Saí muhatu ua banzele kuila Jihova ka mu zolele, uambe: “O kibhidi kia dikota ki ngene mu dibhana na-kiu izuua ioso, o ku di mona kala ki ngala’mi ni valolo.” O kuila uene ué mu divua kiki? Se kiene, nange u di bhuidisa: ‘O kuila Jihova, mu kidi, u suua o jiselevende jê?’ Kiene, muéne u suua o muthu u mu bheza! O izuelu ia Jezú, i tu londekesa kuila Jihova u suua o jiselevende jê.—Tanga Nzuá 6:44.

Ihi ia mesenene o kuzuela Jezú, ió uejiia kiambote Jihova ni vondadi iê, muthu uoso-uoso, ndenge? (Luka 10:22) Jezú ua jimbulula: “Kana muthu u tena kuiza ko-kuami, se Tata ua ngi tumu u kamba ku mu sunga.” Kienhiki, ki tu tena ku kituka akaiedi a Kristu—ni abhezi a Tat’etu ia diulu, Jihova—se Jihova u kamba ku tu sunga. (2 Tesalonika 2:13) Se tu tendela ia mesenene kuzuela Jezú, tua-nda mona kuila, Nzambi uene mu tu langa.

Ihi ilombolola ku tu sunga kuala Jihova? O kizuelu “ku tu sunga,” mu Ngeleku, kilombolola ku sunga uanda ua jimbiji. (Nzuá 21:6, 11) O kuila Jihova u tu jijidika ku mu bheza? Kana. Jihova ua tu bhange ni ufôlo ua ku sola, mukonda dia kiki, muéne ka jijidika o athu phala ku mu bheza. (Matendelelu 30:19, 20) Saí diiala mukua ku tokuesa o Bibidia, uambe: “Se-ku kikuatelu bhu kanga dia dibhitu dia muxima ua muthu. Ka tena ku di jikula bhu kanga.” Jihova u sota ku mixima ia jimidi ja athu, uoso ua mesena ku muijiia. (1 Malunda 28:9) Kioso kia sanga muthu, muéne u mu sunga ko kuê. Kiebhi kia bhanga kiki?

Jihova u sunga o muthu uala ni muxima uambote. (Ikalakalu 13:48) Jihova u bhanga kiki mu maukexilu a iiadi—bhu kaxi ka njimbu iambote ia Bibidia, i tula ko kuetu, ni bhu kaxi ka nzumbi iê ikôla. Kioso Jihova kia mona o muxima ua muthu ua mesena kuívua o kidi kia Bibidia, muéne bhu kaxi ka nzumbi iê u kuatekesa o muthu ku tendela ni ku kumbidila o kidi ku muenhu uê. (1 Kolindo 2:11, 12) Sé o kikuatekesu kia Nzambi, ki tueji tena ku kala akaiedi a kidi a Jezú, ni ku kala abhezi a kidi a Jihova.

Ihi i tu longa o izuelu ia Jezú mu divulu dia Nzuá 6:44 ia lungu ni Jihova Nzambi? Jihova u sunga o athu ku mbandu iê mukonda muéne u mona o ukexilu uambote ua muxima uâ ni ku a suua. O ku tendela o kidi kiki, kia kuatekesa o muhatu u tua mu tange ku dimatekenu. Muéne uambe: “O ku kala selevende ia Jihova, ujitu ua dikota ua tokala ku tambula o muthu ku muenhu uê. Se Jihova ua ngi solo phala ku kala selevende iê, ngala ni valolo iavulu phala muéne.” Abha eie? O kuila o kuijiia kuila Jihova u suua o abhezi’ê ki ku suínisa ku jikula o dibhitu dia muxima uê?