O KABUETELE a mu vuala kindala, kala luua ni nguzu. Kioso kia tu vuala, ima ioso a kexile mu tu bhangela-iu ku jitata jetu. Kioso ki tua mateka o kuenda, tua kexile mu mona o athu kála mazonda. Se jitata jetu ki ji kexile bhu mbandu, ene exile mu tu kusa. Maji ki tu kexile mu kala ni uôma, kioso ki tua kexile kumoxi ni mam’etu mba tat’etu.

Mu undenge uetu, tua kexile mu divua kiambote kioso o jitata jetu kia kexile mu tu londekesa henda ni ku tu ximana. Kioso ki tua kexile mu mona o henda ia jitata jetu ko kuetu, tua kexile mu divua kála imbuá kia mona ngana iê. Kioso kia kexile mu tu ximana, tua kexile mu divua kiambote ni kubhanga dingi ima ia uabha.

Kioso ki tua kulu, o makamba metu a tu kuatekesa ué kudibhana valolo. Tua kexile mu divua kiambote mu kukala bhu mbandu iâ, ki tuexile mu kala ni uôma ua kuia mu xikola.

O ibanzelu íii, i jimbulula kiambote kiebhi o jitata kia tokala ku sasa o tuana. Maji saí minzangala kene mu sanga makamba avulu ambote, saí ué tumbonga kejiia o henda ia jitata jâ. Diminga * uambe: “Kioso ki ngi mona jifoto ja miji ia sanguluka, ia mu bhanga kumoxi o ima, ngamba kiki: ‘Ai ué! Tamanu nga kexile ni muiji kála iú mu undenge uami, ngeji sanguluka kiavulu.’” Nange kiene ué ki uene mu divua.

Nange kioso ki ua mateka kukula, eie ku kexile mu dibhana valolo. Nange ka ku zolele, ka kexile mu ku ximana ku jitata jê ni makamba. Nange u dilembalala mam’enu ni tat’enu ku dikuata, katé kia disenge, eie u divua kala eie ua a bhangesa ku disenga. Ki kiene ngó, nange o jitata jê exile mu ku xinga mba mu ku beta.

Kiebhi kia divua o muthu a kambe ku mu sasa kiambote? Saí iá a di ta ku makanha, amukuá a nua kiavulu mu unzangala uâ. Amukuá a di ta mu ibuka ia jibandi, phala kusanga o kisangusangu ku muenhu. Saí minzangala, a sota kusakana selu phala kusanga o kuzediua. Maji o minzangala a bhanga kiki, a disenga uá ni lusolo, o kudisenga-phe kuku, ku a bhangesa dingi kudisuuata.

O minzangala kene mu di ta ku ima ia iibha kala o makanha, o jidroga ni uhôlua, maji ka a sase kiambote, mu ku kula kuâ ka dibhana uá valolo. Ana uambe: “Eme ki ngi kexile mu dibhana valolo, mukonda mam’etu ua kexile mu ngi tangela ithangana ioso kuila ngi kiôua. Muéne kexile mu londekesa kuila ua ngi zolele.”

 O ukexilu ua tu sase ki uene ngó u bhangesa o muthu kukamba kudibhana valolo. Tu tena ku kamba kudibhana valolo, mukonda dia ku disenga, ibhidi ijila mu kukuka, mba mukonda dia ku iibha o pholo. O ima ioso iii, i tena ku katula o kisangusangu kietu, ni kuzanga o ukamba uetu ni akuetu. Ihi-phe i tena kukuatekesa o muthu kudibhana valolo?

Tua tokala kuijiia kuila tuala ni kikuatekesu. Etu oso tuala ni muthu ua mesena ku tu kuatekesa​—o muthu iú, muéne Nzambi.

Bhu kaxi ka polofeta Izaia, Nzambi uambe: “Kana kukala ni uoma, kuma eme ngala bhuamoxi n’eie; kana kubhuuama, mbata eme ngala ngi Nzambi ié; eme ngi ku suinisa, hé ngi ku kuatekesa, anga ngi ku fikidila ni lukuaku luami lua kadilu, lua kuiuka kuami.” (Izaia 41:10, 13) Kisangusangu kia dikota, kuijiia kuila Nzambi ua mesena ku tu bhana o lukuaku luê lua kadilu phala ku tu kuatekesa! Ki tu bhingi dingi kukala ni uôma!

Mu Bibidia muala misoso ia athu, abhezi a Nzambi a bhitile mu ibhidi iavulu, maji Nzambi ua a kuatekesa. Hana, manh’â Samuuele, ua divuile kála ka kexile ni valolo, mukonda ka tenene kuvuala. Exile mu mu xonguena mukonda dia kukamba o kuvuala. Mukonda dia kiki, Hana ua kexile mu dila kiavulu, ka kexile dingi mu dia. (1 Samuuele 1:6, 8) Maji kioso kia sambe kua Nzambi, muéne ka divu dingi kia iibha kana.—1 Samuuele 1:18.

Sobha Davidi, saí ithangana ka kexile ué mu dibhana valolo. Mu mivu iavulu, Sobha Saulu ua kexile mu mu sota phala ku mu jibha. Mu ithangana iavulu, Davidi hinu uafu maji ua bhuluka. Muéne ua kexile mu divua kála ua bôba mu dijiia dia menha mukonda dia ibhidi. (Jisálamu 55:3-5; 69:1) Maji né muene kiki, muéne ua soneka: “Ngi zeka ni kutululuka, ngiia muene ku kilu; mukonda eie u Jihova uala ku ng’inga; né ku ubheka uami ngala bhua kondama.”—Jisálamu 4:8.

Hana ni Davidi a takula kua Jihova o itateku iâ ioso, Jihova ua a kuatekesa. (Jisálamu 55:22) Kiebhi ki tu tena kukaiela o phangu iâ lelu?

