Kiebhi Kieji Tambuijila Jezú

Athu avulu a xikina Nzambi, amba kuila o jingeleja ja tokala ku bhanga ukamba ni jinguvulu. Ene a xikina kuila o jingeleja ji tena ku kuatekesa ku batula o maka mu ngongo. Maji a mukuá a zuela kuila o jingeleja ni jinguvulu, ka tokala ku bhanga ukamba. Ihi i u banza ia lungu ni jingeleja ku bhanga ukamba ni jinguvulu? O kuila o jingeleja ni jinguvulu a tokala ku bhanga muene ukamba?

JEZÚ KRISTU, a mu tange kuila “muthu a mu xila kiavulu ku jingeleja.” Kienhiki, xinganeka ngó se tua tenene ku mu bhanga o kibhuidisu, o kuila o jingeleja ja tokala ku bhanga ukamba ni jinguvulu? Kiebhi muéne kieji tambuijila? Kioso kia kexile hanji mu ixi, muéne ua tambuijila o kibhuidisu kiki bhu kaxi ka izuelu ni mu ima ia kexile mu bhanga. Mu kifika, ku Diskursu dia bhange ku Mulundu, Jezú ua bhana itendelesu ia kuatekesa o akaiedi’ê kuijiia se ihi ia tokalele o ku bhanga mu sanzala iâ. Tua-nda di longa jipondo ja longo muéne ku mulundu.

A Bhana Phangu Iambote ku Akuâ

Jezú ua jimbulula o ukexilu ua tokalele kulondekesa o akaiedi’ê ia lungu ni mundu iú. Muéne uambe: “‘Enu mu móngua ua ixi. Maji se o móngua ki uala dingi ni ngunzu, kiebhi ki ua-nda toalesa? Ki uala dingi ni valolo ia kima, u bhinga kia ngó ku u texi phala ku u diota-diota ku athu.’ Enu mu mukengeji ua mundu. . . . O mukengeji uenu u muikine bhu pholo ia athu, ene a mone ima iambote i mu bhanga, ni a ximane Tata ienu uene mu diulu.” (Matesu 5:13-16) Mukonda diahi Jezú ua sokesa o akaiedi’ê ni móngua ni mukengeji?

O izuelu ia Jezú ia londekesa kuila o akaiedi’ê ala kala móngua, ka tokalele ku kala ngó bhu kididi kimoxi, maji a tokalele ku kala ku mundu uoso. Ene ala kala mukengeji, ene ka muika ngó kididi kimoxi, maji mu ididi muala athu oso. Mu kuzuela kiki, Jezú ua londekesa kuila, o akaiedi’ê ka tokalele ku bhanga ukamba ni mundu. Mukonda diahi?

Xinganeka ngó: O móngua ki u tena ku toualesa sé ka u fungu ni kudia. O mukengeji ki u tena ku muikina o dixilu se ka u tulu-mu. Kienhiki, ki ki bhonzo ku tendela se mukonda diahi, Jezú ka tendelesa o maxibulu mê ku tunga bhu kididi kimoxi ku dima dia milundu ene ngó mudiâ. Ka suínisa ué o akaidi’ê, ku tunga ubheka uâ ku dima dia milundu phala ka kale bhu kaxi ka athu kala kumoxi mu ubhezelu. Kála o móngua u bhinga ku u funga mu kudia, o mukengeji ué u bhinga ku muikina mu kitombe, o Jikidistá a tokala ku di tungula bhu kaxi ka athu mukuá.

‘Ka Bhanga Mbandu ia Mundu’

Mu kiki, o itendelesu ia Jezú ia lungu ni ku kala kumoxi ni athu a mukuá, ku bhangesa ku bhanga kibhuidisu, kia lungu ni Kidistá se u dibhana ni maka a jinguvulu. Mukonda diahi? Ande dia ufuilu uê, Jezú ua sambe kua Nzambi, mu ku bhingila o akaiedi iê: “Ki nga bhingi kuma u a katula mu ngongo, maji nga bhingi kuila u a enga, u a kudila kua Diabhu ió ua bhukumuka. ‘Kala eme ki ngi bhanga mbandu ia mundu, ene uá ka bhanga mbandu ia mundu.’” (Nzuá 17:15, 16) Kienhiki, kiebhi o Jikidistá ka bhanga mbandu ia mundu, se a dilungu ni athu mu diembu diâ, a kalakala ni athu mu diembu diâ? Phala tuijiia o itambuijilu, tua-nda di longa ibhuidisu iiadi:

• Ihi ia banzele Jezú ia lungu ni jinguvulu?

• Ihi ia tokala ku bhanga o Jikidistá lelu?