Se eie ua mu di longa o Bibidia ni Mbangi ia Jihova, uene mu di iudika ande dia kudilonga. O mbote ia dikota ijila mu kubhanga ué kiki, ande dia kuia mu kiônge. Tu di tunda dingi kiambote, kioso ki tuala ni ukexilu uambote ua kudilonga.

Ijiia kizuua kuxi ni kuebhi ku ua tokala kudilonga. Ola iebhi i u tena kudilonga dingi kiambote? ku dimatekenu dia kizuua, ande dia kumateka kukalakala, inga kioso o an’a kiaia mu zeka? Se kutena kudilonga mu kithangana kiavulu, ijiia thembu kuxi ki u tena kudilonga mu mbandu ni mbandu, kana kuehela kima ki kufidisa. Sota kididi kia tokala, ni kukatula o ima ioso i ku landukisa, mu ku jika o mutelembe, mutelembe ua izunzumbia, ni mutelembe ua kafuetele. Mu kusamba ande dia kumateka o kudilonga, kua-nda kukuatekesa kuzubha o jihanji, phala ni u tene ku xinganeka kiambote mu Mak’a Nzambi.—Filipe 4:6, 7.

Xinda o itambuijilu, ni ku di iudika phala kubhana itambuijilu mu kilunga. Mateka mu kuijiia o milongi ioso. Xinganeka mu diambu dia milongi mba kibatulu, tala kiebhi kala diambu diofele dia sokela ni diambu dia milongi. Tonginina o jifoto joso ni ibhuidisu ia kubhitulula ilondekesa o milongi ia tokala. Mu kiki, tanga ni kusota o kitambuijilu kia kibhuidisu kia tokala. Xinganeka ni kutanga o ibatulu io lomboluele, ni kuxinganeka kiebhi iene ia lungu ni milongi. (Ikalakalu 17:11) Kioso ki ua-nda sanga o kitambuijilu kia kibhuidisu, u ki xinda, mba u zuela ngó ia tokala, ia-nda kukuatekesa kulembalala o kitambuijilu mu kiônge. Mu kiônge, eie u tena kuzangula o lukuaku luê, se ua mesena ku bhana kitambuijilu mu kithangana kiofele mu izuelu iê.

Kudilonga o milongi ki i difu kala semana mu iônge, eie ua-nda bandekesa o kuijiia kuê kua lungu ni Bibidia.—Matesu 13:51, 52.

• Kithangana kiebhi ki ueji katula mbote mu ku di iudika phala o iônge?

• Kiebhi ki u tena ku di iudika phala kubhana kitambuijilu mu kiônge, mu izuelu iê?