“Kukonda o Malamba Kua Enhoso a Tate”
“Kukonda o Malamba Kua Enhoso a Tate”
“[Jihova] ua ng’undu . . . kukonda o malamba kua enhoso a tate.”—IZA. 61:1, 2.
1. Ihi ia bhange Jezú phala o athu akexile mu tata, mukonda diahi ua bhange kiki?
JEZÚ KRISTU uambe: “Kúdia kuami, o kubhanga vondadi ia ió ua ngi tumu, ni kuzubha o kikalakalu kiê kia ngi bhana o kubhanga.” (Nzu. 4:34) Mukonda dia ku bhanga o kikalakalu kia mu bhanene kua Nzambi, Jezú ua londekesa o ídifua ia Tat’ê. Kála o henda ia Jihova ku athu. (1 Nzu. 4:7-10) O poxolo Phaulu, ua londekesa o henda íii kioso kiambe kuila Jihova, ‘Nzambi u kuatekesa.’ (2 Kol. 1:3) Jezú ua londekesa o henda íii, kála kia tange o kikanenu kia Izaia. (Tanga Izaia 61:1, 2.) Jezú ua tange o kikanenu kiki kioso kia bokona mu dilombe dia Nazalé, iu uambe kuila o kikanenu kiki kia kexile mu dikumbidila kua muéne. (Luk. 4:16-21) Mu ukunji uê, Jezú ua kondo malamba kua ió akexile mu tata, iu ua a tululukisa o mixima.
2, 3. Mukonda diahi o akaiedi a Kristu a tokalele ku kaiela o phangu iê ia ku konda o malamba ku athu akexile mu tata?
2 O akaiedi a Jezú a tokalele ku kaiela o phangu iê ia ku konda o malamba ku athu akexile mu tata. (1 Kol. 11:1) Phaulu uambe: “Di longese jingienu mudienu, ni kudikuatekesa, mu di sokejeke kumoxi.” (1 Tes. 5:11) Tua tokala ku di kuatekesa mudietu mukonda o athu a mu dibhana ni “jithembu jabhonzo.” (2 Tim. 3:1) Athu ambote lelu, a mu dibhana ni jithembu jiji, ni ima ia iibha ia a bhekela o hadi.
3 Kála kia ki kanena mu Bibidia, mu izuua isukidila-ku ia mundu iú ua iibha, “athu a kà kala azodi a ene ngó, injenji, akua ukumbu, a tènda akuâ, a nonga, a [xibhaka] tata ni mama, a kamba kusakidila, a kamba ujitu ua Maka ma Nzambi. Ka moneka henda ia muthu, kene kuloloka, akua kutatela ngó akuâ, keji kufikisa jihanji, a kaka, a di zemba ni ima iambote. En’ia a bhanga ufe, a thathamana, a vula izala. A kala azodi i jivondadi jâ, ki azodi a Nzambi, kana!” O ukexilu iú ua mu di bandekesa dingi, mukonda ‘athu aiibha-phe, jindunge jâ jiia ni ku di bandekesa.’—2 Tim. 3:2-4, 13.
4. Ihi iene mu bhita ku mundu mu izuua ietu?
4 Ki tu tokala ku diuana, mukonda o Mak’â Nzambi a zuela kuila, “o mundu uoso-phe ua zeka mua kadiaphemba ió mukua ku tondalesa.” (1 Nzu. 5:19) “O mundu uoso-phe,” o ima kála o jingeleja, o jinguvulu, o uenji, ni ima ia mukuá dingi. Se-ku phata kuila Satanaji muéne “o sobha ia mu tumina mu ngong’umu,” “o nzambi iaiibha ia mundu iú.” (Nzu. 14:30; 2 Kol. 4:4) O ima ia iibha ku mundu, ia mu dibandekesa mukonda Satanaji uala ni njinda iavulu, mu kuijiia kuila kua kambe ngó bhofele Jihova ua-nda mu buika. (Dij. 12:12) Kima kiambote kuijiia kuila o thembu ia bhana Nzambi kua Satanaji, ni mundu uê ua iibha, ia-nda bhua kiá, o maka a zangula Satanaji alungu ni ungana ua Jihova, a-nda bhua!—Dim., kibat. 3; Job., kibat. 2.
