1, 2. (a) Jimbulula se mukonda diahi kia monekene kála Mozé ua kexile mu kiluezu? (Tala o foto ia dianga.) (b) Mukonda diahi Mozé ka kexile ni uôma ua njinda ia sobha?

FALAÓ uexile nguvulu ua kexile ni kutena, uexile ué nzambi ia akua Ijitu. Saí divulu dizuela kuila, phala akua Ijitu, muéne ua betele-kota “mu unjimu, ni mu kutena,” muthu uoso-uoso mu ixi ndenge. Falaó ua mesenene kuila o akua Ijitu a mu kuata uôma, mu kiki muéne ua kexile mu tá kitundu ku mutué, kia kexile ni fikula ia nhoka iala polondo phala ku numata. O fikula ienioió ia kexile mu lembalesa o athu kuila, o jinguma ja sobha, eji ku ji buika ni lusolo. Xinganeka kiebhi kia divuile Mozé kioso kia mu ambela Jihova kuila: “Ndoko-phe eie-muene ngi ku katula mu ku ku tuma kua Falaó, phala u tundise mundu uami ua an’a Izalaiele mu Ijitu.”—Mak. 3:10.

² Mozé uai ku Ijitu mu boka o njimbu ia Nzambi kua Falaó, sé uôma. Kioso kia bhiti o dikuinhi dia mabhebhu, Falaó uambela Mozé: “Aluka-ze, kizuua kioso ki u ngi mona dingi o pholo, ki kala kizuua kié kia kúfua.” (Mak. 10:28) Ande dia Mozé ku tunda bhu pholo ia Falaó, muéne ua kanena kuila, o mon’a ua phande kumbi ua sobha ueji kufua. (Mak. 11:4-8) Mozé ua tendelesa  ué o miji ioso ia akua Izalaiele phala ku jibha mbudi, mba hombo ni ku sangela o manhinga mu mikangala ia dibhitu ni ku xiia ku thandu a mabhitu. O mbudi ia ndumbe iexile kiama kikôla kia nzambi Ra, ia Ijitu. (Mak. 12:5-7) Ihi ieji bhanga Falaó? Mozé ka kexile ni uôma. Mukonda diahi? Mukonda dia kixikanu kiê, muéne ua belesela Jihova, ‘ka kexile ni uôma ua njinda ia sobha. Anga u kolokota ni ufiiele kála ua mu mona Nzambi, Ió ka moneka ku mesu.’—Tanga Jihebeleu 11:27, 28.

3. Ihi i tua-nda di longa mu kixikanu kia Mozé kua ‘Ió ka moneka ku mesu?’

³ O kuila o kixikanu kiê, kia mu suína kála ua mu “mona Nzambi?” (Mat. 5:8) Phala ku suínisa o kixikanu kietu, phala ku mona ‘Ió ka moneka ku mesu,’ tu di longe o phangu ia Mozé. Kiebhi o kixikanu kiê kua Jihova kia mu lange ku uôma ua muthu? Kiebhi kia londekesa o kidielelu kiê, mu ikanenu ia Nzambi? Ni kiebhi o uhete ua Mozé ua ku mona ‘Ió ka moneka ku mesu,’ ua mu suínisa kioso muéne ni mundu uê, kia kexile mu iluezu?

4. Ihi ia kexile mu banza o athu ka kexile ni kixikanu, kioso kia mono kuila Mozé uendele kua Falaó?

⁴ O ió ka kexile ni kixikanu, nange a banzele kuila Mozé ka kexile ni kutena kua kexile na-ku Falaó. Kia monekene kuma o muenhu ua Mozé ua kexile bhu maku a Falaó. Mozé uebhula Jihova: “Emi’eme nanhi, Ngana, nga kàie kua Falaó, ni nga kà tundisa an’a Izalaiele ku Ijitu?” (Mak. 3:11) Mozé ua lengele ku Ijitu, mu 40 a mivu ku dima. Nange muéne ua dibhudisa: ‘O kuila ngeji londekesa unjimu se nga vutukile ku Ijitu, phala ku bambukisa o njinda ia sobha?’

