O Kuila Jihova ua Kuijiia?
O Kuila Jihova ua Kuijiia?
“[Jihova] uejiia oso a mu tokala.”—2 TIM. 2: 19.
1, 2. (a) Jezú ua thandanganhele ni ihi? (b) Ibhuidisu iahi i tua tokala ku xinganeka?
SAÍ kizuua diiala Falizeu ua zukamene kua Jezú, uebhula, uixi: “Mesene, kiebhi o kijila kia dikota mu Kitumu?” Jezú ua mu vutuila, uixi: “Zola [Jihova], Nzambi iê, ni muxima ué uoso, ni muenhu ué uoso, ni kilunji kié kioso.” (Mat. 22:35-37) Jezú ua zolele kiavulu o Tata iê ia diulu, iu ua londekesa mu izuelu íii. Jezú ua thandanganhe ué mu ku bhanga o vondadi ia Jihova, ua londekesa o ukexilu iu mu ku kala fiiele. Ande dia ufuilu uê, muéne ua zuela kuila Nzambi ua mu ijidile kiambote, mukonda dia ku belesela o itumu Iê. Kienhiki Jezú ua kolokotele mu henda ia Jihova.—Nzu. 15:10.
2 Lelu kuene athu avulu ene mu zuela kuila a zolo Nzambi. Kiene ué ki tuene mu zuela. Maji tua tokala ku xinganeka mu ibhuidisu íii: O kuila Nzambi ua ngijiia? Kiebhi Jihova kiene ku ngi mona? O kuila muéne ua ngijiia kála ngi muthu ua mu tokala? (2 Tim. 2:19) Ujitu ua dikota ku kala ni ukamba ni Ngana ia ngongo ioso!
3. Mukonda diahi saí athu a banza kuila ene ka tena ku tokala kua Jihova, ni ihi i tena ku a kuatekesa ku lungulula o ibanzelu iâ?
3 Saí athu a zolo kiavulu Jihova, maji kia a bhonza ku xikina kuila a tena ku kala ni ukamba ni Nzambi. Saí iá a di tolesa, ka xikina kuila a tena ku a zola kua Nzambi, mukonda dia kiki, ene a xinganeka kuila ka tokala kua Jihova. Tu sanguluka kiavulu mu kuijiia kuila Nzambi, u tu mona mu ukexilu uéngi! (1 Sam. 16:7) O poxolo Phaulu uambela o Jikidistá ni akuâ: “Maji muthu-phe se u zola Nzambi, ió a mu ijiia kuala muène.” (1 Kol. 8:3) Phala ku kuijiia kua Nzambi, ua tokala u mu zola. Xinganeka ngó: Mukonda diahi ua mu tanga o kadivulu kaka? O kuila ua mu di suínisa phala ku sidivila Jihova, ni muxima uê uoso, ni muenhu uê uoso, ni kilunji kiê kioso? Se ua di batizala kiá, ihi ia ku bhangesa o ku di batizala? O Bibidia izuela kuila Jihova uejiia kiambote o mixima, muéne u bhangesa o athu ku mu zukama. (Tanga Ajeu 2:7; Nzuá 6:44.) Eie uejiia kuila se ua mu sidivila Jihova mukonda muéne ua ku bhangesa ku mu zukama. Muéne nuka ua-nda xisa o athu a mu bheza, se ene a kolokota mu ufiiele uâ. Nzambi ua a zolo kiavulu.—Jisá. 94:14.
4. Mukonda diahi tua tokala ku bhana valolo ku ukamba uetu ni Jihova?
4 Se Jihova ua tu zukamesa kua muéne, tua tokala ku kala mu henda iê. (Tanga Juda 20, 21.) O Bibidia izuela kuila tu tena ku tunda mu njila ia Nzambi. (Jihe. 2:1; 3:12, 13) Mu kifika, mu divulu dia 2 Timote 2:19, o poxolo Phaulu ua tumbula Himenu ni Filetu. O kiiadi kiki, a tokalele kua Jihova, mu kusuka-ku ene a xisa o njila ia kidi. (2 Tim. 2:16-18) Saí athu a tokalele mu ilunga ia Ngalásia, a xisa ué o njila ia kidi. ka nangenena mu njila ia kidi. (Nga. 4:9) Tua tokala tu bhana valolo ku ukamba uetu ni Jihova.
5. (a) Ídifua iebhi ia zolo Jihova? (b) Phangu iahi i tua-nda di longa?
