ua di fikidila phala ka mu lundule ku masoladi. Ene akexile mu lenga o jinguma mukonda akexile ni uôma uavulu. Mukonda diahi akexile ni uôma? Mu veji javulu, Davidi ua kexile mua évua kutumbula dijina dimoxi. Dijina dia diiala. O diiala diódio diemanene bhu honga, Davidi nange nuka ua muene diiala dia dikota kala o diiala diódio.

Ngoliia! Davidi ua tenene kumona se mukonda diahi o masoladi akexile ni uôma uê, muéne ua lebhele kiavulu kála mulundu. Né muene sé o izuatu iê, muéne nange ua nemene kiavulu, mala aiadi ndenge. Maji muéne ua tele o izuatu iê ia ita, ua kexile ni nguzu iavulu, uexile dizonda dia ita. Ngoliia ua kobo jinvunda. Xinganeka o dízui diê dia dikota kusebhulula o masoladi a Izalaiele ni Sobha iâ, Saulu. Muéne ua bhingi diiala dimoxi phala kubhânga-nê, mu veji dia kifuxi kioso kúlua ita!—1 Samuuele 17:4-10.

Akuâ Izalaiele a di sueka mukonda dia uôma. Sobha Saulu ué kiene. Davidi uévu kuila o maka enhá a tenesele kiá mbeji! O ifuxi iiadi ia masoladi, akuâ Fidíxia ni akuâ Izalaiele, ka tenene kubhanga kima. Ngoliia ua kexile mua sebhulula izuua ioso. Davidi njinda ia mu kuata. Jisonhi kuxinganeka o sobha ia Izalaiele ni masoladi mê ni makota atatu a Davidi kudisueka mukonda dia uôma! Phala Davidi, Ngoliia ka kexile ngó mu sebhulula o masoladi a Izalaiele; maji ua kexile mu sebhulula o Nzambi ia Izalaiele, Jihova! Maji ihi ieji bhanga o munzangala Davidi? Ihi i tu tena o kudilonga mu kixikanu kia Davidi?—1 Samuuele 17:11-14.

Tu vutuke bhofele, mbeji javulu kudima. Kua kexile mu vunda kiá, Davidi ua kexile mu kuinga o jimbudi ja tat’ê ku milundu ia zukamene ni mbanza ia Beleme. Muéne uexile munzangala ua uabhele o pholo, ua uabhele ku mu tala mesu. Mu ithangana ia kunhoha, muéne ua kexile mu xika kambanza. O kuiuka kua ibhangelu ia Nzambi kua mu suínisa kiavulu, o uhete uê ua kuxika mimbu, ua dibandekesa dingi mukonda dia kukala mu xika ola javulu. Maji mu usuku uenhó, Davidi a tumu ku muixana. Tat’ê ua mesenene ku mu mona mu kithangana kieniókio.—1 Samuuele 16:12.

Muéne ua sange tat’ê, Jese, kuzuela ni diiala dia kukile kiá kiavulu. O vuelu íii, o polofeta ia fiiele Samuuele. Jihova ua mu tumine ku unda mona umoxi ua Jese phala kubhingana ku usobha ua Izalaiele! Samuuele ua muene kiá o sambuadi dia makota a Davidi, maji Jihova ua londekesele kiambote kua Samuuele kuila, ku sambuadi dienhodio Muéne ka solele-bhu ni ngó umoxi. Maji kioso Davidi kia bhixila, Jihova ua tangela Samuuele: “Mu unde; muene kiabh’ú!” Samuuele ua jikula o lumbinga lua máji a katunda iu ua a lundula ku mutué ua Davidi mu’axaxi ka makota a Davidi. O muenhu ua Davidi ua lunguluka kioso kia zubha o ku mu unda. O Bibidia i zuela: “Nzumbi ia Jihova anga i tula ni nguzu ku thandu dia Davidi tunde kizuua kien’okio.”—1 Samuuele 16:1, 5-11, 13.

O kuila Davidi ua matekene kiá kukala ni luímbi lua usobha? Kana, muéne ua sangulukile, iu ua kexile mu kingila o nzumbi ikôla ku mu ijidisa o thembu  ieji mateka kiá o kutumina kála sobha. Muéne ua sulukile mu kikalakalu kiê kia kuinga o jimbudi. Muéne ua bhangele o kikalakalu kiki ni henda ioso ni kusuína. Mu veji jiiadi o jimbudi ja tat’ê hinu a ji dile, kia dianga ku hoji, o kia kaiadi ku úlusu. Davidi ka lengele o iama ienioió kana. Mu veji dia kiki, muéne ua bhângela o jimbudi ja tat’ê. Mu ithangana iiadi íii, muéne ua jibha ni maku’ê o iama!—1 Samuuele 17:34-36; Izaia 31:4.

