O kuila ua mesena ku kala ni sauidi iambote ni ku kola muenhu, eie ni muiji uê? Ua mesena ku kala ku mundu, sé ndolo, hadi, né kufuá? Kiki ki nzoji kana. Kidi muene, tua-nda kala ku mundu ubhe, mukonda Jihova muéne ua tu kanena. Tala kiebhi kia jimbulula o kikumbidilu kia vondadi iê mu divulu dia Dijingunuinu 21:3-5.—Tanga.

“[Nzambi] u a kondona o masoxi moso ku mesu mâ!” (Dijingunuinu 21:4) Masoxi ebhi a-nda kondona muéne? Ki masoxi a ku sanguluka kana, mba masoxi a langidila o mesu metu. O kikanenu kia Nzambi, kilondekesa o masoxi ijila mu hadi, ni kuditenda kua muthu. Nzambi ka-nda kondona ngó o masoxi; maji ua-nda zubha o ima i bhekela o masoxi—o hadi ni kuditenda.

‘Ki kua-nda kala dingi kufuá.’ (Dijingunuinu 21:4) O nguma, o kalunga, iene ia beta o kota mu ku bhekela masoxi ku athu mu ixi. Jihova ua-nda bhulula ku kalunga o athu a belesela. Kiebhi kia-nda bhanga kiki? Mu ku zubha o kima ki bhekesa o kalunga: o kituxi ki tua lundula kua Adá. (Loma 5:12) Jihova ua-nda katula o kituxi ku athu bhu kaxi ka ku kula kua Jezú. * Kienhiki, o nguma ia sukina, o kalunga, a-nda “i bhuisa-ku.” (1 Kolindo 15:26) O athu a fiiele, a-nda kala ku muenhu kala kia mesena Nzambi—sé kufuá ni sauidi ia iuka.

‘Né ndolo.’ (Dijingunuinu 21:4) Ndolo iebhi ki ia-nda kala-ku dingi? O ndolo ioso, ki kale, ia muxima, mba ia mukutu, ijila mu kituxi ki tua lundula i bhangesa o muenhu ku kala sé valolo ku athu avulu, ki ia-nda kala-ku dingi.

O muenhu sé masoxi, sé ndolo, sé kufuá, ua-nda kala ua kidi muene. Eie nange u dibhudisa: ‘Maji kiki-phe kia-nda bhita kuebhi?’ ‘O kuila o kikanenu kia Nzambi kia lungu ni kuia ku diulu?’ Kana. Tu di longe se mukonda diahi kana. Kia dianga, o kikanenu ki mateka kiki: “O balaka ia Nzambi iala mu’axaxi ka athu,” o athu a tungu mu ixi. (Dijingunuinu 21:3) Kia kaiiadi, o kikanenu kizuela: ‘Ki kua-nda kala dingi kufuá’—mundu mua kexile o kalunga, maji ki kua-nda kala-ku dingi. Ku diulu nuka kuexile kalunga, maji mu mivu iavulu, o kalunga kene mu ixi. Kienhiki, o kikanenu kia Nzambi kia lungu ni muenhu uambote, kia-nda dikumbidila muene bhabha mu ixi.

Jihova ua mesena kuila tu xikina mu kikanenu kiê kia lungu ni mundu ubhe mu ixi. Kia zubha kuzuela o mabesá a-nda tambula o athu mu ixi, muene, uambe: ‘Kindala ima ioso ngi i bhangulula ku ubhe!’ Anga u zuela dingi: ‘Maka enhá a kidi, a tokala ku a dielela.’ (Dijingunuinu 21:5) Mukonda diahi ki u di longe dingi se kiebhi eie ni muiji ué mu tena ku kala kumoxi ni abhezi a zediua a-nda mona o kikanenu kia Nzambi ku di kumbidila mu kidi?