5 Se tua mesena kuila Jihova u tuijiia, tua tokala ku kala ni ídifua iambote. (Jisá. 15:1-5; 1 Phe. 3:4) O ídifua íii, o ku lenduka, ni kixikanu. Tua-nda di longa phangu jiiadi ja athu alondekesa o ídifua íii, ia a zolele kiavulu kua Jihova. Tua-nda di longa ué phangu ia muthu ua kexile mu di zangeleka kiavulu, mukonda dia kiki, Jihova ka mu zolele. Tu tena ku katula phangu iambote mu maka enhá.
O Tata ia ió Ala ni Kixikanu
6. (a) Kixikanu kiahi kia londekesa Mbalahamu mu ikanenu ia Jihova? (b) Kiebhi Jihova kiejidile Mbalahamu?
6 Mbalahamu ua “xikina kua Jihova.” Mukonda dia kiki, a mu ixana “tata ia oso a xikana Nzambi.” (Dim. 15:6; Lom. 4:11) Mukonda dia ku kala ni kixikanu, Mbalahamu ua xisa o ixi iê, o makamba mê, o jimbote jê, iu uai ku ixi iéngi. (Dim. 12:1-4; Jihe. 11:8-10) Mbalahamu ua kolokota mu kixikanu kiê mu mivu iavulu. Ua londekesa o kixikanu kiê kioso kia “bhakula Izake kala sata” phala ku belesela Jihova. (Jihe. 11:17-19) Mbalahamu a mu ijidile, ia a mu zolele kiavulu kua Nzambi, mukonda muéne ua kexile ni kixikanu mu ikanenu ia Jihova. (Tanga Dimatekenu 18:19.) Jihova ka mu ijidile ngó kuila Mbalahamu ua kexile ku muenhu, muéne ua mu ijidile kála dikamba diê.—Tiia. 2:22, 23.
7. Ihi iejidile Mbalahamu ia lungu ni ikanenu ia Jihova, ni kiebhi muéne kia londekesa kixikanu?
7 Mu mivu ioso ia bhiti Mbalahamu ka tambula o ujitu ua ku lundula o ixi ia mu kanene. Muéne ka mono ué o mbutu iê ‘kuvula kála museke bhu mbandu ia kalunga.’ (Dim. 22:17, 18) Sumbala o ikanenu íii, ki ia di kumbidila kioso Mbalahamu kia kexile ku muenhu, né kiki muéne ua londekesa kixikanu kua Jihova. Muéne uejidile kuila o ikanenu ioso ia Nzambi i di kumbidila. Né kiki, Mbalahamu ua londekesa kixikanu mu ukexilu uoso ua muenhu uê. (Tanga Jihebeleu 11:13.) O kuila Jihova ua tu ijiia kála tu athu ala ni kixikanu, kála Mbalahamu?
O ku Kingila Jihova Kulondekesa Kixikanu
8. Ima iahi ia mesena o athu, kuila i di kumbidila?
8 Sai ima iavulu i tua mesena kuila i di kumbidila. Kála o ku kazala, ku kala ni ana, ni ku kala ni sauidi iambote, o ku mesena o ima íii, ki kima kia iibha. Sumbala saí athu kene mu tena ku suua o ima ia mesena. Se tuene mu bhita mu maka enhá, phala ku dibhana-nau kiambote tua tokala kulondekesa kixikanu kia kidi.
9, 10. (a) Saí athu a bhanga ihi phala ku kala ni ima ia mesena? (b) Ihi i u banza ia lungu ni ikanenu ia Nzambi ia di kumbidila ku muenhu uê?
9 Kieji londekesa ku kamba kilunji ku mesena ku dianga ku sota o ima íii, mu veji dia ku sota o itumu ia Nzambi. Kiki kieji bhangesa o muthu ku zanga o ukamba uê ni Jihova. Mu kifika, saí athu ene mu sota ku saka o uhaxi mu ukexilu ua ibhila Jihova. A mukuá a sola ku kalakala dikanga, maji a kala se kithangana kia ku kala ni muiji uâ, ni kuia mu iônge mu kilunga. Ihi i tuamba ia lungu ni ku kazala ni muthu ki kidistá? Se saí Kidistá u sola ku bhanga kiki, o kuila ua mesena muene kuila Jihova u mu ijiia? Kiebhi Jihova kieji divua se Mbalahamu ka kexile ni muanhu ua ku kingila o ki kumbidilu kia ikanenu iê? Ihi i tuamba se Mbalahamu ua solele ku fumanesa o dijina diê, mu veji dia ku kingila Jihova? (Sokesa ni divulu dia Dimatekenu 11:4.) O kuila Jihova ueji mu mona kála dikamba diê?