Mu kubhita thembu, Davidi a muixana dingi. O fuma iê ia bhixidile katé kua Sobha Saulu. Sumbala uexile hanji disoladi dia nguzu, Saulu ka mu xikinine dingi kuala Jihova, mukonda ua ditunine kubelesela o itendelesu ia Nzambi. Jihova ua katuile o nzumbi iê ku thandu dia Saulu. Mukonda dia kiki, sobha ua kexile ni nzumbi ia iibha—ua kexile ni njinda, ibanzelu iaiibha ni ia usuéia. Kioso o nzumbi iaiibha ki ia kexile ku thandu dia Saulu, muéne ua tokalele kuívua mimbu phala kutena kudivua kiambote. O mala a Saulu evuile o fuma ia Davidi kuila ngimbidi iambote, dizonda ué dia ita. Mu kiki-phe, Davidi a muixana, mu kubhita thembu ua kituka ngimbidi ia Saulu, ua mateka ué kuambata o mauta mê.—1 Samuuele 15:26-29; 16:14-23.

Benge-benge o minzangala a tena kudilonga phangu javulu mu kixikanu kia Davidi. Mu ithangana iê ia kunhoha, muéne ua kexile mu bhanga ima i mu kuatekesa kuzukama dingi kua Jihova. Muéne ué ni muanhu uoso ua dilongo maufunu ambote a mu kuatekesele kusanga salu. Maji o kia beta-o-kota, muéne ua kexile mu kaiela o nzumbi ikôla ia Jihova. Phangu jambote ji tu tena o kukatula!—Ndongixi 12:1.

Sumbala ua kexile mu sidivila Saulu, Davidi ua kexile mu vutuka kubhata phala kuinga o jimbudi, saí bhabha mu ithangana iavulu. Mu kithangana kiki, Davidi a mu tumu kuala Jese kuia mu tala o makota mê atatu akexile mu sidivila mu kifuxi kia masoladi a Saulu. Ni kubelesela kuoso, Davidi uambata o kudia ku jiphange jê akexile bhu honga ia Ela. Kioso kia bhixila, muéne ua diuana mu kumona o ifuxi iiadi ia masoladi a bhongoloka kála ki tua tange ku dimatekenu. Ene emanene kala kifuxi ku sámbua dimoxi dia mulundu, o honga ia bhitile mu kaxi kâ.​—1 Samuuele 17:1-3, 15-19.

Phala Davidi, o maka enhó ka tokalele kukala ngó kiki kana. Ki bhita kiebhi o kifuxi kia Nzambi ia muenhu, Jihova, kulenga mukonda dia diiala dimoxi, mubhezi ua nzambi ja makutu? Davidi ua mono Ngoliia kusebhulula Jihova. Bhenhobho, ua mateka kudikunda ni masoladi maka alungu ni kujibha Ngoliia. Ki ku bhiti kithangana kiavulu, o dikota dia Davidi, Eliabe, uevu ia kexile mu zuela Davidi. Muéne ua mu bazela ni njinda ioso, ua mu tangela kuila muéne ua bhukumukine, ua kexile ngó muenhomo phala kutala o ita. Maji Davidi ua mu tambuijila: “Nga te kituxi kiahi? Ngebhul’ami ngó lumoxi luene!” Mu kiki-phe, muéne ua suluka ni maka a kutolola Ngoliia, saí muthu uévu iu ua kundu kua Saulu o maka enhá. O sobha ua tumu kuixana Davidi.​—1 Samuuele 17:23-31.

Ia lungu ni Ngoliia, Davidi ua tangela kua sobha: “Ki bhu kale muthu u botomoka muxima mukonda dia kiiala kiki.” Saulu ni masoladi mê akexile ni uôma mukonda dia Ngoliia. Ene nange a tondala mu ku disokesa ni diiala diódio, a xinganeka kiebhi  kieji tena kubhixila ku phetu ia diiala. Ene a xinganeka kuila ki kueji bhinga ithangana iavulu phala kua tolola. Maji ki kiene kia kexile mu xinganeka Davidi. Kála ki tua-nda mona, muéne ua kexile mu tala o maka mu ukexilu uéngi. Mu kiki, muéne ua di bheka phala kubhânga ni Ngoliia.​—1 Samuuele 17:32.

