Mbalahamu Diiala Dia Lenduka

Mbalahamu ua xikama bhu muelu ua balaka iê, mu kilembeketa, mu kumbi dia muanha uatu. Kioso muéne kiaia ni ku tala u mona mala atatu, a mu zukama ku balaka iê. * O kia zubha ku a mona, u balumuka bhu muelu ua balaka uia ni ku lenga mu ku a kaudila, u a bhinga phala n’a nhohe bhofele ni ku a zalela. Muéne ua a bhana “kambolo” u a bhangela dingi kudia, mbolo ni matheka, lete, ni xitu ia ngombe ia lambe. Mu ku zalela ajitu’ê, Mbalahamu ka londekesa ngó o ukexilu ua ku zalela, maji kala ki tua-nda di longa, muéne ua londekesa o ku lenduka kua kidi.—Dimatekenu 18:1-8.

O KU LENDUKA IHI? O ku lenduka, kulombolola ku kamba ku di zangeleka, ku kamba ukumbu. O muthu ua lenduka, ki muthu ua tobho kana. (Filipe 2:3) O muthu ua lenduka, uivua kiambote akuâ, u zokela o ubhezelu uê.

KIEBHI MBALAHAMU KIA LONDEKESA O KU LENDUKA? Mbalahamu ni kisangusangu kioso ua sidivila akuâ. Kála kia ki tange kiá ku dimatekenu, kioso Mbalahamu kia mono o athu kitatu, ni lusolo luoso muéne ua a zalela. O muhatu’ê Sala, ni lusolo ua lambe kudia. Sumbala kiexile kikalakalu kiavulu, Mbalahamu ua lengela mu takajana ni ajitu, muéne ua a bhana kudia, muéne uai ni lusolo luoso mu kibhanga kiê, ua solo-mu kiama phala ku ki jibhila o ajitu, muéne ua bhange ioso phala ku zalela o ajitu. Mu veji dia ku bhana o kikalakalu kioso ku jiselevende jê, o diiala didi dia lenduka, ua bhange ioso ia tokalele o ku bhanga. Muéne ka mono kuma o ku sidivila akuâ ku tobha.

Mbalahamu ua kexile mu kuívua o ima ia kexile mu zuela o athu a mu kondolokele. O Bibidia izuela bhofele o izuelu ia Mbalahamu ni Sala. Kienhiki tua di longo kuma mu veji jiiadi, Mbalahamu uevu izuelu ia Sala, iu ua belesela. (Dimatekenu 16:2; 21:8-14) Saí  kithangana, Sala ua zuela kima kia ‘iibhila kiavulu Mbalahamu.’ Maji kioso Jihova kiambela Mbalahamu ku xinganeka kiambote o ibanzelu iê, Mbalahamu ni ku lenduka kuoso ua bhange o kima kia mu bhingile o muhatu’ê.

PHANGU IAHI I TU KATULA KUA MUÉNE? Mu kidi se tu londekesa o ku lenduka, tua-nda sanguluka mu ku sidivila akuetu. Tua-nda sanguluka mu ku bhanga ioso i tu tena phala ku a sangulukisa o mixima iâ.

Tu tena ué kulondekesa o ku lenduka, mu ku xikina o ima i zuela akuetu. Mu veji dia ku dituna ngó o ima i zuela akuetu, mukonda ki izuelu ietu, tua-anda londekesa unjimu se tu xikina o izuelu ia akuetu. (Jisabhu 15:22) O ukexilu iú, u kuatekesa bhenge-bhenge ió ala ku pholo ia akuâ. Saí diiala uala ku pholo a mu ixana Nzuá, uambe: “O muthu uambote u kala ku pholo, u kuata ukamba uambote, u bhangesa akuâ ku kala ni u ukexilu ua kuzuela sé hele.” Muéne uambe dingi: “Ku bhinga ku lenduka kuzuela kuila o muthu ua mu kala ku pholo ua beta-uhete, eie ndenge. Maji se-ku muthu—né muéne o muthu uala ku pholo, u tena ku bhanga o ima ni uhete uoso.”

Kioso ki tu kaiela o phangu ia Mbalahamu ia kuívua o ima i zuela akuetu, ni ku sidivila akuetu, tu kala ni ukamba ni Jihova. Mukonda ‘Nzambi ua iibhila akua izala, u bhana-phe ujitu, athu oso a lenduka.’—1 Phetele 5:5.

[Tanga mu luji]