DISÁ 55
Kwatekesa o Kilunga Kyé
Ku mundu woso, mazunda a athu amusidivila Jihova mu jimidi ja ilunga. O athu yá, abhana valolo yavulu mu itendelesu yene mutambula, amesena we kukwatekesa o kilunga. O kwila kyene we ki udivwa ya lungu ni kilunga kyé?
1. Kyebhi ki utena kungastala o kithangana ni nguzu yé phala kukwatekesa o kilunga?
Etwenyoso tutena kukwatekesa o kilunga. Mukifika, o kwila utena kwambata o jiphange akuka kya ni yó akate phala kuya muyônge? Mba nange utena ku akwatekesa ni ima yamukwa kala, kusumba ima mba kuzelesa o dibhata dyâ. (Tanga Tiyaku 1:27.) Etu we tutena kudibhakula phala kukwatekesa mu kuyudika ni kuzelesa o Kididi kya Ubhezelu. Seku muthu amujijidika kubhanga o ima yiyi. O henda yetu kwa Nzambi ni ku jiphange jetu yene itubhangesa ‘kudibhakula mu vondadi yetu.’—Jisálamu 110:3.
O Jimbangi ja Jihova a abatizala atena kukwatekesa dingi o kilunga mu maukexilu amukwa. Mu kifika, o jiphange jamayala atena kubhanga nguzu phala kusidivila kala akwatekexi atufunga mba tufunga. Kikale o jiphange jamala mba ja ahatu, atena kukwatekesa o kikalakalu kya kuboka, mukukala aboki a ithangana ni ithangana mba aboki athembu yoso. Sayi Jimbangi ja Jihova atena kukwatekesa mu kikalakalu kya kutunga ididi phala kubheza Jihova. Amukwa aya mu ilunga mwabhindamena kikwatekesu.
2. Kyebhi kikutena kukwatekesa o kilunga ni ima itwala nayu?
Tutena kujingisa ‘Jihova ni ima yoso i twala nayu.’ (Jisabhu 3:9) Phala etu ujitu kusangela kitadi phala kukwatekesa o kilunga ni kikalakalu kya kuboka ku mundu woso. (Tanga 2 Kolindu 9:7.) O kitadi kitusangela ene mukwatekesa nakyu we o jiphange abhita mu mavuwa. Avulu ‘a katula kakitadi’ phala kusangela semana joso mba mbeji joso. (Tanga 1 Kolindu 16:2.) Tutena kusangela bhukaxi ka jikaxa mu Kididi kya Ubhezelu mba mu sayite donate.isa4310.com. O ukexilu utukalakala ni ima itwala nayu, kutubhana kithangana kya kulondekesa o henda yetu kwa Jihova.
DILONGE DINGI
Tala maukexilu akukwatekesa o kilunga.
3. Kwatekesa o kilunga ni jimbote jé
Jihova ni Jezú azolo yó abhana ni muxima woso. Mu kifika, Jezú watonginina o mutudi wexile ngadyama, wabhange nguzu phala kusangela kitadi. Tanga Luka 21:1-4, mukusuluka bhanga o ibhwidisu ya kayela:
-
O kwila twabhingi kusangela kitadi kyavulu phala kusangulukisa Jihova?
-
Kyebhi Jihova ni Jezú kyadivwa kyoso kitusangela kakitadi ni muxima woso?
Phala kwijiya kyebhi kyene mukalakala ni kitadi kitwene musangela, tala OVIDYU. Mukusuluka bhanga o kibhwidisu kya kayela.
-
HKyebhi kyene mu kalakala ni kitadi kitusangela phala kukwatekesa o ilunga ku mundu woso?
4. Tutena kudibhakula phala kukwatekesa
O Jiselevende ja Jihova mu ukulu awabhelele kyavulu kulanga o ididi yâ ya ubhezelu. Maji phala kubhanga kiki, kikubhingile ngó kitadi. Tanga 2 Malunda 34:9-11, mukusuluka bhanga o kibhwidisu kya kayela:
-
Kyebhi akwa Izalayele kyexile mukwatekesa kulanga o tembulu?