5, 6. Ihi ia kuatekesa Mozé ku kala ni uôma ua Jihova mu veji dia ku kala ni uôma ua Falaó?

⁵ Ande dia ku vutuka ku Ijitu Nzambi ua bhana itendelesu kua Mozé. Mu ku bhita kithangana Mozé ua soneka o itendelesu íii mu divulu dia Jobe: “O uoma ua Nzambi, uene o unjimu.” (Jobe 28:28) Phala ku kuatekesa Mozé ku di bhana ni uôma ni ku bhanga ima ni unjimu, Jihova ua sokesa o athu ni muéne, o Nzambi, Suke-ku. Muéne uebhula: ‘Nanhi muene ua bhange o dikanu dia muthu? U bhangesa kuila iú dibubu, iú muxilu, o iú u mona, iú kifofo? Manhi ki eme muene ngi Jihova?’—Mak. 4:11.

⁶ Ihi i lombolola o izuelu íii? Mozé ka tokalele ku kala ni uôma? Mukonda Jihova ua mu tumikisine, muéne ueji bhana kua Mozé o kutena kua ku tula o njimbu ia Nzambi kua Falaó. Falaó ka kexile ni kutena kua kexile na-ku Jihova. O jiselevende ja Nzambi a bhitile kiá mu iluezu mu Ijitu, kiki ki kiexile o veji ia dianga. Nange Mozé ua lembalala kiebhi Jihova kia langele Mbalahamu ni Zuze, mba muéne Mozé ku ji Falaó ja kexile ku ungana m’ukulu. (Dim. 12:17-19; 41:14, 39-41; Mak. 1:22–2:10) Mukonda dia kixikanu kua Jihova, ‘Ió ka moneka ku mesu,’ ni ku suína kuoso, Mozé uai kua Falaó, ku mu tudila o njimbu ia mu tumine Jihova.

7. Kiebhi o kixikanu kia phang’etu kua Jihova kia mu lange?

⁷ O kixikanu kua Jihova kia lange phang’etu a mu ixana Ella ku uôma ua athu. Ku muvu ua 1949, Ella a mu tele mu kaleia ku ixi ia Estônia ku akua KGB. A mu zula, anga o minzangala exile xiku dia ngoji, a kala ku mu tala. Muéne uambe: “Nga kexile ni jisonhi javulu, maji né kiki nga sambe kua Jihova, anga o muxima uami u tululuka, ngi divua kiambote.” Mu ku suluka, Ella a mu xisa bhu dixilu diofele mua vundile, anga u bhita-mu izuua itatu. Muéne uambe: “O xiku dia ngoji a dikôla: ‘Tua-nda bhanga ioso phala o dijina dia Jihova ka di tumbule dingi mu ixi ioso ia Estônia! Ua-ndaia ku kibende, o a mukuá a-ndaia ku Sibéria!’” Ni ku mu xonguena ene ambe ué: “Kuebhi  kuala o Jihova iê?” Ella ua tokalele ku kala ni uôma ua athu enhó, anga ueji dielela kua Jihova? Kioso kia mu fundisa, muéne ua a tambuijila sé uôma: “Eme nga xinganeka kiambote mu maka enhá, kota ngi kala mu kaleia maji ni ukamba uami ni Nzambi, mu veji dia ku tunda mu kaleia, anga ngi texi o ukamba uami ni muéne.” Ella uejidile kuila Jihova muthu ua kidi kála o diiala dia kexile ku pholo iê. Muéne ua kolokota mu ufiiele uê kua Jihova, mukonda ua kexile ni kixikanu kua muéne.

8, 9. (a) Kiebhi ki u tena ku di bhana ni uôma ua athu? (b) Se uala ni uôma ua athu, ua tokala u dielela kua nanhi?

