Hulda Wakumbidila o Mbambe ye
KU INDONÉSIA, ku kikôlo kyofele kya Sangir Besar, kwatungu jiphange jetu jitatu ja ahatu. Mivu kudima ene exile mukalakala ku ndundu ya musanza wa kalunga. Ene a ejiya kyambote mu kikôlo kyenyokyo mukonda dya ukunji wa—mu kukwatekesa o athu kutendela o Bibidya. Mu kithangana kyenyokyo ene exile mubhanga kikalakalu kyadifwile kyengi.
Kikôlo kya Sangir Besar ku mbandu ya thunda ya Indonésia
Kyadyanga ene exile mubokona mu menya anga exile mubhongolola o matadi aneme phala ku ambata ku ndundu. Sayi matadi akomene kala o bola ya kujokala o malunda a fiti. Mu kusuluka ene exile muxikama ku ibaka ya mabaya, ya exile mubula o matadi ni jimartelu. O matadi ya exile mutola kyavulu o diyaki dya sanji kota. Kyoso kyexile muzubha kwa abula exile mu ata mu jisaku, ya exile mubanda nawu kate bhu kididi bhwatungile. Mu kusuluka ene exile muta o matadi mu jisaku jamakota, ya exile mu ata mu makalu phala kubhanga nawu o ikoka.
Phange Hulda, wamubhongolola matadi bhu ndundu ya kalunga
Ku jiphange jitatu jiji umoxi amwixanene Hulda. Phange Hulda wexile dingi ni kithangana phala kubhanga o kikalakalu kiki o akwa ndenge. O kitadi kyexile mutambula wexile mulanga nakyu o ibhindamu ya mwiji we. Maji kindala mwene wamesenene we kuphopheka kitadi phala kubhanga kima kyengi. Mwene wamesenene kusumba tablete phala atene kukalakala ni JW Library®. Phange Hulda wejidile kwila o jividyu ni ima yamukwa yala mu JW Library, yejimukwatekekesa kubokela akwa, kudilonga ni kutendela kyambote o Bibidya.
Mu mbeji imoxi ni kaxaxi, phange Hulda wexile mukalakala ola jiyadi ni kaxaxi izuwa yoso mu kamene, mu kubula o matadi yu watena ku izalesa kadikalu kamoxi. Mu kusukaku mwene wexile ni kitadi kyasoko phala kusumba o tablete.
Phange Hulda ni tablete ye
Phange Hulda wambe: “Sumbala ngatohokele kyavulu, anga ngexile mu kwivwa we jindolo javulu mukonda dya kubula o matadi, maji mu kumona o kikwatekesu ki ngatambula mu kukalakala ni mutelembe wami wa ubhe mu ukunji, ni kupelepalala o yonge sé itateku, ngadijimbi ni lusolo o kutohoka ni jindolo joso.” Mwene wambe we kwila o tablete yamukwatekesa kubokona mu yonge ni kuboka kumoxi ni kilunga mu kithangana kya uhaxi wa Covid. Twasanguluka kyavulu mu kwijiya kwila phange Hulda, watena kukumbidila o mbambe yaxindi.
