MAZUNDA ni mazunda a athu ku mundu uoso, a xikina kuila o ia zuela mu kiônge kia dianga mu ixi ia Vatikanu ku muvu ua 1870, kifua ulongelu ua dikota ua Ngeleja ni kuila, athu oso a tokala ku i belesela. Maji tua tokala kudibhuidisa, o kuila kiki kiene ki longa o Mikanda Ikola? O kuila o Papa Francisco, muéne ua bhingana poxolo Phetele? O kuila poxolo Phetele muéne ua diangela kukala papa?

O kitumu kia bhana mu kiônge kia dianga mu ixi ia Vatikanu ku muvu ua 1870, kia tundu mu divulu dia Matesu 16:16-19 ni Nzuá 21:15-17. O jivelusu jiji ni jivelusu ja mukuá ja Bibidia, ji londekesa kuila Jezú ua bhana kua poxolo Phetele kikalakalu kia dikota mu kilunga kia Jikidistá ja dianga. Mu kidi, kioso Jezú kia di sange ni Phetele mu veji ia dianga, Jezú ua tangele kuila Phetele ueji kala ni nguzu kála ndanji. (Nzuá 1:42) Maji o kuila Kristu ua bhana ukota kua Phetele?

Mu divulu dia Matesu 16:17, 18, tu sanga-mu o izuelu ia Jezú kua Phetele, muéne uixi: “Ngi ku ambela dingi, kuma eie Phetele, [mu ku dilombolola uedi “Mbandu ia Ndànji”], o bhu ndànji iíi, bhene bhu ngi tunga o Ngeleja iami.” * O kuila Jezú ua kexile mu zuela kuila o “ngeleja” iê mba kilunga ueji ki tunga ku thandu dia Phetele? O kuila Phetele muéne ua kexile ku pholo ia maxibulu a mukuá a Jezú? Kiebhi o jipoxolo ja mukuá kiévu o izuelu ia Jezú? O divulu dia Matesu, Marku ni Luka, di tu londekesa kuila mu kubhita izuua ene a di kuatele mudiâ se nanhi uexile o dikota mu kaxi kâ. (Matesu 20:20-27; Marku 9:33-35; Luka 22:24-26) Se Jezú ua bhele kiá o ungana mba ukota kua Phetele, o kuila o jipoxolo eji kala dingi ni phata se nanhi mu kaxi kâ uexile o dikota?

Kiebhi Phetele kiévu o izuelu ia Jezú? Kuma muéne uexile mukua Izalaiele, sé phata Phetele  uejidile kiambote o ikanenu ia sonekene o jipolofeta mu Mikanda ia Hebalaiku ia lungu ni “ditadi.” (Izaia 8:13, 14; 28:16; Zakadiia 3:9) Kioso muéne kia sonekena o jiphange jê, Phetele ua lombolola kuila o “ditadi” diotangele mu Mikanda Ikola diexile Ngana Jezú Kristu, o Mexiia. Phetele ua soneka o kizuelu mu Ngeleku pe’tra (kiene o kizuelu ki tu sanga mu divulu dia Matesu 16:18) phala kulombolola ngó Jezú Kristu.—1 Phetele 2:4-8.

Poxolo Phaulu uexile ué dixibulu dia Jezú. O kuila Phaulu ua xikinine kuila Jezú ua bhele o ukota mba ungana kua Phetele? Phaulu uejidile kiambote o kikalakalu kia Phetele mu kilunga kia Jikidistá, kienhiki muéne ua soneka kuila Phetele ni jipoxolo ja mukuá, ‘a ejidile kuma jingunji.’ Phaulu uejidile kuila kuexile ‘jingunji’ javulu, ki Phetele ngó kana. (Ngalásia 2:9) Se Jezú ua solele kiá Phetele phala kukala ku pholo ia kilunga, kiebhi kia kexile mu mu tumbula kuala o jiphange jê kala ngunji ia kilunga?

