1, 2. Ihi ia-nda bhanga o Utuminu ua Nzambi, ni mukonda diahi tu tena ku dielela kuila, o Utuminu ua-nda kuíza muene?

KU MULUNDU ua zukamene mu sanzala ia Kafanau ku muvu ua 31 K.K., Jezú Kristu ua longo o maxibulu mê kusamba: ‘Utuminu uê uíze.’ (Mat. 6:10) Lelu o athu ene mu dibhuidisa se o Utuminu ua-nda kuíza muene. Maji etu tua dielela kuila, o misambu ietu i tuene mu bhanga, mu ku bhinga kuila o Utuminu ua Nzambi uíze, a-nda i tambuijila.

² Bhu kaxi ka Utuminu, Jihova ua-nda kuongeka o muiji uê ku diulu ni mu ixi. O vondadi íii ia Nzambi, ia-nda di kumbidila. (Iza. 55:10, 11) Mu kidi, Jihova ua mu tumina kiá mu izuua ietu! O izulukutu iene mu bhita mu 100 ia mivu, ilondekesa o kidi kiki. Nzambi ua mu bhanga kikalakalu kia madiuanu, phala o mazunda ni mazunda ia jiselevende jê, ja fiiele. (Zak. 14:9; Dij. 15:3) Kiki kilombolola kuila, Jihova ku kala Sobha lelu, ki kiene kimoxi ni uejilu ua Utuminu ua Nzambi, ua tu longo Jezú kusamba. Kiebhi o izulukutu iiadi íii ki i difu, ni kiebhi ki tu divuua?

3. (a) Thembu kuxi ia undu Jezú ku Usobha, ni kuebhi kua mu undu? (b) Kiebhi ki ueji londekesa kuila o Utuminu ua mateka ku muvu ua 1914? (Tala ku luji.)

³ Ku disukilu 19 dia hama, o mukengeji ua mateka ku muika, o jiselevende ja Nzambi a mateka ku tendela kiambote o  kikanenu kia Daniiele, kia soneka ku 2,500 ka mivu ku dima: “Mu izuua ia jisobha jenhiji, o Nzambi ia diulu ua kà bheka-ku o utuminu ki u xikina dingi ku u jikinisa.” (Dan. 2:44) Mu mivu iavulu o Adilongi a Bibidia, a kexile mu boka kuila ku muvu ua 1914, kueji bhita izulukutu iavulu. Athu avulu mu thembu ienioió, a xikinine o kidi kiki. Saí musoneki uambe: “Ku muvu ua 1914, o athu ku mundu akexile ni kidielelu kiavulu mu ikanenu.” Maji ku muvu uenhó, o Ita ia Dianga ia Bhiti ku Mundu Uoso, ia mateka o ku kumbidila o ikanenu ia Bibidia. O nzala, ni itungutu ia jixi, ni mabhebhu, ni ikanenu ia mukuá ia Bibidia, ia kexile mu di kumbidila, ia londekesa kuila Jezú Kristu ua kexile kiá mu tumina ku diulu, kala Sobha ia Utuminu ua Nzambi ku muvu ua 1914. * Mu ku unda Mon’ê kala Sobha ia Utuminu, Jihova ua kexile kala Sobha mu ukexilu ua ubhe!

4. Ihi ia bhangele ni lusolo, o Sobha a mu undu, kioso kia mateka o ku tumina, ni ihi dingi ia bhangele ku mundu uê?

⁴ O kikalakalu kia dianga kia Sobha a mu undu kua Nzambi, kiexile o ku bhânga ni Satanaji, o Nguma ia dikota ia Tat’ê. Jezú ni ji-anju jê, a kaie Diabhu ni madimonho mê ku diulu. Kiki kia bheka ku sanguluka kuavulu ku diulu, maji kia bheka jiphaxi javulu mu ixi. (Tanga Dijingunuinu 12:7-9, 12.) Anga o Sobha u suluka mu ku zelesa o mundu uê, ni ku a longa ku bhanga o vondadi ia Nzambi. Tu di longe kiebhi o ku belesela kuâ, mu itendelesu ia Jezú ku tu bhana phangu lelu.

