1, 2. (a) Ima iahi i ua mu kingila kumona mu Palaízu? (Tala o foto ia dianga.) (b) Ihi ia-nda beta kota ku tu zediuisa ku mundu uobhe?

ETU tua mu kingila o ‘muenhu ua kalela-ku,’ ni hanji ioso. O poxolo Phaulu uambe kuila, o muenhu iú, uene “o muenhu ua kidi.” (Tanga 1 Timote 6:12, 19.) Athu avulu a-nda tambula o muenhu ua kalela-ku mu Palaízu mu ixi. Xinganeka o kuzediua kuetu, mu ku balumuka izuua ioso ni sauidi iambote, ni kisangusangu kioso. (Izaia 35:5, 6) Xinganeka o kusanguluka kuê, mu kukala kumoxi ni muiji uê, makamba mê, ni athu a kazola a-nda fukunuka. (Nzuá 5:28, 29; Ikalakalu 24:15) Eie ua-nda di longa mauhete a ubhe, ua-nda kala ni uhete ua kubhanga kiambote o ima i ua uabhela. Mu kifika, u tena ku di longa dingi ia lungu ni ibhangelu ia Nzambi. U tena ué ku di longa kuxika mimbu, mba kutunga o inzo iê.

² Sumbala tua mu kingila ni hanji ioso o kizuua ki tua-nda bhanga o ima íii, o ubhezelu ua Jihova, kiene o kima kia-nda  tu bhekela o kisangusangu kia dikota. Xinganeka o kuzediua kuetu, kioso o athu oso mu ngongo kia-nda xila o dijina dia Jihova, ni kumona Jihova kala Ngana iâ. (Matesu 6:9, 10) Tua-nda sanguluka kiavulu mu kumona o ixi ioso ni athu a iuka, kala kia mesena Nzambi. Xinganeka ué kiebhi kia-nda kala o ukamba uetu ni Jihova, kioso ki tua-ndaia ni ku kituka tu athu a iuka!​—Jisálamu 73:28; Tiiaku 4:8.

3. Ihi i tua tokala kubhanga kindala?

³ Tua dielela kuila, Jihova ua-nda bhanga o ima ioso íii ia madiuanu, mukonda ‘kua Nzambi, iene ioso i xikina.’ (Matesu 19:25, 26) Se tua mesena kutunga ku mundu uobhe katé ku hádia ni hádia, kiki kiene o kithangana kia ku ‘ku kuatenena’ ku muenhu ua kalela-ku. Kuma tuejiia kuila o dizubhilu dia zukama, o uendelu uetu ua tokala ulondekesa kuila, tua mu kingila o dizubhilu dia mundu iú, mu kithangana kioso kioso. Tua tokala kubhanga ioso kindala, mu ku di pelepalala phala kutunga ku mundu uobhe. Tua-nda mona kiebhi ki tu tena ku di pelepalala.

4. Kiebhi ki tu tena ku di pelepalala kindala, phala kutunga ku mundu uobhe? Bhanga kifika.

⁴ Kiebhi ki tu tena ku di pelepalala kindala, phala kutunga ku mundu uobhe? Se tua mesenene kuia mu tunga mu ixi iéngi, nange tueji di pelepalala kiambote phala kutunga mu ixi ienioió. Mu kifika, nange tueji mateka ku di longa o dimi ni ídifua ia athu a tungu mu ixi íii. Nange tueji lola o kudia kuâ. Kiene ué kimoxi, tu tena ku di pelepalala kindala phala kutunga ku mundu uobhe, mu kubhanga ioso phala kuenda kala athu a tungu kiá ku mundu uobhe. Tu mone o maukexilu u tu tena ku o kubhanga kiki.

5, 6. Kiebhi o kusota kubelesela o itendelesu ia kilunga kia Jihova lelu, kua-nda tu kuatekesa ku di pelepalala phala kutunga ku mundu uobhe?

⁵ Satanaji ua mesena kuila, o athu ku mundu iú, a bhanga o ima ia mesena. Avulu a banza kuma, kima kiambote ku di tumina, ni kuila, ka bhingi kubelesela Nzambi. Ihi iene mu bhita mukonda dia ku di tumina mudiâ? O athu a tala hadi iavulu, ka sanguluka ku muenhu. (Jelemiia 10:23) Maji Jihova, Nguvulu ia henda. Xinganeka o kuzediua kuetu, kioso o athu oso ku mundu uobhe kia-nda mu belesela!

