1. Ihi ia bhangesa Phaulu ku sanguluka ni jiphange akua Kolindo?

KU MUVU ua 55 mu K.K. O poxolo Phaulu ua kexile mu mbanza ia Tolouade, maji ka tenene ku jimba o mbanza ia Kolindo. Ku muvu ua dianga, muéne ua thandanganhele kiavulu kioso kiévu kuila o jiphange mu Kolindo akexile mu zoka. Muéne ua bhangele kála ki bhanga o tata, ua a sonekena mukanda phala ku a bhana itendelesu. (1 Kol. 1:11; 4:15) Muéne ua a tumikisa ué o múkuatekexi uê Tito, iu ua bhingi Tito ku mu tangela ioso ia kexile mu bhita kuenhoko. Phaulu ua kexile mu kingila Tito mu Tolouade, phala kuijiia kiebhi kia kexile o jiphange mu Kolindo. Maji Tito ka bhixila, kiki kia luualesa kiavulu Phaulu. Ihi ieji bhanga Phaulu? Muéne uai katé ku Masedonha, kuene kua takajana nê. Tito ua mu tangela kuila o jiphange mu Kolindo, a belesela o itendelesu iê, ni kuila ene a mesenene kiavulu ku mu mona. Phaulu kioso kiévu kiki, muéne ua “[sangulukile] dingi kiengi.”—2 Kol. 2:12, 13; 7:5-9.

2. (a) Ihi ia soneka Phaulu ku akua Kolindo, ia lungu ni kixikanu ni kisangusangu? (b) Ibhuidisu iebhi i tua-nda di longa?

² Mu ku bhita kithangana, Phaulu ua soneka mukanda uéngi ku akua Kolindo. Muéne ua a ambela: ‘Ki kuila tuala ni ungana ua kutumina o kuxikana kuenu, maji tuala tu akuatekexi ua ku sanguluka kuenu, enu mua suína mukonda dia kixikanu kienu.’ (2 Kol. 1:24) Ihi ia mesenene kuzuela Phaulu kioso kiambe kiki? Ni ihi ia tokala ku di longa o tufunga tua Jikidistá lelu?

3. (a) Ihi ia mesenene kuzuela Phaulu kioso kia soneka: ‘Enu mua mu suína mukonda dia kixikanu kienu?’ (b) Kiebhi o tufunga lelu, kiene mu kaiela o phangu ia Phaulu?

³ Phaulu ua tumbula ima iiadi ia beta-kota mu ubhezelu uetu—kixikanu ni kisangusangu. Ijiia ihi ia zuela ia  lungu ni kisangusangu: ‘Ki kuila tuala ni ungana ua ku tumina o kuxikana kuenu, . . . enu mua mu suína mukonda dia kixikanu kienu.’ Ni izuelu íii, Phaulu ua xikina kuila o jiphange mu Kolindo ka suínine mukonda dia muthu, maji mukonda dia kixikanu kiâ kua Nzambi. Kienhiki Phaulu uejidile kuila ka bhingile ku langa o kixikanu kia jiphange, ka mesenene ué ku ki bhanga. Muéne ua dielele kuila o jiphange exile Jikidistá ja jifiiele, a mesenene ku bhanga o ima ia iuka. (2 Kol. 2:3) Lelu o tufunga mu kilunga a kaiela o phangu ia Phaulu, ejiia kuila o jiphange jâ, ala ni kixikanu kua Nzambi ni kuila a mu sidivila ni muxima uoso. (2 Tes. 3:4) Mu veji dia ku a bhana itumu ia neme, o tufunga a dielela mu itumu ia Bibidia, ni mu itendelesu ia kilunga kia Jihova. Lelu o tufunga ka tumina o kixikanu kia jiphange jâ.—1 Phe. 5:2, 3.