Saulu ua ditunu: “Eie ku tena kuia kutakana ni mukua Fidixia iú, mu kubhánga-nê, kuma eie u mona-ndenge hanji, muene-phe diiala dia ita tunde undenge uê.” O kuila Davidi uexile muene mona-ndenge? Kana ngana, maji ka kexile luua mu kitala kia kukala disoladi. Muéne ué ua kexile hanji ni pholo ia mona-ndenge. Maji Davidi mu unzangala uê a muijidile kiá kála diiala dia ita.—1 Samuuele 16:18; 17:33.

Phala kutululukisa Saulu, Davidi ua mu tangela ihi ia bhangele ku hoji ni ku úlusu. O kuila muéne ua kexile mu dinanza? Kana. Davidi uejidile se nanhi ua mu kuatekesele kujibha o iama ioio. Muéne uixi: “Jihova ua ngi kudila ku iala ia hoji, ni ku iala ia úlusu, muene ue u ngi kudila bhu maku ma mukua Fidíxia iú.” Mu kiki, Saulu uixi: ‘Kuabhu! Ndaie, Jihova muene a kala n’eie.’​—1 Samuuele 17:37.

Ua mesena ué kukala ni kixikanu kála kia Davidi? Xala mu kuijiia kuila o kixikanu kia Davidi, ki kiexile ngó kibanzelu kia hatu kana. Muéne ua kexile ni kixikanu kua Nzambi mukonda dia ku muijiia, ni mukonda ué dia ima ia bhitile ku muenhu uê. Muéne uejidile kuila Jihova Mukuatekexi ua henda ni mukua Kukumbidila o jipolomesa jê. Se tua mesena kukala ué ni kixikanu kiki, tua tokala kusuluka mu kudilonga ia lungu ni Nzambi ia Bibidia. Kioso ki tua-ndaia ni kubelesela o milongi i tua mu dilonga, tua-nda mona kuila o mabesá u tua-nda tambula, a-nda kolesa o kixikanu kietu.​—Jihebeleu 11:1.

Ku dimatekenu, Saulu ua bhana o izuatu iê kua Davidi. Ia difuile ni izuatu ia Ngoliia, o izuatu a i bhangele ni ngóndo. Ua mu bhana ué mbinza io bhangele ni utadi. Davidi uende bhofele ni izuatu ienioió maji ua mono kuila ia mu vudile. Muéne kexile disoladi, mu kiki kejidile kuta o izuatu ienioio, benge-benge o izuatu ia Saulu, o diiala dia betele-o-kota mu kulebha mu ixi ioso ia Izalaiele! (1 Samuuele 9:2) Ua i zula iu ua zuata o izuatu iê ia mubhidi.​—1 Samuuele 17:38-40.

Davidi ua kuata o mbangala iê ia kuinga na-iu o jimbudi, o mbuenga ni mbalafunda. O mbalufunda ki iexile uta ua dikota, maji iexile ni kutena kua kujibha muthu. Ia kexile ni dibhululu ku disukilu dia ngoji jiiadi, iexile uta uambote phala o mubhidi. Muéne u ta o ditadi mu mbalafunda, u i nhunga ku mutué ni nguzu iavulu, anga ueha ngoji imoxi, o ditadi diia ni nguzu iavulu, se di ku kuata, kalunga. O uta iú uexile uta uambote, mukonda dia kiki, o masoladi akexile mu bhânga ni mbalafunda javulu.

Ni mbalafunda iê, Davidi ua lenge lusolo phala kutakana ni nguma iê. Tu tena kuxinganeka Davidi kusamba ni nguzu ioso kioso kia kexile mu bonga matadi atanu ofele bhu honga ia kambele menha avulu. Mu suluka, muéne uai mu takana ni nguma iê—kai ni kuenda kana maji uai ni kulenga!

Kioso Ngoliia kia mono o muthu ueji bhânga-nê, ihi ia banze muéne? O Bibidia iamba kuila kioso kia mu mono, muéne “ua mu xikulula, u mu toka mesu bhenhobho; kuma hanji uala mon’a ndenge.” Ngoliia ua mateka o kudikola: “Kifua ua ngi mono ngi ímbua, uala ku ng’endela ni mbangala?” Muéne ua mono ngó o mbangala ia Davidi, maji o mbalafunda ka i muene. Muéne ua xingi ni kulokela Davidi mu majina a jinzambi ja akuâ Fidíxia iu ua kanena kuila o kimbi kiê ueji ki bhana ku jinjila ni ku iama ia muxitu.​—1 Samuuele 17:41-44.