⁶ Ku mundu uobhe, tua-nda sanguluka mu kukaiela o itendelesu ia kilunga kia Jihova, phala kukuatekesa o ixi ku kituka palaízu, ni kulonga o athu oso a-nda fukunuka. Jihova ua-nda tu tumina kubhanga kikalakalu kia dikota. Maji ihi i tuamba, se o athu ala ku pholo a tu tumina kubhanga kikalakalu kia tu ibhila? O kuila tua-nda belesela? O kuila tua-nda bhanga ioso phala kubhanga o kikalakalu kietu ni kisangusangu kioso? Phala ku di pelepalala phala kutunga ku mundu uobhe katé ku hádia ni hádia, tua tokala kubelesela o itendelesu ia kilunga kia Jihova lelu.

7, 8. (a) Mukonda diahi tua tokala kubelesela o jiphange ala ku pholo? (b) Ihi ia bhiti ni Jikidistá ja mukuá? (c) Kidielelu kiahi ki tuala na-kiu kia lungu ni mundu uobhe?

⁷ Se tua mesena kukala polondo phala kutunga ku mundu uobhe, tua tokala kubelesela o itendelesu ia kilunga kia Jihova, ni ku dibhana kiambote ni akuetu. Tua tokala ué kusanguluka ni kubelesela o jiphange jala ku pholo. Mu kifika, kioso kia tu bhana  kikalakalu kia ubhe, tua tokala kubelesela ni vondadi ioso, ni kubhanga ioso phala ku ki bhanga ni kusanguluka kuoso. Se tu di suínisa kubelesela o jiphange jala ku pholo lelu, tua-nda belesela ué o itendelesu i tua-nda tambula ku mundu uobhe. (Tanga Jihebeleu 13:17.) Kioso o akua Izalaiele kia bokona ku Ixi ia Kanana, a a uanene o ididi phala kutunga. (Dialuilu 26:52-56; Josuué 14:1, 2) Kioso ki tua-nda bokona ku mundu uobhe, ki tuejiia o kididi kia-nda tu bhana phala kutunga. Se tu di longa kiá kubelesela o jiphange ala ku pholo kindala, tua-nda sanguluka mu kubhanga o vondadi ia Jihova mu kididi kioso kioso bhu tua-nda tunga.

⁸ Xinganeka o ujitu u tua-nda tambula, ua ku sidivila ku mundu uobhe, ua-nda Tumina Nzambi! Mukonda dia kiki, tu sanguluka mu kubelesela o itendelesu ia kilunga kia Jihova lelu, ni kubhanga kikalakalu kioso kioso kia tu bhana. Saí bhabha, a tu bhana kikalakalu kiéngi. Mu kifika, saí jiphange ja kexile mu kalakala ku Betele ia Estados Unidos, a a tumikisa kala aboki a katunda. Saí tufunga tua ilunga, a a tumikisa ué kala aboki a thembu ioso mukonda a kuka kiá, mba a mu di bhana ni ibhidi iéngi. Ene a sanguluka ni kikalakalu kiâ kia ubhe, mukonda dia kiki, Jihova ua mu a besoala. Se tu samba kua Jihova mu kubhinga kikuatekesu, tu bhanga ioso phala ku mu sidivila, ni kusanguluka ni kikalakalu kioso kioso kia tu bhana, tua-nda zediua ku muenhu, Jihova ua-nda tu besoala ué. (Tanga Jisabhu 10:22.) Ihi i tua-nda bhanga, se ku mundu uobhe tu mesena kutunga bhu kidi kimoxi, maji o kilunga kia Jihova ki tu tumina kutunga bhu kididi kiéngi? Mu kithangana kieniókio ki tu tokala ku thandanganha ni kididi bhu tua-nda tunga, mba o kikalakalu ki tua-nda bhanga. Tua tokala ngó kusakidila mukonda dia kutunga ku mundu uobhe.​—Nehemiia 8:10.

9, 10. (a) Mukonda diahi tua-nda bhinga kulondekesa o muanhu ku mundu uobhe? (b) Kiebhi ki tu tena kulondekesa o muanhu kindala?