4. (a) Ihi ia mesenene kuzuela Phaulu kioso kia soneka: ‘Tuala tu akuatekexi ua ku sanguluka kuenu?’ (b) Kiebhi kiene mu kaiela o tufunga o phangu ia Phaulu?

⁴ Phaulu uambe ué: ‘Tuala tu akuatekexi ua ku sanguluka kuenu.’ Mu kuzuela kiki, muéne ua kexile mu di tumbula ni jiphange ja mukua. Mukonda diahi tu banza kiki? Mukonda mu mukanda ua sonekena akua Kolindo, muéne ua a lembalesa, kioso kia soneka: “Jezú . . . tua mu kola mu’axaxi kenu, eme ni Sidivanu ni Timote” (2 Kol. 1:19) Kioso kia kexile mu tumbula o izuelu “akalakadi ni akuetu,” mu mikanda iê, Phaulu ua kexile mu tumbula Apolo, Akuila, Pidisila, Timote, Tito ni a mukuá dingi. (Lom. 16:3, 21; 1 Kol. 3:6-9; 2 Kol. 8:23) Mu kuzuela kuila: ‘Tuala tu akuatekexi ua ku sanguluka kuenu,’ Phaulu ua suínisa o akua Kolindo kuila ene ni akuatekex’iê, a mesenene ku bhanga ioso phala ku bheka kisangusangu mu kilunga. Lelu o tufunga tua Jikidistá, a mesena ué ku bhanga kiki. Ene a mesena ku bhanga ioso phala ku kuatekesa o jiphange jâ ku ‘sidivila Jihova ni ku tana.’—Jisá. 100:2; Fil. 1:25.

5. Kibhuidisu kiebhi ki tua tokala ku xinganeka ni mu ihi i tua tokala o ku xinganeka?

⁵ Mu izuua íii, exana kibuka kia jiphange ja mala ni ahatu a suína mu ubhezelu, a tokala mu jixi javulu phala ku a ebhuidisa kiki: “Izuelu iahi ni ihi ia bhange o tufunga ia bandekesa o kisangusangu kiê? Kioso ki tua-nda kuívua o itambuijilu iâ, xinganeka kiebhi ki ueji tambuijila ia lungu ni tufunga. Tu xinganeke ué kiebhi ki tu tena ku bheka kisangusangu mu kilunga kietu. *

6, 7. (a) Mu ukexilu uebhi o tufunga a tokala ku kaiela o phangu ia Jezú, ia Phaulu ni jiselevende ja mukuá ja Nzambi? (b) Mukonda diahi o ku lembalala o majina a jiphange jetu, ki bandekesa o kisangusangu kiâ?

⁶ Phange jetu ja ahatu mba ja mala, a zuela kuila, a sanguluka kiavulu kioso o tufunga kia thandanganha ni ene. O tufunga a tena ku bhanga kiki, se a kaiela o phangu ia Davidi, Edihu ni Jezú. (Tanga 2 Samuuele 9:6; Jobe 33:1; Luka 19:5.) O jiselevende jiji ja Jihova, a xila akuâ mu ku a exana mu majina mâ. Phaulu uejidile ué o valolo ia kuijiia o majina a jiphange jê. Mu mukanda ué ua sukina muéne ua menekena 25 a jiphange mu ku a tumbula o majina, ua tumbula ué Pelesida, Kidistá a mu tange kua Phaulu kuila, ‘Menekenenu Pelesida, kamba dietu dia kazola.’—Lom. 16:3-15.

 ⁷ Saí tufunga kia a bhonza ku lembalala o majina. Maji né kiki, a bhanga ioso phala ku lembalala o majina, kála a mu zuelela o jiphange, ‘eie ua sange ngalasa bhu pholo diami.’ (Mak. 33:17) O tufunga a-nda sangulukisa o mixima ia jiphange jâ, kioso kia exana mu majina mâ, mu ku a bhinga ku tambuijila o ibhuidisu kioso kia di longa o Mulangidi, ni mu iônge ia mukuá.—Sokesa ni Nzuá 10:3.

