1, 2. Mukonda diahi Jezú ua tange o kifika kia jitalendu?

JEZÚ ua tange o musoso ua Jitalendu, phala ku londekesa ku Jikidistá a a undu, o kikalakalu kia tokala o ku bhanga. Maji o kifika kiki, kia lungu ni akaiedi oso a Jezú. Ki kale se tuala ni kidielelu kia kuia ku diulu mba ku tunga mu ixi, etu oso tua tokala ku tendelela kiambote o kifika kiki kia jitalendu.

² Thembu kuxi kia tange Jezú o kifika kiki? Muéne ua tange o kifika kiki, kioso kia kexile mu zuela ni maxibulu mê ia lungu ni ima ieji bhita, kieji kala Sobha ni kioso kieji mateka o izuua i sukidila-ku. (Matesu 24:3) O kifika kia jitalendu ki bhanga mbandu ku ikanenu ia mu di kumbidila mu izuua ietu.

3. Ihi i tu tena ku di longa mu ifika i tu sanga mu divulu dia Matesu mu kibatulu kia 24 ni 25?

³ Kioso Jezú kia zuela ia lungu ni kifika kia jitalendu, muéne ua tange ifika itatu ia mukuá, ia lungu ni izulukutu ieji bhita mu izuua i sukidila-ku. O ifika ioso íii,  ijimbulula o ídifua iambote ia tokala kulondekesa o akaiedi’ê. Tu tena ku tanga o ifika íii mu divulu dia Matesu 24:45 ndu 25:46. O kifika kia dianga, kia lungu ni kimbadi kia fiiele, o kibuka kia tolo kia Jikidistá a a undu, ala ni kikalakalu kia ku longa o mundu ua Jihova. Ene a tokala ku kala fiiele ni ku dimuka. * (Tala ku luiji.) O kifika kia mukuá, kia lungu ni kuinhi dia ilumba. Mu kifika kiki, Jezú ua tendelesa o Jikidistá a a undu phala ku kala polondo ni ku di langa mukonda, ene kejiia o kizuua ni kithangana kia-nda kuíza muéne.  * (Tala ku luiji.) Mu ku suluka, Jezú ua tange o kifika kia jitalendu, phala ku londekesa ku maxibulu mê kuila, ene a tokalele ku kalakala ni ku suína phala ku kumbidila o kikalakalu kia a bhanene. Mu ku suka-ku, Jezú u ta o kifika kia jimbudi ni jihombo, kijimbulula kiambote o maka a lungu ni athu a-nda tunga mu ixi. Muéne u londekesa kuila, ene a tokala ku kala fiiele ni ku bhanga ioso phala ku kuatekesa o Jikidistá a a undu. * (Tala ku luiji.) O milongi íii, ia-nda jimbulula kiambote o kifika kia jitalendu.

4, 5. Nanhi o diiala dia kifika ni iebhi iexile o valolo ia talendu imoxi?

⁴ Tanga Matesu 25:14-30. Mu kifika kia jitalendu, Jezú ua zuela ia lungu ni diiala u bhanga njila. Mu kifika kia mukuá kia difu ni kiki, Jezú ua zuela ia lungu ni diiala u bhanga njila phala kuia ku kala sobha. * (Tala ku luiji.) (Luka 19:12) Mu mivu iavulu, o madivulu metu akexile mu jimbulula kuila, mu ifika iiadi, o diiala di lombolola Jezú, ua bande ku diulu ku muvu ua 33. Maji Jezú ka mu tumbika ku Usobha mu kithangana kia bande ku diulu. Muéne ua kingila katé ku muvu ua 1914, kioso o jinguma jê kia a tula ‘bhoxi dia inama iê.’​—Jihebeleu 10:12, 13.

⁵ Jezú ua zuela kuila, o diiala dia kifika ua kexile ni dinake dia jitalendu. Kiexile kitadi kiavulu. * (Tala ku luiji.) Ande dia diiala ku bhanga njila, muéne ua uane o kitadi kiki ku jiselevende jê. Muéne ua a tendelesa ku kalakala ni kitadi kiê, ni ku ki bandekesa. Kála o kitadi kiexile ni valolo iavulu phala o diiala mu kifika, saí kima kia kexile ni valolo iavulu phala Jezú. O kima kiki kiexile ihi? Kiexile o kikalakalu kia bhangele muéne kioso kia kexile mu ixi.