5. Ihi ia bhiti ku muvu ua 1914, katé ku dimatekenu dia muvu ua 1919?

⁵ Kioso o Sobha kia zelesa o diulu ku ilongesu ia Satanaji ni madimonho mê, Jihova ua tumina Jezú ku tonginina kiambote ni ku zelesa mu nzumbi o akaiedi’ê mu ixi. O polofeta Malakiia ua ki sokesa ni ku zelesa mu nzumbi. (Mal. 3:1-3) O musoso ulondekesa kuila, muéne ua mateka ku zelesa o akaiedi’ê ku muvu ua 1914, katé ku dimatekenu dia muvu ua 1919. * Phala ku bhanga mbandu ia muiji ua Jihova mu ngongo, tua tokala tu zela. (1 Phe. 1:15, 16) Ki tu tokala ku di xidisa ni ubhezelu ua makutu, ni jinguvulu ja mundu iú.

6. Kiebhi ki tuene mu tambula o kudia mu nzumbi, ni mukonda diahi tua tokala ku tambula o kudia kuku?

⁶ Ni ungana ua tambula, Jezú ua solo ‘o kimbadi kia fiiele.’ O kimbadi kiki, kieji bhana kudia mu nzumbi mu kithangana kia tokala ku athu oso, a tokala ku “kilunga kimoxi” kia Jezú. (Mat. 24:45-47; Nzuá 10:16) Tundé ku muvu ua 1919, kibuka kiofele kia jiphange a a undu, ene mu bhanga o kikalakalu kia dikota, kia ku bhana o kudia ku akua “dibhata.” O kudia kuavulu kuene mu tu bhana o jiphange jiji, ku tu kuatekesa o ku suínisa o kixikanu kietu. Kiki ki suínisa o vondadi ietu ia ku di zelesa mu ukexilu ua xitu, ua kilunji, ni ua nzumbi. O kudia ku tu tambula mu nzumbi ku tu longa, ku tu bhana uhete, phala ku bhanga o kikalakalu kia beta-o-kota, kia mu bhanga mu ixi lelu. O kuila ua mu katula mbote mu kudia kuku?

7. Kikalakalu kiahi kia beta-o-kota kia mateka Jezú? O kikalakalu kiki, kieji suluka katé kuebhi?

⁷ Kioso kia mateka Jezú o ukunji uê mu ixi, muéne ua boko: “Kua ngi bhingi ue kuia kukola o Njimbu Iambote ia Utuminu ua Nzambi mu jisanzala jamukuá, kuma kiene kia ngi bheka.” (Luka 4:43) Ku mivu itatu ni  kaxaxi, Jezú ua kexile mu bhanga o kikalakalu kiki. Muéne ua longo o maxibulu mê: “O ki muia, muenda ni kuta Maka, kuila: Utuminu ua Diulu ua zukama.” (Mat. 10:7) Kioso kia mu fukununa, Jezú ua kanena kuila o maxibulu mê eji boka o njimbu íii, “katé ni ku maxokololo ma jixi.” (Ika. 1:8) Muéne ua a kanena kuila, ueji kala nau mu ku bhanga o kikalakalu kiki kia beta-o-kota, katé mu izuua ietu.—Mat. 28:19, 20.