8. Kiebhi kia kaiela Phaulu o phangu ia Jihova ni ia Jezú?

⁸ Phaulu ua londekesa kuila ua bhanene valolo ku jiphange mu ku a ximana, iú ukexilu uambote ué ua ku sangulukisa o jiphange. Mu kiki, mu mukanda ua soneka mua londekesa o vondadi ia ku kalakala phala ku sangulukisa o jiphange, Phaulu ua soneka: “Nga mi dielela kinéne, kienhiki ngi di thatha kiavulu mukonda dienu.” (2 Kol. 7:4) O izuelu íii ia ku ximana, ia tula ku mixima ia jiphange akua Kolindo. Phaulu ua ximana ué o ilunga ia mukuá. (Lom. 1:8; Fil. 1:3-5; 1 Tes. 1:8) Kioso kia tumbula Pelesida mu kilunga kia Loma, Phaulu ua soneka ué: “Muène ua kalakala kiavulu mua Ngana.” (Lom. 16:12) O izuelu íii, ia sangulukisa kiavulu phang’etu uexile fiiele! Phaulu ua kaiela o phangu ia Jihova ni ia Jezú, ia ku ximana akuâ.—Tanga Marku 1:9-11; Nzuá 1:47; Dij. 2:2, 13, 19.

9. Mukonda diahi o ku ximana o jiphange ku bandekesa o kisangusangu mu kilunga?

⁹ Lelu, o tufunga ejiia ué o valolo ia ku ximana o jiphange jâ. (Jisa. 3:27; 15:23) Se kafunga u bhanga kiki, kia difuangana ua mu zuela: ‘Nga mono i ua bhange. Eme ngi ku bhana valolo.’ O jiphange jetu a bhindamena kuívua o izuelu ia tufunga i suínisa. Phang’etu uala mu 50 a mivu, ua zuela ieji zuela ué akuâ, muéne uambe: “Ku salu, ku bhonza muthu ku ximana. O athu ka di suua mudiâ, athu a mesena ku di londekesa se nanhi ua beta-kota. Mukonda dia kiki, se o kafunga u ngi ximana mukonda dia kima ki nga bhange mu kilunga, ngi sanguluka kiavulu! Ngi mona kuila a ngi zolo kua Tata iami ia diulu.” Saí phange ua mu sasa tuana tu iiadi ubheka uê, kiene ué kia divua. Izuua íii, saí kafunga ua mu ximana. Kiebhi kia divu phang’etu? Muéne uambe: “O izuelu ia kafunga ia ngi suínisa kiavulu!” Sé phata, se kafunga u ximana o jiphange, ene a sanguluka kiavulu. Kiki kia-nda ku a suínisa kiavulu mu njila ia muenhu, ‘a-nda kuenda sé ku bhuila.’—Iza. 40:31.

10, 11. (a) Kiebhi o tufunga kia tena ku kaiela o phangu ia xisa Nehemiia? (b) Ihi ia-nda kuatekesa o tufunga ku suínisa o jiphange kioso kiaia mu a kunda?

¹⁰ Mu ukexilu uebhi o tufunga a bhana valolo ku jiphange ni ku bandekesa o kisangusangu kiâ mu kilunga? Mu ku sota o ku suínisa ió a bhingi kikolokotesu. (Tanga Ikalakalu 20:28.) Kioso o tufunga kia bhanga kiki, ene a kaiela o phangu ia tufunga m’ukulu. Mu kifika, tala ihi ia bhange o mubhidi Nehemiia, kioso kia mono kuma o jiphange jê akua Judeia, a zozele mu nzumbi. O musoso uamba kuila, muéne ua a suínisa. (Neh. 4:14) Lelu, o tufunga a mesena ué ku bhanga kiki. Ene ‘a balumuka’—a sota—ku kuatekesa o jiphange jâ ku kolokota mu nzumbi. Phala ku suínisa o jiphange, ene a a kunda ku mabhata mâ, se o ithangana i bhana. Mu kithangana kia ku kunda, ene a sota ku a ‘suínisa mu nzumbi.’ (Lom. 1:11) Ihi ia-nda ku a kuatekesa ku bhanga kiki?

