәԛа кʹьрʹине у ӧса жи бькарьбьн бьжин бьн сәрԝертийа Пʹадшатийа Хԝәдеда. Иро әм али бьжартийа дькьн йед кӧ әʹрде нә. Чь щурʹәйи? Әм нав тʹәмамийа дьнйайе мьзгинийа дәрһәԛа Пʹадшатийе бәла дькьн. Ӧса әм нишан дькьн ԝәки әм пьштгьрийа Пʹадшатийа Хԝәде дькьн (Мәт. 24:14; 25:40).

9. Чьрʹа әм гәрәке дӧдьли нәбьн кӧ Йаһоԝа ԝе ԛьрара хԝә һьндава мәрьва бинә сери?

⁹ Паше Иса дӧайе хԝәда гьлийед ӧса гот: «Әʹмьре тә бә». Гәло бь ԝан гьлийа Иса чь дьхԝәст бьгота? Йаһоԝа һәйә Әʹфьрандар у чахе әԝ тьштәки ԛьрар дькә, ԝе әʹсә бе сери (Иша.55:11). Йаһоԝа ԝе тʹӧ щар изьне нәдә Шәйтʹан, ԝәки рʹе ԝи бьгьрә кӧ ԛьрара Хԝә һьндава инсанәте бинә сери. Дәстпекеда ԛьрара Йаһоԝа әԝ бу, ԝәки Адәм у Һеԝайерʹа зарʹед беԛьсур бьбьн у бь ԝан әʹрд тʹьжә бә (Дәстп. 1:28). Һәрге Адәм у Һеԝа безӧрʹәт бьмьрана, әԝ ԛьрара Хԝәде ԝе нәһата сери. Ле Хԝәде мәщале дьдә әԝед кӧ баԝәрийа хԝә ԛӧрбана Иса тиньн, ԝәки бьбьнә бекемаси у һʹәта-һʹәтайе бьжин. Йаһоԝа мәрьва һʹьз дькә у дьхԝазә мәрьвед гӧһдар ӧса бьжин, ча әԝи сәре-серида ԛьрар кьр.

10. Бь сайа кʹьрʹине чь чʹарә һәйә бона мәрьвед кӧ мьрьнә?

¹⁰ Гәло чь чʹарә һәйә бона ԝан мәрьва йед кӧ мьрьнә ле Йаһоԝа нас нәкьрьбун у жерʹа хьзмәт нәкьрьбун? Бь сайа кʹьрʹине, әԝана дькарьн жь мьрьне рʹабьн. Баве мәйи һʹьзкьри ԝе ԝана вәгәрʹинә жийине, сәва кӧ әԝана дәрһәԛа ԛьрара ԝи пебьһʹәсьн у бькарьбьн жийина һʹәта-һʹәтайе бьстиньн (Кʹар. Шанд. 24:15). Йаһоԝа мьрьна тʹӧ кәси нахԝазә. Чахе мьри жь мьрьне рʹабьн, Йаһоԝа ԝе бьбә Баве ԝан, чьмки әԝ Канийа жийине йә, демәк әԝ жийине дьдә (Зәб. 36:9). Ләма жи Иса һин дькьр ӧса дӧа бькьн: «Баве мәйи әʹзмана» (Мәт. 6:9). Йаһоԝа шьхӧләки фәрз да Иса, демәк мьрийа жь мьрьне рʹакә (Йуһʹн. 6:40, 44). Иса ԝе щьнәтеда әве йәке бькә. Ләма әԝи гот ԝәки әԝ «рʹабун у жийин» ә (Йуһʹн. 11:25).

11. Ԛьрара Хԝәде һьндава «әʹлаләтәкә мәзьн» чь йә?

