O Kuila Tua Tokala ku Dielela ku Jingeleja mu Maka Alungu ni Ita?
Alberto uexile disoladi mu dikuinhi dia mivu. Muéne u zuela: “O padele ietu, ua kexile mu tu besoala, mu kuzuela: ‘Nzambi uala n’enu.’ Maji nga kexile mu di bhuidisa: ‘Eme nga múia ku jibha, o Bibidia i zuela kuila,’ “kana ku jibha.”’”
Ray ua kexile mu naviiu ia ita mu Ita ia Kaiiadi ia bhiti ku Mundu Uoso. Saí kizuua, muéne uebhuidisa padele: “Eie ua bokona mu naviiu iu ua sambe mu ku bhinga dibesá phala o masoladi ku nganhala o ita. O kuila o jinguma jetu ka mu a sambela uá phala ku nganhala o ita?” O padele ua tambuijila kuila, o ima i bhanga Ngana, o athu ka tena ku i tendela.
Se ku xikina mu kitambuijilu kiki, k’eie ngó kana.
IHI I LONGA O BIBIDIA?
Jezú uambe kuila, mu ijila ioso, o kijila kia dikota, ‘o ku zola mukuenu, kala ki ua di zolo eie-muene.’ (Marku 12:31) O kuila Jezú ua londekesa kuila tua tokala ku tala bhuoso bhua tungu mukuetu mba o ixi iê phala ku mu zola? Kana. Muéne uambe ku maxibulu mê: “Kiene kia m’ijidila ku athu oso, kuma muala mu jixibulu jami, se mua di zolo mu dienu.” (Nzuá 13:34, 35) O ku di zola mudiâ, kueji kala kidimbu phala ene. Ene eji kala polondo phala ku bhana o mienhu iâ phala ku di kuatekesa mudiâ, kana ku jibha akuâ.
O Jikidistá ja dianga, akexile mu belesela o izuelu ia Jezú. O divulu, Enciclopédia da Religião, di zuela: “O jitata ja dianga ja ngeleja, kala Tertulianu ni Origen a zuela kuila, o Jikidistá a a fidisa o ku katula o mienhu ia athu, kienhiki a ditunu ku kala masoladi a akua Loma.”
KIEBHI O JIMBANGI JA JIHOVA KIENE MU KUMBIDILA O KIJILA KIKI?
Kuma o Jimbangi ja Jihova, a tungu mu jixi joso, athu mu jixi jiji ene mu zoka mudiâ. Maji ene a bhanga ioso phala kulondekesa o kidimbu kiâ—o henda.
O kuila o atuameni a jingeleja, ene mu longa o henda ia kidi ia Jikidistá?
Mu kifika, mu ita ia bhitile ku muvu ua 1994, ku mbandu ia akua Hutu ni akua Tutsi, mu ixi ia Ruanda, o Jimbangi ja Jihova ka di tele-mu kana. O Jimbangi ja Jihova akua Hutu ni akua Tutsi, akexile mu di kuatekesa mudiâ sumbala ejidile kuila mu ku bhanga kiki, exile mu ta o mienhu iâ mu iluezu. Kioso athu kiiadi, akua Hutu, mbangi ja Jihova, kia kuatekesele phange jâ akua Tutusi o ku lenga, o tupita tua Interahamwe ia akua Hutu, ambe: “Mua tokala kufuá mukonda mua kuatekesa akua Tutsi o ku lenga.” Kienhiki, kiiadi kiâ a a jibha.—Nzuá 15:13.
Ihi i u banza: O kuila o ima ia bhanga o Jimbangi ja Jihova, ia di lungu ni izuelu ia Jezú ia ku zola akuetu?