Phala kumona kyebhi o Jimbangi ja Jihova kyene mukayela o phangu yiyi yokulu, tala OVIDYU. Mukusuluka bhanga o ibhwidisu ya kayela.
-
Mukonda dyahi kima kyambote kulanga ni kuzelesa o Kididi kya Ubhezelu?
-
Kyebhi ki utena kukwatekesa?
5. O jiphange jamala atena kubhanga nguzu phala kutambula dingi ikalakalu
O Bibidya iswinisa o mayala Jikidistá kubhanga nguzu phala kukwatekesa o kilunga. Phala kumona phangu imoxi, tala OVIDYU. Mukusuluka phanga o kibhwidisu kya kayela.
-
Mu vidyu, ihi yabhange manu Ryani phala kukwatekesa dingi o kilunga?
O Bibidya izwela o idifwa yabhingi kukala nayu o jiphange jamala phala kusidivila kala mukwatekexi wa tufunga mba kafunga. Tanga 1 Timote 3:1-13, mukusuluka bhanga o ibhwidisu ya kayela:
-
Idifwa yebhi yabhingi kukala nayu o jiphange jamala amesena kusidivila kala mukwatekexi wa tufunga mba kafunga?
-
Idifwa yebhi yatokala kukala nayu o miji yâ?—Tala o jivelusu 4 ni 11.
-
Kyoso o jiphange kyabhanga nguzu phala kukala ni idifwa yiyi, mbote yahi ikatula o jiphange joso mu kilunga?
NANGE SAYI MUTHU WIBHULA: “Kwebhi kwene mutunda o kitadi phala o ikalakalu ya Jimbangi ja Jihova?”
-
Kyebhi kiweji tambwijila?
IHI IWADILONGO
Jihova ubhana valolo yavulu mu nguzu itubhanga phala kukwatekesa o kilunga ni kithangana kyetu, nguzu ni ima itwala nayu.
Kubhitulula
-
Kyebhi kitutena kukalakala ni kithangana ni nguzu yetu phala kukwatekesa o kilunga?
-
Kyebhi kitutena kukwatekesa o kilunga ni jimbote jitwala naju?
-
Kyebhi kiwamesena kukwatekesa o kilunga?
TOKWESA DINGI
Tala se mukonda dyahi Nzambi kajijidika kubhana dijimu.
“Ihi Yamba o Bibidya ya Lungu ni Dijimu?” (Milongi ya jw.org)
O Bibidya yamba kwila sayi ikalakalu mu kilunga, o jiphange ja mala a abatizala kya ene atokala ku ibhanga. Maji ihi ibhita se mukonda dya ibhindamu, o phange ya muhatu amubatizala kya wabhingi ku ibhanga?
Sota Kutendela o Ungana Wala Nawu o Tufunga Mukilunga (O Mulangidi, wa Kawana wa 2021)
Ijiya o Jimbangi ja Jihova ni kuswina kwoso abhange nguzu phala kwambata madivulu ku jiphange jâ.
Kuuanena o Madivulu Katé ku Maxokololo ia Ixi ia Congo (4:25)
Tala kyebhi o ukexilu wakufuta o ikalakalu yetu ki udifu ni ukexilu wa jingeleja jamukwa.
Eye Nange Wandawabhela we o Maka Yá
IBHUIDISU IENE MU BHANGA DINGI O ATHU
Kyebhi o Jimbangi ja Jihova Kyene Mulonga o Bibidya?
Ni ukexilu ubhe yú wakulonga o Bibidya wa Jimbangi ja Jihova, eye utena we kutanga o jivelesu mu Bibidya yoso yoso iwamesena. Divwa kyambote phala kwixana muthu kumwiji wé mba kamba dyé kudibunda neye mukudilonga o Bibidya.