⁹ Nange, tua-nda bhinga ué kulondekesa o muanhu ku mundu uobhe. Mu kifika, nange tuívua kuila, o athu a mukuá a sanguluka, mukonda a fukununa o jindandu ni makamba mâ. Maji, nange kubhinga kukingila katé kia-nda fukununa ué o jindandu ni makamba metu a kazola. Se kiki ki bhita, o kuila tua-nda sanguluka kumoxi ni akuetu, ni kulondekesa muanhu? (Loma 12:15) Se tu sota kukingila lelu o kizuua kia-nda dikumbidila o ikanenu ia Jihova, ku hádia tua-nda londekesa ué o muanhu.​—Ndongixi 7:8.

¹⁰ Tu tena ué ku di pelepalala phala kutunga ku mundu uobhe, mu kukala ni muanhu, kioso kia jimbulula dingi kiambote milongi ia Bibidia. O kuila tu di longa kiambote o milongi ia ubhe, ni kulondekesa muanhu, se ki tu tendela kiambote o milongi ia ubhe? Se kiene ki tuene mu bhanga, ki kia-nda tu bhonza kulondekesa o muanhu  ku mundu uobhe, se Jihova u tu bhana itendelesu ia ubhe.—Jisabhu 4:18; Nzuá 16:12.

11. Mukonda diahi tua tokala ku di longa kuloloka akuetu kindala, ni kiebhi o ukexilu iú ua-nda tu kuatekesa ku mundu uobhe?

¹¹ O ukexilu ua mukuá ua ku di pelepalala phala kutunga ku mundu uobhe, o kukala ni ukexilu ua kuloloka. Mu Utuminu ua Kristu ua Midi ia Mivu, kua-nda bhinga thembu phala o athu oso ku kituka athu a iuka. (Ikalakalu 24:15) O kuila tua-nda di zola ni ku di loloka? Se tu di longa kuloloka akuetu ni kukala nau mu ukamba uambote kindala, ki kia-nda tu bhonza kubhanga o ima íii ku mundu uobhe.​—Tanga Kolose 3:12-14.

12. Mukonda diahi tua tokala ku di pelepalala phala kutunga ku mundu uobhe?

¹² Ku mundu uobhe, nange ka-nda tu bhana o ima i tua mesena mu ithangana ioso, mba nange kua-nda bhinga ku kingila katé kia tu bhana na-iu. Né muene se tu bhita ni kima kioso kioso, tua tokala ku sakidila ni kusanguluka. Mu kidi, tua-nda bhinga kulondekesa o ídifua ia mu tu longa Jihova lelu. Mu kiki, se tu di longa kulondekesa o ídifua íii lelu, tua-nda londekesa kuila, tu xikina kuila, o mundu uobhe ua-nda kuíza, ni kuila, tua mu di pelepalala phala o muenhu ua kalelaku. (Jihebeleu 2:5; 11:1) Tua-nda londekesa ué kuila, tua mesena muene kutunga ku mundu uobhe, mua-nda kala ngó o athu a belesela Jihova.

13. Ku mundu uobhe, ihi i tua-nda sota ku ta ku pholo?

¹³ Ku mundu uobhe, tua-nda kala ni ima ioso i tua bhingi phala kuzediua ku muenhu. Maji, o kisangusangu kia dikota, kia-nda kuijila mu kukala ni ukamba uambote ni Jihova. (Matesu 5:3) Tua-nda bhanga o kikalakalu kia Jihova, ni kusanguluka mu ku mu sidivila. (Jisálamu 37:4) Mu kiki, kioso ki tu sota ku ta o sidivisu ia Jihova ku pholo, tua mu di pelepalala phala kutunga  ku mundu uobhe.​—Tanga Matesu 6:19-21.

14. Mbambe jebhi ji tena ku suua o minzangala mu sidivisu ia Jihova?

¹⁴ Kiebhi ki tu tena kubandekesa o kisangusangu kietu mu sidivisu ia Jihova? Tu tena kubhanga kiki, mu ku suua jimbambe. Se u munzangala, xinganeka ia lungu ni ku dibhakula mu sidivisu ia Jihova. Mukonda diahi ku tokuesa mu madivulu metu, o ikalakalu ioso i u tena o kubhanga? U tena kusuua mbambe mu ikalakalu ioso íii. * (Tala ku luiji.) Zuela ni jiphange a di bhakula mu sidivisu ia Jihova mu mivu iavulu. Se u di bhakula mu sidivisu ia Jihova, ua-nda di longa ima iavulu ia valolo. O ima i ua-nda di longa, ia-nda kukuatekesa ku sidivila Jihova ku mundu uobhe.

