“Mu izuua ia jisobha jenhiji, o Nzambi ia diulu ua kà bheka-ku utuminu ki u xikina dingi ku u jikinisa; o utuminu iú kà uehela ku bhita dingi bhu maku ma miji iéngi; uene kiá ua kà sasujula mautuminu moso’ama anga a-bhua-ku, maji o uene ua kà xalela ni ku tumina mu thembu joso ku hádia ni hádia.”—Daniiele. 2:44.

O Utuminu ua Nzambi, unguvulu ua diulu. O Sobha a mu solo, Jezú Kristu ua-nda bhingana bhu kididi kia jinguvulu joso, ni ku bhangesa kuila o vondadi ia Nzambi ka i bhanga ngó ku diulu maji ni mu ixi ué. (Matesu 6:9, 10) O unguvulu íii, ka-nda u bhingana ku unguvulu uéngi kana, mukonda uene ‘utuminu ua xalela, ua Ngana ietu, Mubhuludi Jezú Kristu.’ Tua-nda kala ni kutululuka kua kidi ku hádia ni hádia.—2 Phetele 1:11.

“Ki kima kia ku di uana. Kuma katé ni [Satanaji] mukuâ ku di bhangesa kala anju ia mukengeji. Ki ki kala ue kidiuanu se jingunza jê ji di bhangesa ku kala athu a bhanga o mbote. O ku dizubhilu a kà tambula kia sokela mu imbamba iâ ia bhanga jinga.”—2 Kolindo 11:14, 15.

O jingeleja ja makutu a-nda ulondekesa kala kikalakalu kia Diabhu, ni ku i jima mu ixi. O jingeleja joso ni ijibhangânga ki kua-nda kala-ku dingi. Kiki kia-nda bhangesa kuila, athu oso a zolo o “Nzambi ia kidi, ia muenhu,” a mu bheze mu “kixikanu kimoxi” ni mu “nzumbi ni mu kidi.” Kiki kia-nda bhangesa o athu ku kala ni kutululuka ni ku kala kumoxi!—1 Tesalonika 1:9; Efezo 4:5; Nzuá 4:23.

‘Nzambi muéne uenda jinga-nâ, u kala Nzambi iâ. Muéne u a kondona o masoxi moso ku mesu mâ! Ki ku kala dingi kufuá, né ngó mukôndo, mba kudila, mba kukata. Mukonda ima ia diangele-ku, ia bhiti.’—Dijingunuinu 21:3, 4.

 Jihova Nzambi ua-nda bhanga kiki, bhu kaxi ka Mon’ê Jezú ua bhana o muenhu phala ku bhulula o athu mu ngongo. (Nzuá 3:16) Mu utuminu ua Jezú, o athu a-nda kala athu a iuka, sé kituxi. Athu ka-nda tala dingi hadi mukonda, ‘Nzambi ua-nda kala ni athu’ iu ua-nda a “kondona o masoxi moso ku mesu mâ.” O ku kamba o ku iuka ni hadi iene mu tala o athu, ia-nda bhita; ‘o ixi a-nda i lundula ku athu a iuka, muene mua-nda tunga ku hádia ni hádia.’—Jisálamu 37:29.

“[Jezú Kristu] u kuata mudikixi, na kinhoka kiòkulu-ô, muène Diabhu, mba [Satanaji], anga u mu kuta phala a bhange midi ia mivu bhu lubhambu. Anga u mu takula mu dikungu ki di moneka hole, hé u di jika, anga u mu tela-ku kidimbu, phala ka bhombe dingi akua jixi, katé ki-bhua kubhita o midi ia mivu. O midi ia mivu ki i zubha ku bhita, ki bhinga a mu jituna hanji kathangana.” Dijingunuinu 20:2, 3.

O ibhangelu ioso ia iibha i bhanga Satanaji ia ka jimuka kioso Satanaji ni madimonho a-nda ku a kasa ni ku a takula ku “dikungu ki di moneka hole,” ka-nda tena ku nganala dingi o athu. Ene ka-nda tena ku dita mu ima ia bhanga o athu. Kutululuka kua dikota ku kala ku mundu sé Satanaji ni madimonho mê phala ku nganala o athu!