⁸ O kixikanu kua Jihova, kia-nda ku kuatekesa ku di bhana ni uôma. Se o xiku dia ngoji u ku fidisa ku bheza Nzambi, nange u mona kuila o muenhu uê uala bhu maku a athu. Nange u dibhuidisa se kima kiambote ku suluka mu ku bheza Jihova, phala ku kuatesa ji njinda kua xiku dia ngoji. Lembalala kuila kua-nda kala ni uôma ua athu, se u kala ni kixikanu kua Nzambi. (Tanga Jisabhu 29:25.) Jihova uebhula: “Eie-phe u muthu uami, u kala ni uoma ua muthu ni mukuenu, uà xikamena kufua? mba o mon’a muthu u lela kala iangu?”—Izaia 51:12, 13.

⁹ Kolokota mu ku dielela kua Tat’ê, o Suke-ku. Muéne u mona o athu oso ene mu tala o hadi, mukonda dia jinguvulu a kambe o henda, muéne u a kuatela henda anga u a kuatekesa. (Mak. 3:7-10) Né muéne se ku bhinga ku zokela o ubhezelu uê ku pholo dia xiku dia ngoji ala ni ku tena kua dikota, ‘ku kale ni hele kioso ki u zuela, mba i ua-nda kuzuela, mukonda bhu kumbi dienhódio, Nzambi kiene kia kà ku bhana kioso ki u zuela.’ (Mat. 10:18-20) O jinguvulu ni xiku dia ngoji kala ni kutena kuala na-ku Jihova. Se u suínisa o kixikanu kiê kindala, ua-nda mona kuila Jihova Muthu ua mesena kiavulu ku ku kuatekesa.

10. (a) Ihi ia tendelesa Jihova ku akua Izalaiele ku mbeji ia Nizá ku muvu ua 1513 A.K.K.? (b) Mukonda diahi Mozé ua belesela Nzambi?

¹⁰ Ku mbeji ia Nizá ku muvu ua 1513 A.K.K., Jihova ua tendelesa Mozé ni Alá, ku tangela akua Izalaiele phala ku jibha mbudi, mba hombo ia disanze ni ku sangela o manhinga mâ mu mikangala ia dibhitu ni ku xiia ku thandu a mabhitu. (Mak. 12:3-7) Ihi ia bhange Mozé? O poxolo Phaulu ua soneka ia lungu ni muéne: ‘O mu ku xikana, muéne ua bhitisa o Phasu ia dianga, iú ua tumine ku tesa o kidimbu kia manhinga ku mabhitu a jinzu ja an’a Izalaiele phala o Anju ia Kibuika ki ia jibhile o ana a phande-kumbi.’ (Jihe. 11:28) Mozé uejidile kuila o ikanenu ia Jihova ieji di kumbidila. Muéne ua dielele kuila o an’a oso a phande-kumbi ku Ijitu eji kufua.

11. Mukonda diahi Mozé ua tendelesa akuâ?

¹¹ Nange o an’a Mozé akexile ku ixi ia Midiiana, akexile dikanga dia ‘kijibhangânga.’ * (Mak. 18:1-6) Maji né kiki, muéne ua tendelesa o miji ia mukuá mu Izalaiele akexile ni an’a a phande-kumbi akexile mu iluezu. O mienhu ia athu ia kexile mu iluezu, Mozé ua zolele o jiphange jê. O Bibidia i zuela: ‘Bhenhobho Mozé u tuma kuixana adiakimi oso a Izalaiele, u ambela uixi: Jibhenu kambudi phala o Phasu.’—Mak. 12:21.

12. Njimbu iahi ia tu tumina ku boka Jihova?

¹² Ni kikuatekesu kia ji-anju, o mundu ua Jihova ua mu boka njimbu ia dikota: ‘Nzambi mu kuatedienu uôma, mu ximanienu o unéne uê! Kuma o kumbi diê dia kufundisa athu oso dia bhixila! Mu bhezienu, Ió ua bhange o diulu, ni ixi, ni musanza ua kalunga ni ji fixi ji fuafua o menha!’ (Dij. 14:7) Kiki kiene o kithangana kia ku boka o njimbu íii. Tua tokala ku dimuna o jivizinhu jetu, phala ku tunda mu Babilonha ia Dikota  phala ka “tambule mbandu ku mabhebhu mê!” (Dij. 18:4) O “jimbudi jamukuá,” a di bunda kumoxi ni Jikidistá a a undu, phala ku dionda o athu a sondoloka kua Nzambi phala ku ‘kala makamba’ mê.—Nzuá 10:16; 2 Kol. 5:20.