6, 7. Ihi ilombolola o jitalendu?

⁶ O kikalakalu kia ku boka kiexile ni valolo iavulu phala Jezú. Mukonda dia kikalakalu kiê kia ku boka, athu avulu a kituka maxibulu. (Tanga Luka 4:43.) Maji muéne  uejidile kuila, kua kexile kikalakalu kia dikota phala ku ki bhanga, mukonda athu avulu hanji eji xikina o njimbu iambote. Mu kiki, muéne uambe ku maxibulu mê: “Bhetulenu mesu, mu tale kiambote mu mábhia, idima iabhi kiá, iala polondo phala ku i bhongolola!” (Nzuá 4:35-38) O kidimakaji kiambote, ka tena ku xisa o díbhia diala ni idima iala polondo phala ku i bhongolola. Jezú ua kexile ué ni ukexilu iú. Mu kiki, ande dia muéne ku vutuka ku diulu, Jezú uambe ku akaiedi iê: “Ndenu, mua ka longe jixibulu.” (Matesu 28:18-20) Mu ku zuela kiki, Jezú ua a bhana o ujitu ua dikota ua ku boka o njimbu iambote.​—2 Kolindo 4:7.

⁷ Kala o diiala ua bhana o kitadi kiê ku jiselevende jê, Jezú ua bhana ku Jikidistá a a undu o kikalakalu kia ku bhanga maxibulu. (Matesu 25:14) Mu kiki, o jitalendu ji lombolola o kikalakalu kia ku boka ni ku bhanga maxibulu.

8. Sumbala o kitadi kia tambula o ji selevende ki kia sokele, ihi ia kingila o ngana?

⁸ Jezú uambe kuila, o ngana ua bhana kitanu kia jitalendu ku selevende ia dianga, jiiadi ku ia kaiela, ni imoxi kua ió ua sukidila-ku. (Matesu 25:15) O kitadi kia bhanene o ngana ku abhika kiki sokele, maji muéne ua mesenene kuila, ene oso a kalakala phala ku bandekesa o kitadi kiê. Kiene kimoxi, Jezú ua mesena kuila, o  akaiedi’ê a a undu a bhanga ioso ia tena mu sidivisu ia ku boka. (Matesu 22:37; Kolose 3:23) Mu Pendekoxi ia muvu ua 33, o akaiedi a Jezú a mateka ku bhanga maxibulu a athu a jixi joso. Kioso ki tu tanga mu Bibidia o divulu dia Ikalakalu, tu mona o nguzu ia bhangele mu kikalakalu kiki. * (Tala ku luiji.)​—Ikalakalu 6:7; 12:24; 19:20.

9. (a) Ihi ia bhange o jiselevende jiiadi ni kitadi kia tambula ni ihi i tu tena ku di longa mu íii ia bhange? (b) Ihi ia tokala o ku bhanga o athu ala ni kidielelu kia ku tunga mu ixi?

⁹ O jiselevende jiiadi ja dianga, a kalakala kiambote ni kitadi kia ngana, ji lombolola o Jikidistá a a undu a fiiele mu izuua isukidila-ku. Tundé ku muvu ua 1919, ene a mu bhanga ioso ia tena mu kikalakalu kia ku boka. Mu kifika, o kitadi kia tambula o jiselevende jiiadi ja dianga ki ki sokele, maji kiki, ki kilombolola kuila, kuala ibuka iiadi ia Jikidistá a a undu a fiiele. O jiselevende jiiadi ja kifika, a kalakala ni ku suína kuoso ni ku bandekesa ku kitadi. Maji, o kuila o Jikidistá a a undu, ene ngó a tokala ku kalakala ni ku suína mu kikalakalu kia ku boka ni ku longa? Kana. O kifika kia Jezú kia lungu ni jimbudi ni jihombo, ki tu longa kuila, o athu ala ni kidielelu kia ku tunga mu ixi, a tokala ku kuatekesa o Jikidistá a a undu ni ku a kala fiiele. Ene a bhana valolo iavulu ku ujitu iú. Mu kidi, o mundu ua Jihova “kilunga kimoxi” ngó, ene oso a kalakala ni ku suína kuoso mu sidivisu ia ku boka ni ku bhanga maxibulu.​—Nzuá 10:16.

