Әм бь рʹасти баԝәр дькьн, кӧ созед Хԝәде ԝе бенә сери? Иса ве йәкеда дӧдьли нибу, у бь һинкьрьнед хԝә, әԝи гӧһдаред хԝә һелан дькьр баԝәр бькьн. Ԝәрен әм шеԝьр кьн әԝ мәсәлә, йе кӧ Иса ль сәр Чʹийайе Зәйтʹуне гӧһдаред хԝәрʹа гот, кʹижан кӧ Мәтта 5:18-да ньвисар ә: «Әз рʹаст ԝәрʹа дьбежьм, бәри дәрбазбуна әʹрд у әʹзман, дәԛәк йан жи һʹәрфәкә бьчʹук жь Ԛануне ԝе ӧнда нәбә, һʹәта кӧ һʹәму бенә сери».

Һʹәрфәкә бьчʹук йа алифбәйа Ибрани һәйә, י (йод). Әв һәрфа пешьн ә Тетраграматоне йа наве Хԝәдейи пироз, Йаһоԝа. * Хенщи ԝе йәке һәр хәбәр у һәр «һʹәрфәкә бьчʹук» жь Ԛануна Хԝәде, ԛанунзан у Ферьс һʹәсаб дькьрьн ча тьштәкә пʹьрʹ мӧһим.

Иса дьгот кӧ әʹрд у әʹзман ԝе бькарьбьн дәрбаз бьн, ле һәр һʹәрфәкә бьчʹукә жь Ԛануне ԝе дәрбаз нәбә у әʹсәйи ԝе бе сери. У жь Ньвисаред Пироз жи әм педьһʹәсьн кӧ әʹзман у әʹрд ԝе тʹӧ щар ӧнда нәбьн у ԝе һәр-һәйи бьн (Зәбур 78:69). Ләма жи әв йәк дьдә кʹьфше, кӧ һәр һʹәрфәкә бьчʹукә жь Ԛануне, ԝе ӧса нәминә у бе сери.

Гәло ле Йаһоԝа Хԝәде дина хԝә дьдә тьштед бьчʹук? Бәле. Һәла дина хԝә бьдьнә ве йәке: Бәре, щьмәʹта Исраелерʹа һатьбу готьне, кӧ әԝана гәрәке һәстуйед бәрха Щәжьне нәшкеньн (Дәркʹәтьн 12:46). Әв ида тьштәкә бьчʹук бу. Ле гәло ԝана фәʹм дькьр, кӧ чьма әԝана гәрәке тʹӧ һәстуйед бәрхе нәшкеньн? Дьбә кӧ на. Йаһоԝа Хԝәде заньбу, кӧ әв тьштәкә бьчʹук, тьште пʹехәмбәртийе бу. Демәк әʹйанкьрьна ԝе йәке бу, кӧ тʹӧ һәстуйед Мәсиһ ԝе нәһата шкенандьне, чахе ль сәр стуна щәфайе әԝ гәрәке дардакьрьна (Зәбур 34:20; Йуһʹәнна 19:31-33, 36).

Жь ԝан гьлийе Иса әм чь һин дьбьн? Әм жи дькарьн бь тʹәмами баԝәр кьн, кӧ һʹәму созед Йаһоԝа Хԝәде һур бь һʹур ԝе әʹсәйи бенә сери. Бь рʹасти жи жь ԝан һʹәрфед бьчʹукә Ибрани, баԝәрийа һьндава созед Йаһоԝа чьԛас мәзьн дьбә!