O Njimbu ia Mbote a mu i Tula mu Ngongo Ioso
5. Kiebhi kia mu dikumbidila o kikanenu kia lungu ni ku tula o njimbu iambote mu izuua isukidila-ku?
5 Mu izuua isukidila-ku o ima ioso ia tange Jezú ia mu di kumbidila. Muéne uambe: “O Njimbu íii Iambote ia Utuminu ua Nzambi, ia bhingi ku i tula mu ngongo ioso, mu ku bhana umbangi ku ifuxi ioso; kiene kia kiéza o dizubhilu.” (Mat. 24:14. NW) O kikalakalu kia ku tula o njimbu iambote ia Utuminu ua Nzambi, a mu ki bhanga ku mundu uoso. Lelu, 7.500.000, ndenge a Jimbangi ja Jihova, mu 107.000 a ilunga ndenge ku mundu uoso a mu boka o Utuminu ua Nzambi, kála kia bhangele Jezú. (Mat. 4:17) Mu izuua ietu o njimbu iambote, iene mu konda o malamba a athu a tate. Ku mivu iiadi ia bhiti, o athu a di bhakula kua Jihova, a tenesa 570.601!
6. Ihi i u banza ia lungu ni kikalakalu kia utuminu kia mu dibandekesa?
6 O Jimbangi ja Jihova, a mu boka ué o njimbu iambote, a mu bhana madivulu avulu mu 500 ja madimi, ndenge. Nuka kia bhitile ku mundu! O nzungule dia athu a mu di bhakula kua Jihova, alondekesa kuila o kikalakalu kiki madiuanu. Sé o kikuatekesu kia nzumbi ikôla, o Jimbangi keji tena ku bhanga o kikalakalu kiki, ku mundu iú ua Satanaji. O njimbu iambote ia Utuminu iene mu boka ku mundu uoso, ki iene ngó mu konda o malamba a jiphange jetu, maji i konda ué o malamba a athu oso a i xikina.
O Jiphange Jetu ji tu Konda o Malamba
7. (a) Mukonda diahi ki tu tokala ku kingila kuila Jihova u zubha kiá o jiphaxi joso? (b) Kiebhi ki tuejiia kuila tu tena ku kolokota kioso ki tu dibhana ni izukutisu, ni ibhidi?
7 Ku mundu iú uezala ni jiphaxi, tu kingila ku dibhana ni maka a tu luualesa. Ki tua tokala ku kingila kuila Nzambi u zubha kiá o jiphaxi joso ande dia ku buika o mundu iú ua iibha. Kioso ki tu dibhana ni kizukutisu, o ku kolokota kuetu, kulondekesa kuila tua zokela o ungana ua Jihova. (2 Tim. 3:12) Ni kikuatekesu kia Tata ietu ia diulu, tu tena ku kaiela o phangu ia Jikidistá mu Tesalonika, a kolokotele mu izukutisu ni ibhidi ni kixikanu kioso.—Tanga 2 Tesalonika 1:3-5.
8. Kiebhi ki tu londekesa o Bibidia, kuila Jihova u konda o malamba a jiselevende jê?
8 Ki tu tokala ku kala ni phata kuila Jihova u konda o malamba a jiselevende jê. Mu kifika, kioso o muenhu ua polofeta Elija ua kexile mu iluezu mukonda dia Sobha ia iibha Jezabele, o polofeta ua lenge, muéne uambe kuila ua mesenene kufuá. Mu veji dia ku mu bazela, Jihova ua mu suínisa, iu ua mu bhana o kikalakalu kia polofeta. (1 Jis. 19:1-21) Tu tena ku mona kuila Jihova u konda o malamba a jiselevende jê, bhu kaxi ka ima ia bhiti mu Kilunga ku hama ia dianga. Mu kifika, “o [ilunga] mu Judeia, ni mu Ngalileia, ni mu Samádia, anga i kala ku paze, i di tunga; i enda mu uôma ua [Jihova], ni mu kutululuka kua Nzumbi Ikôla, anga i sokoloka.” (Ika. 9:31) Tu sakidila ué o ‘ku tululukisa kua Nzumbi Ikôla!’
9. Ihi i tu longa o ukexilu ua Jezú, ua ku konda o malamba a athu?
9 O Jikidistá a tululuka o mixima mu ku di longa ia lungu ni Jezú Kristu, ni ku kaiela o phangu iê. Jezú uambe: “Zenu kokuami enu oso mua bhuila, enu mua tate ni imbamba ia mi nemena, eme nda ngi mi nhohese. Di tuikienu jungu iami, mu di longe ko kuami; mbata eme nga belesela, nga batama muxima, nda mu mone kutululuka kua jinzumbi jenu. Mbata o ima iami ioso i ngi m’inda na-iu, ki i bhonzo; o kimbamba kiami ki ngi mi tuika, kia bhebhuluka.” (Mat. 11:28-30) O ku di longa o ukexilu uambote ua Jezú ku dibhana ni athu, kima kiambote phala ku tu kuatekesa ku dibhana ni jiphaxi.
