Phala Madiya, Lawulu ni Irene omusambu ujitu wakatunda. Ene adivwa kwila, bhukaxi kamusambu, atena kuzwela ni Nzambi, kumusakidila ni kusota okikwatekesu kyê. Ene axikina ni kidi kyoso kwila, o ima izwela o Bibidya yalungu ni kusamba kwa Nzambi, kidi: “O kidyelelu ki twala na-kyu kwa mwene kyenyiki: Ima yoso itubhinga mu vondadi yê, mwene u twívwa.”—1 Nzwá 5:14, nwt.

Kumbandu yamukwa, athu avulu kaxikina izwela o Bibidya yalungu ni kusamba. Xitevá wajimbulula kyebhi kyadivwa yalungu ni kusamba. “Kyoso kingexile ni 17 dyamivu, ngafundu makamba atatu. Umoxi wafu mukiluwezu kyadikalu. Kiyadi kyaboba mumenya akalunga.” Ihi yabhange Xitevá? “Eme ngasambe kwa Nzambi phala kwijiya se mukonda dyihi o ima yoyó yexile mubhita. Maji kingimono  o itambwijilu. Eme ngadibhwidisa. ‘Ihiphe ingibhangesa kusamba?’” Athu avulu adivwa kwila, omisambuyâ ka itambwijila. Mukonda dya kiki, ene adibhwidisa se mukonda dyahi atokala kusuluka ni kusamba.

Kwene dingi ima yengi ibhangesa amoxi kudivwa kwila, Nzambi katambwijila omisambuyâ. Amukwa ambakwila, tundé ukulu, Nzambi wejiyakyá o ima yoso itwambhindamena mba o ibhidi yetu. Mukiki, kikubhingi kumubhinganayu dingi mumusambu.

Amukwa adivwa kwila, Nzambi kevu omisambuyá, mukonda dya ituxiyâ yatele mu ukulu. Jeny wambe: “Okibhidi kyami kyadikota,” kingamudibhanakyu “okudivwa kala kingala ni valolo. Ngabhange ima yangibhangesa kudyela, mukonda dya kiki, ngidivwa kwila, Nzambi katokala kungivwa.”

Kyebhi ki udivwa yalungu ni musambu? Se wadivukya kala o athu utwa atange kudima, mba wala ni jiphata jalungu ni musambu, o itambwijilu ya Bibidya yandakukwatekesa. Etu tutena kudyelela mu ima izwela o Bibidya yalungu ni musambu; * yene itena kukwatekesa kusanga o itambwijilu ya ibhwidisu kala yiyi:

• Okwila Nzambi wivwa mwene omisambu yetu?

• Mukonda dyahi sayi misambu ka itambwijila?

• Kyebhi ki utena kusamba phala Nzambi akwivwe?

• Omusambu ukukwatekesa kyebhi?