13. Ihi ia-nda ku kuatekesa ku bandekesa o vondadi iê ia ku boka o njimbu iambote?

¹³ Tuejiia kuma o ‘kizuua kia kufundisa’ kia bhixila muene. Tuejiia ué kuila, tua tokala ku bhanga o kikalakalu kietu kia ku boka ni ku bhanga maxibulu ni lusolo, kála kia zuela Jihova. Mu kisuma, o poxolo Nzuá ua ‘mono anju jiuana jemana ku hota jiuana ja ixi, ja kuata o kithembu ku hota jiuana ja ixi.’ (Dij. 7:1) O kuila u mona o ji-anju jiji kuehela o kitembu kia hadi ia dikota phala ku buika kiá o mundu iú? Se u mona o ji anju jojo ni mesu a kixikanu, eie ua-nda tena o ku boka o njimbu iambote ni kidielelu.

14. Ihi i tu bhangesa “kudimuna o muthu uaiibha ku njila iê ia iibha, phala ku bhulula o muenhu uê?”

¹⁴ O Jikidistá ja kidi jala kiá ni ukamba ni Jihova, ni kidielelu kia muenhu ua kalela-ku. Maji né kiki, tuejiia kuma, tuala ni kikalakalu kia “kudimuna o muthu uaiibha ku njila iê ia iibha, phala kubhulula o muenhu uê.” (Tanga Izekiiele 3:17-19.) Maji kiki ki kiene ngó, o kima ki tu bhangesa o ku boka. Tu boka mukonda tua zolo Jihova ni ji vizinhu jetu. Mu kifika kiê kia diiala mukuá Samádia, Jezú ua jimbulula ihi i lombolola o ku kala ni henda. Tua tokala ku dibhuidisa: ‘O kuila eme ngala ni ukexilu ua diiala mukuá Samádia, mba ngala ni ukexilu ua diiala mukuá Levita ni mutuameni ua ngeleja? Ngene mu kala polondo phala ku boka mba ngene mu fula ku bokela akuetu?’ (Luka 10:25-37) Se tu dielela mu ikanenu ia Nzambi, ni ku zola o  jivizinhu jetu, tua-nda bhanga ioso phala ku boka o njimbu ande dia ku bhua o kithangana kia ku boka.

15. Mukonda diahi o akua Izalaiele a divuile kuma a a kuata?

¹⁵ O kixikanu kia Mozé kua ‘Ió ka moneka ku mesu,’ kia mu kuatekesa kioso o akua Izalaiele akexile mu iluezu kioso kia tundu ku Ijitu. O Bibidia i zuela: “An’a Izalaiele a zambula mesu, a mona Ijitu ioso ia solomoka mu ku a kaiela; anga a bhuuama ni uoma, a dikola kua Jihova.” (Mak. 14:10-12) O kuila ene a tukumuka? Kana. Jihova ua kanene: “Eme-phe ngi kolesa o muxima ua Falaó, o muene ua-nda ku a kaiela, eme bhuenhobho nda ngi fumane ku thandu dia Falaó, ni ku thandu dia kilombo kiê kioso, akua Ijitu phala à k’ejiie kuma eme Jihova.” (Mak. 14:4) Sumbala Jihova ua a dimuine, o akua Izalaiele ka kexile ni kixikanu. Ene a mono ngó o Kalunga ka Kusuka ka jika o njila, o makalu a ita a Falaó, akexile mu kuíza ku dima ni kafunga kâ, uexile ni 80 a mivu ua kexile mu a endesa. Ene a divuile kuma a a kuata.

