Ihi ia bhiti? Mukonda diahi Nzambi ka bhângela o Jijudé kála kia bhangele m’ukulu? Mukonda diahi muéne ka a tumina kuluua n’a tene kudibhulula? O kuila o ibanzelu ia Nzambi ia lungu ni ita ia lungulukile? Kana. Maji saí kima kia dikota kia fudisa Nzambi kukuatekesa o Jijudé. Ene a ditunine o Mon’â Nzambi, Jezú, o Mexiia a mu kanene. (Ikalakalu 2:36) Mukonda dia kiki, akua Izalaiele a texi o ujitu uâ ua kukala mundu ua Nzambi.—Matesu 23:37, 38.

Nzambi ka kexile dingi mu langa o Jijudé ni Ixi ia Kanana, ka kexile dingi mua tumina ni kua kuatekesa mu ita. Kála kia tangele Jezú, o mabesá ejila mu kukala ni ukamba ni Nzambi, a a tambuile nau ia a bhanene ku kifuxi kia ubhe, o Izalaiele mu nzumbi, mu kubhita thembu o kifuxi kiki kia ubhe a k’ixana Izalaiele ia Nzambi. (Matesu 21:43) O kilunga kia Jikidistá a a undu ni nzumbi ikola, iene o Izalaiele ia Nzambi mu nzumbi. Ku hama ia dianga, a a tangela kuila, ene exile “mundu ua Nzambi.”—1 Phetele 2:9, 10.

Kuma o Jikidistá ku hama ia dianga, ene exile kiá o “mundu ua Nzambi,” o kuila Nzambi ua a bhângela mu kua bhulula bhu maku ma akua Loma? O kuila muéne ua a tumina kuluua ni jinguma jâ? Kana, muéne ka bhange kiki. Mukonda diahi? Kála ki tua mono ku mbandu ia bhiti, Nzambi muéne u xinda o kithangana kia kuluua o ita. Nzambi ka bhângela o Jikidistá ku hama ia dianga, ka a tumina ué kuia mu ita. Nzambi ka bhange kiki, mukonda ki kiexile o kithangana kia tokala kia kuzubha o hadi ni kuiibha kuoso.

Kienhiki-phe, kála o jiselevende ja Nzambi m’ukulu, o Jikidistá ku hama ia dianga, a tokalele ku kingila katé o kithangana kia Nzambi kia kuzubha o kuiibha ni hadi. Mu kithangana kieniókio, Nzambi ka a tumina kuluua ita ni jinguma jâ. Jezú Kristu ua londekesa o kidi kiki mu ulongelu uê. Mu kifika, muéne ka longo o maxibulu mê kuluua ita kana, maji ua a tangele uixi: “Zolenu nguma jenu; a sambedienu kua Nzambi, oso a mi tatesa; benzelenu a mi bhubhidila, bhangenu mbote oso a mi zembe.” (Matesu 5:44) Mu kutangela o kithangana kioso o masoladi akua Loma kieji kuíza phala kubuika o mbanza ia Jeluzaleme, Jezú ka tendelesa o Jikidistá ku hama ia dianga kukala mu mbanza ni kubhânga kana, maji ua a tendelesa o kulenga. Mu kidi ene a belesela, a lengela ku milundu.—Luka 21:20, 21.

Nzambi ua tumina poxolo Phaulu o kusoneka: ‘Ki mu kale mù vutula phonzo ku muthu uoso-uoso, . . . kuma a ki soneka mu Mikanda Ikôla, exi: ‘Phonzo ia ngi tokala eme ngi Jihova, eme-muène ngi i futa.’ (Loma 12:19) Phaulu ua kexile mu bhitulula  ia zuelele Nzambi hama ja mivu kudima mu divulu dia Ijila 19:18 ni Matendelelu 32:35. Kála ki tua mono ku mbandu ia bhiti, Nzambi ua zokele o mundu uê m’ukulu mu ku a kuatekesa kutolola o jinguma jâ. Mu kiki o izuelu ia Phaulu, ilondekesa kuila, o ibanzelu ia Nzambi ia lungu ni ita ki i lungulukile kana. Katé ku hama ia dianga, Nzambi ua kexile mu mona hanji o ita kála ukexilu uambote ua kubhulula o jiselevende jê ni kuzubha o hadi ni kuiibha. Maji kála kia bhitile m’ukulu-kulu, Nzambi muéne ua tokalele kuxinda o kithangana kia kuluua ita, ni kusola ué se nanhi ua tokalele kubhanga mbandu ia ita.

Kala ki tua mono, Nzambi ka tumina o Jikidistá ku hama ia dianga kuluua ita. Abha lelu? O kuila Nzambi u tumina o athu kuluua ita? O kuila lelu kiene kiá o kithangana kia Nzambi kia kubhângela o mundu uê? Ihi i banza Nzambi ia lungu ni ita lelu? O mbandu ia kaiela ia-nda tambuijila o ibhuidisu íii.