8. Kiebhi o Sobha kia suínisa o jiselevende jê mu ixi, phala kuboka?

⁸ Ku muvu ua 1919, o jiphange a mateka ku tendela kiambote o “Njimbu iíi Iambote ia Utuminu ua Nzambi.” (Mat. 24:14) O Sobha ua kexile mu tumina ku diulu, muéne uongekele kibuka kia jiselevende ja zele mu ixi. Ene a belesele o itendelesu ia Jezú, ia ku tula o njimbu Iambote ia Utuminu ua Nzambi mu ngongo ioso! (Ika. 10:42) Mu kifika, 20.000 a jiphange, endele mu kiônge kia dikota, kia jixi joso, ku mbeji ia Katutu, ku muvu ua 1922, mu mbanza ia Cedar Point, Ohio, ku Estados Unidos ia Ámerica. Xinganeka o kisangusangu kiâ, kioso o phang’etu Rutherford, kia bhangele o diskursu ni diambu: “O Utuminu,” anga u zuela: “Kolenu, o Sobha ua mu tumina kiá! Enu mu akuatekexi mu ku boka o njimbu iambote. Kiki-phe, boke-nu, boke-nu, boke-nu o Sobha ni utuminu uê.” Mu kizuua kia mukuá, hama jiiadi ia jiphange ai mu boka, a mukuá ende 72 kia ji kilómetulu, tundé bhua kexile mu bhita o kiônge, phala kuia mu boka. Saí phange ia diiala uambe: “Nuka nga-nda jimba o ngolokela ia bhangele, ia kuia mu boka o Njimbu, ni ku suína kua jiphange jetu!” Phange javulu a divuile ué kála muéne.

9, 10. (a) Ihi iene mu bhanga phala ku kuatekesa o aboki a Utuminu ua Nzambi? (b) Mbote iahi i uene mu katula mu milongi íii?

⁹ Ku muvu ua 1922, ku mundu uoso kua kexile kiá 17.000 ia aboki, akexile mu boka ku mundu, mu 58 dia jixi. Maji ene a bhingile kua longa. Ku hama ia dianga, o Sobha ua bhanene itendelesu ku maxibulu mê, ia lungu ni ihi ia tokalele o kuboka, kuebhi kua tokalele o kuboka, ni kiebhi kia tokalele o kuboka. (Mat. 10:5-7; Luka 9:1-6; 10:1-11) Lelu, Jezú ua mu bhana ué itendelesu ia tokala ku jiselevende jê, phala ku boka o Utuminu. (2 Tim. 3:17) Jezú ua mu longa o jiselevende jê bhu kaxi ka kilunga kia Kidistá, phala ku boka. Muéne ua mu bhanga kiki, bhu kaxi ka Xikola ia Ukunji ua Nzambi, iene mu bhanga mu 111.000 a ilunga ku mundu uoso. O sambuadi dia mazunda, ene mu katula mbote mu milongi íii, ala polondo phala kuia mu kuatekesa ‘athu oso.’—Tanga 1 Kolindu 9:20-23.

¹⁰ Katuku o Xikola ia Ukunji ua Nzambi, kuala dingi ji xikola ja mukuá, phala ku longa o tufunga tua kilunga, ni aboki a thembu  ioso, ni jiphange akudi, ni makaza a Jikidistá, ni jiphange a tokala mu Ibuka ia Filiiale ni ahatu’â, ni tufunga tua ilunga ni ahatu’â, ni akunji a jixi jengi. * O jiphange a di longo mu Xikola ia Makaza a Jikidistá, alondekesa o kisakidilu mu xikola íii, ene ambe: “O milongi i tua di longo, ia tu kuatekesa ku bandekesa o henda ietu kua Jihova, ia tu kuatekesa ué ku kala ni uhete ua ku longa kiambote akuetu.”