¹¹ Йаһоԝа һәр кәси тʹәглиф дькә, ԝәки бьбьнә нәфәред малбәта ԝи. Ләма Иса гот: «Һәр кәсе кӧ хԝәстьна Хԝәде бинә сери, әԝ ә бьре мьн, хушка мьн у дийа мьн» (Марԛ. 3:35). Хԝәде дьхԝазә ԝәки «әʹлаләтәкә мәзьн» жь һʹәму мьләта, бәрәка у зьмана бьбьнә хьзмәткʹаред ԝи. У һәрге әԝана  баԝәрийа хԝә ԛӧрбана Иса биньн у ԛьрара Хԝәде биньн сери, әԝана жи ԝе бькʹәвьнә нава ԝан йед кӧ рʹумәте дьдьнә Хԝәде у дьбежьн: «Хьлазбун жь дәсте Хԝәдейе мә йә, Йе кӧ ль сәр тʹәхт рʹуньшти йә у жь дәсте ԝи Бәрхи йә» (Әʹйан. 7:9, 10).

12. Ча дӧайе Иса әʹйан дькә ԛьрара Йаһоԝа һьндава инсанәте?

¹² Әԝ дӧайе Иса әʹйан дькә ԛьрара Йаһоԝа һьндава инсанәтейә гӧһдар. Ль гора ԝи дӧайи, әм гәрәке алийе хԝәда һʹәму тьшти бькьн сәва наве Йаһоԝа рʹумәт у пироз кьн (Иша. 8:13). Наве Иса те һʹәсабе «Йаһоԝа Хьлазкʹар ә». Рʹасти жи хьлазкьрьна мәйә бь сайа кʹьрʹине, наве Йаһоԝа рʹумәт у һʹӧрмәт дькә. Пʹадшатийа Хԝәде ԝе бь сайа кʹьрʹине инсанәтерʹа кʹәрәма бинә. Бәле, әԝ дӧа мә дьдә баԝәркьрьне ԝәки тʹӧ тьшт нькарә рʹе Хԝәде бьгьрә ԝәки ԛьрара хԝә бинә сери (Зәб. 135:6; Иша. 46:9, 10).

13. Чахе әм тенә ньхӧмандьне, бь ве йәке әм чь нишан дькьн?

¹³ Чахе әм хԝә тʹәсмили Йаһоԝа дькьн у тенә ньхӧмандьне, әм нишан дькьн ԝәки әм баԝәрийа хԝә кʹьрʹине тиньн у ԛимәт дькьн. Һьн жи, ньхӧмандьна мә дьдә кʹьфше кӧ әм «пʹара Хӧдан ьн» (Рʹом. 14:8). Хенщи ве йәке, ньхӧмандьн дьдә кʹьфше ԝәки әм дьхԝазьн кӧ Хԝәде исафа тʹәмьз бьдә мә (1 Пәт. 3:21). У Йаһоԝа бь хуна Иса исафа мә тʹәмьз дькә. Әм ԛайим баԝәр дькьн ԝәки Хԝәде чь кӧ соз дьдә, ԝе һʹәму тьшти бьдә мә (Рʹом. 8:32).

14. Чьрʹа Хԝәде жь мә дәʹԝа дькә ԝәки әм мәрьва һʹьз бькьн?

 ¹⁴ Диса ча әм дькарьн нишан кьн ԝәки әм рʹази нә бона кʹьрʹине? Йаһоԝа һʹәму тьшти жь һʹьзкьрьне дькә, у әԝ дьхԝазә ԝәки һʹәму хьзмәткʹаред ԝи ве йәкеда чʹәʹв бьдьнә ԝи (1 Йуһʹн. 4:8-11). У әм әʹйан дькьн ԝәки әм дьхԝазьн «бьбьнә зарʹед Баве [хԝәйи] әʹзмана», чахе әм мәрьва һʹьз дькьн (Мәт. 5:43-48). Мәрьва һʹьз кьн тʹәмийа дӧда йә, ле йа пешийе әԝ ә кӧ Хԝәде һʹьз бькьн (Мәт. 22:37-40). Чахе әм мьзгинийа Пʹадшатийе бәла дькьн, ӧса әм һʹьзкьрьна хԝә һьндава мәрьва дьдьнә кʹьфше у рʹумәта Хԝәде әʹйан дькьн. Бь ве йәке һʹьзкьрьна мә һьндава Хԝәде дьһа мәзьн дьбә, илаһи чахе әм хушк-бьред хԝә һʹьз дькьн (1 Йуһʹн. 4:12, 20).