Mu kusoneka ia lungu ni ukexilu ua Phetele ua kutalatala o athu, Phaulu ni kidi kioso uambe: “Nga mu bazelele bhu pholo ia mundu, mukonda ua tokalele ku mu elêsa.” (Ngalásia 2:11-14) Phaulu ka xikinine kuila, Kristu ua tungile o ngeleja iê mba kilunga ku thandu dia Phetele mba dia muthu ua mukuá mukua ituxi. Maji muéne ua xikinine kuila, o kilunga a ki tungile ku thandu dia Jezú Kristu, o disesa. Mu kuijiia kua Phaulu, “o ndanji-phe muene Kristu.”—1 Kolindo 3:9-11; 10:4.

Ihi-phe ilombolola o izuelu: “Eie Phetele, o bhu ndànji iíi, bhene bhu ngi tunga o Ngeleja iami?” Phala kuijiia kiambote o maka enhá, tua bhingi kutanga o jivelusu ja mukuá. Ihi ia kexile mu dikunda Jezú ni Phetele? Jezú uebhuidisile o maxibulu mê: “Enu-phe, muixi eme nanhi?” Sé ku kukuma, Phetele ua tambuijila: “Eie u Kristu, Mon’a Nzambi ia muenhu.” Mu kiki, Jezú ua ximana Phetele iu uambe kuila o “ngeleja,” mba kilunga kiê, eji ki tunga  mu “ndànji” ia beta o kukola. O ndànji íii muéne Jezú; Phetele ua kexile kiá ni kixikanu kia kolo kua Jezú.—Matesu 16:15-18.

Kienhiki, “Atuameni avulu a Ngeleja” ia Katolika, a soneka kuila o ndànji i tu sanga mu divulu dia Matesu 16:18, muéne Kristu. Mu kifika, o ngana Augustine mu hama ia katanu, ua soneka: “O Ngana uambe: ‘Bhu ndanji íii bhene bhu nga-nda tunga o ngeleja iami,’ mukonda Phetele ua mu tangele: ‘Eie u Kristu, Mon’a Nzambi ia muenhu.’ Bhu ndànji íii-phe bhu ua fisala bhene bhu nga-nda tunga o Ngeleja iami.” O ngana Augustine mu veji javulu uambe kuila “O Ndànji (Petra) Jezú.”

O ngana Augustine ni jingana ja mukuá, se a a fundisile mu kukaiela o ulongelu ua Katolika, eji kua tumbula kála athu a lungulukila o Ngeleja. O ngana Ulrich Luz mukua suíça uambe kuila, o ibanzelu íii ia ngana Augustine ni jingana ja mukuá ene mu dilonga o Bibidia, se a i zuelele mu kiônge kia bhiti mu ixi ia Vatikanu ku muvu ua 1870, eji ku i mona kála ituxi.

O poxolo Phetele kejidile o dijina “papa.” Mu kidi, Jibispu javulu kexile akua Loma, ene a di lukile o dijina didi ku hama ia divua. O dijina papa eza ngó mu dijiia kuala o athu ku disukilu dia hama ia 11. Se-ku kidistá ku hama ia dianga ua banzele kuila Phetele ua tambuile ungana ua dikota ni kuila o ungana iú, muéne ueji ku u bhitisa ku athu engi eji ku mu bhingana. Kienhiki o ngijiie mukua Alemanha ngana Martin Hengel ua suku mu kuzuela kuila “se-ku kima kilondekesa kuila o papa muéne uala ni ‘ukota’ mu ngeleja ioso.”

Kienhiki dibhuidise: O kuila poxolo Phetele muéne ua diangela kukala papa? O kuila a mu bhingana kuala athu engi? O kuila o ulongelu ua Katolika ua lungu ni ungana mba ukota ua papa, uala mu Mikanda Ikola? O kitambuijilu kia kidi kia ibhuidisu itatu íii, kienhiki: kana. Mu kidi, Jezú Kristu muéne o ditadi mba ndanji iu ua tungu o ngeleja iê mba kilunga kiê ku thandu diê-muéne. (Efezo 2:20) Kienhiki kála muthu mudietu, ua tokala kudibhuidisa ‘o kuila nga sange kiá o ngeleja ia kidi?’