15. Mbambe jebhi ji tu tena ku suua mu sidivisu ia Jihova?

¹⁵ Kuene jimbambe javulu ji tu tena kusuua mu sidivisu ia Jihova. Mu kifika, tu tena kusuua mbambe ia kubandekesa o uhete uetu ua kuboka. Mba tu tena kusuua mbambe ia ku di longa kiambote o itumu ia Bibidia, ni ku i kaiela ku muenhu uetu. Tu tena ku di suínisa phala kutanga kiambote, ku bhanga kiambote o madiskursu, mba kutambuijila kiambote mu iônge. Mu kidi, se u suua jimbambe mu sidivisu ia Jihova, o jimbambe jiji ja-nda kukuatekesa kukalakala ni kusuína, ni ku di pelepalala phala kutunga ku mundu uobhe.

16. Mukonda diahi o ku sidivila Jihova, kiene o kima kia beta kota ku muenhu?

¹⁶ Se tu sota ku di pelepalala phala kutunga ku mundu uobhe ua Nzambi, o kuila tua-nda di fula ku ima ia beta kota ku mundu iú? Kana! O kima kia beta kota ku muenhu, o ku sidivila Jihova. Ki tua mu sidivila Jihova mukonda dia kijijidiku kia muthu, mba mukonda tua mesena ngó kubhuluka ku hadi ia dikota. Se tu kala ni ukamba uambote ni Jihova, tua-nda zediua ku  muenhu. Muéne ua tu bhange phala kuzediua ku muenhu. Sé-ku kima kia sokela ni henda ia tu kuatela Nzambi, ni itendelesu iambote iene mu tu bhana. (Tanga Jisálamu 63:1-3.) Etu enioso tu tena kumona o kisangusangu kijila mu ku sidivila Jihova ni muxima uoso. O athu ene mu sidivila Jihova mu mivu iavulu, a zuela ni kidi kioso kuila, iú uene o ukexilu ua beta kota ku muenhu.​—Jisálamu 1:1-3; Izaia 58:13, 14.

17. O kuila o ima ni itonokenu i tua uabhela, ia-nda kala ni valolo mu Palaízu?

¹⁷ Mu Palaízu, tua-nda sanguluka mu kubhanga o ima, ni itonokenu i tua uabhela. Mu kidi, Jihova ua tu bhange ni vondadi ia ku dikila o jihanji jetu, muéne ua kanena kuila, ua-nda bhangesa o ‘mienhu ioso kudia, ni kuikuta ni ima iambote.’ (Jisálamu 145:16; Ndongixi 2:24) Tua bhingi kubhanga itonokenu ni ku nhoha, maji tu beta kusanguluka mu kubhanga o ima íii, se tu sota ku ta Jihova ku pholo. Kiene ki tua-nda bhanga ué ku mundu uobhe. Mu kiki, kima kiambote ku ‘dianga kusota o Utuminu ua Nzambi,’ ni ku xinganeka mu mabesá ijila mu ku sidivila Jihova.​—Matesu 6:33.

18. Kiebhi ki tu tena kulondekesa kuila, tua mu di pelepalala phala kutunga mu Palaízu, katé ku hádia ni hádia?

¹⁸ Né muene se tu xinganeka o muenhu u tua-nda kala nau ku mundu uobhe, ki tu tena kuijiia o ima ioso iambote i tua-nda kala na-iu. Tua tokala kulondekesa kuila, tua mesena kutunga ku mundu iú, mu ku di pelepalala kindala, phala kutambula “o muenhu ua kidi.” Tu londekese o ídifua ia mu tu longa Jihova, ni kuboka o njimbu iambote ni kusuína kuoso. Tua tokala ku lola o kusanguluka kuijila mu ku ta o ubhezelu ua Jihova ku pholo. Tu dielela ni muxima uoso kuila, ku mundu uobhe, Jihova ua-nda kumbidila o ima ioso ia kanena. Mu kiki, tua tokala kuenda kala athu a tungu kiá ku mundu uobhe!