ZUZE ua kexile mu kuívua o dizumba dia ji fololo ni ithulu ia mukuá i sabhuka mu menha. Akexile ku mu ambata kuala o athu akua uenji, ia akexile mu zaúka o honga ia Nilu. Xinganeka o maiala ni jikamelu jâ a mu zaúka o ngiji mu kuia mu mbanza ia Ijitu, ni ku tukisa o jindele jala mu menha.

Xinganeka o ji hima ja xikama ku mixi ia maie ni ji fiku, ja mu bhanga jibuia javulu. Zuze ka kexile mu tendela ia kexile mu zuela o athu akexile mu bhita mu njila. Ua kexile mu sota ku tendela bhofele ihi ia kexile mu zuela o athu. Muéne uejidile kuila, keji vutuka dingi kubhata diê.

Zuze uexile mona-ndenge hanji, ua kexile ngó ni 17 mba 18 dia mivu, maji mua bhiti muéne, adiakime avulu keji tena. O jiphange jê, a mu kuatele difuba mukonda tat’â ua betele ku zola Zuze, kienhiki a mesenene ku mu jibha. Maji mu veji dia ku mu jibha, a mu sumbisa ku athu enhá akua uenji. (Dimatekenu 37:2, 5, 18-28) Kua bhitile kiá semana javulu mu kuenda, o maiala a zukamene kiá ku mbanza ia dikota mua mesenene ku sumbisa Zuze ni ima iâ ia mukuá, a sangulukile kiavulu. Ihi ia kuatekesa Zuze ku kolokota sé ku kala ni kikote ku muxima? Ihi i tua tokala o ku bhanga phala o ibhidi ia muenhu ki i zozese o kixikanu kietu? Tu tena ku di longa ima iavulu kua Zuze.

“Zuze anga a mu bheka mu Ijitu; Potifale, fixiiadi ia Falaó, kabhitangu ka kilangidilu mukua Ijitu, anga u mu sumba bhu maku ma akua jimaiele, oso eza-nê muenhomo.” (Dimatekenu 39:1) Ni izuelu íii, o Bibidia i tu kuatekesa ku xinganeka o jisonhi ja kuatele o munzangala Zuze mu ku mu sumbisa dingi mu veji ia kaiadi. Muéne uexile ngó kála uenji! Tu tena ku xinganeka Zuze ku kaiela ngana iê ia ubhe, kabhitangu ka masoladi a akua Ijitu, mu jinjila jezala ni maloja mu kuia ku dibhata diê dia ubhe.

Dibhata! Zuze nuka ua muene inzo kála ioio. Zuze ua kudila ku muiji ua tungile mu ji balaka, lelu kuku, mungu koko, ni kuinga o jimbudi jâ. Maji mu Ijitu, o ji mvuama kala Potifale a tungile mu jinzo ja makota, ja iuka, jo pindale kiambote. O jingijiie akua ku tokuesa o ima koxi’a mavu, amba kuila o akua Ijitu m’ukulu a uabhele kiavulu o jimbote, ji jaludim ni ithulu iavulu, akexile ni izanga phala ku ku dila-mu mixi ia papilu, ni mixi ia mukuá. Saí jinzo ué ja kexile ni jaludim, ji mbalanda mua kexile mu xikama phala ku nhoha, o jinzo ué ja kexile ni ji njanena phala ku talalesa o inzo, ja kexile ni maxilu avulu, dixilu dia kudia ni maxilu phala o abhika.

O kuila Zuze ua diuanene kiavulu mu ku tala o umvuama iú? Nange kana. Muéne ua divu kuila uexile ubheka mu ixi muenhomo. Phala muéne, akua Ijitu exile akua’xi iengi, a zuelele dimi diengi, a zuatele kiengi, o ngeleja iâ iexile iengi. Ene akexile mu bheza ji nzambi javulu, akexile mu zambula ni ku bhanga ima ia mukuá ia uanga, akexile ni ibanzelu iengi ia lungu ni kufua, a xikinine kuila, o muthu kia fua uia kididi kiengi. O Bibidia  i zuela: “Jhova anga u kala ni Zuze.” (Dimatekenu 39:2) Sé phata, Zuze ua kexile mu jikula o muxima uê kua Nzambi iê, Jihova. O Bibidia i zuela kuila, “Jihova ua zukama kua ió a dikola kua muene.” (Jisálamu 145:18) Ihi dingi ia bhange Zuze phala ku zukama kua Nzambi iê?

