O KUILA kima kia iibha ku bhanga o kibhuidisu kiala mu kapa dia kadivulu kaka? Saí athu a banza kuila kima kia iibha muene, maji athu avulu ene mu dibhudisa se Nzambi muene, muthu ua iibha—a mukuá a xikina kuila kidi muene. Mukonda diahi?

O athu a bhuluka mu mavuua, ene mu kuibhula: “Mukonda diahi Nzambi uehela o ima íii ku bhita? O kuila muéne ka tu suu? Inga muthu ua iibha?”

A mukuá a divua uá kiki kioso kia tanga o Bibidia. Ene a tanga misoso kala, o Dilúvio mu izuua ia Noué, anga a dibhudisa: ‘Mukonda diahi o Nzambi ia henda ua buikisa athu avulu mu dilúvio? O kuila muéne muthu ua iibha?’

O kuila ua bhangele kiá o ibhuidisu íii? Inga u mona kuila ku tena ku tambuijila o athu a kuibhula se Nzambi muthu ua iibha? Se kiki ki bhita, tala o kibhuidisu ki tena ku ku kuatekesa.

Tu zemba o kuiibha mukonda tuejiia o kima kia uabha mu kiki kia iibha. Mu ukexilu iú, ki tu difu ni iama. O Mubhangi uetu ua tu bhange mu “kidifuanganu kiê.” (Dimatekenu 1:27) Kiki kilombolola ihi? Muéne ua tu bhange ni kutena kua kulondekesa o ídifua iê, ni ukexilu ua kuijiia o kima kia uabha mu kiki kia iibha. Tala o kifika kiki: Se Nzambi ua tu bhange ni kutena kua kuijiia o kima kia uabha mu kiki kia iibha, kiki ki kilondekesa kuila muéne ua zembe ué o kuiibha?

O Bibidia ilondekesa kuila Nzambi ua zembe o kuiibha. Mu Bibidia, Nzambi u tu tangela: ‘O njila jami ja tundu o ji njila jenu, o ibanzelu iami ué ia tundu o ibanzelu ienu.’ (Izaia 55:9) Se tu zuela kuila Nzambi muthu ua iibha, ki tueji londekesa kuila o ibanzelu ietu ia tundu o ibanzelu ia Nzambi? Kima kiambote ku sota kuijiia kiambote o ima ande dia kuzuela kuila Nzambi muthu ua iibha. Mu veji dia kuibhula se Nzambi muthu ua iibha mba kana, tua tokala ku dibhudisa se mukonda diahi saí ithangana, o ima i bhanga Nzambi i tu bhangesa ku banza kuila muéne muthu ua iibha. Phala ku tu kuatekesa ku tendela o maka enhá, tu di longe ihi ilombolola o kizuelu “kuiibha.”

Kioso ki tu zuela, muthu ua iibha, tua mu londekesa kuila muéne uala ni ibanzelu ia iibha. O muthu ua iibha, ió u uabhela ku mona akuâ ku tala hadi mba u bhanga poko kioso akuâ kia mu bhita ni ibhidi. Mu kifika, o tata u beta mon’ê mukonda ua uabhela o ku mu talesa hadi, tu tena kuzuela kuila o tata iú, muthu ua iibha. Maji o tata u beta mon’ê mukonda ua mesena ku mu longa mba ku mu langa, o tata iú, muthu uambote. Se a ku fundile kiá kia iibha, u tena ku mona kuila, ki kia bhonzo ku fundisa akuâ mu ima ia bhanga.

Tu di longe ima iiadi i tu londekesa se mukonda diahi saí athu a banza kuila, Nzambi muthu ua iibha—o mavuua u tuene mu mona lelu, ni misoso ia Bibidia ilondekesa kiebhi Nzambi kia kaxtikala o athu m’ukulu. O kuila o ima íii ilondekesa muene kuila Nzambi muthu ua iibha?