10, 11. Nanhi ua tokala ku konda o malamba a akuâ mu kilunga?
10 O jiphange jetu mu kilunga a tena ué ku tu konda o malamba. Mu kifika, xinganeka kiebhi kiene mu kuatekesa o tu funga o jiphange ene mu bhita ni jiphaxi. O dixibulu Tiiaku ua soneka: “Se bhuala muthu mu dienu ua-lu kata [mu nzumbi exana o tufunga tua kilunga], ene a sambe-nê, a mu uese maji [ku] mutue mu dijina dia [Jihova].” Ihi ia-nda bhita? “O kusamb’uku, kua xikana, anga ku mu bhulula uoso ua-lu kata. O [Jihova] u mu balumuna, se ua tele ituxi, u mu loloka-iu.” (Tiia. 5:14, 15) O jiphange ja mukuá mu kilunga a tena ku tu konda o malamba.
11 Ki ki bhonzo o ahatu kuzuela ni ahatu ni akuâ, o maka a bhita nau. Bhenge-bhenge o jiphange adiakimi kiá, a tena ku bhana milongi ku minzangala. O jiphange jiji ja kulu mu nzumbi, nange a bhiti kiá mu maka ala nau o minzangala. O ídifua iâ iambote i tena ku kuatekesa. (Tanga Tito 2:3-5.) O tufunga ni jiphange joso a tokala ku ‘suínisa oso a toloka mixima’ mu kaxi ketu. (1 Tes. 5:14, 15) Kima kiambote kuijiia kuila Nzambi, “mukua ku tu kuatekesa mu hadi ietu ioso, phala tu tene ue kukuatekesa oso ala mù tala hadi kala etu.”—2 Kol. 1:4.
12. Mukonda diahi kima kiambote kuia mu kilunga?
12 Kima kiambote kuia mu Kilunga kuívua maka a Bibidia a tu kolokotesa. O Bibidia izuela kuila Juda ni Sila, “a longesa jiphange ni maka mavulu, a a kolesa mixima ni ku a bhana dingi [kikuatekesu].” (Ika. 15:32) Ande dia ku mateka o kiônge kietu, ni kioso ki tu zumbuka tuene mu di suínisa ni jiphange mu kilunga. Né muene se tuala ni jiphaxi, ki tu tokala ku kala ubheka, mukonda ku bhanga kiki ki kia-nda zubha o jiphaxi ji tuala naju. (Jisa. 18:1) Mu veji dia kiki, kima kiambote ku kaiela o milongi ia poxolo Phaulu: “Tu di xinganekienu mudietu, tu di suinise mu ku dizola, ni kubhanga o mbote. Kana kufula ku di bhongolola jinga, uila amoxi ki ene kufula, maji tu di longesa mudietu. Uila kiki, tu di suinisienu mudietu, kota-kota dingi kioso ki mu mona o Kizuua kia Ngana kí zukama.”—Jihe. 10:24, 25.
O Mak’â Nzambi a tu Kuatekesa
13, 14. Jimbulula kiebhi o Bibidia i tena ku tu kuatekesa.
13 Ki kale se tu Jikidistá a tu batizala kiá, mba tua mu di longa kindala ia lungu ni Nzambi, ni ikanenu iê, tu tena ku sanga kikuatekesu mu Mak’â Nzambi. Phaulu ua soneka: “Kuma ima ioso [iosoneke] m’ukulu mu Mikanda Ikôla, a i [soneka] phala etu ku di longa, phala mu kinhenge, ni mu kutula o muxima mu kutanga o Mikanda, tu kale ni kudielela.” (Lom. 15:4) O Mikanda Ikola, i tena ku tu kuatekesa ni ku tu ‘longa kiasoko, mu ku bhanga madimu moso ma mbote.’ (2 Tim. 3:16, 17) O kuijiia o kidi kia lungu ni ikanenu ia Nzambi, ni ku kingila o ki kumbidilu kiê, ki ku suínisa kiavulu. Kienhiki, tua tokala ku di longa kiambote o Mak’â Nzambi, ni madivulu a mukuá a tena ku ku kuatekesa ni ku tu suínisa mu maukexilu moso.
14 Jezú ua tu bhana phangu iambote ia lungu ni ku di longa o Mikanda Ikola, ni ku longa, ni ku kuatekesa akuetu. Kioso kia mu fukununa, muéne ua ‘jimbulula o Mikanda’ ku kiiadi kia maxibulu mê. Kioso kia kexile mu zuela n’â, ene a sangulukile kiavulu ku muxima. (Luk. 24:32) Mu ku kaiela o phangu iambote ia Jezú, o poxolo Phaulu ua ‘tumbula o Mikanda Ikola.’ Athu mu Beleia “a tambulula o maka ni kutetuluka kuoso. Izuua ioso anga a kala mù tekula mu Madivulu ma Nzambi.” (Ika. 17:2, 10, 11) Kienhiki, kima kiambote ku tanga o Bibidia izuua ioso, ku katula-ku mbote, ni ku tanga o madivulu metu, a a bhange phala ku tu kuatekesa, ni ku tu bhana kidielelu mu jithembu jiji ja bhonzo!