Zuze ka thandanganha, muéne ua soto ku bhanga kiambote o kikalakalu kiê. Kienhiki, Jihova ua mu besoala kiavulu, Zuze eza mu mu uabhela kiavulu kua ngana iê ia ubhe. Potifale ua mono kuila o mubhik’ê akexile ku mu besoala kua Jihova, o Nzambi ia mundu ua Zuze, ni kuila o dibhata diê dia kexile mu tambula ué mabesá avulu. Bhofele-bhofele, Potifale ua zolele ni ku dielela kiavulu Zuze iu ua bhakula bhu maku a Zuze ioso ia kexile na-iu kubhata phala Zuze ku i tambula konda.—Dimatekenu 39:3-6.

Zuze ua xisa phangu iambote ku minzangala ia lelu a mu sidivila Nzambi. Mu kifika, kioso kiala mu xikola nange a divua kala ala mu ixi iengi, muezala ni uanga, athu a bhanga ngó o ima sé kidielelu ku hádia. Se kiene ki uene mu divua, lembalala kuila Jihova ka lunguluka kana. (Tiiaku 1:17) Muéne u kala hanji ni uoso u mu kala fiiele, u sota ku bhanga o ima kala kia mu uabhela muéne. Muéne u mu besoala kiavulu, kiene ué kia-nda bhanga n’eie.

O Bibidia i tu tangela ué kuila, Zuze ua kexile mu kula ni ku kala ni kilunji. Zuze ua kituka diiala, “anga u kala muthu ua uabha o pholo ni mukutu.” O izuelu íii ilondekesa kuila, kueji kuiza kiluezu ku pholo, mukonda o ku uabha o pholo ni mukutu ku bhange o athu ku tu uabhela kiavulu.

Zuze ua bhanene valolo ia dikota ku ufiiele; maji o muhatu ua Potifale, kana. O Bibidia i zuela: “Mukaji’a ngana iê u kala mu kala mu ku ta mesu kua Zuze; anga u mu ambela, uixi: Ndoko, tu zekietu.” (Dimatekenu 39:7) O kuila Zuze ua mesenene ku zeka ni muhatu iú mubhezi ua nzambi ja makutu? O Bibidia i tu londekesa kuila Zuze uexile ué ni ji hanji ja xitu kála o minzangala ia lelu, i tu londekesa ué kuila o muhatu ua mvuama ni kabhitangu ka masoladi akua Ijitu, uexile muhatu ua uabha o pholo ni mukutu. O kuila Zuze ua banze kuila o ngana iê ka-nda kuijiia kuila muéne ua zekele ni muhatu’ê? O kuila muéne ua banze mu jimbote jeji tambula mu ku zeka ni muhatu ua ngana iê?

Mu kidi, etu ki tuejiia ihi ia banze Zuze mu kithangana kieniókio. Maji tuejiia kiambote ihi ia kexile ku muxima uê. Tu mona o kidi kiki, mu izuelu iê, muéne uixi: “Muadi’ami-ze kejiia dingi  kima kiala-na-kiu m’onzo, iene ioso u i bhana bhu maku’ami; o m’onz’umu ki muala dingi muthu ua ngi tundu ni kima; kana-ku ué kima ki ngi fudisa, ki kale ngó eie, mukonda eie u muhatu’ê; eme-phe ngi tena kiebhi kubhanga kuiibha kuos’uku ni kuta kituxi kua Nzambi?” (Dimatekenu 39:8, 9) Xinganeka Zuze kuzuela o izuelu íii ni ku suína kuoso. O ku xinganeka ngó ku ima ia mesenene o muhatu kuila muéne u bhanga, kia luualesa kiavulu o muxima ua Zuze. Mukonda diahi?