10. Kizulukutu kiahi kilondekesa kuila, tuala mu izuua ia sukidila-ku?

¹⁰ Jezú ua mesena kuila, o akaiedi’ê oso a kalakala ni ku suína kuoso phala ku bhanga dingi maxibulu. Kiki, kiene kia bhangele o maxibulu mê ku hama ia dianga.  Mu izuua íii i sukidila-ku, ia mu di kumbidila o kifika kia Jezú kia lungu ni jitalendu, o kuila o akaiedi’ê a mu bhanga o kikalakalu kiki? Kiene muéne, lelu athu avulu a mu kuívua o njimbu iambote ni ku kituka maxibulu m’ukulu ndenge! Mukonda dia kikalakalu kia suína kia mu bhanga o maxibulu oso a Jezú, mivu joso ene mu batizala athu avulu. O athu enhá a kolokota ué mu kikalakalu kiki kia ku boka. O ima ioso íii, ni mbote ijila mu kikalakalu kiki, ilondekesa kiambote kuila, o kikalakalu kia ku boka kijimbuete kia katunda, kia lungu ni izulukutu ia zuela Jezú kuila ieji bhita mu izuua isukidila-ku. Sé phata, Jezú ua sanguluka kiavulu ni akalakadi’ê!

11. Kiebhi ki tuejiia kuila, Jezú ua-nda kuíza mu kithangana kia hadi ia dikota?

¹¹ Jezú uambe: “Kuila thembu ia lebha kiá, mukua jiselevende’ojo uiza, anga u bhanga-nâ jikonda.” (Matesu 25:19) O Ngana, Jezú, ua-nda bhanga kiki mu disukilu dia hadi ia dikota. Kiebhi ki tuejiia kiki? Mu kikanenu ki tu sanga mu divulu dia Matesu mu kibatulu 24 ni 25, Jezú ua zuela veji javulu kuila ua mu kuíza. Mu kifika, muéne uambe kuila, o athu a ka “mona Mon’a Muthu iú uiza ku matuta ma diulu.” Kiki kia lungu ni kithangana kia hadi ia dikota, kioso Jezú kia-nda fundisa o athu. Muéne ua dimuna ué o maxibulu mê eji kala ku muenhu mu izuua isukidila-ku, phala ku di langa. Muéne uambe: “Kizuua kià keza Ngana ienu ki mua k’ijiia,” ni kuila, “kithangana ki mua ki fikile, kiene kia kà tukuluka o Mon’a Muthu.” (Matesu 24:30, 42, 44) Mu kifika kia jitalendu, Jezú ua kexile mu zuela ué ia lungu ni kioso muéne kia-nda kuíza phala ku fundisa o athu ni ku buika o mundu ua Satanaji. *​—Tala ku luiji.

12, 13. (a) Ihi ia zuela o ngana ku jiselevende jiiadi ni mukonda diahi? (b) Mu kithangana kiebhi o Jikidistá a a undu a-nda tambula o kidimbu kia suku? (Tala o kaxa “ A Tambula o Futu iâ Kioso Kia Fua.”) (c) Mabesá ahi a-nda tambula o athu a kuatekesa o Jikidistá a a undu?

¹² Kioso ngana kia vutuka, ua mono kuila, o selevende a mu bhanene kitanu kia jitalendu, ua nganhala dingi kitanu, o a mu bhanene kiiadi kia jitalendu, ua nganhale  ué dingi kiiadi. O ngana ua a ambela: ‘Kiauabha! Selevende iambote ia fiiele. Eie ua kexi fiiele mu imbamba iófele, ngi ku zangeleka ku imbamba iavulu.’ (Matesu 25:21, 23) Ihi ia-nda bhanga Ngana, Jezú, kioso kia-nda vutuka?

