O Bibidia ki i tu tangela o kizuua kia vuala Jezú, ki i tu tangela ué kuila tua tokala ku bhanga o fesa ia uvualukilu uê. O divulu, McClintock and Strong’s Cyclopedia, diambe: “Nzambi ki muene ua tumina ku bhanga o fesa ia Natale, o fesa íii ué ki tu i sanga mu Mikanda ia Ngeleku [Novo Testamento].”

 O musoso ua Natale, ulondekesa kuila o fesa íii ia tundu mu jingeleja ja ji pagá. O Bibidia ilondekesa kuila Nzambi u divua kia iibha se tu sota ku bheza Nzambi mu ukexilu ua iibhila muéne.—Makatukilu 32:5-7.

1.   Ku bhanga fesa ia uvualukilu ua Jezú: “O Jikidistá ja dianga ka kexile mu bhanga o fesa ia uvualukilu ua [Jezú’] mukonda ene a monene kuila o ku bhanga fesa ia uvualukilu ua muthu uoso-uoso, ukexilu ua ji pagá.”—The World Book Encyclopedia.

2.   Kizuua kia 25 kia mbeji ia Kaiiadi: Se-ku kima kilondekesa kuila Jezú a mu vuala mu kizuua kiki. Nange o atuameni a jingeleja a solo o kizuua kiki mukonda kiexile o kizuua kia kexile o ji pagá mu bhanga fesa, mu kizuua kiki, o usuku ua betele ku laleka o muanha ndenge.

3.   Ku di bhana maujitu, kudia, ji fesa: O divulu, The Encyclopedia Americana diambe: “Mu ixi ia Loma o fesa ia nzambi Saturno, akexile mu i bhanga bhu kaxi ka mbeji ia Kaiiadi, maukexilu avulu a Natale a tundu mu fesa íii ia nzambi Saturno. Mu kifika, mu fesa íii akexile mu bhanga-mu kudia kua katunda, athu akexile mu di bhana maujitu ni ku jikatesa ji vela.” O Encyclopædia Britannica, i zuela kuila, mu kizuua kia kexile mu bhanga o fesa íii “athu ka kexile mu kalakala mba ku ta uenji.”

4.   Imuikinu ia Natale: O Enciclopedia da Religião i zuela kuila o athu akua Europa akexile mu uabhesa o jinzo jâ “ni imuikinu ni mixi ia maukexilu oso” phala ku bhanga o fesa ni ku bhânga ni ji nzumbi ja iibha.

5.   Muxi ua visco ni azevinho: “O jinganga ja jingeleja ja kexile mu zuela kuila o muxi ua visco ua kexile ni ku tena. O athu akexile mu bheza o muxi ua azevinho mukonda a dielele kuila o muanha ueji vutuka.”—The Encyclopedia Americana.

6.   Muxi ua Natale: “O ji pagá akua Europa akexile ni ifua ia ku bheza mixi, katé muene kioso kia kituka Jikidistá ene akexile hanji ni ifua íii.” Mu kifika, tuene mu mona athu “ku tula mixi ia Natale bhu muelu mba moxi ia inzo mu izuua ia ku bhanga o fesa íii.”—Encyclopædia Britannica.