15. а) Кʹижан кʹәрәма әм ньһа жь Йаһоԝа дьстиньн? б) Кʹижан кʹәрәма әме ахьрийеда бьстиньн?

¹⁵ Сәва бь тʹәмами гӧнед мә бенә бахшандьне, әм гәрәке баԝәрийа хԝә кʹьрʹине биньн. Хәбәра Хԝәде мә дьдә баԝәркьрьне, ԝәки гӧнед мә дькарьн «бенә рʹәситкьрьне». (Бьхунә Кʹаред Шандийа 3:19-21.) Чаԝа мә ида шеԝьр кьр, Йаһоԝа бь сайа кʹьрʹине, Мәсиһийед бь рʹӧһʹе пироз кʹьфшкьри дькә зарʹед хԝә (Рʹом. 8:15-17). У Йаһоԝа соз дьдә «пәзед дьн» жи кӧ ԝана бькә малбәта хԝә. Чахе әԝана бьбьнә беԛьсур у амьн бьминьн ԝәʹде щерʹьбандьна хьлазийе, Йаһоԝа ԝе ԝана жи бькә зарʹед хԝә (Рʹом. 8:20, 21; Әʹйан. 20:7-9). Һʹьзкьрьна Йаһоԝа һьндава зарʹед ԝи, ԝе һʹәта-һʹәтайе бә у кʹьрʹин жи ԝе мәрʹа кʹәрәмед һʹәта-һʹәтайе бинә (Ибрн. 9:12). Әԝ пʹешкʹеша Хԝәде ԝе тʹӧ щар ԛимәта хԝә ӧнда нәкә у нә жи тʹӧ кәс дькарә әԝе пʹешкʹеше жь мә бьстинә.

16. Кʹьрʹин мә жь чь аза дькә?

¹⁶ Һәрге әм бь дьле сах гӧнед хԝә тиньн рʹуйе хԝә, Шәйтʹан нькарә мә бьдә сәкьнандьне, ԝәки әм ахьрийеда бьбьнә нәфәред малбәта Йаһоԝа. Иса һатә сәр әʹрде у мьр «щарәке бона һәр тʹьм». Ләма жи ԛәԝата кʹьрʹине тʹӧ щар кʹӧта набә (Ибрн. 9:24-26). Кʹьрʹин бь тʹәмами мә хьлаз дькә жь гӧнә у мьрьне кӧ жь Адәм дәрбази сәр мә буйә. Хенщи ве йәке, бь сайа ԛӧрбана Иса әм аза нә жь һʹӧкӧме дьнйа Шәйтʹан у әм ида мьрьне натьрсьн (Ибрн. 2:14, 15).

17. Һʹьзкьрьна Хԝәде тә бәрбь чь һелан дькә?

¹⁷ Созед Хԝәде ԝе әʹсә бенә сери. Чаԝа кӧ Йаһоԝа ԛанунед тʹәбийәте ӧса дани ԝәки әԝана найенә гӧһастьне, ӧса жи хԝәха Йаһоԝа тʹӧ щар найе гӧһастьне. Әԝ ԝе тʹӧ щар мә нәһелә (Малх. 3:6). Йаһоԝа мәрʹа нә кӧ тʹәне жийине дьдә, әԝ ӧса жи мә гәләк һʹьз дькә. «Әм ԝе һʹьзкьрьна Хԝәдейә һьндава хԝәда нас дькьн у баԝәр дькьн. Хԝәде һʹьзкьрьн ә» (1 Йуһʹн. 4:16). Ахьрийеда әʹрд ԝе бьбә щьнәта бәдәԝ у хԝәш, у сәр әʹрде һәр кәс ԝе чʹәʹв бьдә һʹьзкьрьна Хԝәде. Ԝи ԝәʹдәйи һʹәму хьзмәткʹаред Хԝәде, һьн сәр әʹрде һьн сәр әʹзмана ԝе бежьн: «Пәсьн, рʹумәт, сәрԝахти, шькьри, һӧрмәт, ԛәԝат у зорайи бьра һʹәта-һʹәтайе Хԝәдейе мәрʹа бә. Амин» (Әʹйан. 7:12).