“O izuua isukidila-ku” ia-nda ku bhua mu “hadi ia dikota” kala kiambe Jezú. Muéne uambe: ‘Kua ka kala hadi ia dikota, kuma, kiluua ngó i kala-ku, tundé ku dimatekenu dia mundu katé lelu; ni kuila ki ia ka kala-ku dingi.’—Matesu 24:21.

O hadi ia-nda kala ia dikota, mukonda kua-nda kala jiphaxi javulu kuma nuka ia bhitile. O hadi íii ia-nda suka ngó “ku ita ia kizuua kia Dikota kia Nzambi, Muteni-a-Ioso,” a ixana “Alumajedone.”—Dijingunuinu 16:14, 16.

O athu ku mundu uoso a zola o ku iuka, a mu kingila o kizuua kiki kia-nda bhua o mundu iú ua iibha. Ijiia o mabesá a mu kingila ku tambula mu utuminu ua Nzambi.

“Mundu uavulu” ua-nda bokona ku mundu ubhe ua tululuka: O Mak’â Nzambi a zuela kuila “mundu uavulu” ua athu ua-nda tunda ku “hadi ia dikota” ni ku kala ku mundu ubhe ua iuka. (Dijingunuinu 7:9, 10, 14; 2 Phetele 3:13) Ene a-nda sakidila Jezú Kristu, o “Kambudi ka Nzambi, ka katula o ituxi ia mundu” mu ku a bhulula.—Nzuá 1:29.

Mabesá avulu a-nda tambula o athu mu ku a longa kua Nzambi: Ku mundu ubhe, ‘o ixi ioso ia kezala ni kuijiia kua Jihova, kála o menha kiezalesa o kalunga.’ (Izaia 11:9) O ulongelu iú ua Nzambi ua lungu ni kiebhi kia tokala ku dibhana o athu mudiâ ni ku langa o ixi. Nzambi ua kanena: “Eme Jihova Nzambi ié, u ku longa kioso kia uabha, hé u kuendesa mu njila i ua fuama kuenda mu ku di-tela.”—Izaia 48:17.

Ndandu jetu jafú, a ka vutuka ku muenhu: Kioso kia kexile mu ixi, Jezú ua fukununa o kamba diê Lázalu ua fuile. (Nzuá 11:1, 5, 38-44) Mu ku bhanga kiki, muéne ua londekesa, o kima kia-nda bhanga kioso kia-nda tumina kala Sobha ia Utuminu ua Nzambi.—Nzuá 5:28, 29.

Mu ixi mua-nda kala kutululuka ni ku iuka: Mu utuminu ua Kristu, ki kua-nda kala dingi athu a bhukumukina o itumu. Kiebhi ki tuejiia o kidi kiki? Tuejiia mukonda Jezú u tena ku mona o ima iala ku mixima ia athu, ua-nda tena ku fundisa mu kidi o muthu ua iuka ni muthu ua iibha. O ió a dituna ku lungulula o ukexilu uâ ua iibha, ka-nda kala ku mundu ubhe ua Nzambi.—Jisálamu 37:9, 10; Izaia 11:3, 4; 65:20; Matesu 9:4.

Tua di longo mu milongi íii, ikanenu ia Bibidia ia-nda di kumbidila ku hádia. Kioso o Utuminu ua Nzambi kia-nda tumina o ixi ioso, o “kutululuka kuavulu” kua-nda nangenena ku hádia ni hádia. (Jisálamu 37:11, 29) O ima ioso i bheka ndolo ni jiphaxi iene ku mundu, ia ka bhua. Tu tena ku xikina mu ima íii mukonda dia kikanenu kia Nzambi, k’exi: “Kindala ima ioso nga i bhangulula ku ubhe! . . . Kuma maka ià a kidi, a tokala ku a dielela.”—Dijingunuinu 21:5.