1. Dielela kua Jihova, Tat’etu.

Jezú ua tu tendelesa kuijiia kiambote Tat’ê, o “Nzambi ia kidi imoxi-èlele.” (Nzuá 17:3) O poxolo Phaulu ua tu tangela kuila, Nzambi “kana muthu ua mu kala dikanga.” (Ikalakalu 17:27) O Tiiaku ua soneka: “Zukamenu kua Nzambi, muène u mi zukama enu.”—Tiiaku 4:8.

O kuijiia kuila tuala ni Tat’etu mu diulu ua tu zolo kiavulu, ku tu kuatekesa kudibhana valolo. Mu kidi, ku bhinga thembu phala kudielela kua Nzambi, maji athu avulu a mono kuila o kudielela kua Nzambi kua kuatekesa. Mu kifika, Manda uambe: “Kioso Jihova kia kituka Tat’etu ia kazola, nga tenene ku mu tangela ioso ia kexile ku muxima uami ni kilunji. Kiki kia ngi tululukisa o muxima!”

Madiia uambe: “Jihova muéne ua ngi kuatekesa kioso tata jami kia ngi bhana dikunda. Nga kexile mu zuela ni Jihova ni ku mu bhinga phala ku ngi kuatekesa kudibhana ni ibhidi iami. Muéne ua ngi kuatekesa.” *

2. Kala u dikamba dia ió a mu sidivila Nzambi.

Jezú ua longo o maxibulu mê kudimona kála jiphange. Muéne uambe. “Enu oso mu jiphange.” (Matesu 23:8) Muéne ua mesenene kuila o maxibulu mê a dizola mu kidi, a kala muiji.​—Matesu 12:48-50; Nzuá 13:35.

Mu ilunga ia Jimbangi ja Jihova, ua-nda sanga-mu athu a dizolo mu kidi, a dikuatekesa, ala kála jindandu. (Jihebeleu 10:24, 25) Athu avulu ene mu sokesa o iônge ia Jimbangi ja Jihova ni milongo iambote.

Eva uambe: “Nga kexile ni dikamba dia kazola mu kilunga, muéne uevuile o ndolo i nga kexile mu kuívua. Muéne ua kexile mu kuívua ioso i nga kexile mu zuela, ua kexile mu ngi tangela o Bibidia ni kusamba. Muéne ua kexile mu bhanga ioso phala ki ngi kale ubheka. Muéne ua ngi suínisa kuzuela ni kukatula ioso ia kexile mu ngi tatesa o muxima. Ni kikuatekesu kiê-muene, nga mateka kudibhana valolo.” Madiia uambe dingi: “Mu kilunga nga sange-mu ‘tata ni mama.’ Ene a ngi talatala kiambote, a ngi bhanene valolo.”

 3. Zola akuenu, bhanga-u mbote.

O kuzola akuetu ni kua bhanga mbote, kubhekela ukamba uambote. Jezú uambe: “O kubhana kota mu kuzediuisa, o kutambula ndenge.” (Ikalakalu 20:35) Sé phata, tua-nda mona kuila kioso ki tu zola akuetu, ene uá a tu zola. Jezú uambela o jixibulu jê, uixi: ‘Bhanenu akuenu, ene ué a-nda mi bhana.’​—Luka 6:38.

Kioso ki tu zola akuetu, akuetu ué a tu zola, kiki ki tu bhangesa kudivua kiambote. O Bibidia i zuela kuila “o henda ki ia kà bhua.” (1 Kolindo 13:8) Katidi uambe: “Ng’ejiia kuila o ibanzelu ia iibha i ngi banza ko kuami, makutu. O kukuatekesa akuetu mu ku a bhanga mbote, ia ngi kuatekesa kutolola o ibanzelu íii ia iibha. Ngi sanguluka kiavulu kioso ki ngi kuatekesa akuetu.”

O jindunge ji tua tange ku dima, kifua ki ji tena kuzubha o ibhidi ietu ioso kana. Maji ji tena ku tu kuatekesa kiavulu. Madiia uambe: “Saí ithangana ngene hanji mu divua kia iibha, maji lelu nga beta kusanguluka m’ukulu ndenge. Ng’ejiia kuila Nzambi ua ngi zolo, ngala ni makamba avulu a kazola, a ngi kuatekesa kumona kuila ngala ni valolo iavulu.” Madiia kiene ué kiene mu divua. Muéne uambe: “Saí ithangana ngene hanji mu luuala, maji ngala ni jiphange mu kilunga a tena ku ngi kuatekesa kudivua kiambote. O kia beta-o-kota, ngala ni Tat’etu mu diulu, ngene mu zuela nê izuua ioso. Kiki kikuatekesu kia dikota.”

Kuala dingi kikuatekesu kia mukuá kia beta-o-kota. O Bibidia i tu tangela kuila, o ixi ia-nda kala palaízu. Kuenhoko, kana muthu ua-nda kala ni uôma ua kima. O Bibidia iambe: “A k’èla kiá, muthu u xikama bhoxi dia muvidi uê, muthu u xikama bhoxi dia mufiku uê, o u a kuatesa uôma ka moneka.” (Mikeia 4:4) Mu palaízu kana muthu ua-nda tu kuatesa uôma mba ku tu kuama. Katé muene ni ibanzelu ia iibha ia ima ia bhiti m’ukulu, ‘ki ia-nda kuiza dingi mu kilunji.’ (Izaia 65:17, 25) Nzambi ni Mon’ê, Jezú Kristu a-nda bheka o “kutululuka.” Kienhiki o ‘kuiuka ni kunhoha ni kukondama’ kua-nda kala-ku mu thembu joso.​—Izaia 32:17.