11. Kiebhi o aboki a Utuminu ua Nzambi, kia mu tena o ku boka, sumbala ni kizukutisu?

¹¹ O nguma Satanaji, uene mu mona o nguzu ioso ia mu bhanga phala ku boka, ni ku longa o njimbu iambote ia Utuminu. Muéne u ta ibhidi ku aboki a Utuminu, phala ku fidisa o kikalakalu kiki. Maji o nguma ka mu tena ku fidisa o kikalakalu kiki. Jihova ua zangeleka Mon’ê, “ku thandu dia mautuminu oso ala ku mundu iú.” (Efe. 1:20-22) O Sobha Jezú, ni kutena kuê, u langa ni kuendesa o maxibulu mê, phala o vondadi ia Tat’ê ku i di kumbidile. * O njimbu iambote a mu i boka ku mazunda ni mazunda athu, a mu tambula milongi ia lungu ni ku bheza Jihova! Ujitu ua dikota mu ku kuatekesa mu kikalakalu kiki!

12. Kiebhi kia sokejeka o mundu ua Nzambi, phala ku bhanga o kikalakalu kia Utuminu, tundé ku muvu ua 1914?

¹² Tundé kia mateka Jezú ku Tumina ku muvu ua 1914, o Sobha ua longo kiebhi o jiselevende ja Nzambi, kia tokala ku bhanga o vondadi ia Tat’ê. (Tanga Izaia 60:17.) Tundé ku muvu ua 1919, ene mu sola kafunga mu kilunga phala kuendesa o ikalakalu ia ku boka. Ku muvu ua 1927, o ilunga ia mateka ku boka mu ma Lumingu moso. Ku muvu ua 1931, o jiselevende ja Jihova, a tambula o dijina Jimbangi ja Jihova. Kiki kia a suínisa ku bandekesa o kikalakalu kiâ. (Iza. 43:10-12) Ku muvu ua 1938, maiala oso akexile ku pholo mu kilunga, ka kexile dingi mu ku a sola ku jiphange. Mu veji dia kiki, ene a tokalele ku kala ni ukexilu ua Kidistá phala ku a sola. Ku muvu ua 1972, o kikalakalu kia ku langa o kilunga a ki bhana ku kibuka kia tufunga, mu veji dia ku ki bhana ngó ku kafunga kamoxi. O maiala oso akexile mu kitala ni ukexilu ua Kidistá, a a suinisine ku kuatekesa ‘kuinga o kilunga kia Nzambi, ni ku ki tambula konda.’ (1 Phe. 5:2) Ku muvu ua 1976, o kibuka kia Utuminu ua Nzambi, a ki uane mu ibuka isamanu, phala ku langa o kikalakalu kia Utuminu ku mundu uoso. Tundé o kithangana kieniókio, Jezú ua mateka ku longa o  maxibulu mê, phala ku bhanga o ima kala kia mesena Nzambi.

13. Kiebhi ki u divua mu ku mona o kikalakalu kia bhange o Sobha Mexiia mu 100 ia mivu?

¹³ Xinganeka ia bhange o Sobha Mexiia, tundé kia mateka ku tumina, mu 100 ia mivu ia dianga! Muéne ua zelesa mundu phala o dijina dia Jihova. Muéne ua longo o jiselevende jê, ku boka o Njimbu iambote ia Utuminu mu 239 a jixi, ua longo athu avulu ku bheza Jihova. Muéne uongeka athu avulu, sambuadi dia mazunda ndenge, muthu ni muthu, ua di bhakula mu vondadi iê, phala ku bhanga o vondadi ia Tat’ê. (Jisá. 110:3) Mu kidi, o kikalakalu kia Jihova bhu kaxi ka Utuminu ua Mexiia, kikalakalu kia dikota, kikalakalu kiambote. Kua kambe hanji izulukutu iambote, ia-nda bhita ku pholo!

14. (a) Ihi i tua mu bhinga kua Nzambi, kioso ki tu samba kuila, o ‘Utuminu uê uíze?’ (b) Kiebhi o kibatulu kia Bibidia phala o muvu ua 2014, ni mukonda diahi kibatulu kia tokala?