¹³ Ande dia ku mateka o hadi ia dikota, Nzambi ua-nda ta o kidimbu kia suku ku Jikidistá a a undu, a-nda kala hanji mu ixi mu kithangana kieniókio. Kiki kia-nda kala o kidimbu kiâ kia suku. (Dijingunuinu 7:1-3) Ande dia ku mateka o ita ia Alumajedone, Jezú ua-nda ku a bhana o futu iâ mu ku a ambata ku diulu. Maji ihi ia-nda bhita ni athu ala ni kidielelu kia ku tunga mu ixi, a kuatekesa o Jikidistá a a undu mu kikalakalu kia ku boka? Ene a-nda ku a sola kala jimbudi. Ene a-nda tambula o muenhu ua kalela-ku mu ixi, bhu kaxi ka Utuminu ua Nzambi.​—Matesu 25:34.

14, 15. O kuila, Jezú ua kexile mu zuela kuila Jikidistá javulu a a undu eji kala jiselevende ja iibha ni akua umonha? Jimbulula.

¹⁴ O kifika ki zuela ué ia lungu ni selevende ia tambula o talendu imoxi. Muéne ka kalakale ni kitadi kia ngana iê mba ku ki ta mu bangu phala o mesene ku ki tambula ni nganhu. Mu veji dia kiki, muéne ua kande o dikungu iú ua sueka o talendu. O ngana uambe kuila, muéne uexile selevende ia íibha, mukua umonha. O ngana ua tambula o talendu ia selevende ia iibha ni ku i bhana ku selevende ia dianga. Mu ku suluka, muéne ua texi selevende ia iibha “ku kanga kua vundu, ” kuenhoko kuene kuai ni ku dila kiavulu.​—Matesu 25:24-30; Luka 19:22, 23.

 ¹⁵ Kioso Jezú kia zuela kuila, ku kitatu kia jiselevende kua kexile selevende imoxi ia iibha, mukua umonha, muéne ka mesenene ku zuela kuila, ku Jikidistá a a undu amoxi eji kala ni kídifua kia selevende íii, ia iibha. Tuejiia kiki, mukonda dia ku sokesa o kifika kiki, ni ifika iiadi ia mukuá. Mu kifika kia lungu ni kimbadi kia fiiele, Jezú ua zuela ia lungu ni selevende ia iibha ieji zukutisa o jiselevende ja mukuá. Jezú ka mesenene ku zuela kuila, o athu a bhanga mbandu ku kimbadi kia fiiele eji kituka jiselevende ja iibha. Muéne ua kexile mu dimuna o Jikidistá jiji a a undu, phala ka kituke kala o selevende ioio ia iibha. Mu kifika kia kuinhi dia ilumba, Jezú ua tumbula kitanu kia ilumba ia tobhele. Muéne ka mesenene ku zuela kuila, ku Jikidistá a a undu kaxaxi kâ eji tobha. Mu veji dia kiki, Jezú ua mesenene ku a dimuna ia lungu ni ima ieji tena ku bhita se ene ka di lange mba se ka kala polondo. * (Tala ku luiji.) Kiene kimoxi, mu kifika kia jitalendu, Jezú ka kexile mu zuela kuila, Jikidistá javulu a a undu eji kituka ji selevende ja iibha ni imonha mu izuua isukidila-ku. Muéne ua kexile mu dimuna o Jikidistá a a undu, phala ka kituke kala o selevende ia iibha, maji a kolokote mu kikalakalu kia ku boka.​—Matesu 25:16.

16. (a) Madisá ebhi i tu tena ku di longa mu kifika kia jitalendu? (b) Kiebhi o milongi íii ia tu kuatekesa ku tendela kiambote o kifika kia jitalendu? (Tala o kaxa “ Kiebhi ki Tua Tokala ku Tendela o Kifika Kia Jitalendu?””)

¹⁶ Madisá ebhi a iiadi u tu tena ku di longa mu kifika kia jitalendu? Kia dianga, Jezú ua bhana ku akaiedi’ê a a undu, ujitu ua dikota, o kikalakalu kia ku boka ni ku bhanga maxibulu. Kaiiadi, Jezú ua mesena kuila, etu oso tu kalakala ni ku suína kuoso mu sidivisu ia ku boka. Se tu kolokota ni ufiiele uoso mu sidivisu íii mu ku belesela Jezú ni ku mu kala fiiele, tu tena ku dielela kuila, muéne ua-nda tu bhana mabesá avulu.​—Matesu 25:21, 23, 34.