Mukonda Diahi o Ukaza Uene mu Bhua?

“[O] Jifalizeu anga jiza kua [Jezú], phala ku mu londa, exi: ‘Manhi mu Kitumu kietu ki kôla diiala ku senga muhatu’ê mukonda dia kikuma kioso-kioso?’”—Matesu 19:3.

SAÍ athu mu izuua ia Jezú, a mu ibhuidisa se o ukaza ua tokalele muéne ku nangenena. Jezú anga u a vutuila, uixi: “Manhi kiluua mu tanga kuma Ió uoso ua a bhanga mu dimatekenu, ua a bhanga diiala ni muhatu? Iú uambe, uixi: ‘Mukonda dia kiki, diiala dixa tat’â ni mam’â, hé u di kuatenena kua muhatu’ê. Ene kiiadi kiâ anga a kala xitu imoxi. Kienhiki ene kala dingi kiiadi, maji xitu imoxi kiá. Ioso-phe ia bandeka Nzambi, ki bhu kale muthu u i uanununa.” * (Matesu 19:4-6) Kiki, kilondekesa kuila, Nzambi ua bhange o ukaza phala ku nangenena.

Saí jixi lelu, 40 a makaza ndenge ene mu di xisa, mba ku di “uanununa.” O kuila o milongi ia Bibidia ia lungu ni ukaza, ki iala dingi ni valolo? O kuila o ukaza uene mu bhua mukonda o itumu ia ukaza ki iala dingi ni valolo?

Xinganeka mu kifika kiki: Makaza a iiadi a sumbu dikalu dia difu. Dikaza dimoxi, di langa kiambote o dikalu diê, u di endesa mu ukexilu uambote. O dikalu didi, di nangenena. O dikaza dia mukuá, ka langa kiambote o dikalu diê, ka di endesa ué kiambote. O dikalu didi, dizanganha, ka di endesa dingi. Nanhi uala ni kikuma ku dikalu dia kaiiadi—o mukua dikalu, anga o dikalu? Mu kidi, o mukua dikalu muéne uala ni kikuma.

Kiene kimoxi ué, o makaza ene mu di xisa, ki kilombolola kuila o itumu ia ukaza ki iala dingi ni valolo, mba ia bhonzo. Makaza avulu a zediua alondekesa kuila, o itumu ia ukaza iala muene ni valolo, ki ia bhonzo. O ukaza iú, u bheka kisangusangu ku makaza, ku muiji, ni ku athu oso. O ukaza ua difu ni dikalu, phala ku nangenena, dia tokala ku di langa kiambote, ni ku di iudika ithangana joso.

Ki kale se eie ua kazala kindala, mba ua kazala kiá ukulu, o milongi ia Bibidia ia lungu ni ku suínisa o ukaza, iala ni valolo ia dikota. Tanga phangu mu jimbandu ja kaiela.

[Tanga mu luji]