¹⁴ Né muene se Jihova ua solo Mon’ê Jezú Kristu, phala ku kala Sobha ia Utuminu ua Mexiia, ku muvu ua 1914, kiki ki kiene o kitambuijilu kia musambu u tuene, bhanga kuila, o ‘Utuminu uê uíze.’ (Mat. 6:10) A ki tange mu Bibidia kuila, Jezú ueji ‘tumina o jinguma jê.’ (Jisá. 110:2) O jinguvulu ene mu kua longesa kua Satanaji, a zembe hanji o Utuminu. Kioso ki tu samba mu ku bhinga kuila o Utuminu ua Nzambi uíze, tua mu bhinga kua Nzambi kuila, o Sobha Mexiia, ni jisobha jê, íza mu buika o jinguvulu jiji, kumoxi ni athu oso a zembe o Utuminu ua Nzambi. O kizulukutu kiki, kia-nda kumbidila o kikanenu kia Daniiele 2:44, kiamba kuila, o Utuminu ua Nzambi ‘ua ka sasujula o mautuminu moso, anga a bhua-ku.’ Uene ua-nda buika o jinguvulu ja zembe o Utuminu. (Dij. 6:1, 2; 13:1-18; 19:11-21) O kizulukutu kiki, kia zukama. Mukonda dia kiki, kima kiambote ku sola o kibatulu kia Bibidia kia divulu dia Matesu 6:10, o ‘Utuminu uê uíze,’ phala o muvu ua 2014, o muvu ua-nda tenesa 100 ia mivu ia Utuminu ku diulu, tundé ki ua mateka o ku tumina!

15, 16. (a) Ihi ia-nda bhita mu Utuminu ua Midi ia Mivu? (b) Mu ku suka-ku ihi ia-nda bhanga Jezú, o Sobha Mexiia, ni ihi ia-nda lombolola o ima ia-nda bhanga, ia lungu ni vondadi ia Jihova phala o an’ê?

¹⁵ Kioso o Utuminu ua Mexiia ua-nda zubha ku buika o jinguma ja Nzambi, muéne ua-nda takula Satanaji ni madimonho mê mu dikungu ki di moneka hole, mua-nda kala mu midi ia mivu. (Dij. 20:1-3) Kioso kia-nda buika Satanaji ni madimonho mê, o Utuminu ua Nzambi ua-nda suluka ni ku kalakala, phala ku bheka o mabesá bhu kaxi ka sata ia kukula kua Jezú, ni ku jimisa o kituxi kia Adá. O sobha ua-nda bheka ku muenhu athu avulu afú, ala mu jimbila, iu ua-nda kuendesa kikalakalu kia dikota, kia ku a longa ia lungu ni Jihova. (Dij. 20:12, 13) O ixi ioso ia-nda kala palaízu, kála kia kexile o jaludim ia Edene. O athu oso a fiiele a-nda iuka.

¹⁶ Ku disukilu dia Utuminu ua Kristu ua Midi ia Mivu, o Sobha Mexiia ua-nda zubha ku bhanga o vondadi iê. Mu ku suluka, Jezú ua-nda vutula o Utuminu kua Tat’ê. (Tanga 1 Kolindo 15:24-28.) Ki kua-nda bhinga dingi muthu u tumina bhu kaxi k’etu ni Jihova. O an’a oso a Nzambi ku diulu, ni mu ixi, a-nda diongeka ni Tat’â Jihova, kala muiji umoxi ngó.

17. Ihi i ua solo ku bhanga ia lungu ni Utuminu iú?

¹⁷ O izulukutu ia bhiti ku 100 ia mivu ia Utuminu, i tu bhana kidielelu kuila Jihova ua mu tumina hanji, ni kuila o vondadi iê mu ixi ia-nda di kumbidila. Tu kolokote ku kala tu jiselevende jê ja fiiele, ni ku boka o njimbu ia lungu ni Sobha ni Utuminu uê. Tu bhanga kiki, mu kuijiia kuila kua kambe ngó, Jihova ua-nda tambuijila o musambu uetu: O ‘Utuminu uê uíze!’