10 Ima iahi i ua mesena kuila i di kumbidila? O kuila uala ni kixikanu kia kolo, phala ku kingila kua Jihova, ua kanena ku kumbidila o ikanenu iê ku athu? (Jisá. 145:16) Kála kia bhiti ni Mbalahamu, o i kumbidilu ia ikanenu ia Nzambi, nange ki i di kumbidila mu kithangana ki tua mesena. Maji né kiki, se tu londekesa kixikanu kála Mbalahamu, Jihova ua-nda tu besoala. Se tu bhanga kiki, tua-nda katula mbote iavulu.—Jihe. 11:6.
Phangu ia ku Lenduka ni Phangu ia ku Dizangeleka
11. Kikalakalu kiahi kia kexile mu bhanga Kola?
11 Tua-nda di longa o phangu ia athu a iiadi, ka di fuile mu ukexilu uâ, ua ku belesela o itumu ia Jihova, Mozé ni Kola. O ukexilu uâ, uene ueji bhangesa Jihova ku a ejiia. Kola, uexile Levita mukua Kohate, ua kexile ni kikalakalu kia ku bhitisa o mundu ua Nzambi mu Kalunga ka Kusuka, ku fundisa o akua Izalaiele a bhukumukine Jihova ku Mulundu ua Sinai, ni kuambata o álaka ia kikutu. (Mak. 32:26-29; Dia. 3:30, 31) Muéne ua sidivila Jihova mu ufiiele ué mu mivu iavulu, mukonda dia kiki, a mu xile kiavulu ku akua Izalaiele.
12. Kála kilondekesa o mbandu ua 31, kiebhi o ku dizangeleka kua bhangesa Kola ku kamba ku muijiia kua Nzambi?
12 Kioso o mundu ua Nzambi kia kexile múia mu Ixi ia a Kanena, Kola ua banzele kuila Jihova ka kexile mu kuendesa kiambote o mundu. Kienhiki, 250 a athu ai ku mbandu ia Kola, a mesenene ku lungulula o ima. Kola ni athu enhá ka banzele mu ukamba uâ ni Jihova. Ene ambela Mozé: “O kiki ue kia vulu kiá, kuma o kilômbo kioso kia Ngana, ene oso athu a Ngana, o Jihova uala mu’axaxe kâ.” (Dia. 16:1-3) Mu ku zuela kiki muene ua dizangelekele kiavulu! Mozé ua ambela: “Jihova muene ua-nda kuijidisa uoso o uê ua mu tokala.” (Tanga Dialuilu 16:5.) Mu kusuka-ku Kola ni athu oso akexile bhu mbandu iê afú.—Dia. 16:31-35.
13, 14. Kiebhi Mozé kia londekesa o ku lenduka kuê?
13 Maji Mozé uexile “muthu ua xididika, athu oso mu ngongo ndenge.” (Dia. 12:3) Muéne ua londekesa o ku xididika kuê ni ku lenduka, mu ku kaiela o itendelesu ia Jihova. (Mak. 7:6; 40:16) O Bibidia ki iene mu tu tangela kuila Mozé ua kexile ni phata ia lungu ni ukexilu ua Jihova kuendesa o ima, mba ua dizangele mu ku belesela o itendelesu ia Jihova. Mu kifika, Jihova ua bhana itendelesu se kiebhi kia tokalele ku tunga o balaka, o itendelesu ia lungile ni kulutina ia linhu, ni mazanzu avulu, phala akua Izalaiele ku tunga o ji tenda. (Mak. 26:1-6) Se kafunga mu kilunga ka Nzambi, u ku bhana itendelesu ia lungu ni ima i ua tokala o ku bhanga, ni i ua tokala kueha, nange u luuala. Jihova muéne o kafunga ka beta-kota mu ukexilu uoso, muéne u bhana ikalakalu ku jiselevende jê, u a dielele kuila a-nda tena ku i bhanga. Muéne u tu bhana itendelesu, phala o mbote ietu. Mozé ka luualele ni Jihova kioso kia mu bhanene o itendelesu, mba ua banzele kuila Jihova ka kexile ku mu xila, mba ua kexile ku mu katula o ufolo uê. Mu veji dia kiki, Mozé ua tumina o akalakadi ku kaiela o itendelesu ia Nzambi, “kiene muene kia bhange.” (Mak. 39:32) O ku bhanga kiki, kulombolola ku lenduka! Mozé uejidile kuila o kikalakalu kia tokalele kua Jihova, muene a mu tumu ngó phala ku ki bhanga.