Ukexilu ua Mukuá ua ku Kuatekesa Akuetu
15, 16. Ihi i tua tokala o ku bhanga phala ku kuatekesa ni ku suínisa o jiphange Jikidistá?
15 Tu tena ku kuatekesa, ni ku suínisa o jiphange jetu Jikidistá, mu maukexilu avulu. Mu kifika, tu tena kuia mu sumba kudia, ni ima ia mukuá phala phange muadiakimi kiá, mba phange ua mu kata. Tu tena ué ku kuatekesa akuetu mu ima ia mukuá, ni kulondekesa kuila tua mesena o mbote iâ. (Fil. 2:4) Nange tu tena ku ximana phange uene mu londekesa ídifua iambote, kála, henda, uhete, ku suína, ni kixikanu.
16 Ukexilu ua mukuá ua ku kuatekesa o adiakimi kiá, o ku a kunda ku mabhata mâ, ni ku a evua kiambote o ima ia tu zuelela ia lungu ni misoso iâ, ni mabesá oso a tambula kiá mu sidivisu ia Jihova. Kiki ki tena ku tu kuatekesa, ni ku tu suínisa kiavulu! Tua tokala ku tanga n’â o Bibidia, ni madivulu metu, kioso ki tu a kunda ku mabhata mâ. Nange tu tanga n’â o mbandu ia Mulangidi i tua-nda di Longa mu kiônge, mba o milongi i tua-nda di longa mu kiônge kia Milongi ia Bibidia mu Kilunga. Nange tu kala n’â kumoxi phala ku tala dilonga (DVD). Tua tokala ué ku tanga n’â, o misoso i tu sanga mu madivulu metu.
17, 18. Mukonda diahi tua tokala ku xikina kuila Jihova ua-nda tu kuatekesa ni ku tu suínisa?
17 Se tuijiia kuila saí mubhezi ua Jihova ua mesena kikuatekesu, tu tena ku mu tumbula mu misambu ietu. (Lom. 15:30; Kol. 4:12) Kioso ki tuia ni ku dibhana ni maka a moneka, ni ku sota mu ku kuatekesa akuetu, tu tena ué ku kala ni kixikanu kia kexile na-kiu o mukua jisalamu, uembi: “Se uevu kimbamba kia ku xina, iza na-kiu kua Jihova, muene u ku sokesa na-kiu; kuma muene kana kizuua ki ehela muthu uaiuka ku mu bhondeleka sé mbambe.” (Jisá. 55:22) Jihova ua-nda tu kuatekesa ni ku tu suínisa, mu ku kala tu jiselevende jê ja kidi.
18 Nzambi ua zuela ku abhezi m’ukulu: “Eme, eme-muène ngi muthu ua ku mi konda o malamba.” (Iza. 51:12) Jihova kiene ué kia-nda tu bhangela lelu, ua-nda tu besoala mu ima iambote i tu bhanga, mu izuelu ietu kioso ki tu kuatekesa o athu a mu tala hadi. Ki kale se tua kingila kuia ku diulu, mba ku kala mu ixi, kala muthu a tena ku mu kuatekesa mu izuelu ia Phaulu, ia sonekena ku Jikidistá a undu, kioso kiambe: “Ngana ietu Jezú Kristu muène, ni Nzambi, Tata ietu ua tu zola, ió ua tu bhana o kubhua uôma ni kukondoka o malamba sè kufula, ni kudielela kuambote mu kiadi kiê, a mi izalese o mixima ni kubhua uôma, a mi suinise ni mu kuzuela ni mu kubhanga ima ioso iambote.”—2 Tes. 2:16, 17.
Ua Lembalala?
• Kiebhi o ku kula kua kikalakalu kietu, kiene mu kuatekesa ió a tala hadi?
• Ima iahi i tua tokala o ku bhanga phala ku kuatekesa akuetu?
• Ihi ilondekesa mu Bibidia kuila Jihova u kuatekesa o jiselevende jê?
[Ibhuidisu ia ku dilonga]
[Foto ku mbandu 26]
O kuila uene mu kuatekesa ió a tala hadi?
[Foto ku mbandu 28]
Ki kale o minzangala, ni adiakimi kiá, a tena kua a kuatekesa