16. Kiebhi o kixikanu kia Mozé kia mu suínisa kioso kia bhixila bhu Kalunga ka Kusuka?

¹⁶ Maji né kiki, Mozé ka kexile ni uôma. Mukonda diahi? Mukonda dia kixikanu kiê, muéne ua mono kima kia betele-o-kota mu kutena, o kalunga ni masoladi ndenge. Muéne ua kexile mu ‘mona o ubhulukilu ua Jihova,’ muéne uejidile ué kuila Jihova ueji bhângela akua Izalaiele. (Tanga Makatukilu 14:13, 14.) O kixikanu kia Mozé kia suínisa o mundu ua Nzambi. O Bibidia i zuela ‘Kiejila mu kuxikana, an’a Izalaiele kia zaúka o Musanza ua Kusuka kala bhoxi dia kukuta. O akua Ijitu kia fikisa ue kuzaúka, a boba mu menha a kalunga.’ (Jihe. 11:29) Kioso kia bhiti o kizulukutu kiki, o “mundu anga a kala ni uoma ua Jihova; anga a xikana Jihova, ni selevende iê Mozé.”—Mak. 14:31.

17. Izulukutu iahi ia-nda lola o kixikanu kietu?

¹⁷ Kua kambe ngó o mienhu ietu ia-nda kala mu iluezu. Katé o kithangana kia-nda mateka o hadi ia dikota, o jinguvulu ja mundu iú, a-nda buika o ibuka ia jingeleja ja beta ku kala ni athu, o kilunga kietu ndenge. (Dij. 17:16) Jihova ua kanena kuila, ki tua-nda tena ku di langa kála ‘jisanzala ja kambe o imbaka, ki ji moneka uê dikumba mba mabhitu.’ (Ize. 38:10-12, 14-16) O ió ka mono Jihova, nange a banza kuila, ki tua-nda bhuluka. Ihi i ua-nda bhanga?

18. Jimbulula se mukonda diahi tu tena ku kolokota mu ku suína mu kithangana kia hadi ia dikota.

¹⁸ Ki tu tokala ku kala ni uôma. Mukonda diahi? Mukonda Jihova ua kanena kuila eji zukutisa o mundu ua Nzambi. Muéne ua kanena ué kuila, ueji ku a langa. “Bhu kumbi’odio, mu kizuua kia-nda kua k’èza Ngôngo mu kúlua ni ixi ia Izalaiele, kuila eme o njinda iami ia kà ngi banda mu mazulu.” (Ize. 38:18-23) Nzambi ua-nda buika o athu oso a mesena ku bhanga kia iibha ku mundu ua Jihova. Se u dielela kuila Jihova ua-nda ku langa mu kithangana kia “kizuua kia dikota kia Jihova,” ua-nda mona o ‘u bhuluilu ua Jihova,’ ni ku kolokota mu ufiiele ué.—Joue. 2:31, 32.

19. (a) Ukamba uahi ua kexile nau Jihova ni Mozé? (b) Se u belesela Jihova mu jinjila jê joso; mabesá ahi u ua-nda tambula?

¹⁹ Di pelepalale kindala phala o izulukutu íii, ni ku kolokota mu ‘ufiiele kála ua mu mona Nzambi, Ió ka moneka ku mesu.’ Suínisa o ukamba uê ni Jihova Nzambi mu ku di longa ni ku samba. Mozé ua kexile ni ukamba uambote ni Jihova; muéne ua katula mbote mu ukamba iú, katé muene o Bibidia i zuela kuila Jihova uejidile Mozé “pholo ni pholo.” (Mate. 34:10) Mozé uexile polofeta ia dikota. Se u kala ni kixikanu, eie u tena ué ku kala ni ukamba uambote ni Jihova; kála ua mu mu mona ni mesu. Se u mu belesela mu “mauendelu mé moso” o Mak’â Nzambi a kanena kuila, ‘muéne ua-nda iukisa o njila jê joso.’—Jisa. 3:6.