Kala kiambe Zuze, o ngana iê ua mu dielele kiavulu. Potifale ua bhakuile o dibhata diê dioso bhu maku a Zuze, maji o muhatu’ê kana. Kiebhi Zuze kieji tena ku nganala ngana iê? Muéne ua iibhila o kibanzelu kia ku zeka ni muhatu iú. Maji kuexile kima kia mukuá kia mu bhangesa o ku dituna: O ku ta kituxi kua Nzambi iê, Jihova. Zuze ua di longele kiavulu ni jitata jê kiebhi ki mona Nzambi o ukaza ni ufiiele. Jihova ua kazalesa o makaza a dianga iu ua londekesa o ukexilu uê ua lungu ni maka enhá. O diiala ni muhatu a di bundu mu ku “di bhanga xitu imoxi.” (Dimatekenu 2:24) Oso a bhukumukine o kitumu kiki Nzambi ueji ku a kaxtikala. Mu kifika, o maiala a mesenene ku ngombela o muhatu a Mbalahamu, kuku’a Zuze, ni muhatu a Izake uexile ué kuku’a Zuze, kua kambele ngó eji kua kaxtikala. (Dimatekenu 20:1-3; 26:7-11) Zuze ua di longo kiambote; iu ua mesenene ku belesela o kitumu kiki.

O muhatu ua Potifale ua divu kia iibha ni kitambuijilu kia Zuze. Xinganeka o mubhika ku dituna ku zeka nê ni ku mu ambela kuila keji tena “kubhanga kuiibha kuos’uku!” Né muene kiki, muéne ua mu jijila. Sé phata muéne ua kexile ni njinda, muéne ua mesenene ku bhanga ioso phala ku lungulula o ibanzelu ia Zuze. Muéne ua londekesa o luímbi lua Satanaji kioso kia tendala Jezú. Satanaji ka di tundu kiambote mu jitendasá, maji Satanaji ua kingila “kithangana kiengi.” (Luka 4:13) O jifiiele a tokala ku suina: Kiki kiene kia bhange Zuze. Sumbala o maka enhá a suluka “izuua ioso,” muéne ka xikina. O Bibidia i zuela: “Muéne-phe ka xikina ku muivua.” (Dimatekenu 39:10) Maji né kiki, o muhatu ua Potifale, ua mesenene muene ku zeka ni Zuze.

Muéne ua kingila o kithangana kioso abhika a mukuá kia kexile bhu kanga. Muéne uejidile kuila Zuze ueji bokona m’onzo phala ku bhanga o ikalakalu iê. Kioso muéne kia bokona, o muhatu ua sota ku mu kuata. Ua mu kuata mu divunga diê, ua mu dióndo dingi, uixi: “Zá tu zekietu.” Zuze ua bhange nguzu ni lusolo. Ua bhange ioso, maji né kiki, o muhatu ua kuata ni nguzu ioso mu divunga dia Zuze. Zuze ua di sungu dingi ni nguzu, u xangumuka anga u lengela bhu kanga!—Dimatekenu 39:11,12.

Kima kiambote ku lembalala o kitendelesu kia soneka Phaulu, uixi: “Undumbu lengenu-u!” (1 Kolindu 6:18) Phangu iambote ia xila Zuze ku Jikidistá joso ja kidi! O muenhu u tena ku tu bhangesa ku kala kumoxi ni athu ka xila o itumu ia Nzambi, maji kiki ki kilombolola kuila tua tokala ku bhanga kála kia mu bhanga ene. Kioso-kioso kizé, tua tokala ku lenga.

Mu kifika, Zuze ua di bhana ni kibhidi kia dikota. O muhatu ua Potifale ua mesenene ku vutuila phonzo. Mu kithangana kieniókio, muéne ua mateka o ku di kola ni kuixana o abhika a mukuá phala a bokone. Muéne uambe kuila Zuze ua mesenene ku mu ngombela, maji ua lenge kioso muéne kia di kola. Muéne ua bhake o divunga dia Zuze phala ku di londekesa kua muadi uê, kioso kieji kuíza kubhata. Kioso Potifale kia bhixila, muéne ua mu tangela ioso ni ku mu tela o kikuma mu ku bheka o muthu mukua’xi iéngi kubhata diê. Kiebhi kia divu Potifale? O Bibidia i zuela: “Njinda i mu kuata!” Potifale u tuma ku kuata Zuze anga u mu ta mu kaleia.—Dimatekenu 39:13-20.

