O kitendelesu kia Bibidia kia lungu ni ku zediua ku ukaza, ki kuatekesa kiavulu o makaza, mukonda ki tunda ku muthu ua Bhange o ukaza, Jihova Nzambi. O Bibidia i tu longa kulondekesa ídifua iambote i tena ku bhangesa o ukaza ku zediua, ni ku tu dimuna ku ifua ia iibha i tena ku zanga o ukaza. O Bibidia i longa ué ukexilu uambote ua kuzuela, u zediuisa o ukaza.—Tanga Kolose 3:8-10, 12-14.

O anumi ni ahatu, a tokala ku di bhana kijingu ni ku di xila mudiâ. Kioso kiiadi kiâ kia belesela o kitumu kiâ, kia tokala kulondekesa mu ukaza, kiiadi kiâ, a tena ku zediua mu ukaza uâ.—Tanga Kolose 3:18, 19.

O makaza a tena ku kala kumoxi se ene a di zola mudiâ. Nzambi u tu longa kiebhi ki tu tena o ku zola. Muéne ni Mon’ê, Jezú, phangu iambote ia henda ia kidi, ni kuila ku bhinga ku bhana.—Tanga 1 Nzuá 4:7, 8, 19.

Kioso diiala ni muhatu kia mona kuila o ukaza Ujitu ua Nzambi, o ukaza u nangenena. Nzambi ua bhange o ukaza phala o diiala ni muhatu a kale kumoxi katé ku hádia ni hádia, phala ku langa o miji. O ukaza u tena ku nangenena mukonda Nzambi ua bhange o diiala ni muhatu ni uhete ua ku di kuatekesa mudiâ, mu xitu ni mu maukexilu a mukuá. Muéne ua a bhange ué mu kidifuanganu kiê ni ku tena kua kulondekesa o henda kála ki bhanga muéne.—Tanga Dimatekenu 1:27; 2:18, 24