 ¹¹ Ande dia kuia mu kunda o jiphange phala ku a suínisa mu nzumbi, o tufunga a tokala ku xinganeka ihi ia bhindamena o phange a-nda mu kunda. Ibhidi iahi ia mu bhita na-iu o phange íii? Milongi iahi i tena ku mu kuatekesa? Misoso iebhi ia Bibidia mba kitumu ki tena ku mu kuatekesa? Se o kafunga u bhanga kiki, muéne ua-nda tena ku suínisa kiambote o phange, ka-nda babajala ngó. Kioso kia mu kunda, o kafunga uehela o jiphange kuzuela, ua evua kiambote. (Tiia. 1:19) Saí phange uambe: “Ngi divua kiambote se kafunga u ng’ivua ni muxima uoso.”—Luk. 8:18.

12. Mu kilunga, ananhi a bhindamena kikuatekesu ni mukonda diahi?

¹² Nanhi u katula mbote mu ku a kunda ku tufunga? Phaulu ua tendelesa o Jikidistá ni akuâ uixi, ‘langienu-phe . . . o kilunga kioso.’ Sé phata, o jiphange joso mu kilunga a tokala ku a ximana ni ku a suínisa, bhenge-bhenge ió ene mu kalakala kiá ukulu mu sidivisu ia thembu ioso. Mukonda diahi ene a bhingi o kikuatekesu kia tufunga? Mukonda ió a kulu dingi mu nzumbi, a dibhana ué ni ibhidi iavulu ku mienhu iâ, ku mundu iú ua iibha. Mu kifika, phala ku mona se mukonda diahi katé muene o selevende ia Nzambi ia kulu mu nzumbi u bhinga kikuatekesu, tua-nda di longa phangu ku muenhu ua Sobha Davidi.

13. (a) Kithangana kiebhi kia solo Ixibi-benobi ku jibha Davidi? (b) Ni kiebhi Abisai kia tena ku bhulula Davidi?

¹³ Ku bhita kithangana kioso Davidi kia mu undu kála sobha, muéne ua zoko ni Ngoliia, uexile lefaime ua tokala ku mazonda. Mu ku suina kuê, Davidi ua jibha o dizonda didi. (1 Sam. 17:4, 48-51; 1 Mal. 20:5, 8) Mu ku bhita mivu, Davidi ua lu dingi ita ni akua Fidíxia, iu ua di sange ni dizonda. O dijina diê Ixibi-benobi, uexile ué lefaime. (2 Sam. 21:16) Mu kithangana kiki, o lefaime ueji jibha Davidi. Mukonda diahi-phe? Ki mukonda  dia kuila Davidi ka suinine, maji mukonda dia kuila muéne kexile dingi ni nguzu iavulu. O musoso uambe kuila: “Anga u lua ni akua Fidíxia katé kia bhuila.” Kioso Ixibi-benobi kia mono kuila Davidi ua bhuila, muéne anga “u mesena kujibha Davidi.” Maji ande dia dizonda dieniodio kulondekesa o xibhata iê kua Davidi, “Abisai-phe, mon’a a Zeluia, u mu kudila, anga u nemeka mukua Fidíxia, u mu jibha.” (2 Sam. 21:15-17) Davidi ua bhuluka! Davidi ua sakidila kiavulu Abisai, kioso muéne kiéza ku mu kudila ni ku bhulula o muenhu uê mu kiluezu! Madisá ahi, u tu tena ku di longa mu musoso iú?

