Kyoso omivu kyaya ni kubhita, ohenda mukaxi kamakaza iya ni kuzoza. Se kiki kyamubhita mu ukaza wé, okwila wabhingi kuthandanganya?

•  Ihi iwabhingi okwijiya?

•  Ihi iwatokala okubhanga?

 Phala o ukaza kukala kyambote, omakaza atokala kudilondekesa henda. Kala okudya ni menya abhana jinga nguzu kumukutu ni ku ubhangesa kukala ni sawidi yambote, okudilondekesa jinga henda kukolesa we o ukaza. Né mwene se kwabhiti kyá mivu yavulu, o mayala ni ahatu abhingi kumona jinga kwila a azolo ni ku asuwa kwala kaza dyê.

 Ohenda yakidi ki isota ngó okyê. Ohenda isota okusanguluka kwa mukwâ. Mukiki, muveji dya kulondekesa ngó henda mukithangana kyoso kyamesena, odikaza dyahenda, wijiya kyoso kaza dyê kyabhindamena kutambula henda hé ubhanga yoso phala kumubhana ohenda yiyi.

 Mu ithangana yoso, o ahatu abhindamena dingi ohenda, omayala ndenge. Odiyala utena kuzola kyavulu muhatu wê. Maji se mwene ulondekesa ngó ohenda yiyi kudimatekenu ni kudisukilu dyakizuwa mba ande dya kuzeka kumoxi, Muhatu wê kandakwijiya kyambote se mwene wamuzolo mwene kyavulu mba kana. Kima kyambote kulondekesa henda mu ithangana yavulu kukizuwa.

 Londekesa henda mu izwelu. Izwelu yofele kala “ngakuzolo” mba “Eye wala ni valolo yavulu phaleme” izwelu yiyi itena kubhangesa kaza dyé kudivwa kyambote.

 Kitumu kya Bibidya: “Kyoso kyezala mu muxima, kyene kizwela odikanu.”—Matesu 12:34.

 Ndunge: Eye kutokala ngó kulondekesa ohenda mukuzwela mukanu, kana. Musonekene kanjimbu kupapela mba mumutelembe.

 Londekesa henda mu ibhangelu. Okudibhubhala, kubhana nzobole mba kukwata bhumaku akaza dyê kutena kulondekesa kwila eye wamuzolo. Tutena kulondekesa we kwila twasuwu kyavulu kaza dyetu, mukumubabata ni kumutala ni henda ni kumubhana kaujitu. Ihi itwamba yalungu ni kukwatekesa omuhatu, nange kwambata ombwenga yê, kumujikula odibhitu, kusukula omalonga, kusukula izwatu mba kulamba? Phala athu avulu, o ibhangelu yiyi ki ilombolola ngó kukwatekesa omuhatu kana, maji kilondekesu kyahenda!

 Kitumu kya Bibidya: “Ohenda yetu itudizola nayu, ki ikale yamaka ngó mukuzwela mba izwelu yahatu itanga ngó bhudimi. Maji yafwama ikala henda yakidi, idilondekeza jinga mu ima yoso itubhanga.”—1 Nzwá 3:18.

 Ndunge: Talatala kaza dyé ni henda kala kyoso kimwakexile muditangesa.

 Sotenu kithangana phala kukala kumoxi. Okukala ubheka ni kaza dyé, kukolesa o ukaza, ubhangesa kaza dyé kumona kwila eye wawabhela kukala kumoxi ni mwene. Kidi, okukala ubheka ni kaza dyé nange kutena kubhonza bengebenge se mwala ni twana mba se mwala ni ima yavulu yabhingi ku isokejeka kizuwa ni kizuwa. Nange mutena kubhanga ima yofele kala okwenda kumoxi mu kithangana ni kithanagna—kiyadi kyenu ngó.

 Kitumu kya Bibidya: ‘Sola o ima yoso yawabha.’—Filipe 1:10.

 Ndunge: Sayi makaza mukonda dya kukala ni ikalakalu yavulu, akatula kithangana phala kukala kumoxi kikale “m’usuku” mba “musukilu dyasemana.”

 Ijiya kaza dyé. Kala muthu wala ni ibhindamu yê yakutambula henda. Kala muthu atangele kwa mukwa kyebhi kyamesena kutambula ohenda ni kuzwela we se wabhingi dingi kutambula henda. Mukusuluka, ni lusololwoso, bhanga kala kimwadikundu. Lembalala kuma phala o ukaza kukala kyambote, omakaza atokala kudilondekesa henda.

 Kitumu kya Bibidya: “Ohenda . . . Ki yene kusota ngó o kyê.”—1 Kolindu 13:4, 5.

 Ndunge: Muveji dya kujijidika kukuzola, dibhwidise kiki: ‘Ihi ingatokala okubhanga phala kubhangesa kaza dyami kungizola dingi?’