O maka a mateka kioso Jezú kia kanena ku kifumbe kuila ueji kala ni muéne mu Palaízu. Jezú uambe: “Kidi ngi kuambela lelu, ua ka kala ni eme mu Palaízu.” (Luka 23:43, NW) Bhabha, Jezú ka zuela se kuebhi kueji kala o Palaízu. O kuila Jezú ua kexile mu zuela kuila o kifumbe ueji kala ni muéne ku diulu?

Tua-nda di longa se o kifumbe ua kexile ni ídifua ieji mu bhangesa ku kala ku diulu. O athu ala ni kidielelu kia kuia ku diulu, ene mu a batizala ni menha ni nzumbi ikôla, anga a kituka maxibulu a Jezú. (Nzuá 3:3, 5) Ene uá a kumbidila ku mienhu iâ o itumu ia Nzambi, alondekesa o ídifua kála, athu a kidi, a kolokota mu ufiiele uâ, ni kulondekesa o henda. (1 Kolindo 6:9-11) Ene a kala uá jifiiele kua Nzambi ni kua Kristu, katé ku disukilu dia mienhu iâ mu ixi. (Luka 22:28-30; 2 Timote 2:12) Mu ku kumbidila o itumu íii ia Nzambi, ene alondekesa kuila a tokala ku a fukununa ni ku kala kumoxi ni Kristu ku diulu kala akunji ni jisobha, phala ku tumina o ixi mu midi ia mivu.—Dijingunuinu 20:6.

Maji o kifumbe ua kexile ku mbandu ia Jezú, uexile kijibhânganga, iu uafú mu ufunu uê ua ujibhânganga. (Luka 23:32, 39-41) Mu kidi, muéne ua londekesa ukexilu ua ku xila kioso kia zuela kua Jezú, kuila: ‘Ngi lembalale, hádia ki uíza ku usobha mu Utuminu uê.’ (Luka 23:42) Maji muéne ki muthu a mu batizala, kexile dixibulu dia Jezú, né muene ku kala ni ukexilu uambote a tokala o ku kala nau o jifiiele. O kuila Jezú ueji kanena o kifumbe kuia ku diulu phala ku tumina kumoxi ni akaiedi’ê a fiiele a kolokotele mu ufiiele uâ?—Loma 2:6, 7.

Mu kifika: Se muthu u ku bhinga muloloki mukonda dia ku nhana o kitadi kiê, nange u tena ku mu loloka. Maji o kuila ueji mu dielela ku tambula konda ia uenji uê mba ku langa o muiji uê? Eie ueji bhana ngó o ikalakalu íii ku muthu u ua mu dielela kiavulu. Kiene ué kimoxi, o athu a tambula o kidielelu kia kuia ku diulu, a tokala kulondekesa kuila, athu a kidi, a-nda belesela o itumu ia Nzambi kioso kia-nda tumina o athu a-nda kala mu ixi. (Dijingunuinu 2:10) Sumbala o kifumbe ande dia kufuá ua londekesa kuila muthu ua kidi, ki kuexile kima kia londekesa kuila muéne uexile muthu ua kidi.

Maji o kuila Jezú ua kanena o kifumbe ku kala né ku diulu mu kizuua kieniókio? Kana, mukonda katé muene Jezú ka bokona ku diulu mu kizuua kieniókio. Mu veji dia kiki, muéne ua bhange izuua itatu “koxi a mavu”—mu mbila. (Matesu 12:40; Marku 10:34) Né muene kioso kia mu fukununa, muéne ua kexile hanji mu ixi 40 a izuua ande dia kuia ku diulu. (Ikalakalu 1:3, 9) Kienhiki, o kifumbe keji tena ku kala ku diulu ni Jezú mu kizuua kieniókio.

Palaízu iebhi-phe kueji kala o kifumbe? Kioso kia-nda mu fukununa, muéne ua-nda kala mu ixi mu Palaízu kua-nda tumina Jezú. (Ikalakalu 24:15; Dijingunuinu 21:3, 4) Phala kuijiia dingi ia lungu ni Palaízu ni itumu ia Nzambi, zuela ni Jimbangi ja Jihova.