14 Mozé ua londekesa ué o ku lenduka kioso kia di bhanene ni maka a bhonzo. Saí kizuua Mozé ua dizangele, iu ua kambe ku bhana fuma kua Nzambi kioso athu kia kexile ku mu longolola. Mukonda dia kiki, Jihova ua mu ambela kuila muéne ka-nda kuambata o athu mu Ixi ia a Kanena. (Dia. 20:2-12) Mozé ni phang’ê Alá, a talele hadi iavulu, mu kuívua o ku longolola kua akua Izalaiele. Mukonda dia kiluezu kia te Mozé, kia mu fidisa ku tambula o ujitu ua kexile mu kingila tundé ukulu! Ihi ia bhange Mozé? Sumbala muéne ua luualele, Mozé ua belesela Jihova. Muéne uejidile kuila Jihova Nzambi u fundisa ni kidi kioso. (Mate. 3:25-27; 32:4) Kioso ki u banza mu phangu ia Mozé, ki u xikina kuila muéne a mu ijidile kuala Jihova?—Tanga Makatukilu 33:12, 13.
O ku Belesela Jihova ku Bhinga ku Lenduka
15. O ku dizangeleka kua Kola, ku tu longa ihi?
15 Tu tena ku kala ni ukamba ni Jihova se tu belesela o itendelesu ia tu bhana mu kilunga, phala ku tu kuatekesa ku tendela o maka mu ukexilu uéngi. Kola ni athu akexile bhu mbandu iê, a ditunu Nzambi, mukonda dia ku di dielela mudiâ, ku dizangeleka, ni ku kamba kixikanu. Sumbala Kola ua banzele kuila Mozé ua kukile kiavulu phala kuendesa o mundu ua Nzambi, maji Jihova muéne ua kexile mu kuendesa o mundu uê. Kola ka kexile mu belesela o akunji a Nzambi. Kola ua tokalele ku kingila kua Jihova, phala ku mu kuatekesa ku tendela kiambote o ima, mba ku i lungulula. Mu kusuka-ku Kola uafú, mukonda dia ku dizangeleka kuê!
16. Kiebhi o ku kaiela o phangu ia kulenduka kua Mozé, ku bhangesa ku tuijiia kua Jihova?
16 O phangu íii itendelesu phala o tufunga ni jiphange joso mu kilunga lelu. Phala ku kingila kua Jihova, ni ku belesela o itendelesu iene mu tu bhana, ku bhinga ku lenduka. O kuila tuene mu londekesa kuila tu athu a lenduka, a xididika kála Mozé? O kuila tu tena ku belesela o jiphange ala ku pholo, ni ku kaiela o itendelesu i tuene mu tambula? O kuila tu tena kulondekesa o ku tululuka kioso ki tu luuala? Se tu bhanga kiki, a-nda tuijiia kuala Jihova. Muéne ua-nda zola kiavulu o ku lenduka, ni ku belesela kuetu.
Jihova Uejiia Oso a mu Tokala
17, 18. Ihi i tena ku tu kuatekesa ku kala ni ukamba ni Jihova?
17 Kima kiambote ku xinganeka mu phangu ia athu a a zolele kuala Jihova, ia a kituka makamba mê. Mbalahamu ni Mozé, kexile athu a iuka, a luezele ué kála etu. Maji né kiki, Jihova ua ejidile kála athu a mu tokalele. Maji o phangu ia Kola, ilondekesa kuila ki tu tena ku zukama kua Jihova, ni ku kala ni ukamba ni muéne. Muthu ni muthu ua tokala ku dibhula: ‘Kiebhi Jihova kia ngi mona? Ihi i ngi tena ku di longa mu phangu ia athu enhá?’
18 Mu kuijiia kuila Jihova u mona o jiselevende jê, ja fiiele kála athu a mu tokala, ki tu tululukisa kiavulu. Kolokota mu ku kala ni kixikanu, ku lenduka, ni ídifua ia mukuá dingi, phala ku kala ni ukamba ni Nzambi ietu. Athu oso a ejiia kuala Jihova ala ni ujitu ua dikota lelu, ku hádia, a kingila ku tambula mabesá avulu.—Jisá. 37:18.
Ua Lembalala?
• Ihi ilombolola ku kuijiia kuala Jihova?
• Kiebhi ki tu tena ku kaiela o phangu ia Mbalahamu?
• Phangu iahi i tu katula kua Kola ni Mozé?
[Ibhuidisu ia ku dilonga]
[Foto ku bandu 29]
Kála Mbalahamu, o kuila tua dielela kuila Jihova ua-nda kumbidila o ikanenu iê?
[Foto ku bandu 31]
Kola ka mesenene ku belesela o itendelesu
[Foto ku bandu 32]
O kuila Jihova ua kuijiia kála u muthu u belesela o itendelesu iê?