O kitambuijilu kia Davidi kilondekesa kuila muéne ua kexile ni kixikanu kia dikota. Xinganeka o munzangala kutangela Ngoliia: ‘Eie ua-lu ngi bhixila ni xibhata ié, ni sosa, ni ngubu; eme-phe ngi ku bhixila mu dijina dia Jihova dia ifuxi, Nzambi ia kilômbo kia Izalaiele, ió ua mu lokalala eie ni ku mu lebhula.’ Davidi uejidile kuila o kutena kua muthu mu xitu ni mauta mê, kalé ni valolo iavulu. Ngoliia ua xingile Jihova Nzambi, mukonda dia kiki Jihova ueji bhanga kima. Kála kia tange Davidi, o ‘ita ia ngene ia Jihova.’​—1 Samuuele 17:45-47.

Davidi kexile kifofo kana, muéne uexile mu mona kuila Ngoliia diiala dia dikota ni kuila uala ni mauta avulu. Maji Davidi kehela kuila o ima íii i mu kuatesa  uôma. Muéne ka bhangele kála kia bhangele Saulu ni masoladi mê. Davidi ka disokesa ni Ngoliia. Mu veji dia kiki, muéne ua sokesele Ngoliia ni Jihova. Ngoliia ua lebhele kiavulu, athu amukuá ndenge, ua kexile ni metulu 2.9 ja kitala, maji uexile nanhi se tu mu sokesa ni Suke-ku mu ngongo ioso? Mu kidi, kála o athu a mukuá mu ngongo, muéne uexile kála dihoho, kua kambele ngó Jihova ueji mu buika kiá!

Davidi uai ni kulenga phala kutakana ni nguma iê, ua te o lukuaku luê mu mbuenga phala kukatula-mu ditadi. Muéne ua te o ditadi mu mbalafunda, ua i nhungu iu ua di takula. Ngoliia ué uai ni kulenga phala kutakana ni Davidi, o disoladi dia kexile mu kuata o ngubu iê, ua kexile ku pholo. Nange o kitala kia Ngoliia kia mu bhekela ué kúfua, mukonda o disoladi dia kexile mu kuambata o ngubu ua butile, ka tenene kuzangula o ngubu phala kulanga o mutué ua Ngoliia. Bhuene-muene Davidi bhua takula o ditadi.​—1 Samuuele 17:41.

Davidi ua takula o ditadi. Xinganeka, o athu a dixibhile mu kumona o ditadi kuia ni nguzu ioso katé bhu dibhômo dia kiiala kiókio. Sé phata, Jihova ua bhangele ioso phala o ditadi dia takuile Davidi, ki di lueze. O ditadi dia bokona muéne bhu dibhômo dia Ngoliia. O dizonda ua bu ni pholo bhoxi! O disoladi dia kexile mu kuambata o ngubu iê, ua lengele ni uôma uavulu. Davidi ua zukama, ua sungu o xibhata ia Ngoliia iu ua batula na-iu o mutué ua dizonda.​—1 Samuuele 17:48-51.

Mu kiki, Saulu ni masoladi mê, a sangele nguzu. Ene a dikola ni kusuína kuoso, iá ai phala kujibha akuâ Fidíxia. O ita ia bhitile muéne kála kia tangele Davidi kua Ngoliia, kuila: “Jihova . . . Ua-nda ku mi bhakula bhu maku metu.”​—1 Samuuele 17:47, 52, 53.

Lelu o jiselevende ja Nzambi ki jene mu lúa dingi ita kála m’ukulu. Kana dingi. (Matesu 26:52) Né kiki, tua tokala kukaiela o kixikanu kia Davidi. Kála muéne, tua tokala kumona Jihova kála muthu ua kidi—kála o Nzambi imoxi-élele u tua tokala kusidivila ni kukala ni uôma. Saí bhabha, tua-nda divua kála o ibhidi ietu iala kota, etu ndenge, maji o ibhidi ietu se tu i sokesa ni kutena kua Jihova, tua-nda mona kuila ibhidi iofele. Mu kiki, se tu sola Jihova kála Nzambi ietu ni ku mu dielela kála kia bhangele Davidi, sé-ku ibhidi mba maka, a-nda tu kuatesa uôma. Sé-ku kima, Jihova ka tena ku ki tolola!