14. (a) Ihi i tu kuatekesa ku kala fiiele mu ithangana ia ibhidi? (b) Kiebhi o tufunga kia tena ku kuatekesa akuâ, ku kala dingi ni nguzu ni kisangusangu? Bhana phangu.

¹⁴ Etu tu Jimbangi ja Jihova ku mundu uoso, tua mu kuambata o kikalakalu kietu kia kuboka, né muene ni ibhidi i tu bhekela Satanaji ni mademonho mê. Saí athu mudietu, a dibhana ni ibhidi iavulu. Maji ni kikuatekesu kia Jihova, tu tena ku zoka ni ji “Ngoliia” joso, ni kua tolola. Saí ithangana, o ibhidi ia mundu iú i tu bhangesa ku bhuila ni ku luuala. Mu ithangana íii, ki ki bhonzo o ku tu ‘zozesa’ mu nzumbi. Mu ithangana íii, o kikuatekesu ki tu tambula ku tufunga, ki tena ku kuatekesa ku kala dingi ni kisangusangu, kala kia divu kiá phange javulu a bhiti ué mu maka enhá. Saí muboki ua thembu ioso uala kiá mu 60 a mivu ndenge, uambe: “Mivu ku dima eme ki nga divu kiambote, mu kiki, o sidivisu ia ku boka ia kexile mu ngi bhangesa ku bhuila dingi. Saí kafunga ua mono o ku bhuila kuami, iu uéza mu zuela n’eme. Ua zuela n’eme bhu kaxi ka Bibidia. Nga belesela o itendelesu ia ngi bhana, anga nga katula mbote iavulu. Muéne uambe dingi: “Ngi sakidila kiavulu o kikuatekesu ki nga tambula, ku kafunga keniókio!” Mu kidi, kikuatekesu kia dikota kuijiia kuila, kuene tufunga tua henda a tu langidila, ni kuila kála Abisai m’ukulu, ene ala polondo ‘phala ku tu kuatekesa.’

15, 16. (a) Mukonda diahi Phaulu a mu zolo kiavulu ku jiphange? (b) Mukonda diahi, etu tua zolo o tufunga tu’etu mu kilunga?

¹⁵ Ku kala mubhidi, kikalakalu kia dikota. Saí ithangana, o tufunga a bhita mausuku sé ku zeka mu ku thandanganha ni ku samba, mukonda dia kilunga kia Nzambi mba ku bhana kikuatekesu mu nzumbi. (2 Kol. 11:27, 28) Né muene kiki, o tufunga a langa o kikalakalu kiâ ni kisangusangu kioso, kála kia bhange Phaulu. Muéne ua soneka ku akua Kolindo: ‘Eme ku mbandu iami, nga sanguluka kiavulu mu ku kalakala phala enu mu ku sota o mbote ia mienhu ienu.’ (2 Kol. 12:15) Mukonda dia mienhu ia jiphange jê, Phaulu ua di bhakula mu kua suinísa mu nzumbi. (Tanga 2 Kolindu 2:4; Fil. 2:17; 1 Tes. 2:8) Kiki, kiene kia bhangesa o jiphange ku zola kiavulu, Phaulu!—Ika. 20:31-38.

¹⁶ Etu tu jiselevende ja Nzambi lelu, tuala ué ni tufunga tu’etu a tu zolo kiavulu, ni ku sakidila Jihova mukonda dia ku tu bhana o ujitu iú. Ene a bandekesa o ku sanguluka kuetu mu ku sota o mbote ietu. Tu divua kiambote, kioso ene kia tu kunda ku mabhata metu. O kia mukua, tu sakidila kiavulu mukonda dia ene ku kala polondo phala ku tu kuatekesa, mu ithangana i tu divua kuila, tua bhuila kiá mu ibhidi i tu dibhana na-iu ku mundu iú ua iibha. Sé phata, o tufunga tua Jikidistá, ‘akuatekexi phala o kisangusangu kietu.’