Ki tuejiia kiambote kiebhi kiexile o jikaleia ja akua Ijitu mu izuua iná. O jingijiie akua ku tokuesa o ima koxi’a mavu, a sange o ididi íii ia kituka kiá ngundu—ididi ia makota iexile ni ji kaleia. Mu ku bhita kithangana, Zuze ua jimbulula kiambote kiebhi kiexile o kididi, muéne ua tumbula o kizuelu “kaleia” kilombolola kididi kia vundu. (Dimatekenu 40:15) O divulu dia Jisálamu,  di tu londekesa kuila Zuze a mu kaxtikala kiavulu: “Inama iê a i kuama mu ditaka; o jifelu ja jingidinhá ja mu bokona ku muxima moxi.” (Jisálamu 105:17, 18) Saí ithangana, akua Ijitu akexile mu ta o ji pelezu mu mataka a bhangesele o maku a ji pelezu ku kala ku dima ni ku a kuta; a mukuá a a kutile ni misanga ia felu bhu xingu. Zuze ua tale hadi iavulu né muene sé ku ta kituxi kioso-kioso!

Muéne ka bhiti-mu ngó tu izuua kana. O Bibidia i tu tangela kuila Zuze ‘ua kexile mu kaleia.’ * Muéne ua bhiti mivu mu kididi kieniókio kia iibha! Zuze kejidile se eji mu katula mu kaleia. Mu ku bhita ji semana, ni jimbeji, ihi ia mu kuatekesa o ku kolokota?

O musoso u tu bhana o kitambuijilu kiki: “Jihova-phe anga u kala ni Zuze, u mu bhanga henda.” (Dimatekenu 39:21) Se-ku kima ki tena ku batula o henda ia Jihova ku jiselevende jê, né muene o kaleia, mataka mba o ku vunda. (Loma 8:38, 39) Tu tena ku xinganeka Zuze ku samba kua Tat’ê ia diulu ni ku tambula o kutululuka ni ku batama kua muxima kuene mu bhana “Nzambi ió athu oso kuene mú tambula o dikuatekesu.” (2 Kolindu 1:3, 4; Filipe 4:6, 7) Ihi dingi ia bhange Jihova kua Zuze? O Bibidia i zuela kuila Zuze “u sangesa ngalasa ku mesu a kasalelu u tambula konda ia kaleia.”

O jipelezu a a bhanene kikalakalu, Jihova ua besoala dingi Zuze. Zuze ua suínine mu ku bhanga kiambote o ikalakalu ia tambuile ni ku xisa Jihova ku bhanga o mbandu iê. Ni dibesá dia Jihova, Zuze eza ku mu dielela kuala o kasalelu kála kia bhitile mu dibhata dia Potifale. O Bibidia i zuela: “O kasalelu anga u bhakula bhu maka a Zuze, o jipelezu joso jala mu kaleia; katé ioso iala mu bhanga momo, Zuze kiá uia ni ku i bhanga. Kasalelu kala ku suua dingi ima ia bhakuila bhu maku’a Zuze, mukonda Jihova uala-nê; o ima ioso ia bhanga, Jihova u i zediuisa, ienda kiambote.” (Dimatekenu 39:22, 23) Zuze ua sangulukile kiavulu mu kuijiia kuila Jihova ua kexile mu ku mu langa!

Etu ué tu tena ku bhita mu ithangana ia bhonzo, maji tu tena ku di longa ima iavulu ku kixikanu kia Zuze. Se tu zukama izuua kua Jihova mu ku samba ni ku mu belesela ni ufiiele uoso, ni ku bhanga o ima ia mu uabhela, muéne ua-nda tu besoala ué. Kála kia bhiti ni Zuze, Jihova ua bhakele mabesá avulu phala ku bhana kua Zuze kala ki tua-nda mona ku hádia mu kadivulu kaka.